Kosova i bashkohet sot Shteteve të Bashkuara të Amerikës në përkujtimin e viktimave të sulmeve terroriste të 11 Shtatorit 2001.

Në këtë ditë, në Kosovë do të zhvillohen disa aktivitete përkujtimore në nderim të mijëra personave që humbën jetën në sulmet që tronditën SHBA-në dhe botën.

Në ora 09:00, ushtruesja e Detyrës së Presidentes, Albulena Haxhiu, së bashku me kryeministrin në detyrë, Albin Kurti, do të bëjnë homazhe te memoriali “Kosova Kujton”, kushtuar viktimave të 11 Shtatorit në SHBA. Pas homazheve, Haxhiu dhe Kurti do të mbajnë fjalë rasti.

Në ora 09:30, Peja Peace Forum do të organizojë në Pejë një tryezë të rrumbullakët për nderimin e viktimave të sulmeve terroriste të 11 Shtatorit.

Në ora 09:40, kryetari i PDK-së, Bedri Hamza, së bashku me deputetët e kësaj partie, do të bëjnë homazhe te memoriali “Kosova Kujton”.

Ndërkaq, në ora 10:00, delegacioni i Aleancës do të bëjë homazhe pranë memorialit “Kosova Kujton”, në nderim të viktimave të sulmeve terroriste të 11 Shtatorit 2001 në Shtetet e Bashkuara të Amerikës.

Në ora 11:00, Shoqata “Miqtë e Amerikës” do të mbajë aktivitetin tradicional përkujtimor me rastin e 25-vjetorit të sulmeve terroriste të 11 Shtatorit 2001 në SHBA.

Përmes këtyre aktiviteteve, Kosova shpreh solidaritetin dhe respektin për viktimat, familjet e tyre dhe popullin amerikan./A.K/

Sot nga ora 09:30, në Gjykatën Speciale në Hagë, do të vazhdojë fjala përfundimtare e mbrojtjes së Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit, të cilët akuzohen për vepra penale kundër administrimit të drejtësisë.

Në seancën e së enjtes, Zyra e Prokurorit të Specializuar kërkoi gjashtë vjet burgim për ish-presidentin Hashim Thaçi.

Për bashkëakuzuarit e tjerë, prokuroria kërkoi dënime më të ulëta: nga tre vjet burgim për Bashkim Smakajn, Isni Kilajn dhe Fadil Fazliun, si dhe nëntë muaj burgim për Hajredin Kuçin.

Prokurori Joshua Hafetz tha se kërkesat për dënim bazohen në provat dhe faktet e paraqitura gjatë procesit gjyqësor.

“Bazuar në të gjitha provat dhe faktet, Prokuroria kërkon që të merrni një vendim që përputhet me ligjin, provat dhe faktet. Pra, fajtorë për të gjitha pikat e aktakuzës”, ka thënë Hafetz.

Ndërkaq, mbrojtja e Hashim Thaçit ka kërkuar lirimin e tij nga të gjitha akuzat, duke argumentuar se provat e Prokurorisë nuk janë të mjaftueshme.

“Prokuroria iu kërkon juve që të dërgoni në burg z. Thaçin për 6 vjet për biseda që janë bërë në qendrën e paraburgimit, të cilat nuk kanë pasur asnjë ndikim në botën reale. Ne kërkojmë që vendimi juaj të bazohet në prova dhe jo në spekulime dhe që të jetë lirimi nga të gjitha akuzat”, ka thënë avokatja e Thaçit, Sophie Menegon.

Sipas mbrojtjes, disa nga dëshmitarët e përmendur në aktakuzë kanë deklaruar se nuk janë ndikuar nga askush. Menegon ka pretenduar gjithashtu se një pjesë e informacionit që pretendohet se është përmendur nga Thaçi gjatë vizitave në paraburgim ishte tashmë publike ose e njohur nga vizitorët e tij.

Thaçi, Smakaj, Kilaj, Fazliu dhe Kuçi akuzohen se, gjatë periudhës prill–nëntor 2023, kanë ndikuar në dëshmitë e dëshmitarëve të thirrur nga prokurorët në rastin gjyqësor për krime lufte kundër Thaçit dhe ish-udhëheqësve të tjerë të Shtabit të Përgjithshëm të UÇK-së.

Në këtë proces, Thaçi përballet me tri akuza për tentim dhe pengim të personave zyrtarë në kryerjen e detyrave zyrtare, si dhe tetë akuza për shkelje të fshehtësisë së procedurës dhe mosbindje ndaj gjykatës.

Ndërkohë, në rastin kryesor, Hashim Thaçi, Kadri Veseli, Rexhep Selimi dhe Jakup Krasniqi janë në pritje të vendimit, i cili pritet të shpallet më 16 shtator./A.K/

Sot nga ora 11:00 pritet të mbahet vazhdimi i seancës konstituive të Kuvendit të Kosovës, ku në rend dite është zgjedhja e pesë nënkryetarëve të Kuvendit. Zgjedhja e tyre dështoi në vazhdimin e seancës së mbajtur të mërkurën.

Në atë seancë, deputetja e Lëvizjes Vetëvendosje, Albulena Haxhiu, u zgjodh kryetare e Kuvendit të Kosovës.

Pas dështimit të konstituimit të Kuvendit, kryetari i Vetëvendosjes, Albin Kurti, tha se pajtueshmërinë për zgjedhjen e nënkryetarëve synon ta arrijë përmes një takimi me kryetarin e PDK-së, Bedri Hamza, dhe kryetarin e LDK-së, Lumir Abdixhiku.

Kurti tha se i ka ftuar dy liderët në takim dhe bëri thirrje për qasje konstruktive, në mënyrë që Kuvendi të konstituohet dhe të formohet sa më shpejt Qeveria e re. Megjithatë, që nga ajo ditë nuk është raportuar për një takim mes tyre.

Me zgjedhjen e kryetarit dhe pesë nënkryetarëve, Kuvendi konsiderohet i konstituuar.

Bazuar në aktgjykimin e Gjykatës Kushtetuese të 25 qershorit 2025, deputetët kanë pasur afat deri më 7 gusht për përfundimin e procesit të konstituimit. Megjithatë, edhe vazhdimet e mëhershme, edhe seanca e sotme, janë ftuar përtej këtij afati.

Në dy raste paraprake, Kurti kishte kërkuar kohë shtesë për të negociuar për çështjen e zgjedhjes së presidentit. Sipas tij, vetëm konstituimi i Kuvendit dhe formimi i Qeverisë nuk mjaftojnë për të shmangur zgjedhjet e reja, nëse nuk zgjidhet edhe presidenti i vendit.

Kurti dhe Abdixhiku më herët janë dakorduar për emrin e Bekim Sejdiut si kandidat i përbashkët për president. Megjithatë, kjo marrëveshje nuk e garanton kuorumin e nevojshëm prej 80 deputetësh, pasi gjashtë deputetë të LDK-së kanë dalë kundër.

Në vazhdimin e seancës së mbajtur të mërkurën, kryetarja e re e Kuvendit, Albulena Haxhiu, dha dy arsye për mosvazhdimin e procesit të konstituimit, të cilat ajo i cilësoi si pengesa për zgjedhjen e nënkryetarëve.

Arsyetimi i parë lidhej me propozimin e Listës Serbe për nënkryetar të Kuvendit. Haxhiu e konsideroi atë propozim jokushtetues për shkak të përdorimit të termit “populli serb”.

“Popull serb ka në Serbi, ndërsa Republika e Kosovës e ka popullin e Kosovës, ku 92% janë shqiptarë, 4% serbë dhe 4% nga komunitetet e tjera”, kishte thënë Haxhiu.

Përfaqësuesi i Listës Serbe, Igor Simiq, gjatë nominimit të Sllavko Simiqit për nënkryetar, kishte thënë se ai propozohet “në emër të popullit serb”.

I vetmi institucion në Kosovë që mund të japë interpretim për kushtetutshmërinë e një çështjeje është Gjykata Kushtetuese. Ndërkohë, i njëjti formulim ishte përdorur nga Lista Serbe edhe gjatë konstituimit të Legjislaturës VIII, më 22 mars 2021, kur Vetëvendosje e kishte votuar propozimin.

Arsyetimi i dytë i Haxhiut ishte se nuk kishte vota të mjaftueshme për kandidatët për nënkryetarë të propozuar nga PDK-ja dhe LDK-ja.

Megjithatë, emrat e nominuar nuk u hodhën në votim, përmes të cilit do të mund të verifikohej nëse kishin apo jo mbështetjen e deputetëve./A.K/

Instituti Hidrometeorologjik bën të ditur se sot moti do të jetë më i freskët, me diell dhe vranësira të ndryshueshme, por më freskët.

IHK njofton se temperaturat minimale do të lëvizin nga 10°C deri në 13°C, ndërsa maksimalet nga 25°C deri në 30°C.

Rënia më e theksuar e temperaturave maksimale pritet në zonat malore.

Do të fryjë erë nga drejtimi i veriperëndimit, me shpejtësi 1–5 m/s. /A.K/