Inspektorati Policor i Kosovës ka njoftuar se sipas hetimeve të para, aksidenti tragjik që ndodhi në rrugën rajonale Mitrovicë – Pejë, në fshatin Çubrel, ku humbën jetën tre persona ka ndodhur si pasojë e mospërshtatjes së shpejtësisë së vozitjes me kushtet e rrugës nga drejtuesi i automjetit zyrtar të policisë.

Ky automjet, sipas informacioneve, ka kaluar në shiritin e kundërt dhe ka goditur një veturë civile.

Në lidhje me këtë ngjarje, Inspektorati Policor ka njoftuar se ka rekomanduar suspendimin e policit që ka drejtuar automjetin në momentin e aksidentit.

“Si pjesë e procedurave administrative dhe për të siguruar zhvillimin e hetimeve, IPK-ja ka propozuar pezullimin e zyrtarit policor që ishte në timon gjatë aksidentit, ndërkohë që hetimet lidhur me rastin janë duke vazhduar në koordinim me prokurorin kompetent,” thuhet në njoftimin e IPK-së.

Në Gjykatën Themelore në Prishtinë sot pritej të mbahej shqyrtimit fillestar ndaj Naim Murselit, Granit Plavës, Kushtrim Kokallës dhe Tom Dodajt, të cilët akuzohen për rastin e vrasjes së Liridona Ademajt më 29 nëntor 2023. Ndërsa, me vendim të kryetares së trupit gjykues, Fatime Dermaku, seanca u shty për 31 janar 2025, me fillim nga ora 11:00.

Deri te shtyrja e seancës së shqyrtimit fillestar kur të akuzuarit pritej të deklaroheshin rreth fajësisë, erdhi pasi që avokati i Kushtrim Kokallës, Ndrec Dodaj dhe ai i Tom Dodajt, Agron Kuçi, nuk ishin pajisur me shkresa të lëndës.

Të akuzuarit në gjykatore u sollën nën masa të rrepta të sigurisë.

Përveç të akuzuarve dhe mbrojtësve të tyre, në sallën e gjyqit ishin të pranishëm edhe familjarët e të ndjerës, Liridona Ademajt.

Prokurorja e rastit, Javorka Perlinçeviq tha se të gjitha palët janë pajisur me shkresat e lëndë, përveç avokatit, Agron Kuçi mbrojtës i Tom Dodajt.

Sipas saj, avokati Kuçi nuk ka pas qasje në email.

“Të gjithë mbrojtësve të të akuzuarve u kemi dërguar shkresat e lëndës, vetëm një problem ka qenë me avokatin, Agron Kuçi të cilit disa herë ia kemi dërguar shkresat e lëndës me email, mirëpo na është lajmëruar se emaili i tij është i mbushur. Jemi dëgjuar nëpërmjet telefonit dhe i kemi thënë se i kemi dërguar shkresat dhe para seancës na ka lajmëruar se nuk ka mund ta hap emailin. Mirëpo, kopjen e aktakuzës ia kemi dorëzuar në formë fizike. Dhe sa i përket të pandehurve të tjerë të gjithë i kanë pranuar shkesat e lëndës”, tha ajo.

Ndërsa, avokati i të akuzuarit, Kushtrim Kokallës, Ndrec Dodaj tha se sot nuk janë plotësuar kushtet për t’u mbajtur kjo seancës, pasi sot 10 minuta para se të nis seanca e sotme është pajisur me shkresat e lëndës.

“Gjyqtare, unë sot i ka pranuar shkresat e lëndës 10 minuta para se të hyjë në sallë, është fakt se më datën 22 apo 23 më ka thirr dikush prej Prokurorisë unë kam qenë në gjykim dhe nuk kam pas mundësi me ardhur deri në Prokurori, një koleg i imi Skënder Gojani më duket i ka marrë dhe mi ka dorëzuar sot, unë nuk e di përmbajtën e atyre CD se çka ka dhe në këtë situatë çfare jemi nuk kam arritur me lexua as aktakuzën. Në këtë situatë çfare jemi nuk mund ta kryej obligimin tim ndaj klient…As nuk jam në gjendje me këshillua klientin tim qysh me u deklaruar as nuk jam në gjendje as vetë me deklaruar pa e ditur gjendjen e provave”, thotë Dodaj.

Më pas prokurorja e rastit, Javorka Perlinçeviq tha se avokati i Granit Plavës, Skënder Gojani i ka marrë shkresat e lëndës edhe për avokatin, Ndrec Dodaj.

Ajo tha se për këtë prokuroria ka dëshmi, dhe nuk e dinë marrëveshjen në mes të dy avokatëve.

“Normal që është ftuar ka thënë se është në seancë, pas kësaj më 22 janar 2025 në ora 11:35 avokati Skënder Gojani e ka marrë lëndën me pajtimin e Ndrec Dodaj për të gjithë lëndën gjë që vërteton edhe kjo shkesë e prokurorisë. Çfarë ka qenë marrëveshja avokatit Ndrec Dodaj dhe Skëndert Gojani këtë nuk e di”, tha ai.

Se shkresat e lëndës i ka marrë avokati i Plavës, Skënder Gojani e pranoi edhe vetë ai.

Edhe avokati i Tom Dodajt, Agron Kuçi tha se për shkak të telasheve me emailin e tij, sot është pajisur me aktakuzën.

“Është e vërtet që unë kam pas probleme dhe vazhdoj me pas probleme me email, sot e kam marrë aktakuzën shkresa tjera të lëndës, CD apo ndonjë gjë tjetër nuk kam. Ndonëse i mbrojturi im gjatë gjithë procedurave penale ka bashkëpunuar dhe ka pranuar fajësinë, mirëpo sot si mbrojtje nuk mund të deklarohem për pranimin e fajësisë“, theksoi ai.

Kryetarja e trupit gjykues, Fatime Dërmaku u shpreh se shtyrja e seancës së sotme të shqyrtimit fillestar për vrasjen e Liridona Ademajt nuk do të ndodh më.

Ajo tha se kjo sjellje e mbrojtëse të të akuzuarve, Kokalla dhe Dodajt tregon seriozitetin e tyre.

“KKGJ ia tërheq vërejtjen mbrojtësit të të pandehurit Kushtrim Kokallës avokatit, Ndrec Dodaj që të mos ta pengoj kryetaren e trupit gjykues të udhëheqë seancën konform dispozitave ligjore është vërejtje me shkrim. Ju e dini që kemi 15 ditë afat për të mbajtur shqyrtimin fillestar të pandehurit janë në paraburgim ne nuk mund t’i shkelim dispozitat ne jemi gardian të mbrojtjes së të drejtave të të pandehurve në proces penal…..është kërkuar një eksternal disk që duhet ta sjellni ju për t’ua bart të gjitha provat me u vendos të gjitha ndërhyrjet për hir të korrektësisë, nuk ka ndërprerje, nuk keni shkua me i marr me kohë… neve nuk mund të vazhdojmë me këtë shqyrtim fillestar meqenëse kemi pengesa dëmtohet mbrojtja e të pandehurve meqenëse avokatët, Ndrec Dodaj dhe Agron Kuçi.. Nuk është krejt pak me qenë mbrojtës jemi pjesë e sistemit dhe me thënë nuk punon email ju e dini që mbrojtja e të pandehurve për veprën penale që akuzohet i mbrojturi juaj parashihet një dënim mjaftë i lartë…. e mos të flasim për avokatin Dodaj që përfaqëson Kushtrim Kokallën për çfarë dënimi parashihet kjo tregon vetëm seriozitetin e juaj për mbrojtje”, theksoi ajo.

Të pajtimit që të vazhdohet me shqyrtimin fillestar ishin mbrojtja e Naim Murselit dhe Granit Plavës, ndonëse deklaruan se disa CD nuk janë hapur.

Për prishje të rendit dhe qetësisë, kryetarja e trupit gjykues, Fatime Dërmaku e dënoi me 500 euro gjobë avokati, Ndrec Dodaj.

Gjyqtarja Dërmaku kërkoi falje edhe për mediat të cilat nuk arritën të jenë të pranishme në sallë, ndonëse interesimi i tyre ishte i madh.

Sipas tij, për shkak të hapësirës së sallës në gjykatë nuk kanë arritur të gjitha mediat të jenë të pranishme.

Prokuroria Themelore në Prishtinë më 15 janar 2025 ka ngritur aktakuzë ndaj Naim Murselit, Granit Plavës, Kushtrim Kokallës dhe Tom Dodajt. Të akuzuarit ngarkohen për vrasjen e Liridona Ademajt më 29 nëntor 2023.

Sipas aktakuzës Murseli, Plava dhe Kokalla ishin dakorduar që vrasja të kryhej nga i akuzuari Granit Plava me marrëveshje që bashkëshorti i Liridona Ademaj, Naim Murseli t’ia paguante atij 30 mijë euro.

Agjencia për Informim dhe Privatësi ka lansuar platformën për identifikimin e rrjedhjes së të dhënave personale. Në Ditën Ndërkombëtare për Mbrojtjen e të Dhënave Personale, u tha se kjo platformë siguron që institucionet të jenë më të përgatitura për të siguruar të dhënat personale, rrjedhjen e tyre dhe mbrojtje nga sulmet e mundshme kibernetike.

Komisionerja e Agjencisë për Informim dhe Privatësi, Krenare Sogojeva, tha se ky projekt paraqet avancim shtesë për zbatimin e ligjit dhe forcimin e mekanizmave për kontrolle shtesë.

“Platforma që do të prezantojmë e mbështetur nga ambasada amerikane në Kosovë paraqet një avancim shtesë në angazhimin tonë për të garantuar zbatimin efektiv të Ligjit për mbrojtjen e të dhënave personale. Po ashtu edhe forcimin e mekanizmave të kontrollit të cilat kanë për qëllim sigurimin e monitorimit të publikimit të paautorizuar të të dhënave personale të qytetarëve tanë. Me gjithë përpjekjet angazhimin dhe përkushtimin tonë të përbashkët, nevojat për forcimin dhe avancimin për mbrojtjen e të dhënave personale në Kosovë vazhdon të mbetet prioritet i joni. Sigurimi i zbatimit të ligjit dhe ndërgjegjësimi i kontrolluesit publik dhe privat për veprimet që duhet t’i marrin në raport me mbrojtjen e të dhënave personale”, tha ajo.

Lansimi i kësaj platforme është bërë në mbështetje me Ambasadën e ShBA-së në Kosovë.

Zëvendësshefi i Misionit në ambasadën e ShBA-së, Ralan Hill, tha se ky projekt do t’i ndihmojë institucionet e Kosovës të ndërtojnë qëndrueshmëri edhe të sigurisë kibernetike.

Sipas tij, platforma zbulon shkeljet e të dhënave dhe mbledh informacione për kërcënime kibernetike, duke iu mundësuar agjencive të identifikojnë shpejt shkeljet ose rrjedhjet e saj.

“Shtetet e Bashkuara kanë mbështetur këtë projekt përmes Byrosë Ndërkombëtare të Narkotikëve dhe Çështjeve të Zbatimit të Ligjit të Departamentit të Shtetit, me qëllim që t’i ndihmojnë institucionet e Kosovës të ndërtojnë qëndrueshmëri të sigurisë kibernetike. Kjo platformë zbulon shkeljet e të dhënave dhe mbledh informacione për kërcënimet kibernetike, duke u mundësuar agjencive të identifikojnë shpejt shkeljet ose rrjedhjet. Ai gjithashtu mund të ofrojë informacion mbi akterët keqdashës dhe vektorët e sulmit, duke përmirësuar reagimin e Kosovës ndaj këtyre krimeve kibernetike. Përmes pjesëmarrjes në këtë program, Kosova po mbron më mirë të dhënat dhe po lufton krimin kibernetik. Ne jemi partneri juaj në këtë përpjekje. Në botën tonë të ndërlidhur, krimet kibernetike nuk respektojnë kufijtë, andaj edhe ne duhet bërë përpjekje për të luftuar”, theksoi ai.

Lansimin e kësaj platforme e mirëpriti edhe zëvendës ambasadori i Kroacisë në Kosovë, Nedjelko Spilek.

Peter Sorensen ka marrë pëlqimin përfundimtar nga ministrat e Jashtëm të Bashkimit Evropian për postin e përfaqësuesit të posaçëm të bllokut për dialogun për normalizim të raporteve mes Kosovës dhe Serbisë.

Paraprakisht, më 24 janar ambasadorët e BE-së kishin konfirmuar Sorensenin në këtë post.

Politikani nga Danimarka u zgjodh nga përfaqësuesja e lartë e BE-së për politikë të jashtme dhe siguri, Kaja Kallas, për ta zëvendësuar Mirosllav Lajçakun në këtë post.

Pasi ka marrë pëlqimin nga ambasadorët dhe kryediplomatët, Sorensen do të nisë mandatin më 1 shkurt.

Emisarit aktual, Lajçak, i skadon mandati më 31 janar.

Para nisjes së takimit në Bruksel të kryediplomatëve, ku Sorensen u konfirmua, ministrja e Jashtme e Sllovenisë, Tanja Fajon, tha se me zgjedhjen si emisar të diplomatit nga Danimarka, po dërgohet mesazhi se dialogu mes Kosovës dhe Serbisë mbetet lart në agjendën e bllokut evropian.

Kush është Sorensen?

Sorensen ka përvojë të gjatë diplomatike në strukturat e BE-së. Ai aktualisht është Këshilltar i lartë në Shërbimin e Veprimit të jashtëm të BE-së (EEAS) për diplomaci digjitale.

Gjatë karrierës së tij diplomatike në BE, Sorensen ka ushtruar disa detyra në Ballkanin Perëndimor. Ka shërbyer si përfaqësues i posaçëm i BE-së për Bosnje e Hercegovinë dhe shef i zyrës së BE-së në Sarajevë. Po ashtu ka qenë edhe shef i delegacionit të bllokut evropian në Shkup.

Më herët, Sorensen ka punuar si këshilltar edhe në Kosovë në misionin e Kombeve të Bashkuara në Kosovë (UNMIK), ndërsa ka qenë edhe përfaqësues i posaçëm i përfaqësuesit të lartë të BE-së në Serbi.

Në Ballkan, ai ka punuar edhe në misionin e Organizatës për Siguri dhe Bashkëpunim në Evropë (OSBE) në Kroaci.

Përvoja e tij nga rajoni thuhet se ka qenë edhe një prej argumenteve se pse Kaja Kallas ka vendosur që ai të jetë pasardhësi i Lajçakut.

Për postin e lehtësuesit të dialogut garoi edhe emri i ish-ministri i Jashtëm i Finlandës, Pekka Haavisto, i cili po ashtu ka njohuri për zhvillimet në Ballkanin Perëndimor.

Për këto rol, ishte përmendur edhe emri i ish-presidentit dhe ish-kryeministrit të Sllovenisë, Borut Pahor. Vitin e kaluar, ai pranoi se ishte i interesuar për këtë post. Por, gjatë janarit të këtij viti tha se nuk do të garonte për këtë post, pasi ka kuptuar se kërkohet më shumë një nivel diplomatik sesa politik.

Ndryshe, gjatë mandatit gati pesëvjeçar të Lajçakut, Kosova dhe Serbia kanë arritur Marrëveshjen në rrugën drejt normalizimit të raporteve.

Marrëveshja, e cila nuk është nënshkruar, është ligjërisht e obligueshme për palët ka thënë blloku. BE-ja ka akuzuar Kosovën dhe Serbinë për mosnisjen e zbatimit të paktit, duke thënë se kjo do të ndikojë në rrugëtimin e dy shteteve drejt integrimeve evropiane.

Dialogu për normalizimin e raporteve ndërmjet Kosovës dhe Serbisë, që ndërmjetësohet nga Bashkimi Evropian, ka nisur më 2011. Gjatë procesit janë arritur disa marrëveshje, por pak prej tyre janë zbatuar në terren./REL/