Sindikata e Re e Korporatës Energjetike të Kosovës ka paralajmëruar protestë të punëtorëve në tri divizionet e KEK-ut, pas shqetësimeve për kushtet e punës, sigurinë dhe mungesën e pajisjeve mbrojtëse.

Kryetari i Sindikatës së Re të KEK-ut, Xhelal Jashari, ka bërë të ditur se protesta do të mbahet të mërkurën, më 26 gusht, nga ora 08:00, në Divizionin e Prodhimit të Qymyrit, Termocentralin “Kosova A” dhe Termocentralin “Kosova B”.

Sipas Jasharit, protesta synon të shprehë pakënaqësinë e punëtorëve lidhur me kushtet e vështira të punës dhe mungesën e pajisjeve mbrojtëse, si dhe të shprehë solidaritet me familjet e punëtorëve që kanë humbur jetën në vendin e punës.

Ai ka kërkuar më shumë kujdes për sigurinë e punëtorëve, duke thënë se ata duhet të përfundojnë orarin e punës dhe të kthehen shëndoshë e mirë te familjet e tyre.

Jashari ka ngritur shqetësime edhe për menaxhimin e mjeteve dhe automjeteve në dispozicion të KEK-ut. Sipas tij, ndërsa drejtues të caktuar kanë disa automjete në dispozicion, punëtorët përballen me mungesë të tyre për daljet në terren dhe në zona të prodhimit.

Sindikata ka paralajmëruar edhe një protestë simbolike para Drejtorisë së KEK-ut në Prishtinë, përpara protestës së madhe të 26 gushtit.

Ndërkaq, nënkryetari i Sindikatës, Nexhat Llumnica, ka ngritur shqetësime për presionin e stafit menaxhues ndaj punëtorëve. Sipas tij, në disa raste punëtorët nuk kanë guxim të refuzojnë detyrat në vende që i konsiderojnë të pasigurta, nga frika e procedurave disiplinore.

Protesta vjen pas vdekjes së katër punëtorëve gjatë kryerjes së detyrave të punës në KEK, nga shkurti deri në gusht të vitit 2026./A.K/

Detaje të reja kanë dalë në dritë lidhur me ngjarjen e rëndë në fshatin Kërvasari të Malishevës, ku mbeti e vdekur një grua shtatzënë. Prokuroria Themelore në Gjakovë ka njoftuar se i dyshuari për aktin është vetë bashkëshorti i viktimës, i cili po ashtu ka pësuar plagë të rënda nga arma e zjarrit.

Sipas njoftimit zyrtar të Prokurorisë, i dyshuari është dërguar për trajtim mjekësor në Qendrën Klinike Universitare të Kosovës (QKUK), ku mjekët bëjnë me dije se ai ndodhet në gjendje të rëndë dhe kritike për jetën.

Prokurori i Shtetit ka dalë në vendngjarje dhe me urdhër të tij, trupi i pajetë i viktimës është dërguar në Institutin e Mjekësisë Ligjore (IML) në Prishtinë për autopsi.

Rasti nga organet e drejtësisë po hetohet nën dyshimin për veprat penale “Vrasje e rëndë” dhe “Mbajtja në pronësi, kontroll ose posedim të paautorizuar të armëve”.

Prokuroria Themelore në Gjakovë, në koordinim me Policinë e Kosovës, bëri të ditur se po ndërmerr të gjitha veprimet e nevojshme hetimore për ndriçimin e plotë të rrethanave të kësaj ngjarjeje dhe grumbullimin e provave relevante. /E.A/

Kryeministri i Mbretërisë së Bashkuar, Andy Burnham, ka arritur të hënën në Ukrainë, në udhëtimin e tij të parë zyrtar jashtë vendit që nga marrja e detyrës.

Kjo vizitë përkojnë me 35-vjetorin e pavarësisë së Ukrainës nga Bashkimi Sovjetik. Gjatë këtij qëndrimi, Burnham pritet të njoftojë arritjen e një marrëveshjeje që i mundëson Ukrainës nisjen e prodhimit të versioneve të saj të raketave britanike “Storm Shadow”.

Me të mbërritur, ai u prit nga ministri i Jashtëm ukrainas, Andrii Sybiha, ndërsa në agjendë është paraparë edhe një takim me presidentin Volodymyr Zelensky.

Ministri britanik i Mbrojtjes, Luke Pollard, deklaroi se përzgjedhja e Ukrainës si destinacioni i parë ndërkombëtar i kryeministrit Burnham dëshmon qartë shkallën e lartë të mbështetjes së Mbretërisë së Bashkuar për këtë shtet.

Pollard theksoi nevojën për rritjen e kapaciteteve të mbrojtjes ajrore, duke vënë në dukje se zhvillimet dhe konflikti në Lindjen e Mesme kanë rritur kërkesën globale për sistemet “Patriot”.

“Për këtë arsye, Mbretëria e Bashkuar po e ndihmon Ukrainën me mjete të tjera mbrojtëse, jo vetëm për të rrëzuar raketat kruiz të lëshuara nga Rusia, por edhe për të neutralizuar dronët”, deklaroi ai për BBC-në. /BBC/

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

24 gusht 1993

Në ndeshjen e autobusit me tren vdiqën 20 qytetarë të Kosovës

Në fatkeqësinë e djeshme, që ndodhi në Pomozotin të Fushë-Kosovës, me ç’rast treni që qarkullonte në relacionin Fushë-Kosovë-Pejë u përplas në autobusin e Elektroekonomisë së Kosovës, humbën jetën 20 udhëtarë. Bëhet e ditur se 5 udhëtarë janë në gjendje të rëndë, kurse 75 të tjerë morën lëndime më të lehta.

Në mjetet e informimit u shpallën emrat e 20 të vdekurve në këtë fatkeqësi: Dejan Cekiq, Nebojsha Millutinoviq, Shamli Hydaverdi dhe Zharko Dimiq nga Prishtina; Ali Berisha, Rexhep Ymeri, Fejzë Piskala, Gani Ymeri, Sadri Shabani e Ymer Uka nga Sllatina e Madhe e Fushë Kosovës; Sami Dervisholli nga Vragolia e Fushë-Kosovës, Drago Karaxhiqi nga Prishtina, Elfete Fetahu nga Podujeva, Jetullah Podvorica nga Dumoshi i Podujevës, Jakup Beqiri nga Podujeva, Ejup Ibrahimi nga Plemetini i Obiliqit, Idriz Hajdini nga Ballabani i Prishtinës, Ragip Myftari, Stevan Ivanisheviqi dhe Bedri Ymeri nga Prishtina.

Në gjendje të rëndë në spitalin e Prishtinës janë Xhevat Shala e Ramadan Çitaku nga Prishtina, Muhamet Dvorani e Arif Zogjani nga Sllatina e Madhe e Fushë Kosovës dhe Ruzhdi Ibrahimi, kurse për shërim të mëtejmë në Klinikat e Fakultetit të Mjekësisë u ndalën edhe Milazim Mustafa nga Prishtina, Qazim Boshnjaku, Zhivorad Vukojeviqi, Izet Ajazi, Dragan Spasiqi, Zhivorad Vidosavleviqi, Çedomir Mihailoviqi, Naman Limoni, Qamil Çelaj, Hazir Vuka, Fatmir Vllahiu, Fehmi Shala, Dervish Dervisholli, Avdullah Marteta, Milomir Trajkoviqi, Feti Cakolli, Agron Pllana, Smajl Krasniqi, Zymer Mustafa, Nazmi Avdullahu, Jonuz Grajçevci, Ramadan Stogu, Fehmi Bulliqi, Dushan Stupar, Ragip Bërbatovci, Trajko Saviqi, Zvonimir Jezdiqi, Dragolub Saviqi, Azem Batalinaj, Vehbi Dervisholli, Kamber Morina, Ymer Mustafa dhe Muharrem Muharremi.

Përveç këtyre të lënduarve, ndihmë mjekësore kërkuan dhe menjëherë janë lëshuar në shtëpi Ismet Brahimi, Dejan Joksimoviqi, Sabri Sllamniku, Esat Kumnova, Besim Brahimi, Çasllav Todiqi, Nazmi Haxhaj, Skënder Bunjaku, Muhamet Ahmeti, Musli Gashi, Shaip Dragusha, Hajriz Grajçevci, Arif Rama, Qamil Grajçevci, Miodrag Rashiqi, Branko Simonoviqi, Gradimir Jovanoviqi, Jonuz Grajçevci, Vojisllav Karishiq, Avni Bajçinovci, Jordan Ristiqi, Zhivorad Mitroviqi, Vahide Ahmeti, Borivoje Jaukoviqi, Ejup Dervisholli, Sllobodan Stevanoviqi, Lubisha Badnjareviqi, Sreten Millovanoviqi, Dragan Steviqi, Nikolla Maksimoviqi, Ekrem Konjuhi dhe Stanimir Gjurgjeviqi.

Gjykatësi hetues i Gjykatës Komunale të Prishtinës, Remzush Latifi, në deklaratën e djeshme për gazetarë tha se detajet e kësaj fatkeqësie nuk dihen, por sipas tij, në orën 6.38 minuta, në fshatin Pomozotin të Fushë-Kosovës në parakalimin hekurudhor u ndeshën treni nr. 661-112, i cili qarkullonte në relacionin Fushë-Kosovë-Pejë dhe autobusi me targën PR 932-85.

Në këtë vendkalim hekurudhor gjenden dy shenjat e trafikut “Kryqi i Andreut” dhe shenja “Stop”, të cilat është dashur që t’i respektojë shoferi i autobusit, theksoi ky gjykatës dhe konstatoi se, në momentin kritik, treni ka qarkulluar me një shpejtësi prej 60 kilometrash në orë. Është konstatuar se në momentin kritik në autobus gjendeshin mbi 90 udhëtarë.

Në këtë vendkalim hekurudhor kanë ndodhur edhe përplasje të tjera të automjeteve me trena. Mirëpo, për rrezikun permanent askush nga përgjegjësit nuk çau kokën dhe nuk u vu laura e domosdoshme, e cila do t’i shpëtonte shumë jetëra të njerëzve.

24 gusht 1995

Nëpër Gllogovc e Deçan dje parakaluan kolona ushtarake

Dje, rreth orës 14:25, nëpër qendër të Gllogovcit parakaloi një kolonë e automjeteve ushtarake e pajisur me armatim të rëndë, njofton Komisioni për Informim i Degës së LDK-së në Gllogovc.

Kjo kolonë shkoi në drejtim të Skënderajt.

Për lëvizjen e forcave të ushtrisë serbe nëpër qytete e vendbanime shqiptare njofton edhe Komisioni për Informim i Degës së LDK-së në Deçan.

Në informatën e këtij komisioni thuhet se dje rreth orës 8:30, nëpër qendër të Deçanit parakaloi një kolonë e forcave të armatosura të ushtrisë serbe, e cila përbëhej nga 18 kamionë ushtarakë, të cilët tërhiqnin prapa edhe armatim të rëndë.

Nga jo kolonë e cila erdhi nga Peja, në qendër të Deçanit u shkëputën katër kamionë të cilët shkuan në drejtim të grykës së Deçanit, ndërsa pjesa tjetër e kolonës shkoi në drejtim të Gjakovës.

Në Podujevë dy të vdekur nga ethet hemorragjike

Ethet hemorragjike janë grup i sëmundjeve ngjitëse të ngjashme në mes veti, por që dallojnë nga etiologjia, epidemiologjia, patogjeneza dhe shtrirja gjeografike. Virusët në këtë sëmundje janë të ndryshëm, të cilët barten nëpërmjet enëve të vogla të gjakut, nga rriqrat e infektuara, brejtësit e fushës, deri te kontakti i drejtpërdrejtë përmes kontaminimit me sekretet e tyre në ushqim, ujë dhe ajër. Nga tre pacientët e sëmurë në komunën e Podujevës, dy kanë vdekur para pak kohësh, kurse një është në hospitalizim e sipër.

Secili nga virusët e sipërpërmendur është bartës i infektimit, thotë Fadil Dabinovci, epidemiolog, por siç dihet ethet hemorragjike kërcënojnë ata individë, të cilët kohën më të madhe e kalojnë në natyrë, apo që janë në kontakt të drejtpërdrejtë me bagëtinë, gjithashtu edhe familjarët dhe personelin mjekësor që kujdeset për të sëmurin. Simptomet e para paraqiten me kokëdhembje, plogështi, dhimbje të nyjave dhe muskujve, të skuqurit e lëkurës etj. Kjo sëmundje paraqitet zakonisht gjatë stinës së verës.

Dr.Dabinovci shton se aktivizimin e këtij virusi e shkakton fenomeni ekologjik-biologjik, i cili rezulton edhe me shumëzimin e tepërt të rriqrave dhe të brejtësve. Masat kundërepidemike aplikohen varësisht nga lloji i etheve hemorragjike mbi mbikëqyrje të shtuar epidemiologjike. Rol të rëndësishëm këtu ka edhe njohja e inkubacionit të secilit lloj të etheve hemorragjike, pastaj dezinfektimi, dezinsektimi dhe deratizimi.

25 gusht 1997

Përleshje e policisë serbe me persona të panjohur në fshatrat e brezit kufitar të Gjakovës

Operimet pirateske të personave të paidentifikuar e të armatosur, shpesh edhe të maskuar, që në kohët e fundit në fshatrat e brezit kufitar të Gjakovës thuaja janë bërë të përditshme, po shkaktojnë, jo vetëm një shqetësim të madh te banorët e kësaj treve, por edhe rrezik për jetën e tyre. Një ngjarje e këtillë ndodhi edhe pardje në afërsi, përkatësisht në trekëndëshin e fshatrave Stubëll, Berja dhe Nivokaz të Rekës së Keqe, të Gjakovës, kur rreth orës 11, dy persona të panjohur tentuan të vjedhin bagëtinë e pronarëve të këtyre lokaliteteve. Pa kaluar shumë kohë, këtyre hajdutëve iu bashkangjitën edhe gjashtë persona të tjerë. Dhe, gjithnjë në mbështetje të deklaratave të dëshmitarëve dhënë në Komisionin për Informim të Degës së LDK-së të Gjakovës, rreth orës 14 në vendin e ngjarjes arrijnë edhe forcat e policisë serbe, të cilave pak më vonë iu bashkangjit edhe një helikopter. Gjatë përleshjes, përkatësisht shkëmbimit me armë zjarri, me këta persona tash për tash të paidentifikuar, të cilët po ashtu ishin të armatosur, dy prej tyre janë vrarë. Ky këmbim armësh ka zgjatur disa orë. Pas dërgimit të kufomave të këtyre dy personave në morgun e Spitalit të Gjakovës, me një urdhëresë të policisë, nga punëtorët e NKP “Çabrati”, është bërë varrimi i tyre. Për personat e tjerë nuk dihet se çfarë ka ndodhur, njofton KI i LDK-së të Gjakovës.

24 gusht 1998

Në Suharekë forcat serbe vranë dy dhe plagosën së paku dy fëmijë shqiptarë

Dy shqiptarë u vranë dhe dy të tjerë u plagosën gjatë granatimeve të djeshme, të cilat përfshinë edhe lagjet periferike Suharekës.

KI i Degës së LDK-së në Suharekë njofton se në shtëpinë e tij forcat serbe vranë Abedin Hysen Shalën (60) dhe plagosën dy fëmijët e tij, emrat e të cilëve nuk arritëm t’i mësojmë. Po dje u vra edhe Shefqet Jemin Hoxha (39), i cili në po provonte të shpëtonte familjen e tij.

Bëhet e ditur se edhe në fshatin Peçan, forcat serbe kanë plagosur disa shqiptarë.

Trupat e 10 shqiptarëve të vrarë u dërguan në morgun e spitalit të Gjakovës

Mbrëmë në morgun e spitalit të Gjakovës, policia serbe ka dërguar trupat e pajetë të 10 shqiptarëve të vrarë, njofton KI i Degës së LDK-së në Gjakovë.

Tash për tash dihet vetëm identiteti i një të vrari, Adem Rexhep Dervishit (62) nga Batusha e Rekës së Keqe, ndërsa 9 të vrarit e tjerë janë nga komuna e Deçanit, dhe supozohet se ata janë vrarë në vendin ku takohen kufiri Kosovë-Shqipëri-Mali i Zi. Identiteti i tyre nuk është bërë i ditur.

I njëjti burim bën me dije se mbrëmë dhe sot të shtëna armësh ka pasur edhe në rrugët e qytetit, e sidomos në paralagjet e Gjakovës.

Dje në Açarevë u vra Ganimete Azem Gjilani nga Baica e Lipjanit

Mbrëmë në vijën e frontit në Açarevë, në luftë kundër forcave të agresorit serb u vra luftëtarja e Ushtrisë Çlirimtare të Kosovës, Ganimete Azem Gjilani (19) nga fshati Baicë e Gllogocit.

Bëhet e ditur se varrimi i luftëtares së UÇK-së, Ganimete Gjilani bëhet sot në vendlindjen e saj në Baicë.