Një person pa shenja jete është gjetur sot rreth orës 13:52 skaj rrugës ”Mërgimtarët e Gjilanit” në Gjilan.

Zëdhënësi i policisë rajonale për Gjilan Ismet Hashani, ka bërë të ditur se njësitet policore relevante kanë dalë me urgjencë në vendin e ngjarjes se bashku me një ekip nga emergjenca e spitalit të Gjilanit të cilët ka konstatuar se viktima është pa shenja jete.

“Nga hetimet e para dyshohet se viktima shtetas i Kosovës i vitit të lindjes 1987 është qëlluar nga armë zjarri. Në koordinim me Prokurorin e Shtetit njësiti i hetimeve rajonale ka filluar hetimet në identifikimin e personave të dyshuar, ndriçimin dhe sqarimin e rrethanave të këtij rastit”, ka thënë ai.

Me urdhër të Prokurorit të Shtetit trupi i pajetë është dërguar në Institutin e Mjekësisë Ligjore në Prishtinë për obduksion.

Presidentja Vjosa Osmani në fjalimin e saj në Samitin e Komunitetit Politik Evropian në Budapest, ka deklaruar se Kosova ka pasur mbështetjen e çdo administrate të SHBA-së qe nga fillimi i viteve ’90 dhe beson se kjo mbështetje do të vazhdojë edhe me administratën e presidentit Donald Trump.

Osmani ka thënë se Kosova do të kontribuojë në forcimin e marrëdhënieve euro-atlantike pasi një gjë e tillë është në dobi të sigurisë dhe paqes botërore.

“Është një iniciativë që beson fort në partneritetin midis vendeve evropiane si dhe Shteteve të Bashkuara, pra ajo beson në vlerat e përbashkëta euroatlantike. Besoj, si një vend që ka përfituar kaq thelbësisht nga ky partneritet euroatlantik, që zgjedhja e presidentit Trump do të vazhdojë të forcojë këtë marrëdhënie dhe sigurisht që të gjithë do të japim një kontribut në këtë drejtim. Unë besoj fuqishëm se ky bashkëpunim i fortë mes Evropës dhe Shteteve të Bashkuara do të vazhdojë, është në dobi të sigurisë dhe paqes botërore”, ka thënë Osmani.

Duke folur mbi dialogun mes Kosovës dhe Serbisë në Bruksel, Osmani ka shtuar se diskutimet po vazhdojnë mes kryenegociatorëve për mënyrën e zbatimit të marrëveshjeve të arritura, teksa bëri thirrje për vazhdimin e mbështetjes për Ukrainën.

“Po vazhdojnë diskutimet në Bruksel mes kryenegociatorëve, kryesisht se si mund të vazhdojmë me zbatimin e marrëveshjeve që janë arritur. Këtu siç e dini, temat janë vendosur, kryesisht është se si mund të bashkohemi të gjithë si vende evropiane në gjetjen e zgjidhjeve për çështje si paqja, stabiliteti, siguria ekonomike, si dhe kriza energjetike. Pra, ne do të japim kontributin tonë të vogël, por mendoj të rëndësishëm, dhe në të njëjtën kohë, sigurisht, do të bëjmë thirrje për vazhdimin e mbështetjes për Ukrainën, sepse ne besojmë se ky nuk është vetëm një kërcënim për sovranitetin e Ukrainës, por një kërcënim për sigurinë e të gjithëve ne, dhe sa më të fortë të jemi, aq më të bashkuar të jemi në përballjen me këtë sfidë të sigurisë në kontinentin tonë, aq më mirë për të gjithë ne”, ka thënë Osmani.

Ndërsa, për fitoren e republikanit Donald Trump, presidentja e Kosovës ka theksuar se nuk e sheh si kërcënim.

“Nuk e shoh si kërcënim, Kosova në fakt ka përfituar për dekada nga një mbështetje mbi partizane nga Shtetet e Bashkuara. Ne u bëmë të pavarur kur republikanët ishin në pushtet, ne u bëmë të lirë kur demokratët ishin në pushtet, ne punuam shumë ngushtë me çdo administratë dhe unë besoj fuqimisht që do të vazhdojë të jetë kështu”, ka theksuar ajo.

Presidentja ka potencuar se është një mundësi për të përmirësuar marrëdhëniet tona dhe për të pasur një rol të fortë të Shteteve të Bashkuara për çështjet që kanë të bëjnë me paqen, stabilitetin, sigurinë dhe prosperitetin në Ballkanin Perëndimor.

Komuniteti Politik Evropian u themelua mbi parimin e pozitës së barabartë të të gjithë anëtarëve, të gjitha vendeve brenda kontinentit evropian, me qëllim jo vetëm diskutimin, por edhe gjetjen e zgjidhjeve për sfidat e përbashkëta.

Një veturë është vet-aksidentuar të enjten rreth orës 13:00 në rrugën “Ahmet Krasniqi”, në Prishtinë. 

Vetura ka përfunduar në një pompë të derivatave.

Vozitësja e një veture ka marrë lëndime trupore, ndërsa lajmin e ka konfirmuar zëdhënësja e Policisë së Kosovës për rajonin e Prishtinës, Flora Ahmeti.

Sipas saj, e lënduara është dërguar për trajtim mjekësor.

“Rreth orës 13:00, është pranuar informata për një aksident trafiku të ndodhur në rrugën ‘Ahmet Krasniqi’ në Prishtinë. Në këtë aksident është përfshirë një automjet dhe për pasojë vozitësja është lënduar dhe e njëjta është dërguar për trajtim mjekësor”, ka thënë Ahmeti.

Ndërkaq ajo shtoi se njësia rajonale e trafikut ka dalë në vendin e ngjarjes dhe ka nisur një hetim lidhur me rrethanat e këtij vet-aksidenti.

Përkundër premtimeve e investimeve miliona euro tash e disa vjet për eliminimin e qenve endacakë, ata vazhdojnë të paraqesin problem për qytetarët.

Në hapësirat publike, në të cilat qarkullojnë mijëra persona brenda ditës, qentë endacakë vazhdojnë të ndjellin frikë tek qytetarët. Këta të fundit ankohen për sulmet nga qentë, derisa planet për largimin e tyre, duket se nuk po kanë edhe aq sukses. E Fondacioni për të Drejtat e Kafshëve thekson rëndësinë e rritjes së numrit të inspektorëve veterinarë dhe kritikon autoritetet lokale për menaxhimin e dobët të situatës me këtë lloj të kafshës.

Vetëm nga janari deri në fillim të muajit tetor, rreth 130 qytetarë kanë kërkuar ndihmë në Qendrën Emergjente pranë Qendrës Klinike Universitare të Kosovës (QKUK) nga kafshimi i qenve endacakë.

Qytetari Xhemajl Dakaj derisa tregon rastin se si i janë vërsulur qentë, potencon se nuk është realizuar premtimi për largimin e tyre.

“Kanë qenë 4-5 qen endacakë dhe trotuarit duke ec edhe unë në të njëjtën anë të trotuarit isha kur i pashë ata, e lakova rrugën dola në anën tjetër. Kur i kalova më janë sulur. Pikonte shi e kisha ombrellën dhe me të i prita, por njëri më kishte dalë mbrapa dhe më kapi në këmbë. Por, për fat nuk shkoi në thellësi në muskuj, por vetëm një gërvishtje që doli gjak. Shkova mora injeksione kundër helmimit… Përparim Rama, ky pikë të parë në fushatën parazgjedhore e ka dhënë këtë premtim për qentë endacakë, më kujtohet shumë mirë. Nuk ka bërë asgjë. Normalisht që duhet të hiqen”, thotë Dakaj.

Enver Neziri thotë se shpeshherë has në grumbullin e qenve endacakë.

“Shko shiko te qeveria janë pesë a gjashtë qen duke fjetur… [A keni qenë ndonjëherë të rrezikuar prej qenve?] Po, kam qenë po i kam trembur, i kam ndjekur. Atë që frikësohet e kapin më shumë… Kam pasur rrezik shumë herë… T’i dërgojnë diku nëpër fshatra, t’i strehojnë diku, ose nëpër qendra. Në shkollë të shkosh ka qen, te xhamia ka qen, gjithkund”,thotë Neziri.

Drejtori i Emergjencës në QKUK, Naser Syla në një prononcim potencon se numri i sulmeve nga qentë ka shënuar rritje krahasuar me vitin e kaluar. Ai shton se një numër i konsiderueshëm i rasteve që janë kafshuar nga qentë pa pronar, janë staf shëndetësor.

“Është rritur numri, kohëve të fundit është rritur shumë i pacientëve që kanë kërkuar trajtim këtu tek ne nga sulmi apo kafshimi prej qenve. Deri javën e kaluar që i kemi nxjerrë statistikat janë evidentuar 127 raste prej 1 janarit deri në javën e fundit. Statistikat e fundit janë nxjerrë të premten e kaluar (11 tetor). Por, për fat të mirë, prej këtyre 127 këtë vit, vetëm një ka përfunduar në spital për trajtim më të gjatë. Kurse të tjerët të gjithë janë trajtuar këtu tek ne në qendrën emergjente dhe kanë shkuar në shtëpi pas terapisë së marrë… Vitin e kaluar kanë qenë 86 raste. Një numër i madh (i të sulmuarve nga qentë) kanë qenë profesionistë shëndetësorë edhe vitin e kaluar ka pasur profesionistë shëndetësorë”,tregon Syla.

E në kryeqytet shumë shpejt pritet të funksionalizohet qendra për strehimin e qenve pa pronar.

Drejtori i Shërbimeve Publike në Komunën e Prishtinës, Bekim Brestovci zotohet se deri në mars të viti 2025 do të largohen deri në 1 mijë e 500 qen pa strehim nga kryeqyteti.

Ndërsa, në kohën kur ekipi i KosovaPress-it vizitoi qendrën në Hajvali javën e kaluar, aty ndodheshin vetëm katër qen.

“Sipas dinamikës që ne e kemi krijuar, po pretendojmë t’i kapim mes 40 dhe 50 qen brenda javës deri në funksionalizmin e qendrës tonë të strehimit. Më pastaj këtë dinamikë do e rrisim sepse tanimë, është i njohur premtimi im publik që deri në fund të muajit mars të vitit të ardhshëm, të bëjmë largimin e 1300 deri 1500 qenve endacakë nga hapësirat publike. Të njëjtit do të trajtohen, por besojmë që shumica e tyre edhe do të kalojnë në adaptim…Qendra për strehim është e ndarë në dy faza. Faza e parë besoj që maksimalisht edhe dy javë funksionalizohen”,tregon Brestovci.

Ndërkaq, lidhur me raportimet për sulmet nga qentë në QKUK, Brestovci premton se vullnetarisht do t’i largojnë qentë nga aty, porse thekson se nuk është përgjegjësi e komunës.

“Për hapësirat brenda Qendrës së Klinikës Universitare, Komuna e Prishtinës nuk është përgjegjëse për sigurinë brenda për brenda atij lokacioni… Jemi zotuar që deri në fund të këtij muaji, më së largu deri në përfundim të javës së parë muajit nëntor t’i largojmë të gjithë qentë nga QKUK. Po i dalim ndihmë edhe atyre”, shton Brestovci.

Ai tregon se deri më tani janë adaptuar rreth 300 qen.

Udhëheqësja e Fondacionit për të Drejtat e Kafshëve, Elza Ramadani thotë se komunat shpenzojnë mijëra euro për zgjidhjen e problemit me qentë endacakë, porse projektet e tyre janë afatshkurtra.

“Komunat bëjnë disa projekte shumë afatshkurtra dhe të pamenduara për një afat më të gjatë. Strategjia kombëtare për menaxhimin dhe kontrollin e qenve me dhe pa pronar që është aprovuar në tetor të vitit 2022 e parasheh pikërisht këtë, që të ndërmerret një masë më gjithëpërfshirëse. Deri më tani komunat ku ne si organizatë gjithmonë i kemi kritikuar, ka pasur të bëjë me mungesën e monitorimeve të projekteve. Është bërë kastrimi, sterilizimi me 50 mijë euro, 100 mijë euro ka edhe komuna që kanë shpenzuar 300 mijë euro për qentë endacak . Dhe prapë nuk e kanë asnjë të dhënë si duhet, nuk e dinë se çfarë ndikimi ose çfarë rezultati ka sjellur ai projekt për komunitetin aty”,potencon Ramadani.

Përveç këtyre, Ramadani thekson se duhet bërë më shumë inspektime në këtë drejtim dhe se sipas saj duhet shqiptuar dënime për ata që i braktisin qentë.

“Niveli qendror ka nevojë që t’i rrisë inspektorët veterinarë. Të bëjë inspektime më shumë, t’i mbyllë petshopet ilegale, të kontrollojë mbarështimin e qenve, importin e qenve prej vendeve fqinje, identifikimin dhe regjistrimin. Të bëjnë dënime dhe ndëshkime për ata që braktisin dhe shumë aspekte të tjera”, shprehet Ramdani.

Ndërkaq, kryeministri i Kosovës, Albin Kurti në takimin e fundit me kryetarët e komunave të Kosovës deklaroi se si qeveri janë të gatshëm të bashkëfinancojnë për ndërtimin e qendrave të strehimit për qentë endacakë. Ai kërkoi nga komunat që të bëjnë analizimin e hapësirave dhe të caktojnë vendin se ku duhet ndërtuar ato.