Lajmet

Kush e fitoi garën parazgjedhore të Kosovës në rrjetet sociale?

Published

5 years ago

on

Prishtinë, 17 maj – Përdorimi i rrjeteve sociale, e sidomos i Facebook-ut si rrjeti më i popullarizuar në Kosovë, është̈ bërë një domosdoshmëri për politikanët, të cilët janë goxha të varur nga kjo formë e komunikimit, për të qenë më afër me qytetarët dhe sa më të pranishëm në jetën publike. Veçanërisht, ky komunikim virtual, merr intensitet të shtuar në kohën e fushatave zgjedhore politike. Të gjitha rrjetet sociale ‘vlojnë’ nga postimet e shumta politike. Kosova mbajti zgjedhjet e fundit parlamentare me 14 shkurt 2021. Ky hulumtim është koncentruar vetëm në rrjetin social Facebook dhe sjellë të dhëna interesante sa i përket formës së përdorimit të këtij rrjeti nga politikanët shqiptarë të Kosovës dhe ndërveprimit të tyre me opinionin publik.

Të gjithë në rrjetet sociale! Të gjithë kanë për të thënë diçka. Shumë nga ata që postojnë, edhe mund të mendojë se po ‘flasin’ me një numër të madh të qytetarëve, të paktën me të gjithë ata që janë përcjellës (followers) të tyre. E vërteta është më ndryshe. Facebook, ka disa limite që ndalojnë shfaqjen e një postimi tek të gjithë ndjekësit. Por, po ashtu, jep edhe mundësinë që të përçohet mesazhi edhe përtej numrit të ndjekësve. Kjo bëhet nëpërmes pagesës (sponsorizimeve), dhe postimi shfaqet te më shumë përdorues të rrjetit e madje edhe te kategori të përzgjedhura. Pos kësaj, për politikanët, në shumë raste Facebook është shndërruar në ‘foltoren e konferencave mediatike’, pasi adresimet që ata bëjnë, merren direkt nga mediat, duke u krijuar politikanëve dy favore njëkohësisht: E para, ua mundësojnë shfaqjen më të gjerë publike, dhe e dyta, transmetohet vetëm ajo që politikani ka shkruar, pa pasur asnjë mundësi që ai të pyetet nga gazetarët për çështje të ndryshme.

Si rrjedhojë, përdorimi më i shpeshtë i Facebook-ut nga politikanë është i shpeshtë dhe dinamik. Por më shumë kjo formë komunikimi, vjen në shprehje gjatë kohës së fushatës elektorale dhe manifestimeve të tjera politike. Gjithsesi edhe në kohën kur s’ka fushatë parazgjedhore, komunikimi i këtij lloji, është goxha popullor.

Zgjedhjet e fundit parlamentare në Kosovë patën dhjetë ditë fushatë. Nga data 2 deri më 12 shkurt, u konsideruan ditët legale të saj. Ndryshe, edhe parafushata ishte intensive. Por, hulumtimi i këtij shkrimi, është përqendruar vetëm në këto dhjetë ditë, për të parë, matur e testuar, se cili mund të ketë qenë efekti i komunikimit publik virtual, mes politikanëve, partive politike në njërën anë dhe qytetarëve në anën tjetër.

Sa për të kujtuar, rezultati përfundimtar, i dhënë nga Komisioni Qendror i Zgjedhjeve (KQZ), për zgjedhjet e jashtëzakonshme parlamentare doli të jetë: 48% e trupës votuese morën pjesë në zgjedhje, apo mbi 840 mijë persona nga rreth 1 milion e 800 mijë qytetarë me të drejtë vote.

Fitues i këtyre zgjedhjeve u shpall koalicioni Lëvizja Vetëvendosje dhe lista e krijuar nga Vjosa Osmani – Sadriu me 50.28% të votave, të cilat iu përkthyen me 58 deputetë. E dyta doli Partia Demokratike e Kosovës (PDK) me 17.09% me 19 ulëse të deputetëve. Lidhja Demokratike e Kosovës (LDK) me 12.73% u rendit partia e tretë me 15 deputetë. Aleanca për Ardhmërinë e Kosovës (AAK) fitoi 7.12% – 8 deputetë. Pjesën tjetër të parlamentarëve në Kuvendin e Republikës së Kosovës, që janë gjithsej 120, e plotësojnë subjektet politike minoritare.

Kandidatët për kryeministër – shfaqja në Facebook

Gjatë këtyre zgjedhjeve kandidatët për kryeministër nga partitë politike, kanë përdorur profilet e tyre në Facebook, për të paraqitur programet dhe për të promovuar takimet me qytetarë, të cilat kësaj radhe kanë qenë edhe të kufizuara për shkak të masave kundër pandemisë COVID-19.

Nga data 2 deri me 12 shkurt, përkatësisht gjatë kohës së fushatës zgjedhore, kandidatët për kryeministër kanë përdorur në nivele të ndryshme profilet e tyre në rrjetin social Facebook.

Kandidati për kryeministër nga radhët e koalicionit LVV-Lista, Albin Kurti në këtë periudhë ka pasur gjithsej 24 postime. Njëkohësisht, është interesant se Kurti, fitues dominant i këtyre zgjedhjeve, ka qenë përdoruesi më i vakët i Facebook. Nga këto 24 postime, ai ka shpërndarë foto e video, por nuk ka shkruar ndonjë status të pashoqëruar me foto apo video. Secili nga postimet e tij, është përcjellë me një vistër pëlqimesh (like), shpërndarje e komente. Nga hulumtimi, del se Kurti nuk ka shpenzuar mjete financiare në këtë rrjet, pasi nuk ka sponsorizuar asnjë nga publikimet që ka bërë. Në llogarinë personale në Facebook, Kurti sot ka 491,442 ndjekës (followers) dhe është personaliteti politik më popullor në vend.

Fotoja me më së shumti pëlqime, është ajo e publikuar më 8 shkurt 2021, e cila ka marrë mbi 26 mijë sosh. E njëjta kishte 962 komente dhe 683 shpërndarje.

Videoja e publikuar më 11 shkurt ka marrë mbi 25 mijë pëlqime, një tjetër e publikuar më 12 shkurt ka marrë mbi 11 mijë komente, e cila po ashtu ka qenë 1 mijë e 900 herë e shpërndarë.

Kandidatja për presidente nga koalicioni LVV-Lista, Vjosa Osmani – Sadriu, gjatë 10 ditë të fushatës ka bërë gjithsej 61 postime.

Një nga fotot e publikuar më 4 shkurt ka thyer rekordin sa i përket fotove të Osmani – Sadriut. Ajo ka marrë mbi 30 mijë pëlqime e mbi 1 mijë e 800 komente. Ndërsa videoja e publikuar nga Osmani, e datës 12 shkurt ka marrë mbi 35 mijë pëlqime dhe mbi 6 mijë e 700 komente. Llogaria e Vjosa Osmanit në Facebook përcillet nga 347,488 profile të regjistruara në këtë rrjet social.

Numër edhe më të madh të postimeve se Kurti e Osmani në Facebook, ka bërë kandidati për kryeministër nga Partia Demokratike (PDK), Enver Hoxhaj. Ai ka gjithsej 77 publikime. Nga to fotoja më e pëlqyer ka qenë e publikuar më 7 shkurt, e cila ka mbledhur mbi 10 mijë e 600 pëlqime, por ka përfunduar me vetëm 329 komente.

Ndërsa, videoja më e pëlqyer e shpërndarë nga Hoxhaj dhe më e shikuara, ka marrë mbi 5 mijë e 100 pëlqime, 398 komente, 235 rishpërndarje, dhe rezulton të jetë shikuar mbi 500 mijë herë. Hoxhaj bënë pjesë në mesin e kandidatëve për kryeministër të Kosovës i cili ka bërë disa sponsorizime për të rritur vizibilitetin e publikimeve të tij, gjatë 10 ditëve të fushatës. Hoxhaj ka një llogari personale e cila ka edhe numër goxha të ulët të përcjellësve, meqë janë vetëm 77,683 ndjekës.  

Kandidati për kryeministër nga Lidhja Demokratike e Kosovës (LDK), Avdullah Hoti është rekordmeni apsolut i përdorimit të llogarisë së tij në Facebook gjatë 10 ditëve të fushës zgjedhore zyrtare. Ai ka pasur plotë 218 postime. I bie që Hoti, ka bërë 21 postime në ditë, ose afërisht në çdo një orë brenda ditës ka shpërndarë diç për të komunikuar me ndjekësit e tij dhe qytetarët nëpërmes llogarisë në Facebook. Sidoqoftë, rezultati, jo vetëm zgjedhor, por edhe i impaktit në publik, ka qenë mjaft më i ulët krahasuar me kundërkandidatët e tij. Gjithashtu, Hoti ka bërë disa sponsorizime, mënyrë që e mundëson Facebook për të arritur shikueshmëri dhe depërtueshmëri më të lartë te audienca.

Nga të gjitha këto shpërfaqje publike, fotoja e 4 shkurtit e shpërndarë nga Hoti, ka arritur më së shumti pëlqime, 14 mijë e 200 sosh. E njëjta ka marrë dhe 3 mijë e 400 komente dhe 190 shpërndarje. Ndërsa, videoja e 9 shkurtit ka arritur 30 mijë e 100 shikime, e njëjta ka marrë dhe mbi 1 mijë pëlqime dhe 301 komente, e gjithashtu mbanë primatin me më së shumti shpërndarje – 299 gjithsej. Llogaria e Hotit, përcillet nga 83,569 përdorues të regjistruar në këtë rrjet.

Bartësi i listës së Aleancës për Ardhmërinë e Kosovës (AAK), në këto zgjedhje, kandidat për president të vendit nga ky subjekt, Ramush Haradinaj ka bërë 75 postime. Në mesin e tyre, fotoja me përshkrim më e ndjekur ka dalë ajo e publikuar më 9 shkurt e cila ka marrë 9 mijë e 600 pëlqime. Fotoja më e komentuar ka qenë e publikuar më 11 shkurt edhe ka marrë mbi 3 mijë e 200 komente, dhe ajo më e shpërndara është e datës 12 shkurt e cila arriti të rishpërndahet 466 herë.

Videoja e publikuar nga Haradinaj më 2 shkurt, ka marrë mbi 10 mijë e 300 pëlqime, e që gjithashtu ka qenë 753 herë e rishpërndarë. Sa i përket komenteve, rezultatin më të mirë e ka ajo e publikuar me 3 shkurt që ka pasur mbi 7 mijë komentime. Videoja më e shikuar e publikuar nga Haradinaj më 10 shkurt ka arritur të marrë 845 mijë shikime. Edhe Haradinaj, sikurse Hoxhaj e Hoti, kanë shpenzuar mjete financiare në këtë rrjet duke sponsorizuar postimet e tyre. Llogaria e Haradinajt në Facebook, përcillet nga 262,372 qytetar.

Duke qenë se pos Hotit, kandidatët e mësipërm, janë edhe kryetar të partive politike, brenda këtij hulumtimi është përfshirë edhe aktiviteti i Isa Mustafës, në atë kohë, kryetari i Lidhjes Demokratike të Kosovës (LDK). Në Llogarinë e tij, Mustafa ka 70,260 ndjekës. Ai nuk ishte tërësisht pa aktivitet në rrjetet sociale. Mustafa u mundua modestisht ta ndihmoj LDK-në dhe Avdullah Hotin kandidat për kryeministër nga ky subjekt, duke shkruar herë pas here. Gjatë fushatës Isa Mustafa ka pasur gjithsej pesë publikime në Facebook. Nga to, statusi i publikuar më 7 shkurt ka marrë mbi 2 mijë e 900 pëlqime. Ai i publikuar më 10 shkurt ka marrë mbi 2 mijë e 100 komente dhe ka qenë 131 herë i rishpërndarë. Mustafa nuk ka publikuar asnjë foto dhe asnjë video.

(Në këtë tabelë është shfaqur vetëm foto dhe videoja më e pëlqyer në facebook-un e kandidatëve)

Sipas këtyre të dhënave del se Avdullah Hoti nga LDK, Ramush Haradinaj nga AAK dhe Enver Hoxhaj nga PDK, kanë numrin më të lartë të postimeve në krahasim me kandidatin nga LVV-dhe Lista e Vjosa Osmanit, apo fituesin e zgjedhjeve Albin Kurtin. Mirëpo, dallimi qëndron në shtrirjen e pëlqimeve, komenteve dhe shpërndarjeve, e në këtë rast Kurti, ka dyfishin e tyre në krahasim me kandidatët e tjerë.

Pavarësisht nga këto shifra të publikimeve nga kandidatët për kryeministër të mundshëm dhe kryetarët e partive politike, asnjëri nuk ka pasur interaktivitet me votuesit potencial, apo komuentuesit, duke e bërë komunikimin njëkahor.  

Në fushatë “ndezja” komunikuese në rrjetet sociale bëhet edhe nga partitë politike

Sikur edhe kandidatët për kryeministër, njëjtë vepron pothuajse secili prej garuesve për deputet. Jashtë aktivitetit nuk mbesin as llogaritë e partive politike që kanë adresë në Facebook. Në disa raste, subjektet politike në Kosovë, dhe jo vetëm, angazhojnë ndonjë kompani për të menaxhuar rrjetet e tyre sociale, për të qenë në trend me kohën. Njëra nga to që e pranon këtë është edhe AAK, e cila në gjatë fushatës së fundit kishte angazhuar një kompani për menaxhimin e rrjeteve sociale.

“Në Aleancë kemi departamentin e veçantë për menaxhim të rrjeteve sociale, i cili vepron gjatë tërë kohës. Mirëpo, gjatë fushatave zgjedhore angazhojmë edhe kompani konsulente, të cilat janë të specializuara në menaxhim të rrjeteve sociale. Në shumicën e rasteve kandidatët për deputetë profilet e tyre në rrjetet sociale i menaxhojnë̈ personalisht për shkak se shumica janë të mirëinformuar sa i përket teknologjisë”, thonë nga zyra e medieve të AAK-së.

Mirëpo, disa prej tyre kanë edhe njerëz të profilizuar për mirëmbajtjen dhe menaxhimin e rrjeteve sociale. LVV edhe PDK janë dy nga partitë, të cilat kanë deklaruar se nuk kanë angazhuar asnjë kompani për këtë çështje, për shkak që kanë njerëz brenda partive, të cilët janë ekspert të fushës.

Megjithatë, në LVV, konsiderojnë se komunikimi i drejtpërdrejtë me qytetarë gjatë fushatës zgjedhore nuk zëvendësohet me atë përmes rrjeteve sociale.

“Si Lëvizje Vetëvendosje, jemi rritur në takime e tubime direkt me qytetarët, ato janë të pazëvendësueshme, janë të një tjetër lloji. Por, po ashtu janë kategori të ndryshme njerëzore ata që takohen direkt nëpër lagje e fshatra për dallim me ata në rrjetet sociale”, është deklaruar Arlind Manxhuka nga zyra për informim e LVV-së.

Gjithashtu, edhe nga AAK thonë se është i pakontestueshëm komunikimi direkt me qytetarë nëpër takime tradicionale, mirëpo sipas tyre përdorimi i rrjeteve sociale “është kursim në kohë dhe shpenzime”.

“Sigurisht që asgjë nuk e zëvendëson kontaktin e drejtpërdrejtë me qytetarët, mirëpo agjenda e ngjeshur me aktivitete, pamundëson një gjë të tillë. Njëra ndër përparësitë e komunikimit nëpërmes rrjeteve sociale, është kursimi në kohë dhe shpenzime. Tanimë, të gjithë e dimë se mjetet klasike për komunikim si; TV dhe Radio përdoren shumë më pak nga qytetarët, ndërkaq Facebook përveç postimeve (foto, video), mundëson edhe ‘live stream’, e cila në fushatën e fundit është përdorur në masë të madhe për shkak të kostos së ulët”, janë shprehur nga AAK.

Ngjashëm mendojnë edhe strukturat e PDK-së.

“Asnjëri lloj i komunikimit nuk mund ta zëvendësoj tjetrin. Unë i shoh vetëm të dy format në një lloj ndërveprimi për t’u arritur efektet e duhura në komunikim. Por, të dy ndaras, kanë përparësitë dhe mangësitë. Përparësia e komunikimit online është se kushton më lirë, është i shpejtë dhe arrin në një kohë të shkurtër te një numër i madh i njerëzve, ndërsa mangësi është se mungon kontakti i drejtpërdrejt. Kurse tek komunikimi direkt, përparësi takimi nga afër me njerëz, duke parë edhe emocionet e tyre, kërkesat e nevojat”, thotë Bashmir Xhemaj, drejtor për komunikim në PDK.

Nga Lidhja Demokratike e Kosovës nuk janë përgjigjur në pyetjet e dërguara nga studentët e UBT-së.

(Në këtë tabelë është shfaqur numri i postimeve i partive politike në faqet e facebook-ut)

Për komunikimin online virtual, ende shumë për të mësuar

Në fushën e komunikimit në rrjetet sociale, siç është edhe ky nëpërmes facebook-ut, ka mendime se ai mund të avancohet dhe se Kosova nuk ka arritur ende në nivelin e tillë kulturor e politik të një komunikimi të mirëfilltë.

Violeta Hyseni – Kelmendi, gazetare me përvojë të gjatë dhe njohëse e fushës së komunikimit, ka thënë se partitë politike, kryesisht kandidatët e tyre për kryeministër, për dallim nga zgjedhjet e mëparshme, në këto të fundit i kanë përdorur më tepër rrjetet sociale.

“Këtë vit ka pasur një trend në rritje të përdorimit të rrjeteve sociale gjatë fushatës zgjedhore nga subjektet politike. Besoj që ka disa arsye pse ka ndodhur kjo: 1) për shkak se komunikimi me elektoratin përmes rrjeteve sociale tashmë është i pashmangshëm në epokën digjitale dhe partitë e kanë kuptuar; 2) për shkak të pandemisë, njerëzit janë mësuar të funksionojnë më shumë online dhe kjo i ka ndihmuar edhe subjektet politike që më lehtë t’iu qasen atyre”, ka thënë Hyseni–Kelmendi.

Ajo ka potencuar se edhe kostoja e organizimit të aktiviteteve përmes rrjeteve sociale është më e ulët. Gjithashtu, trendi i rritjes së përdorimit të rrjeteve sociale në zgjedhjet e fundit, sipas Hyseni-Kelmendit është edhe për shkak se diaspora nuk ka mundur të vijnë shkaku i masave pandemike, po ashtu edhe është targetuar rinia dhe njerëzit e papunë.

“Mendoj që subjektet tona politike gradualisht po i përshtaten epokës digjitale, por gjithsesi ka nevojë që të investojnë më shumë në këtë fushë. Për të komunikuar në mënyrë proaktive dhe për të zhvilluar aktivitete që tërheqin vëmendjen e qytetarëve, nevojitet të angazhohet një ekip profesional që mund të zhvillojë produkte multimediale”, është shprehur Violeta Hyseni – Kelmendi.

Sipas njohësit të komunikimit masiv, Dren Gërgurit, politikanët janë duke e kthyer vëmendjen tek rrjetet sociale vetëm gjatë kohës së fushatës.

“Më shumë politikanët po e kthejnë fokusin tek media sociale gjatë fushatës zgjedhore. Nga viti 2017-2021 kishim tre palë zgjedhje dhe nga këto parti u shfrytëzua media sociale për të përcjellë njoftime, ashtu edhe shpjegim të programeve dhe atë çka e bën një parti politike të jetë e duhura, pra reklamimin e tyre të cilin e bëjnë përmes medieve”, ka thënë Gërguri.

Ai e sheh rrjetin social facebook si më të përdorurin në Kosovë nga politikanët, të cilët e shërbejnë për të shkëmbyer komunikim me simpatizantët e tyre.

“Partitë politike duhet të punojnë më shumë që të shfrytëzojnë medien sociale për një komunikim, i cili do ishte edhe interaktiv. Kryesisht tek ne si rrjet komunikimi nga akterët politikë përdoret për shembull facebook, e cila është media më e popullarizuar sociale dhe ky përdorim është në formën e dërgimit të mesazhit nga politikani tek audienca, por nuk ka ndonjë interaktivitet në mes tyre. Media sociale ka krijuar një rrjet ku jo vetëm të dërgoj mesazh, por edhe të komunikosh me shikuesit e dëgjuesit, pra ofron interaktivitet”, shprehet ai.

Rrjetet sociale janë një platformë e mirë për subjektet politike, sipas ekspertëve, ato kanë shënuar një rritje viteve të fundit, si një mundësi e mirë për të bërë fushatë elektorale, por nga ana tjetër për ta keqpërdorur për manipulim të votuesve.

Bazuar në të gjeturat e hulumtimit, rezulton se garën në rrjetin social Facebook gjatë fushatës zgjedhore në Kosovë, e fitoi LVV dhe Lista e Vjosa Osmani – Sadriut. Ndonëse patën paraqitje shumë më të paketa sesa rivalët e tyre politik, ky grupacion ishte dominant në këtë rrjet social.

Publikimet e shpeshta të ish kandidatit për kryeministër nga LDK Avdullah Hotit, treguan në vetvete se nuk përbënë domosdoshmërisht avantazh karshi oponencës. Ai kishte nëntë herë më shumë postime se rivali i tij Albin Kurti, por reaksioni qytetar mbi këto publikime të Hotit ishte shumë më i ulët se te Kurti, që doli edhe fitues i zgjedhjeve.

Hulumtimi nxjerrë në pah edhe të dhënën interesante se as partitë politike, as kandidatët për kryeministër e as kryetarët e subjekteve politike, nuk u përgjigjen në çështjet që ngritën qytetarët komentues si ndjekës të tyre.

(Autorë të këtij hulumtimi janë studentët: Blenda Agaj, Driton Iseni, Blerta Gashi, Lea Krajkova, Anita Bakalli, Uranik Emini dhe Blerta Zuka)

Related Topics:
Continue Reading

Lajmet

Prokuroria nis hetimet ndaj KEDS-it për njehsorët elektrikë: Dyshime për mashtrim me faturat

Published

2 hours ago

on

April 3, 2026

By

Prokuroria Themelore në Prishtinë njofton se ka nisur zyrtarisht grumbullimin e informatave lidhur me dyshimet për parregullsi në njehsorët elektrikë të kompanisë KEDS.

Sipas organit të akuzës, ekziston një dyshim i bazuar se këto pajisje nuk po bëjnë matjen e saktë të energjisë elektrike të shpenzuar nga konsumatorët.

Në këtë drejtim, Prokuroria dyshon se është kryer vepra penale “Mashtrimi”, sipas nenit 323 të Kodit Penal të Republikës së Kosovës. Për të zbardhur rastin, Prokurori i Shtetit ka autorizuar Policinë e Kosovës që të ndërmarrë të gjitha veprimet e nevojshme hetimore me qëllim sigurimin dhe grumbullimin e provave shtesë.

“Prokurori i Shtetit ka autorizuar Policinë e Kosovës për ndërmarrjen e të gjitha veprimeve të nevojshme hetimore, me qëllim të sigurimit dhe grumbullimit të provave shtesë lidhur me këtë rast, përfshirë edhe veprimet ndaj zyrtarëve të KEDS-it”, thuhet në njoftimin zyrtar.

Hetimet vijnë pas shqetësimeve se njehsorët nuk pasqyrojnë realisht shpenzimet, duke dëmtuar kështu qytetarët. Prokuroria ka theksuar se mbetet e përkushtuar në ushtrimin e kompetencave ligjore për të garantuar zbatimin e ligjit.

“Lidhur me rastin e parregullsive të dyshuara në njehësorët elektrikë të KEDS-it, ekziston dyshimi se këta njehësorë nuk bëjnë matjen e saktë të energjisë elektrike të shpenzuar… Prokuroria Themelore në Prishtinë mbetet e përkushtuar në ushtrimin e kompetencave ligjore, duke garantuar zbatimin e ligjit dhe mbrojtjen e interesit publik”, përfundon njoftimi i Prokurorisë.

Continue Reading

Lajmet

DITARI: Çfarë lajmesh kemi lexuar në çdo 3 prill, në vitet nëntëdhjetë

Published

2 hours ago

on

April 3, 2026

By

3 prill 1993

Lajm i plotë: Tre gazetarët ferizajas sërish në polici

Dje, në qendrën e sigurimit serb në Prishtinë, u morën përsëri tre gazetarët ferizajas, Rrahim Sadiku, Haki Braha dhe Avni Shabani. Ata u mbajtën në polici tri orë dhe u morën në pyetje për përmbajtjen e revistës “Zgjimi”, e cila u konfiskua para disa ditësh.

Këtyre gazetarëve iu tha që përsëri të paraqiten të hënën, në qendrën e policisë në Ferizaj.

 

Lajme të tjera:

“Bujku” edhe sot nuk u botua

Vazhdon aksioni “Ta mbrojmë ambientin”

U promovua romani “Udhëtimi arbdhetar” i Zejnullah Rrahmanit

Në Ferizaj tubime përkujtimore për të vrarët

Manifestim kushtuar 90-vjetorit të vdekjes së De Radës

Tubim proteste i studentëve ferizajas kundër burgosjes së rektorit dr.Ejup Statovci

Ahmet Gajtani u ftua në polici

Në Prishtinë bombat u gjetën në kontejnerë të mbeturinave

Në Prishtinë u plaçkitën 60 tonë miell

Policia maqedonase gjobit vozitësit shqiptarë

Kosova e përfaqësuar në kampionatin evropian në “full-kontakt”

Në Podujevë arritën pesëdhjetë policë financiarë nga Serbia

Në komunë të Pejës – keqtrajtime të përditshme

NATO bën kontrollin mbi qiellin e Bosnjës

Mas-mediumet serbe i japin publicitet “Traktit” të shpërndarë në Kosovë

 

 

3 prill 1995

Lajm i plotë: Dhuna e përditshme në Kosovë

Kamenicë: – Më 25 mars, policia serbe mori në rrugë të fshatit Rogaçicë, Samet Baxhakun të cilin e dërgoi në stacionin e policisë në Gjilan, nën prtetekst të dorëzimit të armës. Njoftohet se nga inspektorët Ramadan Sermaxhaj dhe njëfarë Sërgjani ai u keqtrajtua fizikisht për disa orë.

Më 20 mars, policia nën preteskt të kërkimit të armëve mori Hevzi Hotin nga Muçivërci, i cili dorëzoi një revole, ndërsa pas kësaj atij policia po i kërkon edhe një automatik.

Më 27 mars, policia mori Vehbi Klaiqin, sekretar i SHHB “Nënë Tereza” në Kamenicë, i cili u dërgua në stacionin e policisë në Gjilan dhe u pyet për kinse vizitën e një delegacioni të jashtëm humanitar.

Më 30 mars policët ndalën në rrugë veprimtarët Isa Kallubën, Skënder Canën dhe mjekun Naser Fetahu, të cilët i dërguan në stacionin e policisë në Kamenicë. Në polici ata u mbajtën rreth dy orë dhe u pyetën për angazhimin e tyre në ambulancën e SHBH “Nëna Terezë” në Kamenicë. Policët u interesuan edhe për mënyrën e sigurimit të barnave për këtë ambulancë dhe për çështje të tjera të aktivitetit politik shqiptar në Kamenicë.

Më 30 mars policia serbe, me pretekst të kërkimit të armëve, mori në shtëpitë e tyre Mehdi M.Morinën dhe Hamëz A.Morinën nga fshati Topanicë. Ata u dërguan në stacionin e policisë ku policët i urdhëruan që të dorëzojnë nga një revole.

Vushtrri: – Më 1 prill, në stacionin e policisë në Vushtrri u malretua rëndë fizikisht Ragip Krasniqi nga Vushtrria. Për shkak të lëndimeve që pësoi nga rrahja ai u detyrua të kërkojë ndihmë mjekësore.

Gjilan:- Më 3 mars, rreth orës 12:30 minuta, policia serbe ndërpreu një turnir futbolli në Gjilan. Turniri ishte organizuar në kuadër të aksionit “Vullneti 95” nga FR i LDK-së, Dega në Gjilan. Policët morën me vete delegatin e ndeshjes Shemsedin Mustafën dhe një refer.

 

Lajme të tjera:

Tubim i madh i shqiptarëve në Bruksel

U nënshkruan dy marrëveshje mes Shqipërisë dhe Suedisë

Beogradi po përgatit “institucionalizimin” e dominimit serb mbi shqiptarët në Kosovë

Intensifikohen planet dhe aksionet e spastrimit etnik të Kosovës

Një program serb për kolonizimin e Kosovës

Kanali TV turk HBB: Pse nuk njihet Kosova?

U ndihmuan 42 familje

Rudina Hatipi kampione e Suedisë në vallëzim

Kërkohet Shpejtim Thaçi

 

 

3 prill 1997

Lajm i plotë: U kthyen rreth 100 azilkërkuesit e parë nga Gjermania në Kosovë

Paralajmërimet e palës gjermane për kthimin e azilkërkuesve shqiptarë nga ky vend, mbrëmë filluan të zbatohen me kthimin e organizuar të tyre në Kosovë. Në orën 19. 15 minuta, në aeroportin e Prishtinës arriti fluturakja e parë nga Gjermania me afro 100 azilkërkues shqiptarë. Ky është kontigjenti i parë që kthehet nga Gjermania në mënyrë të organizuar, njofton gazeta “Bujku”.

Reporteri i kësaj gazete arriti të mësojë nga disa azilkërkues të kthyer se ky kontigjent është nga rethina e Shtutgarit. Në mesin e të kthyerve kishte edhe shumë fëmijë e gra, por kryesiht ishin të rinj. Një azikërkues nga rethi i Suharekës tha se gruaja dhe fëmijët kishin mbetur në Gjermani dhe nuk dinin asgjë për fatin e tij. Po ashtu, të kthyerit thanë ata ishin kapur nga policët gjermanë në rastësi dhe ishin mbajtur në aeroportin e Shtutgardit që nga mëngjesi i ditës së martë. Shumica prej tyre nuk kishin asgjë me vete.

Në aeroportin e Prishtinës nuk pati keqtrajtime të të kthyerve. Ata vazhduan rrugën për në shtëpit e tyre.

 

Lajme të tjera:

Ushtria e Shqipërisë krijon “forcën speciale” për bashkëveprim me forcën ndërkombëtare

Parlamenti shqiptar rishqyrtoi dhe miratoi projektligjin për një amnisti të gjerë

BE konfirmon dërgimin e ndihmave për Shqipërinë

Leka I kthehet në Shqipëri

Merren në pyetje aktivistë të LDK-së në Baran

 

 

3 prill 1997

Lajmet kryesore:

Kryetari Rugova priti ambasadorin e Spanjës

Pala shqiptare e përjashtuar plotësisht nga kthimi i refugjatëve të Kosovës

Demaçi priti diplomatë amerikanë

Në Pacaj të Gjakovës policia bastisi një familje dhe keqtrajtoi katër të rinj

Ndihmuan Shkollën Fillore të Vidishiqit me 550 DM

 

 

Edicioni i parë (Ora 11:30)

Lajmet kryesore:

Konferencë për gazetarë e kryetarit të Republikës së Kosovës dr. Ibrahim Rugova

Një anëtar i Kryesisë së Degës së LDK-së në Shtime u keqtrajtua nga policia

Hungarezët e Vojvodinës nuk duan të shërbejnë në forcat serbe në Kosovë

Serbia shprehet me referendum për (mos)pjesëmarrjen e përfaqësuesve të huaj në zgjidhjen e problemeve në Kosovë

Kaçanik: Policia konfiskon armët me leje

Istog: Tri familje u bastisën për armë

Lipjan: Të mos bihet nën ndikimin e dezinformatave

Nga Lipjani u larguan 20 refugjatë serbë

 

 

Edicioni i dytë (Ora 15:30)

Lajm i plotë: Ia vizatuan me thikë kryqin në këmbë

Dje rreth orës 11, dy policë serbë arrestuan në rrugë Driton Hazir Brahimin (18), nga Korrotica e Ulët, nxënës i vitit IV të shkollës së mesme teknike në Gllogoc.

KI i Degës së LDK-së në Gllogoc njofton se policët e ndaluan Dritonin, që po shkonte në shkollë, dhe e dërguan në postbllokun e Komoranit ku e keqtrajtuan rëndë fizikisht. Policët gjithashtu, duke e gërvishur me thikë, ia “vizatuan” atij kryqin mbi gjurin e këmbës së majtë.

Më pas Dritoni u lirua.

 

Lajme të tjera:

Idriz Rrecaj: Nevojitet ndërhyrje ndërkombëtare me qëllim të largimit të njësive speciale serbe nga Skenderaj

U arrestua Kryetari i Degës së LDK-së në Gllogoc

Medlin Ollbrajt: “Territori i Kosovës mbahet i okupuar nga një forcë armiqësore”

Shqipëria përshëndet Rezolutën e Këshillit të Sigurimit të OKB-së për vendosjen e embargos së armëve ndaj Beogradit

Bërns: “Autoritetet serbe menjëherë duhet të fillojnë bisedimet me shqiptarët e Kosovës”

Kofi Anan i shkruan presidentit Meidani lidhur me Kosovë

Shtypi amerikan për zhvillimet e fundit në Kosovë

U lirua objekti i gjimnazit në Podujevë

Për një koordinim sa më të mirë në grumbullimin dhe shpërndarjen deri në destinacion të ndihmave për Drednicën

Një kontigjent me ndihma u nis nga Gjakova për Drenicë

Vazhdojnë të arrijnë ndihmat për Drenicën

Në Australi vazhdon muaji i solidaritetit për Kosovën

Shqiptarët në Mal të Zi pa të drejta në shumë fusha

Edhe një gazetë e re shqipe në Maqedoni

Doli nga shtypi revista “Theatri”

 

Edicioni i tretë (Ora 16:00)

Lajm i plotë: Nuk është hequr asnjë postbllok i policisë

Duke filluar nga shkurti i këtij viti, policia serbe ka vendosur në komuna të shumta të Kosovës postblloqe të reja policore, krahas postblloqeve të vendosura që nga pushtimi i Kosovës. Në këto postblloqe, të gjithë kalimtarët ndalohen, kontrollohen rreptësisht dhe shpesh keqtrajtohen fizikisht.

Sipas shënimeve të grumbulluara nga degët e LDK-së në Kosovë, postblloqe policore janë vendosur në këto komuna:

Skënderaj – Në Klinë të Epërme, në Runik, në Tërnoc dhe në Skënderaj. Në komunën e Skënderajt koncentrime të përhershme të forcave të reja serbe ka mbi kodrën mbi fshatin Llaushë, në Tërnoc, në Skënderaj, në Fabrikën e Municionit të Gjuetisë, në Kopiliq të Ulët, në Brojë e tjerë;

Mitrovicë – postblloqe janë vendosur në të gjitha hyrje-daljet e qytetit dhe në Shipol në rrugën Mitrovicë-Skënderaj. Koncentrime të forcave serbe ka edhe në ndërtesën e Shoqatës së Zjarrfikësve, në garnizonin e ushtrisë serbe, në hotelin “Tre” në Zveçan dhe në fshatin Frashër;

Vushtrri – postblloku është i vendosur në fshatin Nedakoc në magjistralen Prishtinë-Mitrovicë;

Prizren – postblloku policor në fillim të shkurtit u vendos në Lubizhdë afër Prizrenit, ndërsa postblloqet të herëpashershme policore vendosen në Landovicë, Dushanovë, në Gjonaj e tjerë;

Junik – vendoset herë pas herësh një postbllok policor në vendin e quajtur “Kulla e Malokut” në afërsi të vendbanimit të refugjatëve, ndërsa koncentrime të forcave policore ka pasur në tërë teritorin e Junikut dhe në fshatrat që shtrihen në zonën kufitare;

Çabër – postblloku policor është i vendosur tash sa vite në Gazivodë, ndërsa koncentrime të herëpashershme të forcave policore ka në poligonin rezervë ushtarak po në Gazivodë.

Klinë – pos dy postblloqeve në lagjen “Përlika” të Klinës dhe në rrugën Klinë-Skënderaj, postblloqe policore janë vendosur pas shkurtit edhe në rrugën Pogragjë-Jashanicë, në magjistralën Pejë-Prishtinë – në Dollc, si dhe në Kijevë. Koncentrime të forcave ka në Pogragjë, në objektin e Kombinatit Bujqsor “Malishgani” – rreth 1000 sish;

Suharekë – postbllok është vendosur te stacioni i policisë;

Gllogoc – postblloqe ka në Komoran e Morinë, ndërsa koncentrime të forcave policore ka në Komoran dhe në Gllogoc;

Kamenicë – postbllok ka në vendin e quajtur “Crepane”, në trekëndëshin rrugor Kamenicë-Bujanoc-Gjilan, ndërsa postblloqe të reja janë vendosur pas shkurtit, në vendin e quajtur “Dheu i bardhë”, në Katushnicë, midis fshatrave Hodonoc, Rogaçicë dhe Novosellë, dhe në Koretin, te Fabrika e Pllakave, midis Berivojcës dhe Koretinit. Koncentrime të forcave serbe ka në fshatrat e banuara me serbë në Ranillugë, Rapotovë, Bozhec, Rajnoc etj. Fshati Bozhevc ruhet me pizgauerë e autoblinda. Ndërkohë janë hequr postblloqet te “Dheu i bardhë” dhe në Koretin;

Kaçanik – postblloku policor është i vendosur në rrugën Ferizaj-Kaçanik në fshatin Gërlicë;

Zhur – pos postblloqeve në Vlashnjë, Zhur e Vërnicë, pas shkurtit të sivjemë është vendosur edhe një postbllok në rrugën për Biluzhë, Vlashnjë, Zhur, Shkozë e Vërmicë, ndërsa ka koncentrime të forcave serbe si dhe lëvizje të forcave ushtarake në brezin kufitar me Shqipërinë;

Fushë-Kosovë – ndonëse nuk është vendosur ndonjë postbllok policor, vërehet prani e shpeshtë e policisë në Sllatinë në rrugën për në aeroport;

Podujevë – postblloku policor është vendosur para disa vitesh në magjistralen Prishtinë-Nish në hyrje të Podujevës;

Leposaviq – postbllok ka në lokalitetin e quajtur “Ballaban”. Ky postbblok qe vendosur në tetor të vitit të kaluar, u hoq në dhjetor dhe u vendos sërish në shkurt të këtij viti. Forca ushtarako-policore janë të stacionuara në fabrikën e këmishave në Banjskë. Vazhdon kontrolli i rreptë policorë ndërsa banorëve të fshatit Koshtovë u është tërheuqr vërjejtja që të mos kalojnë kodrave përballë vendit ku janë vendosur forcat serbe;

Dragash – që nga viti 1989 postblloku policor është vendosur në fshatin Zym. Vërehet koncentrim i një numri më të madh ushtarësh në karakollin në fshatin Bresanë;

Istog – postblloku policor është vendosur në Gurrakoc në rrugën Pejë-Mitrovicë-Klinë;

Njëkohësisht burime të degëve të LDK-së në komunat e Kosovës njoftojnë se, përkundër kërkesave të Grupit të Kontaktit për tërheqjen e forcave të policisë speciale nga Kosova, ditëve të fundit është shtuar numri i postblloqeve si dhe numri i këtyre forcave, ndërsa ato nuk janë tërhequr nga asnjë postbllok.

 

Lajme të tjera:

Gjendje e rëndë në komunën e Deçanit

Klinë: Një qytetar u keqtrajtua brutalisht

U themelua Këshilli Organizativ i Protestave në nivel republikan

Policia serbe keqtrajton shqiptarët me pretekst të pjesëmarrjes në protesta

Foto: Ballina e gazetës “Bujku”

Continue Reading

Lajmet

Miratohet projektligji për Lojërat Mesdhetare “Prishtina 2030”, hapet rruga për organizimin e ngjarjes madhore

Published

2 hours ago

on

April 3, 2026

By

Qeveria e Kosova ka miratuar projektligjin për organizimin e Lojërat Mesdhetare Prishtina 2030, duke shënuar një hap të rëndësishëm drejt zhvillimit sportiv dhe afirmimit ndërkombëtar të vendit.

Institucionet e kanë cilësuar këtë nismë si projekt me interes të lartë publik dhe kombëtar, që pritet të ndikojë drejtpërdrejt në zhvillimin ekonomik, përmirësimin e infrastrukturës sportive dhe rritjen e imazhit të shtetit në arenën ndërkombëtare.

Kryeministri Albin Kurti theksoi rëndësinë strategjike të projektligjit, duke nënvizuar standardet që synohen me organizimin e kësaj ngjarjeje:
“Ky projektligj, i bazuar në marrëveshjen për organizimin e Lojërave Mesdhetare ‘Prishtina 2030’, është projekt me interes të lartë publik dhe kombëtar. Ai garanton që organizimi i kësaj ngjarjeje madhore të bëhet me përgjegjësi të plotë institucionale, me standarde të larta transparence, integriteti dhe menaxhimi efikas të fondeve publike. Ky është një investim në rininë tonë, në sportin tonë dhe në imazhin ndërkombëtar të shtetit”.

Nga ana tjetër, ministri i Rinisë dhe Sportit, Blerim Gashani, dha detaje mbi aspektin financiar dhe organizativ të projektit:
“Përmes këtij ligji, qeveria do të miratojë shfrytëzimin e fondeve publike në shumën prej të paktën 253 milionë euro. Burimi kryesor i financimit do të jetë buxheti i shtetit, ndërsa projektligji rregullon edhe kompetencat e institucioneve përkatëse, përfshirë Komitetin Olimpik të Kosovës dhe komunat që do të përfshihen në organizim”.

Projektligji përcakton qartë rolet dhe përgjegjësitë e institucioneve shtetërore, duke krijuar një kornizë të plotë ligjore për organizimin e kësaj ngjarjeje të madhe sportive.

Pas votimit në Kuvend, pritet të nisin përgatitjet konkrete për Lojërat Mesdhetare Prishtina 2030, me synimin që Kosova të radhitet ndër organizatorët e rëndësishëm të eventeve sportive ndërkombëtare.

Continue Reading

Lajmet

Qeveria miraton Projektligjin për Çmimet Tavan

Published

3 hours ago

on

April 3, 2026

By

Lajm në zhvillim:

Qeveria e Kosovës në mbledhjen e mbajtur sot me 3 prill ka miratuar edhe Projektligjin për masat e përkohshme të produkteve bazë në raste të veçanta të destabilizimit në treg, një nismë kjo që synon të vendosë kontroll mbi rritjen e pakontrolluar të çmimeve.

Ministrja e Industrisë, Ndërmarrësisë dhe Tregtisë, Mimoza Kusari-Lila, bëri të ditur se ky ligj vjen si mbrojtje direkte për qytetarët, duke u fokusuar veçanërisht te produktet esenciale.

Gjatë prezantimit, ministrja theksoi se pas vërejtjeve të mëparshme, projektligji marrë parasysh rekomandimet e Gjykatës Kushtetuese.

Sipas saj, ligji i ri do të operojë përmes dy masave kryesore: caktimin e marzhës tregtare (fitimit të lejuar) për shitësit me shumicë e pakicë dhe përcaktimin e çmimit maksimal për produktet bazë.

“Ky projektligj ka për qëllim të përcaktojë kornizën ligjore për vendosjen e masave të përkohshme dhe proporcionale për produktet themelore,” deklaroi Kusari-Lila, duke shtuar se synimi kryesor mbetet mbrojtja e interesit publik në kohë krizash.

Në kuadër të këtij ligji është edhe krijimi i një mekanizmi të ri mbikëqyrës që garanton paanësi në vendimmarrje.

Bord i Pavarur Institucional do të jetë përgjegjës për menaxhimin e situatave kur tregu pëson luhatje të theksuara dhe ky bord do të emërohet direkt nga Kuvendi i Kosovës dhe do t’i raportojë atij për çdo masë të ndërmarrë, sipas ministres.

Ministrja përfundoi duke thënë se ky ligj do të parandalojë spekulimet në treg që bëhen në kurriz të konsumatorëve. Tashmë, projektligji pritet të kalojë në Kuvend për shqyrtim dhe miratim final, duke i dhënë shtetit mjetet e nevojshme ligjore për të ndërhyrë sa herë që stabiliteti i çmimeve rrezikohet.

 

Qeveria miraton Projektligjin për Sigurime Shëndetësor; Vitia: Synojmë qasje universale dhe cilësi në shërbime

Ekzekutivi i Kosovës i ka dhënë “dritën e gjelbër” Projektligjit për Sigurimet Shëndetësore gjatë mbledhjes së mbajtur këtë mëngjes.

Pas prezantimit nga ministri i Shëndetësisë, Arben Vitia, ky projektligj është miratuar për procedim të tutje, duke shënuar një hap drejt njërës prej reformave më të diskutuara në sektorin e shëndetësisë publike.

Gjatë fjalimit të tij, ministri Vitia vuri theksin te rëndësia e kësaj nisme pas një periudhe të gjatë sfidash. Ai bëri të ditur se për hartimin e tij janë analizuar mangësitë e sistemit aktual dhe janë studiuar praktikat ndërkombëtare për të krijuar një ligj që i përgjigjet realitetit ekonomik dhe social në vend.

“Është me rëndësi të veçantë të theksoj që ky projektligj vjen pas një periudhe të gjatë sfidash dhe diskutimesh,” u shpreh ministri Vitia, duke shtuar se synimi është krijimi i një ligji të zbatueshëm që u përgjigjet nevojave të qytetarëve.

Sipas ministrit, ky projektligj rregullon disa çështje kyçe që prekin drejtpërdrejt popullatën:

  • Gjithëpërfshirja: Ligji synon qasje universale për të gjithë qytetarët dhe ngritjen e cilësisë së shërbimeve.
  • Financimi: Rregullohen kontributet për sigurime si burim shtesë financimi, krahas buxhetit aktual.
  • Paketa e përfitimeve: Parashihet një paketë adekuate shërbimesh që do të përditësohet çdo vit.

Ministri Vitia sqaroi se ligji siguron kushte të barabarta për të gjithë dhe rregullon mbarëvajtjen e sistemit.

“Ky ligj e përfshin gjithë popullatën duke synuar qasje universale dhe ngritjen e cilësisë në shërbimet shëndetësore,” deklaroi ai, duke nënvizuar se përmes këtij rregullimi do të ketë një performancë më të lartë në të gjithë sistemin shëndetësor në Kosovë.

Miratimi i këtij projektligji në Qeveri konsiderohet si një kthesë drejt funksionalizimit të sigurimeve shëndetësore, proces ky që ka qenë pezull prej vitesh.

Continue Reading

Të kërkuara