Sot shënohet 112-vjetori i ngritjes së flamurit kombëtar shqiptar në Durrës, një ngjarje historike që u realizua më 26 nëntor të vitit 1912, kur Hafiz Ali Podgorica ngriti flamurin në këtë qytet të rëndësishëm. Kjo ngjarje ka një rëndësi të madhe për shpalljen e Pavarësisë së Shqipërisë dhe për periudhën që i parapriu asaj ngjarjeje të lavdishme.

Hafiz Ali Podgorica, i cili në atë kohë mbante postin e kryetarit të bashkisë së Durrësit, si dhe atë të kadiut dhe myftiut, pati një angazhim të rëndësishëm në proceset politike dhe fetare të atij periudhe. Ai kontribuoi në kapërcimin e dallimeve fetare mes besimeve të ndryshme në Shqipëri për hir të kauzës kombëtare. Ndihmesa e tij, ashtu si dhe e figurave të tjera fetare të kohës, ishte thelbësore për unitetin e kombit në një moment kyç të historisë.

Flamuri kombëtar shqiptar u ngrit me brohoritje dhe me një atmosferë ngazëlluese. Më pas, mytesarifi i Durrësit u pushua, ndërsa Hamid bej Toptani u emërua guvernator provizor. Sidoqoftë, mitropoliti i qytetit refuzoi të pranojë administratën lokale dhe trupat mbrojtëse të qytetit u liruan. Sipas një radiotelegrami të dërguar nga nënkonsulli Rudnay drejtuar Ministrisë së Punëve të Jashtme britanike, informohej se “paria e vendit u doli serbëve përpara”, por mungonin informata të sakta për lëvizjet e ushtrisë serbe, të cilët ishin nisur nga Kruja.

Dy ditë pas ngritjes së flamurit në Durrës, në Kuvendin e Vlorës, përfaqësues të Durrësit, si Dom Nikollë Kaçorri, Abaz Çelkupa, Mustafa Hanxhiu dhe Jahja Ballhysa, morën pjesë si delegatë dhe nënshkruan aktin historik të shpalljes së Pavarësisë së Shqipërisë, një hap i rëndësishëm drejt formimit të shtetit të pavarur shqiptar.

Ky moment historik do të mbahet mend si një ngjarje e paharrueshme në historinë e kombit shqiptar, një dëshmi e forcës dhe unitetit të popullit shqiptar në periudhën e luftës për liri dhe pavarësi./UBTNews/

Kryediplomatja e Kosovës, Donika Gërvalla, ka njoftuar se Presidentja Vjosa Osmani, do ta bëjë sot inaugurimin e Ambasadës së Kosovës në Kolumbi, që ajo e ka cilësuar rezultat historik.

Gërvalla ka thënë se hapja e kësaj ambasade shënon një moment të rëndësishëm për të zgjeruar praninë globale dhe për të forcuar subjektivitetin ndërkombëtar të Republikës së Kosovës.

“Ndihem e gëzuar dhe krenare të njoftoj që puna dhe përgatitjet tona intensive kanë çuar sot në një rezultat historik: në Bogota, Kolumbi, Republika e Kosovës po hap ambasadën e saj në një tjetër vend të rëndësishëm në Amerikën Jugore. Ndihem shumë e nderuar që Presidentja e Republikës së Kosovës, znj. Vjosa Osmani-Sadriu do të bëjë sonte inaugurimin e ambasadës”, ka shkruar Gërvalla.

Presidentja e Kosovës Vjosa Osmani ka marr pjesë në Konferencën Ndërkombëtare për Eliminimin e Dhunës Seksuale gjatë luftës: Derisa çdo grua të mos jetë e lirë nga dhuna, asnjë prej nesh nuk do të jetë vërtetë e lirë.

Osmani ka përmendur luftën duke shtuar se Kosova dhe Kolumbia mund të jenë të ndara nga oqeane, por janë të lidhura nga një e kaluar e përbashkët e dhimbshme dhe janë të përkushtuara për të ngritur zërin për drejtësinë raporton KosovaPress.

“Ne qëndrojmë të bashkuar në përpjekjet tona për të promovuar agjendën e Grave, Paqes dhe Sigurisë, një agjendë që e shohim si një element qendror për paqen dhe sigurinë e qëndrueshme në mbarë botën. Megjithatë, arsyeja kryesore që unë qëndroj para jush sot janë dy zonjat e hekurta të ulura mes jush, Vasfija dhe Shyhreti, dy nga 20,000 të mbijetuarat e dhunës seksuale nga lufta e fundit në Kosovë. Historitë e tyre, dhimbja, lufta e tyre, por më e rëndësishmja, guximi dhe qëndrueshmëria e tyre duhet të jenë të njohura për të gjithë. Ndërsa asnjë fjalim nuk mund t’i përshkruaj vuajtjet e tyre, unë jam i bindur se prania jonë sot këtu, prania jonë së bashku është ajo që i mban ato që të vazhdojnë të luftojnë për drejtësi. Ata nuk kanë nevojë për keqardhjen tonë”, tha Osmani.

Presidentja Osmani ka thënë se ashtu si konflikti i gjatë me dekada në Kolumbi, lufta e fundit në Kosovë, ndonëse krejtësisht ndryshe, ishte një luftë me plagë të thella, veçanërisht për më të pambrojturit.

Ajo ka përmendur se dhuna seksuale u përdor si një armë lufte nga regjimi i Millosheviqit, duke u shkaktuar vuajtje të mëdha të mbijetuarve dhe shoqërisë në përgjithësi.

“Unë me të vërtetë besoj se njohja e kësaj historie të dhimbshme është hapi i parë drejt shërimit dhe parandalimit. Është thënë shumë herë, dhuna seksuale dhe konfliktet janë nga krimet më të tmerrshme që ka njohur njerëzimi. Ajo shkon përtej dëmtimit fizik. Ajo shkatërron jo vetëm individë, por familje, komunitete dhe shoqëri të tëra. Është një armë lufte që është projektuar qëllimisht për të shkaktuar dëme midis brezave. Adresimi i kësaj nuk është vetëm thelbësor për dinjitetin e të mbijetuarve, por për vetë integritetin e humanitetit tonë të përbashkët. Kjo është arsyeja pse unë e përgëzoj Kolumbinë për vënien në qendër të vëmendjes nevojën për tu përqendruar ndaj mbijetuarve në përpjekjet tona për drejtësinë restauruese dhe ndërtimin e paqes”, shtoi Osmani.

Presidentja shtoi se zgjedhja për të përdorur dhunën seksuale si armë lufte është një zgjedhje e qëllimshme.

“Qëllimi është të thyhet shpirti i një kombi. Ndërsa regjimi i Millosheviqit shënjestroi brutalisht gratë, vajzat dhe madje edhe burrat tanë, kriminelët e luftës nuk ishin të përgatitur të përballeshin me vendosmërinë e palëkundur, shpirtin e pathyeshëm dhe popullin e qëndrueshëm të Kosovës, një popull që nuk do të thyhej kurrë, një popull që do të ngrihej nga hiri i luftës për t’u bërë burim fuqizimi, solidariteti dhe mbështetjeje jo për njëri-tjetrin brenda vendit tonë, por edhe për të tjerët në nevojë kudo në botë. Për një kohë të gjatë, edhe të mbijetuarit jetuan në heshtje në shtëpitë e tyre, të rënduar nga stigma dhe të anashkaluar nga sistemi që kishte për qëllim t’i mbronte ata. Por heshtja nuk mund të japë drejtësi. Pikërisht atëherë kuptuam se lufta për të drejtat e të mbijetuarve duhet të jetë në qendër të shërimit tonë kolektiv. Ne e kemi ngulitur këtë agjendë në vetë strukturën e punës sonë, jo vetëm në zyrën e presidentit, por edhe në institucione të tjera, duke siguruar që zërat e të mbijetuarve të dëgjohen, vlerësohen dhe fuqizohen”, ka theksuar Osmani.

Osmani ka përmendur se që nga 14 prilli 2022, pas iniciativës së kampionëve si Feride Rushiti, kanë vendosur ta shpallin14 prillin si ditë kombëtare për të mbijetuarat e dhunës seksuale gjatë luftës së fundit në Kosovë.

“Kjo ditë tani është e gdhendur përgjithmonë në kujtesën tonë kolektive si një ditë për të nderuar të mbijetuarit dhe për t’u zotuar se do të qëndrojmë me ta në çdo hap të rrugës. 14 Prilli nuk është vetëm një datë tjetër. Në këtë datë të vitit 1999, Vasfija e cila na është bashkuar sot, atëherë vetëm 16 vjeçe, ende fëmijë, forcat e Millosheviqit e rrëmbyen nga krahët e nënës së saj. E çuan në një vend që do të shënonte momentet më të errëta të jetës së saj. Për orë të tëra, ajo u mbajt nën kërcënimin e armëve dhe u përdhunua vazhdimisht. Në vend të heshtjes, Vasfija zgjodhi të flasë. Ajo foli për drejtësi, kundër stigmës dhe duke bërë këtë, ajo mblodhi një popull të tërë rreth saj. Sot, ajo është zëri i mijëra të mbijetuarve të dhunës seksuale të kohës së luftës”, ka shtuar Osmani.

Osmani tha se lufta për parandalimin e dhunës seksuale në konflikt nuk është përgjegjësi vetëm e Kosovës apo e Kolumbisë. Presidentja tha se kjo duhet të jetë përgjegjësi globale.

Deputeti shqiptar në Parlamentin e Serbisë, Shaip Kamberi, ka ndarë një mesazh domethënës për Ditën e Flamurit, duke theksuar vazhdimësinë e ndalimit ligjor të përdorimit të simbolit kombëtar shqiptar në Luginën e Preshevës.

Në postimin e tij, Kamberi ka kujtuar se ndërsa shqiptarët në trojet e tyre festojnë këtë datë të shënuar me aktivitete të ndryshme, në Luginën e Preshevës vazhdon gjendja diskriminuese ku Serbia ndalon përdorimin e lirë dhe zyrtar të flamurit kombëtar.

“Serbia është i vetmi shtet në Ballkanin Perëndimor që, përmes ligjit, pengon përdorimin e simboleve kombëtare të pakicave nacionale, nëse ato janë identike me simbolet shtetërore të një vendi tjetër. Flamuri ynë kombëtar, me fushë të kuqe dhe shqiponjën dykrenare, për ne është simbol i identitetit dhe unitetit kombëtar. Për Serbinë, ky është një pretekst për të sanksionuar përdorimin e tij nga shqiptarët,” ka theksuar Kamberi.

Ai ka kujtuar rastet e shumta të ndjekjeve dhe dënimeve ndaj liderëve politikë, përfaqësuesve të institucioneve dhe qytetarëve shqiptarë, vetëm pse kanë valëvitur flamurin kombëtar më 28 Nëntor. Ish-kryetari i Këshillit Kombëtar Shqiptar, Ragmi Mustafi, është ende i dënuar për një veprim të tillë, edhe pas përfundimit të mandatit të tij.

Kamberi ka apeluar për rezistencë qytetare ndaj kësaj padrejtësie dhe ka bërë thirrje që secili shqiptar në Luginën e Preshevës, më 28 Nëntor, të vendosë flamurin kuqezi në shtëpinë e tij.

“Flamuri nuk është thjesht një simbol. Ai është pjesë e identitetit tonë ndër shekuj. Flamuri është i të gjithëve ne, dhe për të duhet të reagojmë së bashku,” përfundon mesazhi i deputetit Kamberi, i cili edhe një herë ngriti çështjen në parlament dhe në arenën ndërkombëtare, duke kërkuar të drejtën për përdorimin e lirë të simboleve kombëtare./UBTNews/