Sport

Kualifikimi i skuadrave së Kosovës në Evropë, shikueshmëria pas pandemisë dhe rekordi i arritur nga Ballkani

Katër skuadra nga Kosova, do të jenë pjesëmarrëse në garat kualifikuese për Champions League, Europa League dhe Conference League.

Published

3 years ago

on

Ulis Hamiti, student i vitit të dytë në Fakultetin Media dhe Komunikim në UBT

Me përfundimin e një sezoni tjetër në BKT Superligën e Kosovës shënohet edhe një kampionat i kompletuar, në të cilin skuadrat të cilat morën pjesë përjetuan emocione të përziera. Por edhe pas festës së shumë skuadrave, pyetja kryesore vazhdon të jetë se si do të performojnë ekipet e Kosovës në fazën kualifikuese në garat evropiane. Këtu flitet për tri kompeticionet kryesore: UEFA Champions League, UEFA Europa League dhe kompeticioni i ri i themeluar dhe implementuar në këtë sezon që përfundoi, UEFA Conference League.

Katër skuadrat e Kosovës që do të jenë në garat kualifikuese për këta tre turne janë: Ballkani që e fitoi titullin e kampionit këtë sezon, Drita që përfundoi në vendin e dytë, Gjilani në pozitën e tretë dhe Llapi fitues i Kupës së Kosovës. Pritshmëritë janë të larta për të gjithë, sidomos për ata që e kanë trajtuar kategorinë më të lartë të Kosovës gjatë këtij sezoni. Është viti i parë që nga Kosova do të garojnë katër skuadra në gara evropiane.

Arbon Flugaj, gazetar i njohur i sportit në Kosovë, jep mendimin e tij se si do të zhvillohen ndeshjet kualifikuese.

“Ballkani me kalimin e një raundi në Champions League, edhe në rast eleminimi pastaj do të siguronte të paktën “Play Off” në Conference League dhe mendoj se nëse përforcohet me dy lojtarë kualitativ nga jashtë, në pozitën e qendër sulmuesit dhe mesfushorit mbrojtës, atëherë do kenë paraqitje të mirë. Këtë sezon si mundësi e mirë që të paktën t’i mbushin arkat e klubit nëse vetëm nuk arrin inkuadrimin në Conference League”, filloi Flugaj.

Ndërkohë për tri skuadrat e tjera pjesëmarrëse, ai është më i mprehtë në opinionet e tij.

“Prej Dritës pres paraqitje solide dhe kalimin e të paktën 2-3 raundeve kualifikuese në Conference League, në rast se iu prin fati në short. Nga ana tjetër, Llapi i Tahir Batatinës, do të ketë shumë presion për të  kaluar raundin e parë, pasi vitin e kaluar dështuan totalisht ndaj Shkupit. Shpresoj ta kem gabim, mirëpo aktualisht mendoj se Llapi do të performojë më së dobti prej klubeve tona. Për Gjilanin është e vështirë të thuhet diçka para se të mësojmë se kush do të jetë trajner i skuadrës dhe cilat do të jenë planet e tij në afatin kalimtar verorë, në bazë të informacioneve që kam nga brenda klubit pritet të ketë prurje të mëdha por nuk e di se a do mjaftoj koha që skuadra të formohet”, potencoi Flugaj.

Padyshim një faktor i cili do t’i ndihmojë skuadrat e Kosovës do të jetë prania fizike e tifozëve. Përgjatë dy viteve të fundit ka pasur momente të turbullta sa i përket lejimit të tifozëve në fushë, për shkak të pandemisë së koronavirusit, por që me konfirmimin dhe lejen për tifozët që të jenë të pranishëm fizikisht në stadium, futbolli në Kosovë po rikthehet në normalitet. Flugaj gjithashtu bën krahasimin e vijueshmërisë gjatë sezonit të kaluar dhe qëllimeve aktuale.

“Sa i përket shikueshmërisë përmes televizionit, ajo definitivisht është rritur për shkak se deri pak para disa muajve stadiumet kanë qenë të mbyllura për shikues, ose janë lejuar një përqindje e vogël e tyre“, tha Flugaj.

Në fund ai shprehet mjaft optimist për sezonin e ardhshëm, por njëkohësisht ndalet dhe trajton temën e rikthimit të shikuesve gjatë pjesës së dytë të këtij kampionati që lamë pas.

“Duke parë ritmin e zhvillimit të futbollit tonë dhe transferimeve të cilat pritet të ndodhin, pres që edicioni i ardhshëm të jetë super i shikuar dhe ndoshta më i miri ndonjëherë. Sigurisht që pas pandemisë shikuesit janë vërshuar drejt stadiumeve, pavarësisht kësaj, pjesa e dytë e kampionatit stagnoi pak në këtë aspekt, ndoshta edhe pse skuadrat kishin dalë nga objektivat sezonale”, përmbylli Flugaj.

Përveç Flugaj, edhe gazetari i njohur i sportit në Kosovë, Faton Polisi, u përgjigj në pyetjet se si mendon se katër skuadrat kryesore do të performojnë në garat evropiane. Ai shprehet optimist duke thënë se pjesëmarrja në raundet kualifikuese, për garat evropiane do ta ndihmojë shumë BKT Superligën e Kosovës në shumë aspekte të ndryshme.

“Pjesëmarrja e  skuadrave, një në kualifikimet e Champions League, dhe tri në Conference League e ka bërë interesante BKT Superligën e Kosovës. Pjesëmarrja në garat evropiane është motiv më i madh për shumë lojtarë të futbollit të Kosovës, për shkak se synimi i tyre është që me paraqitje të mirë të bindin edhe menaxherë të ndryshëm të shprehin interesimin për t’ua mundësuar kalimin në ndonjë klub të Evropës. Jo vetëm lojtarët, por edhe klubet janë përfituese nga paraqitja në garat evropiane në nivel klubesh”, filloi Polisi.

Megjithatë ai nuk e fsheh faktin se skuadrat e Kosovës ende duhet të punojnë shumë për të arritur fazën e grupeve në garat evropiane.

“Përvoja në garat evropiane nuk mungon. Nuk ka munguar ngritja e tyre, por ende mendoj se klubet e Kosovës janë larg të arrijnë të paraqiten në fazën e grupeve të garave të organizuara nga Uefa. Ballkani është pa përvojë në arenën ndërkombëtare, Drita tashmë ka krijuar një përvojë dhe së fundi kishte një paraqitje të mirë, në veçanti ndaj finalistit të ligës së Evropës, Feyenoordit, skuadër e cila me vështirësi e eleminoi Dritën. Edhe Gjilani ka përvojën, por mendoj se do të penalizohet me ndryshimet që ka bërë së fundi në stafin teknik dhe atë organizativ të klubit. Ndërsa Llapi dështoi sezonin e kaluar, por mendoj se do të jetë më i mobilizuar sezonin e ardhshëm”, tha Polisi

Gazetari i njohur i sportit shtoi se fati do të luajë rolin kryesor në performancat e këtyre skuadrave. Ai gjithashtu tregoi se çfarë do të thotë mungesa e pjesëmarrjes së Prishtinës në kualifikimin për garat evropiane për futbollin kosovar.

 “Rrugëtimi i këtyre garave kualifikuese evropiane, Ligën e Kampionëve, Ligën e Konferencës do të varet nga shorti që do ta kenë. Për imazhin e futbollit të Kosovës është humbje e madhe që Prishtina nuk do të paraqitet në garat e Evropës”, qartësoi Polisi.

Në fund ai e trajtoi çështjen e shikueshmërisë së BKT Superligës së Kosovës gjatë dy viteve të fundit, në të cilat pandemia ka pasur një rol të madh në mënyrën se si ka ndryshuar pikëpamja e përgjithshme. Ndryshe nga Flugaj ai është kritik ndaj mënyrës se si është trajtuar rikthimi i shikuesve në stadium, por gjithashtu jep mendimin e tij rreth kësaj dhe se çfarë mund të bëhet për të vazhduar përpara.

“Nuk mund të bëhet krahasimi me dy sezonet e kaluara, në të cilat numri i shikueshmërisë për shkak të koronavirusit ka qenë i kufizuar. Por ajo që mund të them është se numri i shikuesve në tribuna nuk ka qenë i kënaqshëm as sezonin që përfundoi pak ditë më parë. Klubet duhet të punojnë më shumë me shikuesit, është pozitive që ka pasur rënie të përleshjeve në mes shikuesve. Ka pasur një rritje të lehtë të pranisë së shikuesve, por jo në një nivel të kënaqshëm. Përfitimet e klubeve nuk janë të mëdha nga shitja e biletave, madje nuk mund t’i mbulojnë as shpenzimet që bëhen për ujë gjatë një jave“, përmbylli Polisi.

Me gjithë supozimet dhe probabilitetet e mundshme sa i përket kualifikimit evropian, është e rëndësishme të përmendet se me suksesin e Ballkanit këtë sezon, BKT Superliga e Kosovës numëron 10 skuadra të ndryshme të cilat e kanë fituar kampionatin gjatë shekullit 21, shifër kjo e cila barazon rekordin e Suedisë, që po ashtu i ka parë dhe përgëzuar 10 skuadra, të cilat janë shpallur kampione të ligës së tyre gjatë këtij shekulli./UBTNews/

Related Topics:
Continue Reading

Lajmet

UBT organizoi me sukses Konferencën e parë Ndërkombëtare të Mjekësisë Sportive

Published

30 minutes ago

on

October 24, 2025

By

Në Parkun Shkencor, Inovativ dhe Teknologjik të UBT-së në Lipjan, u mbajt me sukses Konferenca e parë Ndërkombëtare e Mjekësisë Sportive (IC-SM 2025) – një ngjarje e nivelit të lartë që shënoi një moment historik për zhvillimin e kësaj fushe në Kosovë dhe rajon.

Në këtë konferencë morën pjesë figura të njohura ndërkombëtare të mjekësisë sportive, përfshirë Presidentin e Federatës Ndërkombëtare të Mjekësisë Sportive (FIMS), Prof. Dr. Fabio Pigozzi nga Italia, Prof. Dr. Norbert Bachl nga Austria, Annika Hangleiter, M.Sc. nga Universiteti Teknik i Mynihut (Gjermani), dhe Prof. Dr. Gobert von Skrbensky nga Austria, së bashku me shumë ekspertë vendorë dhe ndërkombëtarë.

Në hapje të konferencës, Rektori i UBT-së, Prof. Dr. Edmond Hajrizi, theksoi se që nga themelimi, UBT ka qenë e përkushtuar ndaj dijes, inovacionit dhe krijimit të një shoqërie të zgjuar, ku shkenca, teknologjia dhe praktika bashkohen për të krijuar ndikim të qëndrueshëm në shoqëri.

“Mjekësia sportive është një nga fushat që mishëron më së miri këtë filozofi – duke bashkuar shëndetin, edukimin, performancën dhe inovacionin teknologjik”, u shpreh Rektori Hajrizi, duke theksuar se përmes Themelimit të Qendrës për Mjekësi Sportive në UBT, është hapur një kapitull i ri për zhvillimin e kësaj fushe në Kosovë.

Ai gjithashtu përmendi se falë kësaj nisme, Kosova është bërë për herë të parë anëtare e Federatës Ndërkombëtare të Mjekësisë Sportive (FIMS), përmes Shoqatës së Mjekësisë Sportive dhe Ushtrimeve të Kosovës (KASEM) — një arritje që e rendit vendin përkrah mbi 117 shteteve anëtare të kësaj organizate prestigjioze.

Në fjalën e tij përshëndetëse, Prof. Dr. Fabio Pigozzi, President i FIMS-it, vlerësoi kontributin e UBT-së në zhvillimin e mjekësisë sportive dhe theksoi rëndësinë e bashkëpunimit ndërkombëtar për avancimin e kërkimit dhe praktikave klinike në këtë fushë.

Në hapje të konferencës morën fjalën edhe: Fitim Arifi, përfaqësues i Komitetit Olimpik të Kosovës; Agim Ademi, Kryetar i Federatës së Futbollit të Kosovës; Agim Krasniqi, Kryetar i KASEM; Iber Alaj, Drejtor i Departamentit të Sportit në Ministrinë e Kulturës, Rinisë dhe Sportit.

Pjesa kryesore e konferencës përfshiu sesionet shkencore me ligjërata nga:

Prof. Dr. Fabio Pigozzi (Itali) – “Sudden Cardiac Death in Sports and Exercise”

Prof. Dr. Norbert Bachl (Austri) – “Sports Medicine as a Specialty in Europe: Shaping Precise Prevention”

Prof. Dr. Edmond Hajrizi (Kosovë) – “UBT Smart City – An Integrated Platform of Emerging Technologies and Smart Support for Sports Medicine Education, Research, Innovation, and Clinical Services”

Annika Hangleiter, M.Sc. (Gjermani) – “Wearable Technologies in Personalized Prevention: The Future is Already Present”

Prof. Dr. Gobert von Skrbensky (Austri) – “Concepts in Sports Surgery Following Knee Trauma: The Role of Activity Level and Biological Age”

Prezantimet shkencore dhe punimet kërkimore

Në sesionin e dytë të konferencës, të udhëhequr nga Dr. Milaim Berisha dhe Dr. Agron Thaqi, u prezantuan punime shkencore të recenzuara, ndër të cilat:

“The New Era FitScore Test: A Comprehensive General Fitness Assessment” – Era Deva, Milaim Berisha

“The Success Ratio of Non-Surgical Management of Proximal Hamstring Injury in Judo: The Case of Olympic Gold Medalist” – Nora Gjakova, Milaim Berisha

“Beyond Consensus, Into Action: Kosovo’s Response to Elite Athlete Mental Health Challenges” – L.J., Zhu., J., Hell & V. Klissouras

“Comparative Analysis of Body Composition in Elderly Residents of Nursing Homes in Kosovo” – Agron Thaqi

Konferenca IC-SM 2025 shërbeu si një platformë e rëndësishme ndërkombëtare për bashkëpunim, shkëmbim përvojash profesionale dhe prezantim të trendeve më të fundit në mjekësinë sportive. Ngjarja synon të nxisë kërkimin shkencor, inovacionin në rehabilitim, edukimin profesional dhe ndërtimin e rrjeteve ndërkombëtare në fushën e sportit dhe shëndetit.

Konferenca u organizua nga UBT, në bashkëpunim dhe mbështetje të:

  • Kosovo Association of Sports and Exercise Medicine (KASEM),
  • International Federation of Sports Medicine (FIMS),
  • Komitetit Olimpik të Kosovës, dhe
  • Sport, Health and the People – A Western Balkan University Network (SHAPE Project).

IC-SM 2025 u vlerësua si një ngjarje që shënon fillimin e një tradite të re shkencore në Kosovë, duke e pozicionuar vendin në hartën ndërkombëtare të kërkimit në mjekësinë sportive dhe shëndetin publik.

Continue Reading

Lajmet

Muriqi mund të thyejë disa rekorde këtë edicion te Mallorca

Published

5 hours ago

on

October 24, 2025

By

Sulmuesi kosovar Vedat Muriqi ka pasur startin e tij më të mirë me klubin e Mallorcas që nga ardhja në vitin 2022.

Sulmuesi i Mallorcas po kalon sezonin e tij të pestë në klub dhe me një total prej pesë golash, “Pirati” ka vendosur rekord për shënimin e golave në tetë ndeshjet e para të këtij edicioni në ishull që nga transferimi i tij zyrtar në sezonin 2022/2023.

Muriqi, kujtojmë se nuk ka shënuar më herët pesë gola në tetë ndeshjet e tij të para për Mallorcan.

Sezoni i tij më i mirë në Mallorca

Në sezonin 2022/2023, Vedat Muriqi luajti sezonin e tij të parë të plotë me fanellën e Mallorcas. Atë kohë, me të madhin Lee Kang-in në sulm, kosovari regjistroi rekordin e tij më të mirë personal që nga koha e tij te Fenerbahçe, me 15 gola dhe tre asistime në kampionat.

Nga këto 15 golat, Muriqi ndihmoi Mallorcan të fitonte nga tre pikë në shtatë raste në një sezon në të cilin skuadra përfundoi në vendin e nëntë me 50 pikë. Deri më tani dhe padyshim ky është sezoni i tij më i mirë me fanellën e kuqe.

Por edhe atëherë, ai nuk arriti të shënonte pesë gola në tetë ndeshjet e para.

Në fakt, goli i tij i katërt i sezonit u realizua në javën e tetë, dhe vetëm në javën e 11-të ai shënoi golin e tij të pestë, pasi kishte humbur dy ndeshjet e mëparshme për shkak të pezullimit. Pra, nëse vazhdon në trajektoren e tij aktuale, Muriqi mund të tejkalojë edhe rekordin e tij personal- 17 gola, një shifër që e ka arritur në tre raste të ndryshme.

Muriqi mund të bëhet golashënuesi më i mirë në histori të Mallorcas.

Nëse shkojmë edhe më tej për atë që Vedat Muriqi mund të arrijë këtë sezon, shohim se kalimi në vendin e dytë për golashënuesin më të mirë të të gjitha kohërave të Mallorcas është i arritshëm, dhe në fakt, thjesht çështje kohe.

Me 38 gola në 117 ndeshje në La Liga, Muriqi është gjashtë gola prapa Juan Arangos, i cili shënoi 45 gola në 183 ndeshje në La Liga. Një shifër krejtësisht e arritshme në muajt në vijim që mund ta kalojë legjendën e klubit.

Rekordin për gola të shënuar e mban Samuel Eto’o i cili ka shënuar 53 gola në 133 ndeshje.

Megjithatë, me një kontratë deri në vitin 2029, duket gjithashtu se është çështje kohe para se “Pirati kosovar” të bëhet sulmuesi me më së shumti gola në historinë e ekipit elitar të Spanjës./S.K/EO

Continue Reading

Lajmet

Shkëndija, skuadra e parë në RMV që arrin fitore në fazën e grupeve të Ligës së Konferencës

Published

7 hours ago

on

October 24, 2025

By

Skuadra nga Tetova, Shkëndija, ka arritur të shkruajë historinë e futbollit të Maqedonisë së Veriut, duke regjistruar fitoren e parë dhe tri pikët e para në fazën e grupeve të Ligës së Konferencës.

Skuadra kuqezi triumfoi me rezultat minimal 1-0 ndaj ekipit irlandez Shelburn, në ndeshjen e zhvilluar në stadiumin “Todor Proeski” në Shkup.

Goli vendimtar erdhi në minutat shtesë, pas një goditjeje të fortë të Ronaldo Webster, që u devijua nga Patrik Barnet, duke përfunduar në rrjetën e skuadrës mysafire.

Me këtë fitore, Shkëndija jo vetëm që regjistroi triumfin e parë në historinë e saj në fazën e grupeve të një gare evropiane, por gjithashtu u bë skuadra e parë nga Maqedonia e Veriut që arrin një sukses të tillë./S.K/EO/

Continue Reading

Lajmet

​Edhe Serie A pranë anulimit të ndeshjes në Australi

Published

7 hours ago

on

October 24, 2025

By

Grupi “Football Supporters Europe” (FSE) i ka kërkuar Serie A-së që të heqë dorë nga planet për zhvillimin e ndeshjes Milan–Como në Perth të Australisë.

Kjo ndeshje është e parashikuar për fillimin e vitit 2026, dhe kërkesa vjen pas vendimit të La Ligës që të anulojë një ndeshje të ngjashme mes Villarreal dhe Barcelonës në SHBA, pas protestave të lojtarëve dhe tifozëve.

Sipas protestuesve, lojërat nuk kanë vend 15,000 kilometra larg shtëpisë së tyre dhe vazhdimi i këtij projekti do të dëmtonte imazhin e futbollit italian.

Milani ka marrë me hezitim lejen e UEFA-s për ta zhvilluar ndeshjen në stadiumin Optus të Perthit, pasi San Siro nuk do të jetë i disponueshëm për shkak të Lojërave Dimërore Milano-Cortina 2026.

Megjithatë, ndeshja kërkon ende miratimin e Federatës Australiane, AFC-së dhe FIFA-s.

Drejtori ekzekutiv i Serie A, Luigi De Siervo, ka mbrojtur idenë, duke e krahasuar me modelet e NFL dhe NBA që luajnë jashtë SHBA-së.

“Futbolli duhet të ndjekë rrugën e globalizimit nëse nuk do të mbetet prapa”, tha ai.

Nga ana tjetër, Ministrja e Sportit e Australisë Perëndimore, Rita Saffioti, është e bindur se ndeshja do të zhvillohet sipas planit, duke theksuar se presin miratimin përfundimtar brenda ditëve të ardhshme./S.K/FlashScore/

Continue Reading

Të kërkuara