Profesori i UBT-së, Dr. Vesel Rrustemaj ka mbrojtur me sukses disertacionin e doktoratës në Universitetin e Zagrebit, duke përmbyllur nivelin më të lartë të formimit akademik me një hulumtim shkencor të realizuar në Kosovë.

Disertacioni, me titull “Prevalenca e kariesit dentar dhe e shprehive të këqija orale dhe efektet e tyre në okluzionin e fëmijëve 3–6 vjeç në Kosovë”, trajton një temë me rëndësi të veçantë në fushën e ortodoncisë dhe stomatologjisë pediatrike. Hulumtimi analizon prevalencën e kariesit dentar dhe të shprehive të këqija orale te fëmijët e moshës 3–6 vjeç, si dhe ndikimin e tyre në zhvillimin e okluzionit, duke ofruar të dhëna shkencore dhe rezultate konkrete për gjendjen e shëndetit oral në Kosovë.

Ky studim përfaqëson një kontribut të rëndësishëm në kërkimin shkencor, pasi rezultatet e tij mund të shërbejnë si bazë për zhvillimin e strategjive parandaluese, politikave shëndetësore dhe praktikave klinike që synojnë përmirësimin e shëndetit oral të fëmijëve.

Deputeti shqiptar në Kuvendin e Serbisë, Shaip Kamberi, ka njoftuar se është dorëzuar zyrtarisht kërkesa për shkarkimin e ministres së Administratës Shtetërore dhe Vetëqeverisjes Lokale, Snezhana Paunoviq, pas deklaratave të saj skandaloze me të cilat arsyetoi spastrimin etnik të shqiptarëve gjatë viteve të nëntëdhjeta.

Kësaj iniciative të nisur nga grupi parlamentar “Lëvizja e Qytetarëve të Lirë – SDA e Sanxhakut dhe Partia për Veprim Demokratik” i janë bashkuar edhe 47 deputetë të tjerë, duke bërë që gjithsej 53 deputetë të opozitës t’i dorëzojnë kryeministrit Gjuro Macut kërkesën zyrtare për shkarkim të menjëhershëm.

Kamberi ka theksuar se kryeministri ka përgjegjësi politike dhe institucionale për të dëshmuar se në qeveri nuk ka vend për njerëz që mbrojnë dëbimin e qytetarëve mbi baza kombëtare, duke shtuar se në rast refuzimi, vetë kryeministri do të mbajë përgjegjësinë për normalizimin e kësaj politike brenda kabinetit të tij.

Megjithatë, deputeti shqiptar ka shprehur keqardhje që kjo nismë nuk mori mbështetjen e partive të tjera të pakicave nacionale që janë pjesë e koalicionit qeverisës në Serbi. Sipas Kamberit, shkarkimin e ministres Paunoviq nuk e kanë përkrahur as partia boshnjake e Zukorliqit, as ajo e Lajiqit dhe as partia hungareze e Pastorit.

Nga ana tjetër, pas reagimeve të ashpra brenda dhe jashtë vendit, vetë ministrja Snezhana Paunoviq ka kërkuar falje publike ndaj presidentit Vuçiq, kryeministrit Macut dhe qeverisë, duke u arsyetuar se deklarata e saj ishte nxjerrë krejtësisht jashtë kontekstit dhe se nga intervista ishte shkëputur vetëm një sekuencë prej shtatë sekondash për t’u shndërruar në një sulm politik.

Ndërkaq, presidenti serb Aleksandar Vuçiq, gjatë qëndrimit të tij në Kiev, u distancua hapur nga këto komente, duke i cilësuar ato si të pamenduara dhe të papërgjegjshme, dhe duke deklaruar se politika zyrtare e shtetit mbetet dialogu dhe kurrë spastrimi etnik. /E.A/

Komisioni për Çështje Normative i Këshillit Prokurorial të Kosovës, i udhëhequr nga kryesuesi Visar Krasniqi, ka miratuar Draft-Rregulloren për Menaxhimin e Lëndëve përmes Sistemit Elektronik SMIL në Sistemin Prokurorial. Në këtë takim, ku morën pjesë anëtarë të komisionit, drejtues të sekretariatit të KPK-së si dhe përfaqësues nga Misioni i OSBE-së në Kosovë, u shqyrtuan dhe u integruan komentet e pranuara nga dëgjimi publik. Pas këtij procesi, draft-rregullorja u miratua dhe u përcolli në Këshillin Prokurorial të Kosovës për aprovim final.

Sipas njoftimit zyrtar të Këshillit Prokurorial, ky dokument pritet të sjellë një reformë të rëndësishme në operimin e përditshëm të institucioneve të ndjekjes penal.

“Kjo rregullore avancon ndjeshëm menaxhimin e procesit të punës në të gjitha prokuroritë e vendit, duke u fokusuar në fushat kyçe si regjistrimi i dokumenteve në sistemin SMIL, shpërndarja e lëndëve në mënyrë elektronike dhe përdorimi i detyrueshëm i këtij sistemi”, thuhet në njoftimin e Këshillit Prokurorial të Kosovës.

Përveç këtyre pikave, rregullorja e re përcakton rregulla të qarta për mbikëqyrjen e vazhdueshme, raportimin dhe digjitalizimin e plotë të proceseve të punës. KPK-ja ka bërë të ditur se ky reformim do të ketë impakt të drejtpërdrejtë në sistemin e drejtësisë.

“Miratimi i kësaj rregulloreje shënon një hap të rëndësishëm drejt rritjes së transparencës, efikasitetit dhe llogaridhënies brenda sistemit prokurorial të Republikës së Kosovës”, thuhet në njoftimin e KPK-së. /E.A/

Një emergjencë e papritur shëndetësore gjatë pushimeve në Kosovë u shndërrua në një histori suksesi falë reagimit të menjëhershëm dhe profesionalizmit të ekipit mjekësor të United Hospital. Një pacient, i cili filloi të ndiente simptomat e arrestit kardiak gjatë qëndrimit në një qendër tregtare, u transportua me urgjencë në spital, ku mori trajtim të specializuar në kohën vendimtare.

Pas pranimit në Departamentin e Emergjencës, ekipi i kardiologjisë, i udhëhequr nga Dr. Edis Demiri, ndërhyri menjëherë duke realizuar koronarografinë diagnostikuese dhe më pas vendosjen e stentave, procedurë që stabilizoi gjendjen e pacientit dhe i shpëtoi jetën.

Ky rast dëshmon rëndësinë e diagnostikimit të shpejtë, vendimmarrjes profesionale dhe infrastrukturës moderne spitalore në trajtimin e sëmundjeve akute të zemrës. Në patologjitë kardiake, çdo minutë është vendimtare dhe ndërhyrja në kohën e duhur mund të bëjë dallimin mes jetës dhe pasojave të rënda.

Pas trajtimit, pacienti ndau përvojën e tij, duke shprehur mirënjohje të thellë për Dr. Edis Demirin dhe gjithë stafin e United Hospital, të cilët, sipas tij, i dhanë një mundësi të dytë për jetën përmes kujdesit profesional dhe përkushtimit maksimal.

Ky ekip i jashtëzakonshëm mjekësor në United Hospital zhvillon veprimtarinë e tij nën mbikëqyrjen dhe menaxhimin e vazhdueshëm të menaxherit Edmond Hajrizi, një personalitet me profil të lartë akademik dhe përvojë të gjerë në udhëheqjen e institucioneve moderne.

Me vizion strategjik, standarde të avancuara të menaxhimit dhe përkushtim ndaj cilësisë së shërbimeve shëndetësore, ai ka krijuar një kulturë institucionale të bazuar në profesionalizëm, inovacion dhe kujdes të pandërprerë për pacientin.

Nën këtë qasje menaxheriale, United Hospital vazhdon të investojë në teknologji bashkëkohore, në fuqizimin e kapaciteteve profesionale dhe në ngritjen e standardeve të kujdesit shëndetësor, duke u afirmuar si një nga qendrat spitalore më moderne dhe më të besueshme në Kosovë.

“Jam vërtet shumë i lumtur dhe krenar për profesionalizmin e treguar nga ekipi ynë në këtë rast. Kjo është edhe esenca e misionit të United Hospital – të reagojmë me shpejtësi, të shpëtojmë jetë në momentet më kritike dhe të ofrojmë kujdes shëndetësor cilësor pikërisht atëherë kur pacientët kanë më së shumti nevojë. Çdo sukses i tillë është dëshmi e përkushtimit të mjekëve, infermierëve dhe të gjithë stafit tonë, të cilët punojnë me përgjegjësi, profesionalizëm dhe humanizëm në shërbim të jetës”, tha menaxheri i United Hospital, Edmond Hajrizi.

Me shërbim të pandërprerë 24 orë në ditë, ekip multidisiplinar të kualifikuar dhe teknologji bashkëkohore për diagnostikim dhe ndërhyrje invazive, United Hospital vazhdon të konfirmohet si një nga qendrat më të avancuara spitalore në Kosovë për trajtimin e urgjencave kardiake, duke ofruar standarde të larta të kujdesit shëndetësor dhe siguri maksimale për pacientët./rajonipress/