Lajmet

Kurti: Të thuash se jemi të lumtur që jemi një komb i ndarë do të ishte marrëzi

Kurti: Le të flasim si diplomat, por le të punojmë si patriot.

Published

4 years ago

November 26, 2021

Betim Gashi

Në Elbasan u zhvillua mbledhja e shtatë mes dy qeverive Shqipëri-Kosovë.

Mbledhja filloi në orën 10:00 pasi kryeministri Edi Rama priti homologun e Kosovës Albin Kurti me çadër jashtë godinës ku po mbahet mbledhja.

“Do kishim dashur tju prisnim me diell por shpresoj që gjithë ky shi dhe këto pika që kemi mbi kokë të jenë ogur I mirë,” tha zoti Rama në fillim të mbledhjes.

Kryeministri i Kosovës, Albin Kurti u shpreh se shqiptarët janë optimistë edhe kur dita nuk është me diell dhe bie shi themi do të jetë bereqet. Zoti Kurti solli në vëmendje tërmetin tragjik të 2 viteve më parë i cili goditi Shqipërinë duke lënë 51 viktima. Ai tha se dhimbja e personave që humbën të dashurit e tyre është edhe dhimbje e tij.

Kurti: Kjo është mbledhja e 7-të ndërmjet qeverive, por mbledhja ime e parë si kryeministër. Sa herë vij në Shqipëri ka një ndjesi të veçantë. Nikollë Nikprelaj thoshte se jemi një Lis me dy Degë paçka se me dy dialekte që sa vjen dhe po njësohen. Tani çfarëdo që po them po analizohet dhe studiohet mirë se ku desha të dal dhe çfarë mesazhi po dërgoj.

Jemi një, paçka se me dy dialekte që sa vjen e po njehsohen falë ndërveprimit në shumë fusha. Ajo që ndiej në Kosovë, është se ka një lloj ndrydhje të dëshirave dhe ndjenjave kur flitet për Shqipërinë. Befas e gjithë shoqëria në Kosovë përjetoi një zëvendësim për të cilin nuk u pyet e nuk u lejua të debatohet.

Kjo është dhe do të mbetet një temë e dhimbshme dhe më të dhimbshme e bën fakti që politikisht nuk është korrekte të diskutohet për të. Të thuash se jemi të lumtur që jemi një komb i ndarë do të ishte marrëzi, të thuash se jemi të lumtur që kemi 2 shtete do të ishte tepri, të thuash se do të bashkohemi në BE të shquajnë për diplomat. Le të flasim si diplomat, por le të punojmë si patriot. Si diplomat jemi të qartë se mbledhja e 2 qeverive tona është në horizontin e integrimeve.

Sa më të integruar të jemi, aq më e mirë do të jetë jeta e qytetarëve. Njerëzit tanë duhet të lëvizin e punojnë, prandaj duhet t’i zgjerohet biznesi e tregtia. Kjo punë ka nisur të ecë. Së bashku mund të prodhojmë më mirë e të punojmë më shumë. Qartësia se orientimi përbashkët na orienton për lëvizjet më të duhur.

Linja hekurodhore Prishinë Durrës është ekologji dhe fuqi e tokës në det, rritje e rëndësisë së portit kryesor të shqiptarëve. Është e rëndësisë ekonomike dhe gjeopolitike. Ne jetojmë në rajonin tonë e me fqinj tanë me të cilët kemi të kaluar të përbashkët. Marrëveshjet që kemi përpara do të lehtësojnë edhe më tej procedurat.

Siç thoshte Fishta “Vërtet kemi Bajram e Pashkë, shqiptarinë e kemi bashkë”. Po rrisim bashkëpunimin në fushën e drejtësisë si dhe po lehtësojmë njohjen reciproke të diplomave e certifikatave. Për tu siguruar se marrëveshjet do të zbatohen, tashmë kemi koordinator të përbashkët, për çka falenderoj Republikën e Shqipërisë dhe kryeministrin Rama.

Lajmet

Presidentja Osmani pret në takim të ngarkuarën me punë të SHBA-së në Kosovë

Published

10 hours ago

March 12, 2026

UBTNEWS

Vjosa Osmani ka pritur në takim të ngarkuarën me punë të Shtetet e Bashkuara të Amerikës në Kosovë, Anu Prattipati, me të cilën ka diskutuar për zhvillimet aktuale në vend dhe çështje të bashkëpunimit bilateral.

Sipas njoftimit të Presidencës, gjatë takimit u trajtuan zhvillimet e fundit politike në vend, si dhe tema të tjera me interes të përbashkët ndërmjet Kosovës dhe Shteteve të Bashkuara të Amerikës.

Në fokus të bisedës ishte edhe rëndësia e ruajtjes së një mjedisi demokratik, ku respektohen mendimet e ndryshme dhe debati publik zhvillohet në mënyrë të përgjegjshme.

Presidentja Osmani theksoi përkushtimin e vazhdueshëm të Kosova për thellimin e bashkëpunimit me SHBA-në, duke ritheksuar se aleanca ndërmjet dy vendeve mbetet jetike dhe e pazëvendësueshme për Kosovën.

Lajmet

Gjykata Evropiane: Ndalimi i ndryshimit të gjinisë në dokumente shkel ligjet e BE-së

Published

12 hours ago

March 12, 2026

UBTNews

Gjykata më e lartë e Bashkimit Evropian mori vendim të enjten se ligjet kombëtare që ndalojnë ndryshimin e të dhënave gjinore në dokumentet e identifikimit janë në kundërshtim me ligjin e BE-së. Gjykata theksoi sfidat e mëdha me të cilat ballafaqohen personat kur identiteti i tyre gjinor nuk përputhet me dokumentet zyrtare.

Rasti në fjalë rrodhi nga një shtetase bullgare, e regjistruar si mashkull në lindje, e cila kishte filluar trajtimin hormonal dhe identifikohej si grua. Ajo ishte zhvendosur në Itali dhe u kishte kërkuar autoriteteve bullgare të ndryshonin gjininë ligjore, emrin dhe numrin personal në dokumente.

Gjykatat në Bullgari e kishin refuzuar kërkesën, duke u thirrur në rregullat kombëtare që e përkufizojnë seksin vetëm në aspektin biologjik dhe që ndalojnë ndryshimin e të dhënave gjinore.

Megjithatë, Gjykata Evropiane e Drejtësisë konstatoi se megjithëse shtetet anëtare janë përgjegjëse për lëshimin e dokumenteve, mosmarrëveshja mes identitetit gjinor dhe letërnjoftimit mund të shkaktojë dyshime gjatë kontrolleve rutinë, udhëtimeve apo ndërveprimeve profesionale. Sipas Gjykatës, këto “paparashikueshmëri të konsiderueshme” pengojnë të drejtën e personit për lëvizje të lirë brenda Bashkimit Evropian. /Reuters/

Lajmet

KQZ pezullon AKR-në e Behgjet Pacollit

Published

12 hours ago

March 12, 2026

UBTNews

Komisioni Qendror i Zgjedhjeve ka marrë vendim për pezullimin e partisë Aleanca Kosova e Re (AKR), pasi subjekti dështoi të organizojë zgjedhjet e brendshme deri në afatin e paraparë (25 shkurt 2026). Edhe pse partia ishte njoftuar paraprakisht, ajo nuk e ka përmbushur këtë obligim ligjor.

KQZ i ka dhënë AKR-së një afat shtesë prej 45 ditësh për ta mbajtur Kuvendin Zgjedhor. Nëse ky kusht nuk plotësohet as brenda kësaj periudhe, partia do të çregjistrohet përfundimisht nga regjistri zyrtar.

AKR, e cila ishte pjesë e Kuvendit që nga viti 2007, aktualisht udhëhiqet nga ushtruesi i detyrës, Vesel Makolli, pas dorëheqjes së Behgjet Pacollit në tetor 2025. Në zgjedhjet e fundit, kjo parti mbeti jashtë Kuvendit pasi nuk arriti ta kalojë pragun zgjedhor.

Lajmet

IKSHPK: Ndotja e ajrit shkakton mbi 1,150 vdekje në vit në Kosovë

Published

12 hours ago

March 12, 2026

UBTNews

Raporti i fundit i Institutit Kombëtar të Shëndetësisë Publike (IKSHPK) për vitin 2025 ka alarmuar se ndotja e ajrit mbetet një rrezik madhor, duke shkaktuar rreth 12.1% të vdekshmërisë totale në vend.

“Rezultatet tregojnë se 1 150 raste të vdekjeve në vit (121/100 000 banorë) i atribuohen nivelit aktual të PM2.5 në Kosovë i cili paraqet 12.1% të vdekshmërisë totale, nga të gjitha shkaqet (natyrore)”, thuhet në raport.

Sipas të dhënave, gjendja më kritike është regjistruar në Prishtinë (veçanërisht në Kodrën e Trimave), Obiliq, Gjilan, Fushë Kosovë (Palaj) dhe Mitrovicë, ku nivelet e grimcave helmuese PM2.5 gjatë dimrit kanë arritur deri në 272 µg/m3, shifër kjo shumë herë mbi limitet e lejuara.

Shkaktarët kryesorë mbeten djegia e thëngjillit për ngrohje, termocentralet dhe makinat e vjetra, të cilat po rëndojnë shëndetin e grupeve më të ndjeshme si të moshuarit, gratë shtatzëna dhe fëmijët.

IKSHPK thekson se kjo ndotje lidhet drejtpërdrejt me rritjen e rasteve të sulmeve në zemër, goditjeve në tru dhe problemeve të rënda respiratore, duke kërkuar masa urgjente për zgjerimin e ngrohjes qendrore dhe reduktimin e përdorimit të lëndëve djegëse fosile.