Sipas revistës shkencore Nature, shkencëtarët kanë përdorur për herë të parë teknikën e korrigjimit të gjeneve për të parandaluar një sëmundje të trashëguar të zemrës në fazën më të hershme të zhvillimit të embrionit të njeriut.

Ky studim shënon një hap të rëndësishëm drejt trajtimit të sëmundjeve gjenetike dhe mund të ndihmojë në zvogëlimin e rasteve të tilla te fëmijët e krijuar përmes procedurës së Fertilizimit In Vitro (IVF).

Teknika u përdor për të korrigjuar një mutacion gjenetik që shkakton kardiomiopatinë hipertrofike (HCM) – një sëmundje që shpesh çon në vdekje të papritur, sidomos te atletët e rinj.

HCM ndikon rreth një në 500 persona dhe individët që mbartin një kopje të dëmtuar të gjenit kanë 50% mundësi që ta transmetojnë këtë mutacion te pasardhësit e tyre.

Studimi ishte rezultat i një bashkëpunimi mes Institutit “Salk” në Kaliforni, Universitetit “Oregon Health and Science” dhe Institutit për Shkencat Bazë në Korenë e Jugut.

Shkencëtarët krijuan qeliza burimore nga një biopsi lëkure e një personi të prekur nga HCM, që u modifikuan duke përdorur teknologjinë CRISPR, metodë që lejon ndërhyrje të sakta në ADN njerëzore.

Përmes IVF-së, fertilizuan vezë të shëndetshme me spermatozoidet e një dhuruesi që mbante mutacionin HCM, dhe injektuan komponentët e nevojshëm gjenetikë për të korrigjuar defektin.

Embrionet u lejuan të zhvillohen për disa ditë, por nuk ishin të destinuara për implantim, ky përparim hap rrugën drejt trajtimit të mijëra sëmundjeve të shkaktuara nga mutacione në një gjen të vetëm.

Megjithatë, studiuesit theksojnë se nevojitet kujdes i madh për të shmangur rreziqet e futjes së mutacioneve të padëshiruara, sidomos në qelizat që më vonë mund të bëhen spermë apo vezë.

“Studimi është zhvilluar në përputhje të plotë me udhëzimet etike për redaktimin e gjenomit të njeriut, të përcaktuara nga Akademitë Kombëtare të Shkencave, Inxhinierisë dhe Mjekësisë,” u shpreh profesori Juan Carlos Izpisua Belmonte nga Instituti “Salk”. /A.Z/UBT News/

Në vitin 1967, katër vjet pas vrasjes së Presidentit John F. Kennedy, Jacqueline Kennedy, tashmë një nga gratë më të famshme dhe më të admirueshme në botë, udhëtoi drejt Kamboxhias — një udhëtim i rrallë dhe simbolik në një kohë kur rajoni po tronditej nga lufta në Vietnam.

Në Phnom Penh, ajo u prit me nderime të larta dhe u vendos në Hotel Le Royal, një ndërtesë historike e ndërtuar në vitin 1929 dhe e inauguruar nga mbreti Sisowath Monivong.

Për nder të ish-Zonjës së Parë, barmeni i hotelit krijoi një koktej të veçantë që do të hynte në legjendë — “Femme Fatale”.

I përbërë nga konjak, shampanjë dhe krem luleshtrydheje, i dekoruar me lule delikate, ky koktej elegant u bë shenjë dalluese e finesës dhe misterit që karakterizonte gjithmonë Jacqueline Kennedy.

Pas luftës civile që përfshiu Kamboxhian, shumë prej objekteve të vlefshme të hotelit u ruajtën nëpër depo. Gjatë restaurimit të pronës në vitin 1996, kur hoteli u ble nga grupi Raffles, një punëtor thuhet se gjeti gotën origjinale nga e cila Jackie kishte pirë koktejin, ende me gjurmët e buzëkuqit. Sot, ajo ruhet me krenari në një vitrinë në Elephant Bar, përkrah fotografive të vizitës së saj historike.

Brenda hotelit ndodhet edhe suita “Kennedy”, e zbukuruar me portretin e ish-Zonjës së Parë mbi shtretërit me çarçafë të bardhë dhe dysheme elegante me pllaka guri. Në korridor ekspozohet një kopje e revistës Life, e blerë nga Raffles në eBay, e hapur në faqet që dokumentojnë udhëtimin e saj në Kamboxhia.

Sipas ekspertes Elizabeth J. Natalle, autore e librit “Jacqueline Kennedy and the Architecture of First Lady Diplomacy”, kjo periudhë ishte një “kohë kalimtare” për Jackie, mes dhimbjes së thellë që la pas atentati ndaj të shoqit dhe kërkimit të një jete të re.

Gjatë vizitës, shoqërohej nga diplomati David Ormsby-Gore, një mik i afërt i familjes Kennedy, me të cilin kishte lidhje, megjithëse jo zyrtare. Edhe pse udhëtimi u zhvillua në kulmin e tensioneve mes Shteteve të Bashkuara dhe Kamboxhias, Jacqueline këmbënguli se qëllimi i saj ishte krejtësisht kulturor – një vizitë në Angkor Wat, një nga monumentet më të lashta dhe madhështore të Azisë.

E pasionuar pas artit dhe historisë, ajo përdori diplomacinë kulturore si mjet për të ndërtuar ura respekti, pa fjalime politike e pa bujë.

Sot, pas dekadash ndryshimesh e trazirash, Raffles Hotel Le Royal mbetet një simbol i elegancës dhe qëndrueshmërisë në zemër të Phnom Penhit. Ai ka pritur personalitete të shumta, nga Charles de Gaulle dhe Angelina Jolie, deri te Presidenti Barack Obama.

Por për shumë vizitorë, jehona e Jacqueline Kennedy dhe gota e saj me gjurmën e buzëkuqit mbeten kujtimi më romantik dhe më i paharruar i historisë së këtij hoteli legjendar. /A.Z/UBT News/