Lajmet

Kurti kritikon sistemin e drejtësisë: Reforma është domosdoshmëri

Ai përmendi se qytetarët janë të pakënaqur me prokurorinë dhe gjyqësorin.

Published

2 years ago

August 9, 2023

UBT news

Kryeministri Albin Kurti në adresimin e tij në fillim të mbledhjes së Qeverisë së Kosovës ka shfaqur pakënaqësi ndaj sistemit të drejtësisë, duke deklaruar se vettingu është zgjidhja e duhur. Ai përmendi se qytetarët janë të pakënaqur me prokurorinë dhe gjyqësorin ndërsa u shpreh se për vendime meritore nga gjykatat duhet të ketë reagim nga shoqëria.

Kurti tha se janë të shumta rastet kur si pasojë e mosveprimit të sistemit të drejtësisë, persona të ndryshëm me precedentë të shumtë penalë, lëvizin lirshëm, rrezikojnë dhe marrin jetën e qytetarëve tanë, një referim për rastin e ndodhur në lokalin “Bon Vivant” natën e 4 gushtit.

Kurti tha se edhe në raporte të ndryshme kredibile vendore dhe ndërkombëtare konstatohet se drejtësia vazhdon të jetë joefikase dhe e ngadaltë dhe të përshkruhet me fenomenin e rasteve të shumta në rigjykim dhe vendimeve jo të duhura ndëshkimore.

Duke folur për rastin e vrasjes së Marigona Osmanit, kreu i ekzekutivit kosovar u shpreh se autorët morën dënim meritor vetëm pasi shoqëria reagoi ashpër ndaj krimit.

“Në shumë raste, kur ndodhë një krim, po duhet të ngrihet shoqëria në mënyrë që të kemi vendim meritor nga gjykata. Shembull është rasti i fundit me shqiptimin e dënimit me burgim të përjetshëm të vrasësit të së ndjerës Marigona Osmani, pra Dardan Krivaqa. U dashtë një shoqëri e një popull i tërë ta dënojë publikisht krimin, në mënyrë që gjykata të mund ta nxjerrë një verdikt meritor. Vendimet meritore të sistemit të drejtësisë kanë ndikim të dyfishtë në shoqërinë e çdo vendi. Përveçse sjellin drejtësi për viktimat dhe të dëmtuarit, ato diktojnë edhe parashikueshmërinë e pasojave të çdo veprimi jo të ligjshëm e penal, duke ndikuar kështu edhe në parandalimin e krimeve”, tha Kurti.

Kurti e quajti “vendim ekstrem” edhe atë për Naser Pajazitajn, i dënuar fillimisht me burgim të përjetshëm për vrasjen e Donjeta Pajazitajt ndërsa Supremja e liroi nga akuzat dhe e la të lirë.

Kryeministri Kurti u shpreh se niveli i besimit të qytetarëve në organet e drejtësisë vazhdon të jetë ndër më të ulëtit në krahasim me institucionet e tjera. Duke cituar raportin e UNDP dhe USAID, tha se kënaqshmëria e qytetarëve për performancen e sistemit të drejtësisë – gjykata dhe prokurorinë – është vetëm 29%.

Sipas tij, zgjidhja e vetme janë reformat dhe vettingu në sistemin e drejtësisë.

“Sipas statistikave të gjyqësorit, gjatë vitit 2022 Gjykata e Apelit kishte kthyer në rigjykim plotë 1,754 raste. Ky raport e rëndon sistemin e drejtësisë, e ngulfat atë, e vonon drejtësinë, e humb besimin e qytetarëve, dhe si efekt përfundimtar, në mungesë të ndëshkueshmërisë efikase, rrezikon të inkurajojë krimin dhe kriminalitetin. Andaj, reforma është domosdoshmëri e vettingu është zgjidhja. Tash e 5 muaj jemi në pritje që Gjykata Kushtetuese t’i hap sa më shpejtë rrugë jetësimit të kësaj reforme. E koha po kalon. Koha që kalon është kohë e humbur”, tha Kurti.

Në fund, Kurti përshëndeti edhe njëherë letrën e mbi 50 deputetëve dhe 10 kryetarëve të komisioneve parlamentare të politikave të jashtme që i bën thirrje Bruskelit, Uashingtonit dhe Londrës një qasje më të ashëpr ndaj Serbisë në raport me Kosovën.

Lajmet

Rutte në takim me Ramën: Shqipëria është një aleat i dedikuar

Published

4 minutes ago

September 17, 2025

UBTnews

Sekretari i Përgjithshëm i NATO-s, Mark Rutte, ka nisur sot bashkëbisedimet me kryeministrin e Shqipërisë, Edi Rama, në selinë e NATO-s, në Bruksel.

Përpara mediave Rutte pohoi se Shqipëria vazhdimisht paraqet një partner të besusheshëm, në të cilin NATO mund të mbështetet. Ai theksoi përpjekjet e Shqipërisë për të rritur mbrojtjen e shtetit, por edhe mbrojtjen e saj përtej territorit shqiptar.

Rutte: “Shqipëria është një aleat i dedikuar. Shqipëria do të arrijë 2 për qindëshin e shpenzimeve të mbrojtjes këtë vit. Shqipëria po zhvillon bazën e industrisë së mbrojtjes, duke përfshirë ndërmarrjen e saj shtetërore. Je duke ndihmuar shumë me Ukrainën përmes delegacionit shqiptar, por, gjithashtu përmes trajnimit të gjuhës. Jashtë Shqipërisë, merrni pjesë në ushtritë e tokëve të huaja në Letoni dhe në Bullgari, jeni aktivë në Kosovë me KFOR. Pra, po shkoni përtej pritshmërive. NATO mund të mbështetet në Shqipëri dhe anasjelltas”.

Ndërkohë, Rama përmendi rilindjen e industrisë ushtarake të Shqipërisë, bashkëpunimin për portin ushtarak në Portin Romano dhe mundësinë për t’u anëtarësuar në programet e sigurisë së Bashkimit Evropian.

Rama: “Ne po në lançojmë rilindjen e industrisë ushtarake, jemi shumë entuziastë të bisedojmë me ty për punën që mund të bëjmë më tej për portën ushtarake ‘greenfield’ në Portin Romano. Gjithashtu, jemi këtu të flasim për se si mund të anëtarësohemi në programin e sigurt të Bashkimit Evropian. Siguria shkon përtej parametrave të shteteve të BE-së, shtetet e NATO-s në Evropë mund të përfitojnë gjithashtu nga ajo”./D.B/KP

Lajmet

FIFA ndan një shumë rekorde për klubet në Kupën e Botës 2026

Published

45 minutes ago

September 17, 2025

UBT News

FIFA ka njoftuar se do të shpërndajë një shumë rekord prej 355 milionë dollarësh për klubet në mbarë botën në kuadër të Programit të Përfitimeve për Klubet (CBP) të lidhur me Kupën e Botës 2026.

Për herë të parë, pagesat do të përfshijnë jo vetëm lirimin e lojtarëve për fazën finale të turneut, por edhe për ndeshjet kualifikuese.

Ky vendim është rezultat i një marrëveshjeje të arritur mes FIFA-s dhe Shoqatës Evropiane të Klubeve (ECA) në mars të vitit 2023, me synim që sistemi të jetë më i drejtë dhe gjithëpërfshirës, duke siguruar përfitime për klubet në të gjitha kontinentet.

Shuma e ndarë është rreth 70% më e lartë krahasuar me 209 milionë dollarët e shpërndarë pas Kupës së Botës 2022 në Katar.

“Një shumë rekord prej 355 milionë dollarësh do t’u shpërndahet klubeve për lirimin e lojtarëve të tyre. Kjo përforcon bashkëpunimin tonë me ECA-n dhe klubet në mbarë botën, teksa presim një edicion inovativ e globalisht gjithëpërfshirës të Kupës së Botës FIFA vitin e ardhshëm,” deklaroi presidenti i FIFA-s, Gianni Infantino.

Edhe presidenti i ECA-s, Nasser Al-Khelaifi, përshëndeti marrëveshjen, duke theksuar se kjo nismë vlerëson rolin e klubeve në zhvillimin e futbollit ndërkombëtar dhe garanton që gjithnjë e më shumë prej tyre të shpërblehen për kontributin e tyre.

Në edicionin e fundit, Katar 2022, 209 milionë dollarë u shpërndanë për 440 klube nga 51 shoqata anëtare të FIFA-s.

Ndërkohë, edicioni i ardhshëm i Kupës së Botës do të zhvillohet nga 11 qershori deri më 19 korrik 2026 në Shtetet e Bashkuara, Meksikë dhe Kanada./S.K/KP/

Aktualitet

Profesoresha e UBT-së, Jeta Kiseri – Kubati, me publikim në revistën ndërkombëtare IJBM

Published

48 minutes ago

September 17, 2025

Driton Iseni

Prof. Asoc. Dr. Jeta Kiseri – Kubati, profesoreshë në UBT, ka botuar punimin e saj të fundit në revistën shkencore ndërkombëtare International Journal of Biomedicine (IJBM), e indeksuar në Scopus, një prej databazave më prestigjioze shkencore në botë.

Artikulli i titulluar: “Retention Practices of Orthodontists in the Western Balkans”, është rezultat i një bashkëpunimi ndër-rajonal mes UBT-së, Fakultetit të Stomatologjisë në Universitetin e Rijekës dhe Fakultetit të Stomatologjisë në Shkup.

Ky studim origjinal përfshiu një hulumtim të gjerë me mbi 450 ortodontë nga Kroacia, Maqedonia e Veriut dhe Kosova, duke analizuar praktikat dhe protokollet e mbajtjes pas trajtimit ortodontik. Rezultatet zbuluan dallime të rëndësishme mes vendeve sa i përket përdorimit të pajisjeve, ndjekjes së pacientëve dhe faktorëve që ndikojnë në zgjedhjen e metodave të mbajtjes.

Studimi thekson se:

Ortodontët në Kosovë i kushtojnë më shumë rëndësi moshës së pacientëve dhe rritjes biologjike,
Në Kroaci dhe Maqedoninë e Veriut përzgjedhja bazohet kryesisht në llojin e malokluzionit,
Praktikat e kujdesit dhe dhënies së udhëzimeve të shkruara për pacientët ndryshojnë dukshëm mes vendeve.

Ky publikim jo vetëm që pasuron literaturën shkencore ndërkombëtare në fushën e ortodonciës, por gjithashtu nënvizon rëndësinë e bashkëpunimit akademik rajonal dhe potencialin që ka UBT për të kontribuar në shkencë dhe inovacion.

Për më shumë, punimi është publikuar më 5 shtator 2025 dhe mund të lexohet në linkun zyrtar: Retention Practices of Orthodontists in the Western Balkans – IJBM