Sulmuesi i Përfaqësueses së Kosovës, Vedat Muriqi, po kalon një fillim të shkëlqyeshëm te Fenerbahçe, duke dëshmuar vlerën e tij me paraqitjet në fushë.

Sipas mediumit turk “Sabah”, futbollisti 32-vjeçar ka kontribuar në tetë gola këtë sezon, me shtatë realizime dhe një asistim, ndonëse ka munguar në tri ndeshje për shkak të një lëndimi.

Muriqi është rikthyer te skuadra turke pas gjashtë vitesh, ndërsa investimi prej 15.5 milionë eurosh duket se po shpërblehet me paraqitjet e tij në repartin ofensiv.

Sulmuesi kosovar ka lënë pas edhe disa emra të njohur të futbollit evropian, të cilët ishin konsideruar si kandidatë për përforcimin e sulmit të klubit turk në fillim të sezonit.

Me formën e treguar, Muriqi po dëshmon se është një nga lojtarët kryesorë të Fenerbahçes, duke dhënë kontribut të rëndësishëm në sukseset e skuadrës.

D.L

Gjasat që Gianni Infantino të rizgjidhet president i FIFA-s janë rritur ndjeshëm, pasi Victor Montagliani pritet të kandidojë për një mandat të fundit në krye të CONCACAF-it, në vend që ta sfidojë atë.

Kanadezi 61-vjeçar konsiderohej si një nga kandidatët e mundshëm përballë Infantinos, pas kritikave të shumta ndaj planit të FIFA-s për shitjen e aksioneve të Kupës së Botës te investitorët privatë. Megjithatë, Montagliani nuk e kishte konfirmuar asnjëherë zyrtarisht synimin për të kandiduar për kreun e FIFA-s.

Sipas gazetës britanike “The Guardian”, Montagliani nuk do të hyjë në garë kundër Infantinos, i cili synon mandatin e katërt në zgjedhjet e marsit.

Ndërkohë, kundërshtarët e presidentit aktual, të udhëhequr nga UEFA, duhet të gjejnë një kandidat të përbashkët deri më 18 nëntor.

Një tjetër mbështetje e rëndësishme për Infantinon erdhi nga Konfederata Afrikane e Futbollit, pasi të 54 federatat anëtare të saj shprehën përkrahje unanime për rizgjedhjen e tij.

“Është vendim unanim i të gjitha 54 vendeve anëtare të Konfederatës Afrikane për përkrahje pa kushte të Giannit si president i FIFA-s”, deklaroi presidenti i CAF-it, Patrice Motsepe, duke vlerësuar kontributin e Infantinos për zhvillimin e futbollit afrikan.

Ndërkohë, Aleksandar Çeferin synon të vazhdojë në krye të UEFA-s, duke e bërë garën për drejtimin e futbollit botëror edhe më interesante në muajt e ardhshëm.

D.L

Me luftën e Shpati Zekajt, të zhvilluar të premten paradite, Kosova e ka përfunduar paraqitjen në Kampionatin Botëror të xhudos në Baku të Azerbajxhanit.

Kosova garoi me katër xhudistë, por asnjëri prej tyre nuk arriti t’i afrohej zonës së medaljeve. Ky ishte një Botëror veçanërisht sfidues për ekipin kosovar, që për herë të parë që nga viti 2023 mbetet pa medalje në këtë garë.

Mungesa e Distria Krasniqit, e cila nuk mori pjesë për shkak të lëndimit, ishte një nga faktorët kryesorë në këtë kampionat. Kampionia kosovare konsiderohej ndër pretendentet kryesore për medalje, ndërsa mungesa e saj u ndje në një ekip që këtë herë nuk arriti të përmbushte pritshmëritë.

Paraqitjen më të mirë nga xhudistët kosovarë e pati Dardan Cena, i cili fitoi dy luftë në kategorinë deri në 73 kilogramë. Fillimisht, ai mposhti irlandezin Joshua Green, përpara se të triumfonte edhe ndaj gjeorgjianit Lasha Shavdatuashvili. Megjithatë, në luftën e tretë u eliminua nga italiani Leandro Valeriani.

Në të njëjtën kategori garoi edhe Akil Gjakova, por ai u eliminua që në luftën e parë nga kampioni olimpik në fuqi, Hidayat Heydarov i Azerbajxhanit.

Pritshmëri të mëdha kishte edhe për Laura Fazliun në kategorinë deri në 63 kilogramë. Ajo e nisi garën me fitore bindëse ndaj gjermanes Sara-Joy Bauer, por u eliminua në luftën e dytë nga mongolja Enkhriilen Lkhagvatogoo, e cila fitoi me “Ippon” pas vetëm 23 sekondash.

Ndërkaq, Shpati Zekaj u ndal në luftën e parë në kategorinë deri në 100 kilogramë. Ai pësoi humbje nga moldavi Vadim Ghimbovschi, i cili realizoi një uazari herët në përballje.

D.L

Lionel Messi dhe Cristiano Ronaldo mund të luajnë si bashkëlojtarë për një natë, në një ndeshje të veçantë që pritet të tërheqë vëmendjen e gjithë botës së futbollit.

Ish-futbollisti argjentinas Carlos Tevez po planifikon organizimin e ndeshjes së lamtumirës në stadiumin “La Bombonera”, në Buenos Aires, më 20 dhjetor 2026.

Sipas mediumit spanjoll “Marca”, duke iu referuar “Infobae”, synimi i Tevezit është që Messi dhe Ronaldo të jenë pjesë e së njëjtës skuadër në këtë përballje.

Pjesëmarrja e dy yjeve të futbollit botëror ende nuk është konfirmuar zyrtarisht, por Tevez ka bërë të ditur se po punon për ta realizuar këtë ide.

Në mesin e emrave që dëshiron t’i ftojë janë edhe Gianluigi Buffon, Edwin van der Sar, Rio Ferdinand, Nemanja Vidić, Andrea Pirlo dhe Paul Scholes.

“Do ta gjej vetë Cristianon”, ka deklaruar Tevez, duke folur për mundësinë e pjesëmarrjes së portugezit.

Tevez ka luajtur përkrah Messit te Përfaqësuesja e Argjentinës, ndërsa me Ronaldon ka qenë bashkëlojtar te Manchester Unitedi.

Nëse projekti realizohet, tifozët mund të shohin për herë të parë Messin dhe Ronaldon me të njëjtën fanellë, në një ngjarje që premton të jetë ndër më të veçantat e futbollit.

D.L