Lajmet

​Kurti: Administrata Publike efikase çon në Bashkim Evropian

Publikuar

Kryeministri i Kosovës, Albin Kurti ka deklaruar se Reforma e Administratës Publike sjell përmirësime në jetën e qytetarëve, rritjen ekonomike, drejtësinë, punësimin, e sipas tij edhe në integrimin evropian e euroatlantik. Ai shtoi se kjo reformë është prioritet i qeverisë.

Kurti në konferencën “KosovaPar2023”, të organizuar nga Ministria e Punëve të Brendshme, potencoi se një administratë publike efikase, moderne, transparente dhe llogaridhënëse, është çelësi i të gjitha reformave tjera.

“Kur jemi tek Reforma e Administratës Publike duhet të theksoi se ajo është prioritet i qeverisë sonë. Praktika e shteteve të tjera në botë ka dëshmuar se një administratë publike efikase, moderne, transparente dhe llogaridhënëse, është çelësi i të gjitha reformave tjera… Përveç funksionimit të mirë të institucioneve, reforma e Administrata Publike, gjithashtu sjell përmirësime në jetën e qytetarëve tanë, rritjen ekonomike, drejtësinë dhe punësimin, e rrjedhimisht edhe integrimin evropian e euroatlantik. Andaj, ne jemi të përkushtuar që këto reforma t’i bëjmë realitet. Ka një mori studimesh të cilat vërtetojnë se shpejtësia e integrimit evropian të një vendi që aspiron anëtarësim në Bashkimin Evropian, me cilësinë e administratës publike e ka korrelacionin më të fortë edhe se me mirëqenin qytetare, zhvillimin ekonomik apo progresin shoqëror”, tha Kurti.

Ndër të tjera, shefi i ekzekutivit, Albin Kurti theksoi se “nuk mund të kemi barazi shoqërore, nëse nuk kemi barazi gjinore”. Ai shtoi se dallimi mes pagës më të ulët dhe asaj më të lartë ka kaluar nga 20 herë në 4.78 herë.

Kurti tha se numri i shërbimeve të digjitalizuara ka kaluar nga 20 në mbi 150 shërbime përmes portalit “E-Kosova”, derisa shtoi se 56 për qind e qytetarëve i besojnë qeverisë, sipas parametrit për Ballkanin 2023.

“Nuk mund të kemi barazi shoqërore nëse nuk kemi barazi gjinore dhe luftimi i pabarazisë, testin më të saktë e ka pikërisht tek pjesëmarrja e grave dhe te vendimmarrja e grave. Përfaqësimin e drejtë të komuniteteve jo shumicë në çdo kategori, mundësi të barabarta për punësimin e personave me aftësi të kufizuara… Dallimi mes pagës më të ulët dhe asaj më të lartë…ka kaluar nga 20 herë sa ishte në vetëm 4.78 herë…numri i shërbimeve publike të digjitalizuara ka kaluar nga më pak se 20 në mbi 150 shërbime përmes portalit unik ‘E-Kosova’, duke përfshirë shërbimet e gjendjes civile… Kosova mund të jetë një vend relativisht jo i madh, por ajo dhe populli i saj janë pishtar të idealeve të inspiruara nga mendjet më të ndritura në botë… Sipas parametrit për Ballkanin 2023, 56 për qind e qytetarëve i besojnë qeverisë, rritje mesatare ekonomike për vitet 2021 dhe 2022 mesatarisht ka qenë 7.9 për qind”, tha ai.

Ndërkaq, Ministri i Punëve të Brendshme, Xhelal Sveçla tha se janë këmbëngulës që Administratën Publike ta kthejnë në shërbim të përkushtuar për mbështetje të zhvillimit shoqëror, forcimit të shtetit e ngritje të shërbimeve.

Ai shtoi se Administrata Publike është përgjegjëse e drejtpërdrejt për ekzekutimin e politikave qeveritare, për çka tha se duan një administratë që përveç tjerash “respekton qytetarin dhe jep kontribut në dinjitetin, vlerën dhe potencialin e tij”.

“Kjo konferencë ndërkombëtare që është e para e këtij lloji që organizohet në Kosovë, tregon se synimi ynë për një administratë shtetërore, moderne dhe efikase, nuk ishte vetëm një premtim. Ne kemi filluar formimin dhe jemi këmbëngulës që Administratën Publike ta kthejmë në një shërbim të përkushtuar për mbështetje të zhvillimit shoqëror, forcimit të shtetit e ngritje të shërbimeve për secilin qytetar e komunitet të bindur se kjo është mënyra më e mirë për rritjen e objektivave qeveritare për mirëqenie dhe zhvillim…Administrata Publike është përgjegjëse e drejtpërdrejtë për ekzekutimin e politikave qeveritare dhe ne duam një administratë që përveç tjerash respekton qytetarin dhe jep kontribut në dinjitetin vlerën dhe potencialin e tij. Ministria e Punëve të Brendshme ka arritur që ta hartojë dokumentin ligjore, akte nën ligjore dhe kemi ndërmarrë një sërë veprimesh për zbatimin e tyre”, theksoi Sveçla.

Ndërsa, ambasadori gjerman, Jorn Rohde, tha se administrata publike garanton stabilitet dhe praktikë për njerëzit dhe bizneset, derisa shtoi se “tani më shumë se kurrë kemi nevojë për një administratë publike të fortë, fleksibile dhe të aftë”.

Rohde theksoi se çdo sukses i projektit varet nga funksionaliteti i administratës publike.

“Administrata publike garanton stabilitet dhe praktikë për njerëzit dhe bizneset. Veçanërisht ndërsa jemi dëshmitarë se bota po ndryshon me shpejtësi, sfidat e reja shfaqen shpesh, ne më shumë se kurrë kemi nevojë për një administratë publike të fortë, fleksibile dhe të aftë. Në fund por jo për nga rëndësia, pagesë adekuate për t’i përballuar këto sfida… Gjithsesi, ju jeni duke u përballur me pritshmëri të mëdha në rritje qofshin ato nga qytetarët, që dëshirojnë të funksionojnë gamën e shërbimeve, qoftë nga bizneset që dëshirojnë të kenë një mjedis miqësor ndaj biznesit, me gjithë pritshmëritë nga BE-ja duke shpresuar të shohin administratën të zbatojë politikat e arritjes… Ne gjithashtu zbatojmë projekte që mbështesin integrimin në BE, efiçencën e energjisë, menaxhimin e ujërave të zeza, fuqinë punëtore të kualifikuar dhe sipërmarrjen. Megjithatë, çdo sukses i projektit varet nga funksionaliteti i administratës publike”, potencoi Rohde.

Ministria e Punëve të Brendshme sot (e mërkurë) ka bërë hapjen e konferencës KosovaPar2023, në të cilën po marrin pjesë pjesëmarrës nga 20 shtet të botës.

Kjo konferencë do të vazhdoje për dy ditë, ku do të diskutohet për Reformat në Administratën Publike për një qeverisje të mirë, të qëndrueshme dhe fleksibile.

Lajmet

​Tahiri: Kurti nuk ka shpëtim nga ballafaqimi me opozitën, veç vonim

Publikuar

nga

Shefi i Grupit Parlamentar të Aleancës për Ardhmërinë e Kosovës, Besnik Tahiri deklaroi se debati për tri vjet qeverisje do të ndodhë. Ani pse nuk është dhënë një datë e re për mbajtjen e kësaj seance, ai tha se “ka vetëm vonim, se shpëtim nuk ka prej ballafaqimit të kryeministrit me opozitën”. Sipas tij, qeveria e cila udhëhiqet nga kryeministri Albin Kurti është kampione e dështimeve të vendit.

Pas dështimit të seancës, shefi i Grupit Parlamentar të Aleancës për Ardhmërinë e Kosovës, Besnik Tahiri deklaroi se në seancën e ftuar për ditën e sotme nuk pati deputetë të mjaftueshëm për të vijuar debati parlamentar.

“Nuk pati deputetë për të diskutuar dhe për tu ballafaquar me një qeveri e cila është kampione e dështimeve të vendit. Kjo qeveri nuk ka pse t’i del qytetarëve përpara, nuk ka si t’i del pensionistëve përpara, nuk ka si të ju del 80 mijë shërbyesve civil përpara. Nuk ka si të ju del përpara pagës minimale, më e ulëta në Ballkan, nuk ka si të ju del zyrtarëve publik, e cila ju rrezikohet siguria juridike dhe mbi të gjitha nuk ka si të ju del as vëllezërve dhe motrave në diasporë, ku që nga korriku i vitit 2023 nuk ka arritur të bëjë një marrëveshje të vetme për të ndodhur votimi në ambasada në vendet përkatëse”, u shpreh ai.

Tahiri para mediave shtoi se debati do ballafaqimi i kryeministrit Albin Kurti me opozitën do të ndodhë.

“Kryeministri Kurti duke u dorëzuar ka krijuar një pozicion për të negociuar kushtet e dorëzimit me opozitën, mirëpo ne këto kushte nuk i pranojmë, ne presim herët a vonë kapitullimin e këtij përmes dorëheqjes. Ka vetëm vonim, se shpëtim nuk ka prej ballafaqimit të kryeministrit me opozitën me gjitha këto tema. Debati do të ndodhë nuk ka qysh ik, është i protokolluar në kryesi dhe kurdo që të jetë ai debat do të jetë ballafaqimi i të vërtetës dhe i një super mashtrimi që ka ndodhur tash e tri vjet e gjysmë”, deklaroi ai para mediave.

Ai theksoi se të gjithë deputetët e AAK-së kanë qenë të pranishëm, përveç kryetarit, Ramush Haradinaj dhe deputetes Time Kadriaj.

“Në nisje unë e nisi debatin, sot ka qenë një ngjarje e rëndësishme për heroin e kombit, Shkelzen Haradinaj në Gllogjan, dy deputetë kanë munguar. Nuk kanë qenë kryetari Ramush Haradinaj dhe deputetja Time Kadriaj. Mirëpo, unë e kam thirrur unë e kam pasur fjalën në emër të grupit si iniciues dhe në emër të grupit parlamentar fjalën e ka pasur Bekë Berisha”, përfundoi ai.

Debati parlamentar për Qeverinë Kurti ka dështuar në mungesë të deputetëve, ku kryeparlamentari Glauk Konjufca bëri të ditur se të pranishëm kanë qenë vetëm 40 deputetë.

Vazhdo të lexosh

Lajmet

Forcat izraelite intensifikojnë sulmet në Jabalia dhe Rafah

Publikuar

nga

Forcat izraelite intensifikuan sulmet e tyre në Gaza, ku luftime të ashpra janë raportuar në veri të Jabalisë dhe me tanke në jug të Rafahut.

Mjekët thanë se të paktën pesë palestinezë u vranë pasi shtëpitë e tyre u goditën në Jabalia dhe besohet se ka edhe shumë të bllokuar nën rrënoja, porse zona nuk mund të arrihet për shkak të intensitetit të bombardimeve. Në qytetin jugor të Rafahut, banorët raportuan për shpërthime dhe tym.

Sulmet e njëkohshme izraelite në skajet veriore dhe jugore të Gazës këtë muaj kanë shkaktuar një eksod të ri të qindra mijëra palestinezëve që ikin nga shtëpitë e tyre dhe kanë ndërprerë rrugët kryesore të hyrjes për ndihma, duke rritur rrezikun e urisë.

Banorët në Jabalia thanë se tanket kanë shkatërruar tregun lokal dhe buldozerët vazhduan të rrafshonin dyqanet dhe pronat. Krahu i armatosur i Hamasit tha se luftëtarët e tij kishin përfshirë tre tanke atje.

Tanket gjithashtu përparuan pranë Spitalit Kamal Adwan aty pranë, ku mjekët thanë se zjarri izraelit kishte shkaktuar pezullimin e operacioneve në objektin e fundit mjekësor funksional në Rripin verior të Gazës./UBTNews/

Vazhdo të lexosh

Lajmet

Kusari–Lila: Kuvendi shpërndahet vetëm nëse ka vullnet të të gjithë grupeve parlamentare

Publikuar

nga

Shefja e Grupit Parlamentar të Lëvizjes Vetëvendosje (LVV), Mimoza Kusari-Lila ka folur pas dështimit të mbajtjes së seancës së Kuvendit të Kosovës, ku pritej të diskutohej për tri vjet të qeverisjes Kurti.

Në fjalën e saj, Kusari ka vlerësuar se Kuvendi mund të shpërndahet nëse ka vullnet të grupeve parlamentare që janë pjesë e Kuvendit.

“Është e paimagjinueshme të shpërndahet Kuvendi, për një debat për 3 vjet qeverisje ka kaq pak interesim nga deputetët. Jemi në dinamikën e ritmin e mirë të përmbushjes së agjendës legjislative. Vet AAK-ja nuk e kishte kryetarin e partisë, vetëm 3 deputetë ishin prezentë”, ka deklaruar Kusari-Lila.

Kusari-Lila tha se Kuvendi shpërndahet vetëm nëse ka vullnet të grupeve parlamentare që janë pjesë e Kuvendit.

Vazhdo të lexosh

Lajmet

​Mungojnë deputetët, shtyhet debati parlamentar për tri vjet qeverisje

Publikuar

nga

Në mungesë të deputetëve ka dështuar seanca plenare ku do të diskutohej për tri vjet qeverisje. Kryeparlamentari Glauk Konjufca tha se të pranishëm janë vetëm 40 deputetë dhe si e tillë seanca nuk mund të vijojë pa prezencën e 61 deputetëve.

Kjo seancë është ftuar me kërkesë të Aleancës për Ardhmërinë e Kosovës. Shefi i Grupit Parlamentar të Aleancës për Ardhmërinë e Kosovës, Besnik Tahiri tha se janë dakorduar edhe me grupet tjera parlamentare që ky debat të vendoset në një datë tjetër.

“GP i AAK-së tash e tre muaj ka vendosur në kryesi të kuvendit një kërkesë për një debat për tri vjet qeverisje. Në diskutim edhe me grupet parlamentare edhe në mungesë të deputetëve, një temë kaq e rëndësishme që do të jetë një ballafaqim i vërtetë mes opozitës në mes të neve si grup dhe kryeministrit, nuk do të duhej që do të ndodhë pa një dakordim të plot dhe pa pjesëmarrjen të deputetëve. Andaj në mungesë të deputetëve, në dakordim edhe me grupet parlamentare po e shtyjmë këtë debat në kryesi vendosim për datën”, tha ai.

Edhe kryeparlamentari Glauk Konjufca u shpreh se debati parlamentar për tri vjet qeverisje do të vendoset në kryesi për një datë tjetër.

“Merremi vesh në një rast tjetër që kur ka gatishmëri më të madhe të deputetëve, vërtetë nuk do të ishte mirë që kjo seancë të ndodhte me 40 deputetë të pranishëm. Është pa përgjegjësi me prit shumë gjatë, kështu që pritem boll, rreth 40 minuta e ndërprejmë këtë seancë. Duhet me 61 deputetë të zhvillohet seancë. Atëherë merremi vesh për një datë tjetër kur do të ketë kohë kryeministri një datë tjetër, atëherë vijmë në kuvend”, deklaroi Konjufca.

Aleanca për Ardhmërinë e Kosovës po kërkon që përmes një rezolute qeveria ta përmbyllë mandatin e saj me dorëheqje ose me mocion për shkarkim e që më pas të shpërndahet Kuvendi i Kosovës.

Vazhdo të lexosh

Të kërkuara