Lajmet

Kryespiuni ukrainas që u ka shpëtuar dhjetë atentateve dhe që pëlqen errësirën

“Më pëlqen errësira”, tha ai.

Published

on

Asnjë fije drite nuk hyn në zyrën e kreut të spiunazhit ushtarak të Ukrainës, gjeneral-lejtënant Kyrylo Budanov. Muret janë të fortifikuara, dritaret të përforcuara me thasë rëre dhe perdet të ulura. Kur Budanov, 38 vjeç, mbërriti për një intervistë për Financial Times, duke hyrë në një portë e stolisur me një ikonë fetare, ai menjëherë urdhëroi një ndihmës të fikte dritat. “Më pëlqen errësira”, tha ai.

Si kreu i Njësisë Kryesore të Inteligjencës të ministrisë së mbrojtjes, Budanov ka organizuar luftën e fshehtë të Ukrainës kundër Rusisë, duke u bërë një nga figurat më të rëndësishme në luftën e Kievit. I mbijetuari i 10 atentateve të njohura, ai jeton pak a shumë vazhdimisht në një zyrë në periferi të kryeqytetit. Ajo është e dekoruar me simbole patriotike dhe memorialë të luftës në mure dhe një bretkosë pranë tavolinës së tij.

Të besuarit e Budanov po kryejnë sulme prapa linjave të armikut në territorin e pushtuar nga Rusia, por edhe në vetë territorin rus. Por shefi i spiunazhit rrallë merr meritat për këto aksione, duke e mbajtur Moskën dhe pjesën tjetër të botës të hamendësojnë për shtrirjen dhe aftësitë e drejtorisë së tij.

Në bëmat e fundit të departamentit të tij këtë javë, ishte fluturimi i një droni deri në Shën Petersburg, duke goditur një terminal nafte dhe tentativa për të goditur një fabrikë baruti dhe një depo nafte në rajonin Bryansk, në veri të kufirit me Ukrainën. Taktikat e pacipa shpesh kanë acaruar edhe mbështetësit perëndimorë të Ukrainës. Disa kanë frikë kjo se do të provokojë një përgjigje brutale dhe ndoshta edhe bërthamore nga presidenti rus Vladimir Putin. Shefi i spiunazhit ukrainas nuk preket nga shqetësime të tilla dhe zotohet të vazhdojë të operojë thellë brenda Rusisë për të sabotuar makinën e luftës së Putinit.

“Ne nuk parashikojmë ndonjë ndryshim drastik në të ardhmen e afërt. Gjithçka që kemi bërë, do të vazhdojmë ta bëjmë”, tha Budanov.

Ai e di se ky do të jetë një vit sprovues për Ukrainën, tashmë duke luftuar Rusinë për më shumë se një dekadë që kur ushtarët e Kremlinit, pa uniforma u shfaqën në Krime dhe në rajonin lindor të Ukrainës në Donbas.

“Të thuash se gjithçka është në rregull nuk është e vërtetë. Të thuash se ishte katastrofë nuk është gjithashtu e vërtetë”,  thotë Budanov kur u pyet për kundërsulmin e shumëpërfolur të Ukrainës vitin e kaluar që dështoi në arritjen e objektivave të saj.

Ukraina do të arrijë ende ta mbajë Putinin larg, parashikon ai, dhe tashmë ka vërtetuar se “e gjithë legjenda e fuqisë [Rusisë] është një flluskë sapuni”. Si ish-ushtar i forcave speciale që luftoi në Donbas në vitin 2014, Budanov ka marrë pjesë vetë në misione sekrete, duke përfshirë gadishullin e okupuar të Krimesë. Në trup ka ende plagët nga copat nga një mine që i shpërtheu pranë dhe që për pak sa nuk e vrau pasi theu edhe qafën edhe shpinën ndërsa është qëlluar edhe në një krah.

Ai u emërua drejtor i GUR nga Presidenti Volodymyr Zelenskyy në vitin 2020. Kremlini fajësoi GUR edhe për një shpërthim në urën e Krimesë në tetor 2022. Këto e kanë rigjallëruar agjencinë, e cila prej kohësh luante në prapaskenë për sigurinë e brendshme të Ukrainës. Për këtë Budanov gëzon një status thuajse kult mes ukrainasve, të cilët shpërndajnë meme në mediat sociale kur pajisjet ushtarake shpërthejnë në Rusi ose në zonat e kontrolluara nga Rusia.

Por kjo ka edhe një kosto. Kur shefi i GUR del jashtë, ai lëviz me një rreth truprojash dhe agjentësh të inteligjencës. Nga shumë tentativa për vrasje kundër tij, të cilat ai i përshkruan si “asgjë e veçantë”, goditja më e afërt erdhi në vitin 2019, kur një bombë e vendosur poshtë automjetit të tij shpërtheu para kohe. Ai shpëtoi i padëmtuar. Duke iu kthyer prodhimit të armëve, Budanov tha se Rusia po humbet më shumë armë dhe municione sesa mund të bënte, ndërkohë që po lufton me kontrollin e cilësisë.

“Kjo është pikërisht ajo që shpjegon kërkimin e Rusisë për armë në vende të tjera”, tha ai.

Koreja e Veriut është aktualisht furnizuesi më i madh i armëve i Rusisë, tha Budanov.

“Ata transferuan një sasi të konsiderueshme municionesh artilerie. Kjo e lejoi Rusinë të marrë pak frymë. Pa ndihmën e tyre, situata do të ishte katastrofike”, tha ai. Por Rusia nuk do të preferonte të mbështetej në ndihma nga jashtë.

“Kjo është konsideruar gjithmonë një poshtërim”, shpjegoi Budanov.

Një sfidë tjetër me të cilën përballet Rusia është fuqia punëtore. Moska po humb aq ose më shumë trupa sesa mund të rekrutojë, sipas Budanov. Ndihmësi i tij, Vadym Skibitskyi, tha këtë javë se rreth 1 mijë deri në 1100 njerëz i bashkohen ushtrisë ruse çdo ditë, përmes mobilizimit ose vullnetarisht. Aty ku mobilizimi dështon, grupet mercenare ndihmojnë në plotësimin e grupeve tha Budanov, duke përmendur grupin Wagner, të themeluar nga furnizuesi i ndjerë rus i kthyer në kryekomandant të luftës Yevgeny Prigozhin.

“Wagner ekziston”, thotë Budanov, duke hedhur poshtë raportet se ai ishte çmontuar. “Dhe duke folur për Prigozhin, nuk do të isha aq i shpejtë me përfundime”, tha ai duke iu referuar vdekjes së raportuar të kryekomandantit në një aksident avioni vitin e kaluar, një vrasje që perëndimi beson se ishte urdhëruar nga Putini. Kremlini mohoi përfshirjen dhe tha se ADN-ja vërtetoi se Prigozhin vdiq. Por trupi i tij nuk u pa kurrë publikisht.

“Unë nuk po them se ai nuk ka vdekur apo se ka vdekur. Unë po them se nuk ka asnjë provë të vetme që ai ka vdekur”,  tha Budanov.

Një tjetër hobi i preferuar i Budanov është shëndeti i Putinit. Në të kaluarën ai ka pretenduar se presidenti i Rusisë ka kancer dhe Budanov këmbëngul se sheh rregullisht “klone” të Putinit në televizion.

I pyetur për prova, Budanov tha se analistët e tij studiojnë “fizionominë” e Putinit, lobet e veshit, distancën mes vetullave, e kështu me radhë.

Nuk është aq e vështirë. Këtë mund ta bësh lehtësisht vetë”, shtoi ai, duke ngritur supet sikur të sugjeronte se të ngjashmit ishin një mashtrim i dukshëm.

Në fund, duke iu rikthyer temës së luftës, Budanov nuk pranon të bëjë ndonjë parashikim të guximshëm për vitin 2024.

“Jo. Shpresoj që suksesi ynë të jetë më i madh se i tyre”, tha ai duke dalë nga dhoma e errësuar./Lapsi.al

Lajmet

LDK dorëzon kallëzime penale për anëtarët e Qeverisë në detyrë

Published

on

By

Lidhja Demokratike e Kosovës (LDK) ka dorëzuar 17 kallëzime penale ndaj kryeministrit në detyrë, ministrave dhe një zëvendësministre në detyrë, që janë zgjedhur deputetë, duke i akuzuar për shkelje të Ligjit për Qeverinë.

Deputetja e LDK-së, Hykmete Bajrami, që dorëzoi së bashku me deputeten Doarsa Kica-Xhelili kallëzimet penale në Prokurorinë Speciale, tha se kryeministri në detyrë, Albin Kurti, dhe vartësitë e tij, të zgjedhur deputetë në zgjedhjet e 9 shkurtit, kanë shkelur nenin 26 të Ligjit për Qeverinë.

Ajo argumentoi se LDK-ja vlerëson se që nga data 27 mars – kur Komisioni Qendror i Zgjedhjeve certifikoi rezultatin zgjedhor – anëtarët e Qeverisë në detyrë, që janë zgjedhur deputetë, e kanë shkelur këtë ligj.

Duke qenë se që nga data e certifikimit e deri më sot vazhdojnë të qëndrojnë në zyrat e ministrive, duke shfrytëzuar resurset, duke marrë vendime të cilat kanë pasoja financiare dhe pasoja të tjera dhe duke shfrytëzuar resurset e institucioneve të Republikës së Kosovës këta deputetë kanë konsumuar vepër penale“, tha Bajrami.

Bajrami shtoi se për hartimin e kallëzimeve penale, juristët e LDK-së kanë kërkuar qasje në dokumente nga ministritë përkatëse.

Prej disa kemi marrë [qasje në dokumente], disa të tjerë nuk na kanë dhënë qasje dhe ato informata që kemi pasur ne sot i kemi drejtuar te Prokuroria Speciale. Tani, është në dorën e Prokurorisë të kërkojë qasje në vendime të tjera”, tha Bajrami.

Në nenin 26 të Ligjit për Qeverinë, të cilit i është referuar LDK-ja për kallëzimet penale, thuhet: Në rast se anëtari i Qeverisë në detyrë zgjidhet deputet i Kuvendit të Republikës së Kosovës, i njëjti duhet të japë dorëheqje nga posti i anëtarit të Qeverisë para ditës së certifikimit të rezultatit të zgjedhjeve.

Kryeministri në detyrë, Albin Kurti, i cili ka bërë edhe betimin si deputet i legjislaturës së nëntë, më herët ka argumentuar se ekzekutivi i tij është në dorëheqje që nga 23 marsi, kur i ka përfunduar mandati i rregullt 4-vjeçar.

Çështja e dorëheqjes së Kurtit dhe ministrave në detyrë, u aktualizua edhe në nisjen e seancës konstituive më 15 prill, kur deputetët, që mandatin e kaluar ishin në opozitë, votuan kundër verifikimit të mandateve, duke kërkuar dorëzimin e dorëheqjeve zyrtare të kabinetit qeverisës në Kuvend.

Kurti, në anën tjetër, njoftoi Kuvendin, se Qeveria e tij ishte në detyrë që nga 23 marsi, ndërkaq më vonë ministrat e tij kanë deklaruar se dorëheqjet e tyre ia kanë dorëzuar Kurtit. Por, më mospajtimet lidhur me dorëheqjen e Kurtit u tejkaluan në Kuvend, duke i hapur rrugë betimit të deputetëve të legjislaturës së nëntë.

Kallëzimet penale vijnë në kohën kur edhe pas tre muajsh nga mbajtja e zgjedhjeve të rregullta parlamentare, Kosova nuk ka krijuar institucionet e reja.

Që nga 15 prill, deputetët ende nuk e kanë përmbyllur konstituimin e Kuvendit dhe çështja ka ngecur te zgjedhja e kryeparlamentarit. Vetëm me zgjedhjen e kryeparlamentarit dhe nënkryetarëve Kuvendi do të konsiderohej i konstituuar. Një gjë e tillë do t’i hapte rrugë formimit të Qeverisë së re të Kosovës./REL/

Continue Reading

Lajmet

Policia jep detaje për aksionin në disa lokacione në veri ku u zbulua punishtja e armëve, u arrestuan tre të dyshuar

Published

on

By

Policia e Kosovës (PK) përmes raportit 24 orësh ka dhënë detaje për aksionin e së mërkurës në disa lokacione në Mitrovicë të Veriut dhe Zveçan, ku u zbulua një punëtori për modifikimin e armëve.

Sipas Policisë, në këtë aksion u arrestuan tre të dyshuar- ku njëri prej tyre u dërgua në mbajtje, raporton “Betimi për Drejtësi“.

Rasti është iniciuar si “Import, eksport, furnizim, transportim, prodhim, këmbim ose shitje e paautorizuar e armëve dhe materialeve plasëse”.

Mitrovicë Veri-Zveçan  07.05.2025 – 07:00.Pas hetimeve të zhvilluara, me urdhëresë të gjykatës, janë bastisur disa lokacione, në njërën prej tyre është zbuluar një punëtori për modifikimin e armëve të zjarri.  Janë sekuestruar armë të ndryshme, pjesë të armëve, thika, municion, dhe tre makina metalike për gdhendjen e metalit. Lidhur me rastin, tre të dyshuar meshkuj kosovarë janë arrestuar dhe me vendim të prokurorit, njëri prej tyre pronari i shtëpisë është dërguar në mbajtje, ndërsa dy të tjerët janë liruar në procedurë të rregullt”, thuhet në njoftim.

Continue Reading

Lajmet

PE: Kosova të bëjë reforma për t’iu afruar BE-së, të hapë kapitull të ri bisedimesh me Serbinë

Published

on

By

Deputetët e Parlamentit Evropian kanë miratuar një raport për Kosovën që inkurajon shtetin të bëjë reforma për të lëvizur drejt anëtarësimit në Bashkimin Evropian, por po ashtu kërkon që Prishtina dhe Beogradi të hapin një kapitull të ri në bisedimet për normalizim.

Është e qartë që procesi integrues i Kosovës ka nevojë për një momentum të ri – na duhet një kapitull i ri i bisedimeve mes Prishtinës dhe Beogradit. Është jashtëzakonisht pozitive që të gjitha partitë e mëdha politike në Kosovë mbështesin fuqishëm integrimin në BE. E ardhmja e Kosovës është në familjen evropiane dhe ne do të punojmë së bashku në agjendën e reformave sepse çdo anëtarësim në të ardhmen duhet të bazohet në meritë”, tha raportuesi për Kosovën në PE, Riho Terras.

Sipas eurodeputetëve, dialogu për normalizimin e raporteve mes Kosovës dhe Serbisë, “fatkeqësisht nuk ka prodhuar rezultatet e pritura”, teksa ata u kërkuan të dyja palëve që të zbatojnë marrëveshjet e Brukselit dhe Ohrit, përfshirë themelimin e Asociacionit të komunave me shumicë serbe dhe që Serbia të mos kundërshtojë anëtarësimin e Kosovës në organizata rajonale dhe ndërkombëtare.

Për shkak të krizave në veriun e Kosovës, që rritën tensionet mes dy vendeve, që nga shtatori i vitit 2023 në Bruksel nuk është zhvilluar asnjë rund i dialogut politik, por ka pasur vetëm bisedime në nivel të kryenegociatorëve.

BE-ja ka përsëritur vazhdimisht se normalizimi i raporteve mes Kosovës dhe Serbisë është parakusht për rrugën e të dyja vendeve drejt integrimit evropian.

Së voni, shefja për politikë të jashtme dhe siguri e BE-së, Kaja Kallas, ka thënë se Brukseli është duke analizuar gabimet në procesin e dialogut, që ka nisur më 2011.

Ndërkaq, në raportin për Kosovë, PE-ja tha se shteti ka bërë përparim të dukshëm në reformën zgjedhore, qëndrueshmërinë ekonomike dhe mbrojtjen e të drejtave themelore.

Megjithatë, sfidat mbeten sa i përket reformave në gjyqësor, liri të medias, efikasitetit të administratës publike dhe digjitalizimit të shërbimeve publike. Eurodeputetët theksuan se përkushtimi i vazhdueshëm i reformave gjithëpërfshirëse dhe qeverisjes përfshirëse është thelbësore për përparimin e Kosovës në rrugën drejt integrimit evropian.

Eurodeputetët thanë po ashtu se Kosova ka qenë cak i ndërhyrjeve të huaja dhe fushatave dezinformuese, veçmas nga Rusia dhe Kina, që kishin për synim destabilizimin e rajonit dhe pengimin e integrimit evropian të Ballkanit perëndimor.

Prandaj, “Parlamenti Evropian i bën thirrje Qeverisë së Kosovës që të forcojë kapacitetet e saj për të luftuar këto kërcënime”, tha PE-ja.

Më 7 maj, eurodeputetët po ashtu kanë miratuar një raport për Serbinë, të cilës iu kërkua që të përmirësojë dialogun e brendshëm politik, të mbrojë sundimin e ligjit dhe të bëjë reforma kundër korrupsionit.

Ndërkaq, sa i përket dialogut me Kosovës, në raport u tha se Serbia “duhet të punojë në arritjen e një marrëveshjeje gjithpërfshirëse të normalizimit me Kosovën”, por po ashtu edhe të “harmonizojë plotësisht politikën e saj të jashtme me atë të BE-së”./REL/

Continue Reading

Lajmet

Arrestohet i dyshuari për shpërthimin e veturës së u.d. të drejtorit të QKUK-së

Published

on

By

Prokuroria Themelore në Prishtinë njofton se është arrestuar B.K., në Podujevë, nën dyshimin për shpërthimin e veturës private të ushtruesit të detyrës së drejtorit të QKUK-së, Osman Hajdari, më 30 prill 2025.

Prokuroria Themelore në Prishtinë, në bashkëpunim dhe koordinim të plotë me Policinë e Kosovës ka arrestuar një (1) person B.K. në  Podujevë i dyshuar për kryerjen e veprave penale “Përdorimi i armës apo mjetit të rrezikshëm”  nga neni 367 par. 2 të KPRK-së, Zjarrvënia” nga neni 322 par. 2 të KPRK-së dhe “Mbajtja në pronësi, kontroll ose posedim të paautorizuar të armëve” nga neni 366 par 1 të KPRK-së, i cili ka ndodh me datë 30.04.2025 në oborrin e QKUK-së, kundër veturës  se UD Drejtorit të QKUK-së”, thuhet në njoftim.

Sipas Prokurorisë, operacioni policor në bashkëpunim të ngushtë me prokurorin e shtetit është duke vazhduar në mënyrë të intensifikuar në disa lokacione të ndryshme për mbledhjen e provave për hetimin e të gjitha rrethanave të rastit.

Shërbimi Spitalor Klinik Universitar (SHSKUK) përmes një komunikate për medie kishte se dëmtimi ka ndodhur në rrethana të panjohura, teksa parasahihej të mbahej mbledhja e Bordit Drejtues.

Sot, në parkingun e administratës së Qendrës Klinike Universitare të Kosovës (QKUK), ka ndodhur një incident që përfshin dëmtimin e veturës private të ushtruesit të detyrës së drejtorit të QKUK-së, e parkuar në parkingun e administratës. Dëmtimi ka ndodhur në rrethana ende të panjohura, në kohën kur po bëheshin përgatitjet për fillimin e mbledhjes së rregullt të Bordit Drejtues të Shërbimit Spitalor dhe Klinik Universitar të Kosovës (ShSKUK), e cila ishte paraparë të mbahej në hapësirat e administratës qendrore të ShSKUK-së”, thuhej në komunikatë./BetimipërDrejtësi/

Continue Reading

Të kërkuara