Presidenti francez, Emmanuel Macron deklaroi në një intervistë se ”u takon evropianëve të vendosin se si t’i përdorin asetet e ngrira ruse, të cilat Donald Trump po i propozon si pjesë të planit të tij për të investuar në projekte të udhëhequra nga SHBA-të për të rindërtuar Ukrainën, shkruan ANSA.

“Evropianët janë të vetmit që duhet të thonë, meqenëse është pjesë e planit, se çfarë do të bëhet me asetet e ngrira ruse të mbajtura nga evropianët”, theksoi kreu i shtetit.

“Presidenti rus Vladimir Putin nuk dëshiron t’i japë fund luftës në Ukrainë. Nëse do të donte do ta bënte. Por, sot ai vazhdon të vrasë civilë dhe vazhdon të shkatërrojë në mënyrë metodike gjithçka që lidhet me energjinë elektrike dhe ta zhytë popullsinë në të ftohtë dhe errësirë”, shtoi ai.

Për presidentin francez “paqja fillon me një armëpushim”.

Forcat ruse sulmuan kryeqytetin ukrainas Kiev herët të martën, duke shkaktuar zjarre në të paktën dy ndërtesa banimi dhe duke vrarë një person, tha një zyrtar i lartë.

Tymur Tkachenko, kreu i administratës ushtarake të kryeqytetit, tha se një person u vra dhe shtatë u plagosën në sulmet ajrore, të nisura pas orës 1 të mëngjesit, shkruan Reuters.

Njësitë e mbrojtjes ajrore ishin në veprim rreth kryeqytetit dhe administrata ushtarake tha se ishin vendosur si dronët ashtu edhe raketat. Një alarm i ri ajror u shpall në kryeqytet pas orës 5 të mëngjesit./EO

Çdo plan paqeje i besueshëm duhet të ndalojë vrasjet dhe njëkohësisht të mos mbjellë farat për një konflikt të ardhshëm, tha presidentja e Komisionit Evropian, Ursula von der Leyen në një deklaratë, sipas BBC.

“Janë disa elementë kryesorë që Komisioni Evropian kërkon të përfshihen. Së pari kufijtë e Ukrainës nuk mund të ndryshohen me forcë, së dyti të mos ketë asnjë kufizim në forcat e armatosura të Ukrainës që do ta linte atë të cenueshme ndaj sulmeve të ardhshme”, tha Von der Leyen.

“Roli qendror i Bashkimit Evropian duhet të njihet plotësisht në çdo plan paqeje për Ukrainën”, shtoi ajo.

Von der Leyen gjithashtu bëri një thirrje për kthimin e çdo fëmije ukrainas të rrëmbyer nga Rusia”, duke shtuar se dhjetëra mijëra djem dhe vajza kishin mbetur të bllokuar në vend./KP

Ushtria izraelite ka vrarë një anëtar të lartë të grupit militant Hezbollah në një sulm ajror në periferitë jugore të kryeqytetit libanez, Bejrut, pavarësisht një armëpushimi.

Ajo e përshkroi Haitham Ali al-Tabtabai, shefin e shtabit të Hezbollahut, si një veteran të grupit i cili kishte mbajtur një sërë pozicionesh të larta, shkruan BBC.

Ministria e shëndetësisë e Libanit tha se të paktën pesë persona u vranë dhe 28 të tjerë u plagosën në sulmin, i cili goditi një ndërtesë apartamentesh në lagjen me popullsi të dendur Dahieh.

Hezbollah konfirmoi vdekjen e Tabtabai, duke shtuar se Izraeli kishte kaluar një “vijë të kuqe” në kryerjen e sulmit./KP