Një person është arrestuar në Prishtinë, pasi dyshohet se ka sulmuar fizikisht dy zyrtarë policorë në rrugën “Lidhja e Pejës”.

Sipas Policisë së Kosovës, rasti ka ndodhur më 28 tetor, rreth orës 14:00, kur i dyshuari, duke drejtuar një veturë me targa vendore, ka hyrë në mes të kolonës së automjeteve që po shoqërohej nga policia.

Gjatë verifikimit nga zyrtarët policorë, i dyshuari i ka sulmuar dy prej tyre, ndërsa njëri ka pranuar trajtim mjekësor.

Me vendim të prokurorit, i dyshuari është dërguar në mbajtje për 48 orë.

/A.K/

Policia e Kosovës ka raportuar disa raste të dhunës në familje në Fushë Kosovë, Prishtinë, Kamenicë, Novobërdë, Deçan, Pejë dhe Malishevë, të ndodhura më 27 dhe 28 tetor.

Në Fushë Kosovë, një burrë dyshohet se ka sulmuar fizikisht bashkëshorten e tij, e cila ka pranuar trajtim mjekësor. I dyshuari është dërguar në mbajtje me vendim të prokurorit.

Në Prishtinë janë raportuar tri raste. Në rastin e parë, një grua ka raportuar se ish-partneri i saj me të cilin kishte bashkëjetuar kishte ushtruar dhunë psikike ndaj saj. I dyshuari është liruar në procedurë të rregullt. Në një rast tjetër, një burrë dyshohet se ka sulmuar vajzën e tij, e cila ka pranuar trajtim mjekësor, ndërsa i dyshuari nuk është takuar nga policia. Po ashtu, një burrë është arrestuar nën dyshimin se e ka kërcënuar me video-incizime një grua me të cilën ishte në lidhje dashurie. Ai është dërguar në mbajtje.

Në Kamenicë, një burrë është arrestuar nën dyshimin se ka sulmuar fizikisht bashkëshorten e tij. Viktima ka pranuar trajtim mjekësor, ndërsa i dyshuari është dërguar në mbajtje.

Në Novobërdë, një burrë dyshohet se ka sulmuar fizikisht vajzën e tij të mitur, e cila ka çrregullime mendore. Viktima ka pranuar trajtim mjekësor, ndërsa i dyshuari është dërguar në mbajtje për 48 orë.

Në Deçan, një grua ka raportuar se bashkëshorti i saj ushtronte vazhdimisht dhunë psikike ndaj saj. Gjatë intervistimit, i dyshuari ka deklaruar se posedonte një armë automatike. Policia ka shkuar në shtëpinë e tij dhe ka sekuestruar armën, së bashku me një karikator të zbrazët. Pas intervistimit, ai është liruar në procedurë të rregullt.

Në Pejë, një grua është sulmuar fizikisht nga vëllai i saj pas një mosmarrëveshjeje familjare. Të dy janë intervistuar, ndërsa i dyshuari është liruar në procedurë të rregullt.

Ndërkaq, në Malishevë, një grua është arrestuar nën dyshimin se e ka kanosur djalin e saj pas një mosmarrëveshjeje lidhur me një kontest pronësor. Me vendim të prokurorit, ajo është dërguar në mbajtje për 48 orë.

/A.K/

Një 29-vjeçar nga Mati është ekstraduar nga Frankfurti i Gjermanisë drejt Shqipërisë, në kuadër të operacionit “The Wanted”, pas shpalljes së tij në kërkim ndërkombëtar.

Sipas Policisë së Shtetit, shtetasi me inicialet A. Gj. ishte shpallur në kërkim pasi, në maj të vitit 2024, Gjykata e Posaçme e Shkallës së Parë për Korrupsionin dhe Krimin e Organizuar i kishte caktuar masën e sigurisë “Arrest në burg”.

Ai dyshohet për veprat penale “Sigurimi i kushteve dhe i mjeteve materiale për të kryer vrasje”, në kuadër të një grupi të strukturuar kriminal, si dhe për “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.

Arrestimi i tij në Gjermani u bë i mundur falë bashkëpunimit mes Interpol Tiranës dhe Interpol Wiesbaden. Më pas, specialistët e Interpol Tiranës realizuan ekstradimin e tij drejt Shqipërisë.

/A.K/

Protestat për drejtësi për Arlinda Zekajn dhe për të gjitha gratë e vrara në Kosovë do të mbahen sot, më 29 tetor, në Prishtinë dhe Ferizaj, me kërkesa për llogaridhënie institucionale dhe masa konkrete për mbrojtjen e grave nga dhuna.

Në Prishtinë, protesta kombëtare do të nisë në orën 16:00, në sheshin “Zahir Pajaziti”. Organizatorët u kanë bërë thirrje qytetarëve që t’i bashkohen tubimit për të kërkuar drejtësi për Zekajn dhe përgjegjësi nga institucionet përkatëse.

Përmes një njoftimi për media, organizatorët kanë paralajmëruar se protestat do të vazhdojnë dhe se do të ketë bllokim të institucioneve deri në përmbushjen e kërkesave të tyre.

“Sot, në orën 16:00, në sheshin Zahir Pajaziti, mblidhemi prapë për të kërkuar drejtësinë që Arlinda na e la amanet dhe drejtësi për të gjitha gratë e vrara”, thuhet në njoftim.

Ata kanë kërkuar solidaritet qytetar dhe përgjegjësi institucionale, duke theksuar rëndësinë e garantimit të sigurisë dhe lirisë për gratë, si dhe të drejtësisë për viktimat e dhunës.

Ndërkohë, në Ferizaj protesta do të nisë në orën 12:00, para objektit të Komunës. Sipas organizatorëve, pas tubimit do të ketë ndalesa para Qendrës për Punë Sociale, Stacionit Policor dhe Gjykatës, ku do të kërkohet përgjegjësi institucionale për rastin e Zekajt.

Organizatorët u kanë bërë thirrje edhe mediave që ta përcjellin protestën dhe kërkesat e tyre për drejtësi e llogaridhënie.

Vrasja e Arlinda Zekajt në Vitomiricë të Pejës ka nxitur reagime publike dhe protesta, me kërkesa për hetimin e veprimeve të institucioneve përgjegjëse dhe forcimin e mekanizmave për mbrojtjen e grave nga dhuna.

Para se të vritej, Zekaj kishte paraqitur një parashtresë në Prokurorinë Themelore në Pejë, përmes së cilës kishte kërkuar masa urgjente, duke shprehur shqetësime për sigurinë e saj.

Protestuesit kërkojnë që rasti të trajtohet me seriozitet dhe që institucionet të japin llogari për veprimet e tyre, si dhe të ndërmerren masa konkrete për parandalimin e rasteve të ngjashme në të ardhmen.

/A.K/