13 mars 1993

Vizitë e suksesshme e kryetarit Rugova në Itali;

Nga konferenca për gazetarë e kryetarit Rugova në Tiranë;

“Borba”: Kolombo dhe Papa pritën Rugovën;

Varrimi i Berit Bakerit bëhet të mërkurën;

Inspektorët serbë interesohen për sjelljet e policisë serbe!;

Në Deçan u arrestua një veprimtar;

Dy të arrestuar në Istog;

Represion i shtuar edhe në komunën e Malishevës;

Gjermania përgatitet të marrë pjesë në aksionet e OKB-së;

Qosiqi vazhdon traditën e gënjeshtrave serbe rreth Kosovës;

 

13 mars 1995

Deklarata e kujtime të personaliteve të Kosovës me rastin e vdekjes së Akademik Gazmend Zajmi;

Të dhëna biografike për Akademik Gazmend Zajmin;

Varrimi i të ndjerit Gazmend Zajmi bëhet nesër në varrezat e Prishtinës;

Në fund të marsit organizohet një demostratë e shqiptarëve në Uashington;

Tubim protestues i shqiptarëve në Bruksel;

Edhe një stërvitje ushtarake shqiptaro – amerikane;

Kosova edhe çështje ndërkombëtare;

Komente serbe për qëndrimet e SHBA-ve ndaj Kosovës dhe dr. Rugovës;

Dhuna e përditshme në Kosovë;

Lëvizje të ushtrisë serbe në Korishë të Prizrenit;

Policia ndërhyri në dy punkte shkollore në Mitrovicë;

Policia ndërpreu mësimin edhe në Vushtrri;

Në Shtedim të Podujevës u rrah nëna në prani të fëmijës;

Policia financiare serbe u largua me bagazhe të mbushura;

Policia kërcënon me likuidim gazetarin Çerkin Ibishi.

 

Propaganda serbe vazhdimisht në fillimet e saj

Komentet e gazetës serbe “Veçernje novosti” për qëndrimet rreth Kosovës e politikës shqiptare të kryetarit amerikan Bill Klinton të shprehura në letrën e tij dërguar kongresistëve Molinari e Engël tërheqin vëmendjen për disa shkaqe.

Komentet janë shumë të vonuara, por në stilin e propogandës serbe se qëllimi arsyeton mjetin, letrën e kryetarit amerikan Bill Klinton gazeta serbe e sheh si një dëshmi të politikës amerikane antiserbe dhe proshqiptare.

Duke dashur që edhe SHBA-të t’i fajësojë për destabilizimin e rajonit dhe të gjendjes në Kosovë, gazeta përsërit praktikisht vlerësimet e udhëheqësve politikë e shtetërorë serb se gjendjen në Kosovë mund ta destabilizojnë vetëm faktorë të jashtëm.

Në këtë rast, sipas gazetës, në Kosovë dhe në rajon gjendjen po e destabilizojnë SHBA-të, të cilat, janë të gatshme të luftojnë për “interesat e veta në Ballkan deri në shqiptarin e fundit”.

Të kujtojmë me këtë rast vlerësime të fjalëpërffjalshëm të para gjashtë viteve në propagandën serbe: Sllovenia është e gatshme të luftojë në Kosovë deri në shqiptarin e fundit; ose :Kroacia është e gatshme të luftojë në Kosovë deri në shqiptarin e fundit!

Sipas këtyre konstrukteve, shtetet e apostrofuara nuk përkrahin në Kosovë të drejtat e shqiptarëve e as Kosovën, por interesat e tyre në Kosovë.

Këto konstrukte, atëherë u arsyetonin dhe u paraprinin aksioneve të drejtëpërdrejta kundër shqiptarëve e Kosovës dhe pasoheshin me fushata propagandistike kundër Sllovenisë e Kroacisë.

Nuk janë vetëm këto cilësime dëshmi se propoganda serbe gjendet vazhdimisht në fillimet e saj.

Duke komentuar letrën e presidentit Klinton, gazeta serbe citon burimet shqiptare jasht Kosovës, si “Illyria”, “Rilindja” dhe Agjencinë Telegrafike Shqiptare, por ajo kurrësesi nuk citon burimet e mjetet e informimit në Kosovë.

Në këtë mënyrë regjimi serb përpiqet të injorojë forcën dhe legjitimitetin e politikës shqiptare në Kosovë. Në funksion të taktikës së saj të përçarjes, propaganda serbe luan lojën e gjoja afirmimit të një lloj politike shqiptare të egzilizmit dhe të gjoja institucioneve e asociacioneve të caktuara, por gjithësesi jasht Kosovës.

 

13 mars 1997

Kryetari Rugova priti trojkën e OSBE-së;

Kryeministri e vlerëson Shqipërinë në prag të luftës civile;

SHBA i bëjnë thirrje shqiptarëve që të mbështesim qeverinë e re;

1. Bërns shpreh shqetësimin për zgjerimin e rebelimit në veri;

Përpjekje për normalizimin e jetës në Berat;

U plaçkitën depotë e armatimeve në Elbasan;

U shpërthyen depotë e armëve në Korçë;

U mbyll aeroporti i Rinasit;

Për mospërhapjen e konfliktit në vendet fqinje;

OSBE‑ja propozon dërgimin e ekspertëve në Tiranë;

KE paralajmëron katastrofën në rast të dështimit të marrëveshjes;

Korparmata e dytë e Maqedonisë në gjendje gatishmërie;

Ligji për Informim i Serbisë, implikimet për Kosovën;

Deklaratë e sekretarit të KMDLNJ-së rreth tryezës së paralajmëruar në Brezovicë;

Kushtetuta e Maqedonisë nuk e pengon arsimimin sipëror në gjuhën shqipe;

Një inspektor serb ndërhyri në lokalet e SHF “E. Berisha” në Llashticë.

Dhuna e përditshme në Kosovë

 

Prishtinë, 13 mars (QIK)

Shtime: – Sot, në stacionin e policisë serbe në Ferizaj, inspektorët e sigurimit serb morën në pyetje Mehdi Sadriun nga Davidovci.

Ditëve të fundit, dy herë u mor në pyetje Nazmi Ibali, anëtar i Kryesisë së Degës së LDK-së në Shtime. Ai u pyet rreth aktivitetit të tij politik dhe të Degës së LDK-së në Shtime.

Po ashtu ditëve të fundit, me pretekst të kërkimit të armëve, u mor në pyetje edhe Fadil Ferati nga Pjetërshtica.

Gjilan: – Më 6 mars, në të ashtuquajturën bisedë informative në stacionin e policisë serbe në Gjilan u mor Adem Isufi, veprimtar i LDK-së nga Kravarica e Gjilanit. Ai u mor në pyetje rreth tri orë dhe u pyet për aktivitetin e LDK-së në Kravari dhe për Nëndegën e LDK-së në Cërnicë etj.

 

13 mars 1998

 Edicioni i parë (Ora 12:00)

Konferencë me gazetarë e Kryetarit të Republikës së Kosovës dr. Ibrahim Rugova;

Përfaqësuesit e LDK-së me Komitetin ad hoc të Këshillit të Evropës;

Rezolutë e UE-së për Kosovën;

Komuniteti shqiptaro-amerikan kërkon ndërhyrje të menjëhershme ndërkombëtare në Kosovë;

Një delegacion i shqiptarëve nga Melburni u takua me zyrtarë të lartë të Australisë;

Malajzia dënon dhunën në Kosovë; Ua vranë tre anëtarë të familjes e tash i keqtrajtojnë;

Policia fotografon dhomat e mësimit në shkollën e Shipolit; Në Junik e Pomozetin u grumbulluan ndihma për Drenicën; Lagja e Xanajve u plaçkit e u demolua tërësisht; Hani i Elezit: Dhunë e provokime të shtuara të forcave ushtarako-policore; Veprimtarët e LDK-së në Lipjan u morën sërish në polici; Sugjerime kundër hapjes së “korridorit human”; Parlamenti i Maqedonisë nuk përkrahu një projektdeklaratë për Kosovën; Shqiptarët në Australi ndihmojnë Kosovën; Me popullin e Kosovës solidarizohen edhe refugjatët boshnjakë e qytetarët norvegjezë.

 

Edicioni i dytë (ora 14:30):

Klintoni nuk përjashon intervenimin ushtarak ndaj Beogradit;

Departamenti Amerikan i Shtetit: Policia serbe bën spastrim etnik në Kosovë;

Ollbrajt sërish për Kosovën;

Xhejms Rubin: Ofertë e mjerë për dialog e regjimit serb;

Dëshmia e Robert Gelbardit në Kongresin Amerikan;

1. Gelbard: “Veprimet skandaloze dhe të pamoralshme të Beogradit kërkojnë përgjegje të fuqishme dhe unike”;

“La stampa”: Gelbard, për autonominë e Kosovës brenda Jugosllavisë, por jo edhe brenda Serbisë;

Rezolutë për Kosovën në Kongresin amerikan;

Parlamenti Evropian dënoi aksionet brutale të forcave serbe dhe kërkoi dërgimin e forcave preventive në Kosovë;

Robinson kërkon lejimin e hulumtimeve të vrasjeve të fundit në Kosovë;

Gjakovë: Të shtëna pas mesnatës në Lugbunar, plagoset Ukë Nikaj (72);

Helikopteri ushtarak vrojton të ikurit nga Drenica;

Janosh Bugajski: Kosova të vihet nën protektoratin e NATO-s;

Pengjet mbahen nën mbikëqyrje të tmerrshme;

U themelua Këshilli Republikan për Ndihma të Ngutshme.

 

Edicioni i tretë (Ora 16:30):

Kryetari Rugova priti Nikollas Hillin;

Mbledhje e Këshilltarit për Arsim me kryetarët e këshillave të arsimit;

Mitrovicë: Lëvizje të forcave serbe në drejtim të Skënderajt e të Prishtinës;

U keqtrajtua në aeroportin e Prishtinës;

 

13 mars 1999

Ora 10:00:

Vushtrri: Forcat serbe po granatojnë fshatrat: Balinc, Liqej e Oshlan;

Mitrovicë: Forcat serbe po granatojnë Vaganicën dhe Verrnicën;

Mitrovicë: Isa Qerkinaj u dënua me 10 vjet burg;

 

Ora 13:30:

Shpërthim i fuqishëm në qendër të Podujevës – druhet për pasoja të rënda;

Snajperistët serbë shtinë drejt disa shqiptarëve dje pasdite në Podujevë;

Granatohen fshatra të Mitrovicës, Vushtrrisë dhe Skënderajt;

Vushtrri: Digjen shtëpitë shqiptare në Mihaliq e Druar;

Viti: Ushtarët serbë vendosen ne Debëllde – banorët ikin nga fshati;

Forcat serbe shtinë në tre nxënës nga Bubaveci;

Nga morgu i Prishtinës u tërhoq trupi i një shqiptari të vrarë në Pustenik të Kaçanikut;

Kaçanik: Nga tri fshatra u zhvendosën mbi 3 mijë banorë;

Prishtinë: Një nxënës u zhduk pa gjurmë;

Koncentrim i madh i forcave serbe në Obiliq e rrethinë.

 

Ora 14:00:

Edhe një shpërthim në Podujevë – dhjetëra të plagosur, druhet për së paku dy të vrarë

 

Vetëm dhjetë minuta pas shpërthimit në tregun e Podujevës, në orën 13.20 një mjet i fuqishëm eksploziv shpërtheu edhe në afërsi të postës së këtij qyteti.

Dega e LDK-së në Podujevë njofton se masa shpërthyese, e cila ishte e vendosur në një kontejner bërllogu afër një kiosku gazetash, eksplodoi fuqishëm, duke plagosur, sipas njoftimeve të para, së paku dhjetë qytetarë.

Ky burim thekson se nga shpërthimi në tregun e Podujevës, sipas njoftimeve të deritashme, ka dhjetëra të plagosur, ndërsa burime të pakonfirmuara kanë thënë se dy veta janë vrarë.

Të plagosurit janë bartur në drejtim të Shtëpisë së Shëndetit në Podujevë, ndërsa në drejtim të Prishtinës kanë ardhur me shpejtësi të mëdha autoambulancat që kanë bartur të plagosurit në gjendje më të rëndë.

Deri tash nuk ka mundësi të sigurohen informata më të plota rreth bilancit të viktimave. Tregu i qytetit, kun ndodhi shpërthimi i parë, është bllokuar nga forcat policore.

Ndërkohë, një burim nga Podujeva konfirmoi se nga shpërthimi janë plagosur rëndë Shukrije Berisha (30) dhe Jusuf Jusufi nga Dumnica.

Në vendet ku kanë ndodhur shpërthimet kanë dalë pjesëtarë të Misionit Verifikues të OSBE-së të cilët po u japin ndihmë të plagosurve.

Selia e OSBE-së Prishtinë, deri në orën 14 ka pasur njoftim për pesë të plagosur nga shpërthimi i parë që ndodhi në orën 13.10 në tregun e Podujevës.

 

 

Ora 14:30:

Shpërthim i fuqishëm në tregun e Mitrovicës;

Podujevë: Së paku 5 të vdekur nga shpërthimet e sotme;

1. Thaçi: Përgjigja përfundimtare për dokumentin e Rambujesë është një vendim historik për popullin e Kosovës;
2. Uoker: Mbi 90 për qind e popullatës së Kosovës do t’i mirëpresë trupat e NATO-s;

Ivanov: Millosheviqi refuzoi trupat e NATO-s;

Petriç: Në Paris do të bëhet fjalë për implementimin e marrëveshjes;

Komunikatë e UPS të UP-së;

Janovski: Kosovën e ka përfshirë një terror i tmerrshëm serb;

UNCEF: Fëmijët dhe gratë viktimë e terrorit brutal serb;

KMDLNJ: Dënimi i gazetës “Kosova Sot” – vazhdim i dhunës ndaj shqiptarëve;

Përfaqësuesit e OSBE-së vizituan PLK-në;

Një delegacion i Kryesisë së Degës së LDK-së në Fushë Kosovë u prit në OSBE-në në Prishtinë;

1. Klark paralajmëroi Millosheviqin për sulme të mundshme ajrore;

Në Ferizaj u varrosën dy ushtarë të UÇK-së;

Gjendja në Deçan vazhdon të jetë e rëndë.

 

Ora 15:30:

Druhet për së paku 5 ose 6 të vrarë nga shpërthimi në tregun e Mitrovicës;

Ende pa të dhëna të plota për pasojat e shpërthimeve në Podujevë;

Forca të shumta ushtarake serbe në Han të Elezit;

Vazhdojnë granatimet në fshatrat rrëzë Qiqavicës;

Komiteti politik i Asamblesë Parlamentare të KE zhvilloi një debat për statusin e ardhshëm të Kosovës;

Konferencë për gazetarë e drejtuesve të tri gazetave shgiptare të cilat regjimi serb i dënoi me masa drakonike;

Deklaratë e përbashkët e redaksive “Kosova sot”, “Rilindja” dhe “Gazeta e re shqiptare” rreth masave serbe kundër tyre.

 

Ora 17:00:

Delegacioni i Kosovës sot pasdite u nis për Paris;

Forcat serbe granatuan disa fshatra të Podujevës;

Forcat serbe granatojnë e mitralojnë vendin e quajtur Blinishtë të Sllatinës;

PNDSH kërkon nga delegacioni i Kosovës që më 15 mars në Paris të nënshkruajë Marrëveshjen e Rambujesë.

12 mars 1993

Konferencë e rregullt e LDK-së për gazetarë;

Delegacioni suedez për çështje të emigracionit në Kosovë;

AFP: Rugova dënon “spastrimin e heshtur etnik” në Kosovë;

Kamioni me ndihma humanitare pret në doganën e Prishtinës;

Kumtesë e Këshillit për Mbrojtjen e të Drejtave dhe Lirive të Njeriut;

Në Dobelldeh të Vitisë lëvizje ushtarake;

Bastisje edhe në Mitrovicë;

Në Gjakovë vazhdojnë ftesat për armë;

Përkundër kërcënimeve mësimi u mbajt në Suharekë.

 

Masa të vazhdueshme për kolonizimin e Kosovës

 Mbështetur në Programin e Kuvendit të Serbisë për kolonizimin e Kosovës, i cili u miratua më 1990, për serbët dhe malazezët u hap rruga për të marrë falë kredi, troje, banesa, tokë, mal dhe paisje bujqësore. Madje filloi edhe ndërtimi i kolonive, që do të jenë një lloj tipi i kibuceve izraelite.

Kështu, në Skënderaj që ka 50 mijë banorë, dhe që para tri vjetësh kishte 1.100 serbë dhe malazias, tashti me tërë punët në komuna që udhëheqin serbët. Autoritet lokale të instaluara nga Serbia në këtë komunë, gazetës serbe “Jedinsvo” i deklaruan se nga 174 serbë e malazezë që ishin para tri vjetëve në Skënderaj, tash në këtë qytezë jetojnë e punojnë trefish më shumë serbë e malazias. Prej tyre, 41 veta u janë siguruar vendet punës dhe banesat. Ata janë vendosur në vendet e punës ku më parë punonin shqiptarët dhe të cilët u larguan me dhunë nga vendet e tyre të punës. Kuvendi i Serbisë ka miratuar edhe një vendim për të ndihmuar ndërtimin e 30 banesave të reja për serbë dhe malazezë në këtë komunë. Është duke u zhvilluar edhe porcedura për ndërtimin e tri vendbanimeve serbe në Skënderaj, Tomisllav dhe Morinë. Serbëve në këto vendbanime do t’u sigurohet edhe tokë e punueshme.

 

12 mars 1994

 Policia serbe rrethoi dhe bastisi 22 familje në Cerajë të Leposaviqit

Dje, rreth orës 6 të mëngjesit, një ekspeditë e policisë serbe e përbërë prej afro 100 vetash, nën pretekst të kërkimit të armëve dhe arrestimit të disa të rinjëve, të cilët gjatë viteve 1991-92, kishin ikur nga ish-armata jugosllave, bastisën 22 familje shqiptare në fshatin Cerajë të komunës së Leposaviqit, njofton Komisioni për Informim i Degës së LDK-së në Mitrovicë.

Bastisjet dhe arrestimet e policisë serbe zgjatën deri në orën 12.30, me ç’rast ekspedita e policisë serbe bastisi familjet e Abdyl e Beqir Abdylit, Zenel, Hajrë e Xhevat Hajrës, Jetish, Xhafer e Nazif Halilit, Mahmut Ibrahimit, Shaban Azemit, Faik e Abit Mustafës, Demir e Hazir Aliut, Jetullah e Brahim Miftarit, Abaz Elezit, Afrim e Muharrem Ademit,si dhe familjet e Sinan, Behram e Ramadan Rrahmanit.

Njoftohet se policia serbe arrestoi arsimtarin Beqir Abdylin, ndërsa rrahën brutalisht të rinjtë Feriz Aliun (16), Besim Abdylin (16) dhe Driton Abdylin (16), ndërsa ftesa për t’u lajmëruar sot në organet e policisë në Mitrovicë iu lanë Abdyl Abdylit (58) dhe Latif Aliut (23).

Policët gjatë bastisjes kërkonin për t’i dërguar me dhunë në ushtrinë serbe të rinjtë Muhamet Ademin (19), Faruk Abdylin (21), Nexhat Abdylin (21), Hajriz Aliun (21), dhe Safet Hajrën (18).

Gjatë bastisjes ekspedita e policisë serbe ua konfiskoi armët për të cilat dispononin leje këtyre personave, Behram e Sinan Rrahmanit, Muharrem Ademit, Abaz Elezit, Shyqri Miftarit, Mahmut Ibrahimit, dhe Beqir Abdylit, ndërkaq njoftohet se dy revole për të cilat nuk dispononin leje iu morën Beqir Abdylit dhe Demir Aliut.

Kësaj ekspedite të madhe të policisë serbe i printe komandanti i stacionit të policisë në Leposaviq, Lubisha Qosiç.

Në fund të bastisjes, e cila përfundoi në orën 12.30, policët serbë u kërcënuan se derisa vet fshatarët nuk i dorëzojnë të rinjtë, Muhamet Ademin, Faruk e Nexhat Abdylin, Hajriz Aliun dhe Safet Hajrën, do të kthehen sërish dhe do të vazhdojnë me bastisje e keqtrajtime.

 

Lajmet e tjera:

Ushtria serbe u kërcënohet 300 të rinjve shqiptarë për rekrutim;

Forcimi i pozicionit ndërkombëtar të Kosovës dhe dr. Rugovës përcillet me nervozizëm;

Represioni i policisë serbe në Kosovë;

Reagimet serbe për refugjatët shqiptarë në Gjermani;

 

 

12 mars 1997

Lajmet kryesore:

Bashkim Fino – kryeministër i Shqipërisë;

Ka mosmarrëveshje vetëm për ministrin e brendshëm;

Kuvendi miratoi ligjin për amnistinë;

SHBA mirëpritën caktimin e kryeministrit të ri shqiptar;

Franca, Belgjika dhe Britania e Madhe të shqetësuara për gjendjen në Shqipëri;

Mierlo për rrezikun e përhapjes së konflikteve në Kosovë;

Deklaratë e ASHA të Kosovës për ngjarjet në Shqipëri;

Mark Almond për strategjinë e fshehtë të PS në Shqipëri;

The Sunday Telegraph: Mediat përkrahin komunistët në Shqipëri;

Deklaratë e përbashkët e “11 përfaqësuesve të kryengritësve të armatosur” në Gjirokastër;

Situatë e rrezikshme në veri të Shqipërisë;

Situatë dramatike në Shqipëri;

Tri projektrezoluta për Kosovën në Parlamentin Evropian;

Adem Demaçi priti diplomatët rusë;

Në Brezovicë prej 21 e deri më 23 mars mbahet një takim shqiptaro-serb;

Tre civilë sulmuan një të ri shqiptar;

Persona të maskuar keqtrajtuan një qytetar nga Stagova e Kaçanikut;

Në Lagjen e Spitalit u vunë mbishkrimet serbe të rrugëve;

Në Martinaj policia malaziase bastisi familjen Balidemaj;

Në Gjakovës u shpërndanë mbi 500 thirrje për rekrutim në ushtrinë serbe;

Dhuna e përditshme në Kosovë;

Dr. Ferid Muhiq i detyruar të heshtë ngase në Shkup kërcënohet me linç publik.

 

 

12 mars 1998

Edicioni i parë (ora 13:00):

Kryetari Rugova caktoi Komisionin Republikan të zgjedhjeve parlamentare e presidenciale;

Shiraku kërkon nga Jelcini që të bëjë presion mbi Beogradin;

Bashkimi Evropian kërcënon me ndërhyrje ushtarake;

Kuk: Në Kosovë u masakrua popullata civile;

Prodi foli për Kosovën;

Gelbarti ia dorëzoi Milosheviqit fotografitë e të masakruarve shqiptarë;

Primakovi në Beograd dhe në Prishtinë;

OSBE vendosi të bëjë hetime për të vrarët në Kosovë;

Debat për Kosovën në Parlamentin e Turqisë;

Pakistani dënon gjenocidin në Kosovë;

Pesë pjesëtarë të KKN-së largohen nga Kosova;

Institucionet e Republikës së Kosovës kërkojnë ndihmë nga Senatori Robert Dol;

Forca të mëdha të policisë në Prekaz të Ulët;

Rrëfime të atyre që ia dolën të shpëtojnë nga masakra serbe në Prekaz;

Llausha mbahet ende në gjendje rrethimi;

Kush po hedh bomba në lokalet e shqiptarëve në Pejë;

Situatë e rëndë në fshatrat e Dushkajës së Gjakovës;

Vushtrri: Policia konfiskon miellin nga firmat shqiptare;

Helikopterë e aeroplanë fluturojnë shpesh drejt Drenicës;

Interesim i madh i shqiptarëve në Maqedoni për të ndihmuar drenicasit;

Drejtues të LDK-së pritën drejtues të PL të Sanxhakut, Partisë së Koalicionit e PAD-it.

 

Edicioni i dytë (ora 15:30):

Xh. Mustafa: Ofertat e Beogradit për dialog janë joserioze;

“Dojçe vele” : Shqiptarët e Kosovës nuk mund të ulen në të njëjtën tryezë me vrasësit;

Asnjë shqiptarë nuk iu përgjigj kuaziofertës serbe për bisedime;

UP dhe UPS shprehin pakënaqësi me vendimet e Grupit të Kontaktit;

Xhejms Folli: Refuzimi i dialogut nga pala serbe – thelb i jostabilitetit në Kosovë;

Bashkimi Evropian ka një instrument të efektshëm për zgjidhjen e krizës në Kosovë;

Rumania përcjell nga afër zhvillimet në Kosovë;

Lëvizja të vazhdueshme të forcave serbë në relacionin Mitrovicë-Skënderaj dhe anasjelltas;

Në Tërrnavc policia ka plaçkitur shtëpitë e shqiptarëve;

Brojë: Dje pasdite u liruan 110 veta që mbaheshin peng nga policia;

Broja, Kopiliqi, Turiqeci dhe Vojnika vazhdojnë të mbahen në shënjestër të policisë;

KKK: Nga vartat e tyre janë larguar 13.925 veta;

Kontroll i rreptë i qytetarëve në Shipol të Mitrovicës;

Sipas gazetës së Beogradit “Politika”, Armend Dacin e ka vrarë UÇK!;

Deçan: Dy veprimtarë të LDK-së u morën në pyetje dhe u kërcënuan;

Represion i shtuar në Istog.

 

Edicioni i tretë (ora 19:00):

Klintoni viziton pesë muaj më herët Kinën për shkak të Irakut dhe Kosovës;

Parlamenti Evropian kërkon krijimin e forcës ndërkombëtare për ndërhyrje preventive në Kosovë;

Oferta serbe për dialog cilësohet si ofertë cinike;

Gllogoc: Gjendja vazhdon të jetë e rëndë dhe pa kurrfarë përmirësimi;

Policia ndalon e keqtrajton qytetarët;

KMDLNJ: A ka kamp përqendrimi në Drenicë?;

Dejvid Oven: Kurrë nuk ka qenë momenti më i mirë se tash për zgjidhjen e çështjes së Kosovës;

Në Gjakovë u arrestuan dy veprimtarë të LDK-së;

U arrestua sekretari i Degës së LDK-së në Lipjan;

Prizren: Represion i formave të ndryshme;

Prizren: Për Drenicën u grumbulluan deri tash 35.000 DM;

Në vend të haxhillëkut, dha për Drenicën 3.000 DM.

 

 

12 mars 1999

Ora 11:00:

Vushtrri: Granatime drejt Mihaliqit – mbrëmë u dogjën 7 shtëpi shqiptare në Stanoc;

Vazhdon granatimi i disa fshatrave të Mitrovicë e të Vushtrrisë;

Në rrugën Mitrovicë-Stantërg u gjet një person i vrarë;

Granatohen fshatrat e Llapit;

Në fshatin Besi e Lebanë janë stacionuar forca të mëdha policore serbe;

 

Ora 13:30:

Vazhdojnë të granatohen fshatrat e Vushtrrisë;

Kaçanik: Shpërthime në fshatrat Dubravë, Biçec e Kovaçec;

Mitrovicë: Lëvizje të forcave serbe – arrestime e keqtrajtime të qytetarëve;

Mitrovicë: Lutfi Voca u dënua me 12 vjet burg;

Zhvendosen banorët e fshatrave Stanofc i Epërm e Stanofc i Poshtëm të Vushtrrisë.

 

Ora 14:30:

Konferencë për gazetarë e Kryetarit të Republikës së Kosovës, Ibrahim Rugova;

Kryetari Rugova priti anëtarët e Këshillit të Nderit 2 Korriku 1990;

LDK: Trupat serbe po sulmojën fshatrat të gjitha anët e kufirit të Kosovës;

Dhoma e Përfaqësuesve e Kongresit Amerikan votoi për dërgimin e trupave amerikane në Kosovë;

Bill Klinton: “SHBA-të kanë interesa të mëdha për t’i dhënë fund konflikt mes serbëve dhe shqiptarëve në Kosovë”;

Parlamenti Evropian miratoi një rezolutë për Kosovën;

Grupi i Kontaktit takohet të dielën në Paris;

Hashim Thaçi në mbledhjen e Shtabit të Përgjithshëm të UÇK-së;

Deklaratë e dr. Bujar Bukoshit;

1. Kosumi: “Kosova del nga korniza serbe dhe jugosllave”;

Në morgun e spitalit të Gjakovës edhe një shqiptar i vrarë;

Përfaqësuesit e OSBE-së sollën trupat pa jetë të dy shqiptarëve të vrarë në komunën e Kaçanikut;

Në Dubravë kanë mbetur të bllokuar 200 shqiptarë;

Prezencë e shtuar e forcave serbe në Hant të Elezit e rrethinë;

Pejë: Dy shqiptarë u dënuan me 8 vjet e gjysëm burg;

Klinë: Policia keqtrajtoi tre nxënës shqiptarë;

Varrimi i Enver Fekës bëhet nesër, më 13 mars, në Lummadh të Vushtrrisë;

Organet serbe mgritën aktpadi kundër tri gazetave shqipe;

1. Gilman: Bisedimet Hollbruk – Millosheviq ishin të pasuksesshme;
2. Petriç: “Situata në Kosovë është e rrezikshme”;
3. Dinstbir: “Ushtria ‘jugosllave’ spastron brezin kufitar”;

Mbështetet nënshkrimi i marrëveshjes së përkohshme për Kosovën;

Zëdhënësi i socialistëve serbë thotë se Marrëveshje e re i plotëson vetëm kërkesat e ekipit negociator shqiptar;

Beogradi refuzoi të pranojë delegacionin e këshillave të politikës së jashtme të disa vendeve ballkanike;

Paramilitarët serbë të fshatit Prilluzhë sulmuan verifikuesit e OSBE-së;

Përfaqësuesit e tri konfesioneve fetare të Kosovës takohen në Vjenë.

 

 

Ora 16:30:

Dihet për 4 të vrarë dhe në fshatrat e Vërrinit – dyshohet edhe për tre të vrarë të tjerë;

Mitrovicë: I vrari që u gjet sot në mëngjes është Kadri H. Kadriu;

Në Balinc të Vushtrrisë dje është vrarë një pjesëtar i UÇK-së;

Nënkryetari i Kuvendit priti një delegacion të Këshillit të Nderit “2 Korriku”;

Dy ushtarë serbë të plagosur u dërguan në spitalin e Mitrovicës;

Civilët serbë shtinë me armë drejt një shqiptari;

Ferizaj: Forcat serbe janë pozicionuar në Gërlicë.

 

11 mars 1993

Lajmet kryesore: Papa Gjon Pali II priti dr.Rugovën; Kryetari Rugova u takua me kryeministrin e Italisë D’Amato; Kryetari Rugova u takua me Antonio Karilën; Përvjetori i dymbëdhjetë i kërkesave për status të Republikës së Kosovës; Konferencë për shtyp e Partisë Liberale Shqiptare të Kosovës

Thirrje në gjyq për “rastin e Prekazit”; Edhe më tej trysni policore në Gllogjan dhe Nepole; Rojter: NATO-ja përkrah sigurinë e Shqipërisë; Mbi 4.500 plumba të serbit për një shqiptar fiktiv!; Guverneri i instaluar serb Simoviq paralajmëron “konstituimin e Parlamentit të Kosovës”.

 

11 mars 994

Lajmet kryesore: Konferencë për shtyp e kryetarit të Republikës së Kosovës, dr.Ibrahim Rugova; Presidenti i Eucation International kërkoi nga Klintoni dhe Gali të ndihmojë në zgjidhjen e problemit të arsimit shqip në Kosovë; Komunikatë e KMDLNJ-së lidhur me ndërhyrjen brutale serbe në Institutin Albanologjik; SHBA shtojnë numrin e ushtarëve në Maqedoni; Përfaqësues të shqiptarëve në Nju-Jork do të takohen me kongresmenin Jose Serrano; Gjykata serbe në Suharekë u kërcënohet 24 familjeve shqiptare për marrjen e banesave.

 

Represioni i policisë serbe në Kosovë

Prizren: – Dje, policia serbe për të tretën herë, nën pretekst të kërkimit të armëve bastisi disa familje, dyqane, si dhe mësonjëtoret e shkollës fillore në fshatin Korishë të Prizrenit. Pardje në këtë fshat, nën pretekst të kërkimit të armëve u bastisën familjet e Ferit, Ragip, Hamëz e Tefik Kabashit dhe e Haxhi F.Ahmetajt.

Pas bastisjes, policia arrestoi Ferit, Vetim dhe Fadil Kabashin. Ragipi e Lirimi u liruan pardje, ndërsa Haxhi F.Ahmetaj po mbahet ende në polici, kurse Bali Rexhaj u mor dy herë në pyetje.

Nga arrestimet që ndodhën dy ditë më parë, bëhet me dije se ende po mbahen në polici Gani dhe Avdi Zeka, Zeqir Ukimeri dhe Latif Dakaj, mësues, i cili u arrestua në lokalet e shkollës fillore.

Podujevë: – Pardje, rreth orës 8, policia serbe nën pretekst të kërkimit të armëve, bastisi familjen e Halil M.Krasniqit në fshatin Majac të Podujevës. Meqë Halil Krasniqi nuk gjendej në shtëpi, policët i lanë ftesën që brenda ditës të paraqitet në stacionin e policisë në Podujevë.

Të njëjtën ditë rreth orës 16, në Majac u bastisën familjet e Behxhet, Faik, Murat e Qemajl Krasniqit dhe të Mustafë Miftarit. Policët pas bastisjes u kërcënuan se nëse nuk i dorëzojnë armët e kërkuara, familjet e bastisura do të ndëshkohen edhe më ashpër.

Pardje, policia serbe bastisi edhe familjet e Fejzë Mustafës dhe Muharrem Hysenit në fshatin Metohi të Podujevës, nga të cilët kërkuan që të dorëzojnë nga një revole.

Po këtë ditë në fshatin Repë të Podujevës, policia serbe bastisi edhe shtëpinë e Zukë Ademit, nga i cili kërkuan një revole. Zukë Ademit iu la ftesa që të paraqitet dje në stacionin e policisë në Podujevë në orën 14.

Pardje, policia serbe bastisi edhe familjen e Bejtush Halimit në fshatin Revuç të Podujevës, tek i cili u gjet një pushkë e vjetër.

Prishtinë: – Pardje, në rrugën “Jabllanica” të lagjes Kodra e Trimave në Prishtinë, policia serbe kërkoi në shtëpinë e tij Gani Krasniqin (18), para të cilët policët serbë dëshmuan një fotografi të tij. Se për çfarë arsye policët kërkuan Ganiun nuk arritëm të mësojmë. Po atë ditë, policët kërkuan edhe Islam Krasniqin (16). Mbetet dyshimi se kjo është një formë e re e represionit mbi të rinjtë shqiptarë.

Vushtrri: – Dje, rreth orës 10, tre policë serbë shkuan në shtëpinë e Samedin Islamit në fshatin Bukosh të Vushtrrisë dhe kërkuan Avdi Islamin për të dërguar me dhunë në ushtrinë serbe.

Meqë Avdi Islami nuk gjendej në shtëpi, policët morën me vete Samedin Islamin, i cili në stacionin e policisë në Vushtrri është rrahur brutalisht.

Istog: – Më 3 mars, policia serbe mori me dhunë banesën e Sadri Llullakut, ish-milic nga Istogu. Bëhet me dije se në banesën e Sadri Llullakut u vendos një familje serbe.

Malishevë: Dje, ditën e tregut në Malishevë, shumë policë dhe inspektorë të sigurimit serbë, shtuan kontrollin ndaj tregtarëve dhe qytetarëve shqiptarë.

Njoftohet se policia serbe rrahu shumë qytetarë shqiptarë vetëm pse nuk dinin të flisnin serbisht!

Mitrovicë: – Pardje, rreth orës 10, policia serbe nën pretekst të kërkimit të armëve bastisi shtëpitë e Hajzer, Raif e Behram Fekës në Koshtovë të Bobit. Pas bastisjes së këtyre tri familjeve, policët në lagjen e Binakajve bastisën edhe familjet e Dervish Binakut, Bislim Latifit, dhe të Adem Ahmetit.

Njoftohet se gjatë bastisjes, policët u sollën me brutalitet në të gjitha familjet e bastisura.

Pardje, për të tretën herë u bastis familja e Jusuf Lushtës në Mitrovicë, të cilët kërkonin djalin e tij Florent Lushtën, i cil qe tri vite gjendet në Gjermani. Meqë Jusufi nuk ishte në shtëpi, policët i lanë ftesën që të lajmërohet në stacionin e poilicisë në Mitrovicë.

Pejë: – Pardje, policia serbe e postkomandës së Qallapekut, ftoi që të lajmërohen në polici Kurtesh, Zymber, Cenë, Demush, Brahim dhe Sadik Krasniqin, për dje në orën 9.

Pardje, policia e postkomandës në Qallopek, nën pretekst të dorëzimit të armëve ftoi Rexhep Panxhajn nga Kosuriqi i Pejës, i cili u rrah brutalisht. Rexhep Panxhaj u lirua me kusht që të lajmërohet dje në postkomandën e policisë në Qallopek.

Policia serbe në Qallopek, ftoi edhe Musa Rrahmanajn, kryetar i Nëndegës së LDK-së nga Kosuriqi. Për ç’arsye u ftua Musa Rrahmanaj, tash për tash nuk dihet.

Lipjan: – Sot, rreth orës 5 të mëngjesit, për të katërtën herë nën pretekst të kërkimit të armëve u bastisën familjet e Heset, Azem e Hasan Ollurit dhe të Isë Qiriqit në fshatin Krojmir të Lipjanit.

Obiliq: Në fshatin Mazgit i Poshtëm të Obiliqit, ditë më parë policia serbe, nën pretekst të kërkimit të armëve bastisi familjen e Shemë Bllacës, pardje atë të Murat Prestreshit, ndërsa dje u bastis familja e Isak Tërhollit. Gjatë bastisjes, policët në shtëpinë e Isakut shkaktuan dëme të mëdha materiale duke thyer e demoluar shumë orendi. Pas bastisjes, policia mori me vet Isak Tërhollin, i cili në lokalet e policisë në Obiliq u rrah brutalisht.

 

11 mars 1995

Lajmet kryesore:

Vdiq Akademik Gazmend Zajmi; Administrata amerikane pret takim të shpejtë me dr. Rugovën; Gazmend Pula: Britania përkrah rivendosjen e mëvetësisë politike të Kosovës; Shumë të mashtruar rreth ofertës së rrejshme për punësim në Libi; U ngrit aktakuza kundër udhëheqësve të PNDSH; Emin Halimi u dënua me 20 ditë burg; Gjermania nuk i kthen refugjatët shqiptarë; Beogradi kërkon para për kthimin e azilantëve; Dhuna e përditshme në Kosovë; Në Pejë ndahen edhe 30 troje për kolonët serbë; Policia ndërhyri në tregun e Kamenicës; U shkarkuan udhëheqësit e dhunshëm serbë të “Gërmisë”; Tensionet etnike do të vazhdojnë.

 

11 mars 1997

 Lajmet kryesore:

K.Kinkel: Kërkojmë bisedime në prani të palës së tretë për statusin e Kosovës; Elizabet Ren kërkon përcjellje ndërkombëtare gjatë kthimit të shqiptarëve në Kosovë; U shënua 7- vjetori i themelimit të FR të LDK-së; Krijohen komisione pluraliste për zbatimin e marrëveshjes; Partitë shqiptare diskutojnë rreth qeverisë së re; Nikolas Bërns: Në procesin demokratik nuk ka vend për përdorimin e dhunës;  Spekulimet nga Athina për “kujdestarinë” e Greqisë dhe të Italisë në Shqipëri; Në Gjirokastër shpërtheu një depo armësh; Në Korçë mbështetet marrëveshja; Në Berat pesë të plagosur me armë zjarri; Drejtori i Televizionit Shqiptar shqiptar dha dorëheqje; Turqia do t’i dërgojë ndihma humanitare Shqipërisë; Lamberto Dini priti Eliot Engëllin; Nikolas Bonsor: “Shpresoj se rendi do të mund të rivendoset në mënyrë paqësore”; Parlamenti Evropian do të diskutojë urgjentisht problemin e Shqipërisë; Nils Helveg Peterson: Marrëveshja – një lëvizje e rëndësishme; L. Fërçkovski: Shqipëria nuk është Piemont që mund të zgjidhë çështjen globale shqiptare; Shtypi norvegjez për gjendjen në Shqipëri dhe rrezikun e shpërthimit në Kosovë; Kadare kërkon ndërhyrje ndërkombëtare në Shqipëri;

Parlamenti i Maqedonisë mban nesër mbledhje të jashtëzakonshme; Ministri i jashtëm i Maqedonisë kundër largimit të forcave paqeruajtëse; Skema piramidale edhe në Maqedoni; Policia keqtrajtoi fizikisht anëtarët e familjes Berisha nga Dobraja e Vogël; Kërkohet Isuf Shala nga Prapaçani i Deçanit.

 

11 mars 1998

Edicioni i parë (ora 12:00):

Nën kërcënimin e policisë dhe me ekskavator u varrosën veçantë viktimat e masakrës serbe në Prekaz

 

Policia serbe detyroi me dhunë dje pasdreke varrimin e trupave të masakruar nga forcat serbe në Prekaz të Ulët më 5 -7 mars.

Trupat e të 49 të vrarëve dje gjendeshin në një depo të materialit ndërtimor në hyrje të Skënderajt kah drejtimi i Gllogocit.

Anëtarët e familjeve të të vrarëve e të masakruarve që kishin bërë identifikimin e të afërmve të vet refuzuan dje varrimin duke kërkuar një ekspertizë të autorizuar ndërkombëtare për mënyrën e vrasjeve dhe të masakrimit.

Nga trupat e të vrarëve, shumica fëmijë, gra e pleq, shihej se ishin përdorur armë të rënda dhe se njerëzit ishin qëlluar edhe me granata. Disa trupa ishin masakruar, duke përfshirë edhe nxjerrjen e syve. Ndërsa një fëmijë ishte qëlluar me një plumb.

Të afërmit dhe Këshilli i varrimit i thanë dje një delegacioni të LDK-së se nuk mund të bëhej varrimi përderisa ende nuk ishin identifikuar rreth 17 të vrarë e të masakruar dhe për shkak se shumë të afërm të të vrarëve nuk ishin tashmë në Skënderaj, por në vende të tjera të Kosovës. Po ashtu nuk mund të bëhej varrimi në një situatë kur e gjithë Drenica mbahet në gjendjen e shtetrrethimit më të ashpër.

Në përpjekje për të mbuluar gjurmët e krimit, policia serbe dha dje disa herë ultimatume kërcënuese se do të varroste vetë të vrarët, nëse këtë nuk do ta bënin të afërmit e të vrarëve.

Në mbrëmje, policia serbe i detyroi me dhunë njerëzit pak para orës 17,00 që të bartnin arkivolet me trupat e të vrarëve për në Prekaz të Ulët.

Një dëshmitar nga Skënderaj i tha Degës së LDK-së në Vushtrri se varrimi zgjati deri në orën 18:00.

Në varrim kanë marrë pjesë disa qytetarë, të cilët policia i kishte marrë me dhunë në rrugë në cilësinë e dëshmitarëve dhe pak veprimtarë të LDK-së e të KMDLNj-së në Skënderaj si edhe disa anëtarë të familjeve të viktimave. Varrimi u bë nën kërcënimin e policëve e civilëve të armatosur serbë. Në afërsi ishte edhe autoblinda dhe një kamion.

Viktimat u varrosën në varret e hapura më herët, por pa ndjekur asfarë rendi, madje edhe sipas numrave të identifikimit, vetëm duke i futur në varre, gjithnjë nën kërcënimin e policëve e civilëve serbë të armatosur.

Shumica e varreve janë mbuluar mbrëmë me dhe me eskavator, ndërsa të hapura mbetën rreth 10 varre.

Gjatë tërë kohës forcat serbe kanë qëndruar në gjendje gatishmërie, duke kërcënuar të pranishmit se do të shtijnë nëse dikush lëviz.

Një burim nga Skënderaj ka njoftuar sot se policia serbe ka thënë sot se mund të bëhet mbulimi i varreve të tjera, por ka lejuar që këtë ta bëjnë vetëm 60 veta, të cilëve, siç thanë ata, policia do t’ua garantojë sigurinë.

 

Lajme të tjera: Mjekët shqiptarë protestojnë sot para Fakultetit të Mjekësisë; Numri i shqiptarëve të vendosur në Mitrovicë ka arritur 3400; Gjendje e rëndë edhe në Vushtrri; Hebrenjtë e Zvicrës kërkojnë që të ndërpritet riatdhesimi i kosovarëve; Ankara nuk lejon që të përsëritet Bosnja në Kosovë; Ministrat e pesë vendeve ballkanike bëjnë thirrje për dialog; Këshilli i Sigurimit të OKB-së debatoi për Kosovën; Tribunali i OKB-së është duke mbledhur dëshmi lidhur me Kosovën; L. Arbur: Gjyqi i Hagës ka mandat të ndjekë ata që kryen krime në Kosovë; U rrah me pretekst se është ka qenë në Drenicë.

 

Edicioni i dytë (ora 14:45):

Kryetari Rugova mbajti konferencë për gazetarë të huaj; Vazhdon varrimi i të masakruarve në Prekaz; Dyshohet se dy të vrarë nga Prekazi mbahen ende në morgun e Prishtinës; Halil Geci: Ne në Llaushë do të vdesim para dyerve të shtëpive, por jo si terroristë; Mitrovicë: Policia në hyrje-dalje të qytetit keqtrajton qytetarët; Lëvizje të policisë në drejtim të Skënderajt; Policia gjuan me snajperë qytetarët; Mbi 500 punëtorë të Fakultetit të Mjekësisë mbajtën sot një protestë; Medlin Olbrajt: Nuk do të vonohemi për të zgjidhur krizën në Kosovë; Analistët kërkojnë masa më energjike të SHBA-ve për pengimin e konfliktit në Kosovë; Debat për Kosovën në Parlamentin e Belgjikës; Shtypi amerikan i quan të pamjaftueshme masat e Grupit të Kontaktit; Në protestat paqësore në Pejë forcat serbe rrahën 110 veta; Udhëheqësit e UPS të UP u takuan me Gelbardin;

Disa lande në Gjermani stopojnë kthimin e refugjatëve shqiptarë; Policia serbe keqtrajtoi pesë të rinj shqiptarë në postbllokun e Komoranit; Qeveria serbe lavdëron policinë e vet për masakrat dhe fton “pakicën shqiptare” për dialog në kuadër të Serbisë; Qeveria shqiptare angazhohet për përmbushjen e obligimeve të shtruara nga Grupi i Kontaktit; Sllovenia kërkon ndëshkimin e Beogradit; Të shtëna armësh në Cërmjan të Dushkajës së Gjakovës

 

Edicioni i tretë (Ora 18:30):

Gelbard dhe Toni Lojd dënoi masakrimin e fëmijëve, grave e pleqve; Ambasadori amerikan në OKB kërkoi nga komisionerja e lartë të ndërmarrë një mision në Kosovë; Bruksel: Intervenimi ushtarak ndërkombëtar në Kosovë është i hershëm; Vjenë: OSBE kërkon nga Beogradi të pranojë një komision hetimor lidhur me pushkatimet në Kosovë; Organizatat humanitare ndërkombëtare në Kosovë u kërcënuan me likuidim; Paris: Oferta e Beogradit për dialog me shqiptarët – e pamjaftueshme; Demaçi ofertën serbe e quajti hipokrizi; “Dejli Telegraf” angazhohet për intervenim ushtarak në Kosovë; “Fokusi” me shtojcë speciale për ngjarjet në Kosovë – në anglisht e në gjermanisht; Të shtëna sporadike në Turiçec – dy foshnje vdiqën nga acari; Persona të panjohur hodhën një bombë para shtëpisë së pronarit të “Dukagjinit” në Pejë; Në Viti merren në polici shumë pjesëmarrës të protestave; Sot në Gjilan nxënësit iu rikthyen mësimit; Gjilanasit po i përgjigjen me të madhe aksionit: “Në ndihmë Drenicës”; Dy veprimtarë të LDK-së në Gllogoc u mbajtën në arrest dhe u keqtrajtuan rëndë fizikisht; Në Cërmjan u keqtrajtuan 15 shqiptarë; Policia po keqtrajton shqiptarët në hyrje të Istogut; U krye varrimi në Prekaz.

 

Edicioni i katërt (ora 19:30):

Deklaratat e Rugovës, lajm i parë i shumë televizioneve; Xh. Mustafa: Përmes ofertës për dialog, qeveria serbe e arsyeton terrorin e vet në Kosovë; Reagimet serbe lidhur me komentet e sotme të kryetarit Rugova; Solana: NATO po i ndjek nga afër zhvillimet në Kosovë; Interesim i madh i gazetave të njohura në botë për zhvillimet në Kosovë; Japonia sugjeron dialog të menjëhershëm mes Prishtinës dhe Beogradit; Policia ka plaçkitur fshatin Kopiliq të Skënderajt; Rifilloi mësimi në Ferizaj; Në Shtimje gjobiten autotransportuesit; Federata e Sporteve e Kosovës u bënë apel për ndihmë institucioneve sportive evropiane dhe botërore.

 

 11 mars 1999

Lajmi kryesor: Sot në Lummadh të Vushtrrisë u vra Enver Feka

Prishtinë, 11 mars (QIK) – Sot rreth orës 8.30 të mëngjesit, një person i panjohur vrau me revole në dyqanin e tij në Lummadh të Vushtrrisë, Enver (Skender) Fekën (36).

Vrasësi i panjohur pasi kishte hyrë në dyqanin e Enverit, që ndodhet afër vendbanimit të kolonistëve serbë në Lummadh, e kishte qëlluar të ndjerin me disa plumba. Njoftohet se vrasësi ka ikur në mënyrë të rrufeshme me një veturë të zezë të markës “Golf”, me regjistrim të Mitrovicës.

E njëjta veturë mbrëmë është parë në Lummadh me pesë vetë brenda duke qarkulluar nëpër këtë fshat.

Enver Feka ka qenë kryetar i Aktivit të LDK-së në këtë fshat. Ai la pas vetes katër fëmijë të mitur.

 

Lajme të tjera: Vushtrri: Forcat serbe mbrëmë granatuan fshatrat Pantinë, Oshlan, Okrashticë, Liqej e Balincë; Sot në mëngjes nga Serbia në Kosovë hyri një konvoj me forca serbe;

 

Edicioni i orës 12:00:

Forcat serbe sulmuan sërish 2 fshatra të Mitrovicës dhe 3 fshatra të Vushtrrisë; Prizren: Koncentrim i madh i forcave në fshatrat e Vërrinit; Forca serbe ndërhynë në Rigjevë të Klinës; KMDLNJ: Gjatë shkurtit në Kosova janë vrarë 59 veta;      UÇK: Sjelljet e hyzmeçarëve të pushtuesit serb janë skandaloze; Adem Demaçi priti raportuesin special të KB për të Drejtat e Njeriut z. Jiri Dientsbier;

1. Gjukanoviq: Regjimi autoritar i Beogradit po e mban klimën e armiqësive me tërë botën demokratike; Prokurori publik i Serbisë mohon se viktimat e fshatit Reçak janë masakruar;

 

Edicioni i orës 14:00:

Kryetari Rugova priti raportuesin special të OKB-së Jizhi Dintsbir; U gjet trupi i pajetë i Fadil Tolajt nga Gjakova; Gjakovë: Në fshatrat e brezit kufitar po dëgjohen detonime të fuqishme; Në Novolan të Vushtrrisë kanë hyrë forcat e policisë serbe; Në Prishtinë dy romë sulmuan një grua shqiptare; Civilë serbë u panë me armë në rrugë të Kamenicës; Nesër në Paris zhvillohet një debat për Kosovën; Ollbrajt kërkoi nga Kongresi që të mos zhvillojë debatin për vendosjen e trupave në Kosovë; Zëdhënësi i Departamentit amerikan mohon se ka ndërrim të planit paqësor për Kosovën; Millosheviqi në bisedë me Hollbrukun kundërshtoi vendosjen e trupave të NATO-s në Kosovë; Familjet shqiptare largohen nga disa fshatra të Klinës; NATO udhëheq forcat ndërkombëtare në Kosovë; Ollbrajt lavdëron qëndrimin e shqiptarëve; Përgatitet një deklaratë për Kosovën e disa shteteve ballkanike

 

Edicioni i orës 14:30:

Afishe të kontrabanduara me shenjën e OSBE-së në Prishtinë; Forcat serbe vazhdojnë t’i granatojnë fshatrat e Mitrovicës dhe të Vushtrrisë; Prizren: Forcat serbe mbajnë në një rrethim të plotë fshatrat e Vrrinit; KMDLNJ: Disa nga fshatrat e Vushtrrisë në tym e flakë; Forumi Rinor i LDK-së shënoi nëntëvjetorin e themelimit; Raportuesi special i OKB-së bisedoi me drejtuesit e KMDLNJ; Rexhep Boja bisedoi me zëvendësin e shefit të Misionit të OSBE-së në Kosovë.

 

Edicioni i orës 17:00:

Forcat serbe mitraluan dhe granatuan sot fshatrat rreth Vërrinit të Prizrenit; Forcat të shumta serbe kanë rrethuar paralagjën e Prizrenit Hoqa e Qytetit dhe po i keqtrajtojnë banorët shqiptarë; Istog: policia serbe keqtrajtoi dy shqiptarë; Suharekë: Policia serbe keqtrajton edhe veprimtarët e SHHB “Nëna Tereze”; Lëvizje ushtarako-policore në drejtim të Lajthishtës dhe të Hades; Kongresi i Internacionales Liberale në Bruksel aprovoi një rezolutë të veçantë për krizën në Kosovë; KMDLNJ kërkon nga banorët e lagjes Ëmshir që të lajmërojnë rastet e keqtrajtimit nga policia serbe.

10 mars 1993

Lajmet kryesore: Vazhdojnë telegramet e ngushëllimit për viktimat e Shkupit; Ambasada e Gjermanisë ngushëlloi Shoqatën Shqiptaro-Gjermane; Milicia e armatosur serbe intervenoi dhe hoqi flamujt shqiptarë në Preshevë; U themelua Lidhja e Shkrimtarëve dhe e Artistëve Shqiptarë në Zvicër; Ministri i Mbrojtjes Italiane paralajmëron masa për të parandaluar konfliktin në Kosovë; Amerika në rrugë për forcimin e sanksioneve kundër Serbisë e Malit të Zi; Gjermania merr pjesë në hedhjen e ndihmave mbi Bosnjë-Hercegovinë;

 

Opinion: Viktimat e tragjedisë ajrore në Shkup dhe fashizmi i pushtetit dhe vetëdijes serbe

“Fashizimi i pushtetit dhe i vetëdijes serbe, është evident dhe për këtë tashmë ka dëshmi të shumta. Njëra prej këtyre dëshmive gjithësesi është edhe e dhëna se komisioni i ashtuquajtur republikan i Serbisë, për identifikimin e viktimave të tragjedisë ajrore në Shkup, siç njoftojnë mjetet serbe të informimit, prej dje mori edhe një detyrë të re. Ky komision, është autorizuar të “bëjë evidencimin dhe të gjejë pronarët e shumave të mëdha të valutave të huaja, të arit dhe të stolive, që i kishin me vete udhëtarët që vdiqën” në këtë tragjedi ajrore.

“Tanjug”-u, bën me dije se jozyrtarisht gjoja se pothuaj të gjithë udhëtarët që gjendeshin në aeroplanin e kompanisë ajrore “Foker”, kishin me vete “ari, marka gjermane, franka zvicerane dhe shuma të tjera të mëdha devizash”. Me një fjalë, shtypi serb dhe jo vetëm ai, sikur duan të përgatisin opinionin që viktimat e tragjedisë ajrore në Shkup, t’i shpallin kontrabandistë të arit dhe të devizave.

Se vetëdija e fashizuar nuk njehë kurrfarë normash morale dhe etike, është punë që dihet. Mirëpo, vërtetë është e pakuptueshme se si mund të fajësohen për kontrabandë edhe viktimat e kësaj tragjedie ajrore dhe atë ende pa u varrosur. Këtë vërtetë mund ta bëjë vetëm një pushtet që tashmë është fashizuar në të gjitha segmentet dhe raportet me njerëz, apo me ngjarje të caktuar”.

 

10 mars 1994

 Lajmet kryesore: Rezoluta për Kosovën e Komisionit të OKB-së për të drejtat e njeriut; Rezoluta për ish-Jugosllavinë e Komisionit të OKB-së për të drejtat e njeriut; Kumtesë e Qeverisë së Republikës së Kosovës; Ambasadori i Shqipërisë në OKB kërkon angazhimin e Këshillit të Sigurimit për Kosovën; Ndërhyrja në Institutin Albanologjik – dëshmi për politikën e agresionit serb në Kosovë; Si njoftojmë masmediumet serbe për ndërhyrjet në Institut?; U kidnapua Abdyl Kadolli; Represioni i policisë serbe në Kosovë; Lëvizjet e ushtrisë serbe në Kosovë; Vdiq aktori Abdurrahman Shala.

 

10 mars 1995

 Lajmet kryesore: Konferencë për gazetarë e kryetarit të Republikës së Kosovës dr. Ibrahim Rugova; Policia serbe konfiskoi një sasi malli në tregun e automobilave në Prishtinë; Punëtorët shqiptarë vetëm me konkurs mund të kthehen në Fabrikën e Mobileve në Deçan; Në Maqedoni mund të dërgohen trupat e NATO-s?; “Associated Press” njofton për fushatën serbe të rekrutimit të të rinjve shqiptarë në Kosovë; Në komunën e Malishevës 231 të rinjve shqiptarë iu dërguan thirrjet për rekrutim; Dhuna e përditshme në Kosovë; Në Dermjak të Hanit të Elezit ushtarët dhe policët arrestuan l3 shqiptarë; Një i ri u dërgua në Gjykatën ushtarake në Nish; U hap procedura penale kundër një ish-drejtori në Vushtrri; Në Han të Elezit brenda një muaji policia plaçkiti mbi 46 mijë DM; Gjatë muajit shkurt në komunën e Malishevës policia mori në pyetje 71 veta dhe plaçkiti rreth 100 mijë DM; Në Bajnicë të Kaçanikut policia keqtrajtoi disa qytetarë; Në SHM “Kuvendi i Lezhës” në Pozhoran policia mori një profesor; Arben Rusi mbrohet në liri; Në Zagreb promovohet libri i dr. A. Stipçeviçit “Interpretime Albanologjike”; Këshilltarët shqiptarë nuk marrin pjesë në punimet e Kuvendit të KK të Kumanovës; Në Kumanovë filluan “Takimet poetike të Karadakut”;

 

 

10 mars 1997

Lajmet kryesore: Kryetari Rugova përgëzoi dr. Sali Berishën; F. Agani: “Trazirat në Shqipëri nuk do të na shtyjnë në përqafim të Millosheviqit”; Filloi punimet sesioni 53 i Komisionit të të Drejtave të Njeriut i OKB-së; Reagim i SHSHK-së ndaj keqtrajtimit brutal të Bedri Halimit nga policia serbe; Në Pejë inspektorët serbë morën në pyetje bashkëshortët Kastrati; Dhuna e përditshme në Kosovë; Shqiptarët kundërshtojnë ngritjen e kishës serbe në Leshan; Në Gjykatën supreme serbe sot fillon shqyrtimi i ankesave të ish- policëve të Kosovës;

 

10 mars 1998

 Edicioni i orës 12:00:

Në Skënderaj u dërguan edhe trupat e dy të vrarëve

Numri i të vrarëve në Skënderaj nga 47 sa ishte njoftuar dje, u shtua edhe për dy. Policia serbe dërgoi dje trupat e Shaban Jasharit dhe të djalit të tij Hamzë Jasharit.

Duke përfshirë edhe gjashtë viktimat në Llaushë, tash numri i të vrarëve që dihen është 55 të vrarë.

Disa ditë më parë në Qirez dhe në Likoshan ishin vrarë 25 shqiptarë.

Gjatë një jave në fshatrat e Drenicës (Skënderaj e Gllogoc) u vranë të paktën 80 shqiptarë civilë.

Lajme të tjera: Një ekip i mjekëve nuk u lejua të shkonte në Skënderaj; Familjet e të vrarëve nuk lejohen të shkojnë në Skënderaj; Llausha mbahet e rrethuar; Sot në orën 17, qirinj për Drenicën në sheshin “Nëna Tereze”; Në Istog 18 protestues të plagosur; Sipas një ankete të CNN 84% e të anketuarve përkrahin intervenimin e NATO-s në Kosovë; Robert Gelbard arrin sot në Prishtinë; Parlamenti Evropian paralajmëron një rezolutë për Kosovën; Shqipëria kërkon që Greqia të ndihmojë në zgjidhjen e krizës së Kosovës; Klark: “NATO-ja do të marrë një qëndrim më të qartë rreth Kosovës”; Haveli: “Konflikti në Kosovë duhet të ndalet që në fillim”; Geremek: Kosova nuk është vetëm çështje “jugosllave”; NATO-ja nuk don t’i “ikën treni” në Kosovë; U shtri për mjekim në Mitrovicë vajza e plagosur 12- vjeçare; Tre autobusë me gra dhe fëmijë erdhën dje nga Skënderaj në Mitrovicë; Organet e instaluara serbe dhe individët përkrahin aksionet dhe masakrat policore në Drenicë;

 

Edicioni i orës 14:50:

Lajmet kryesore:  Kryetari Rugova priti Ambasadorin Robert Gelbard; Deklarata e kryetarit Rugova dhe e ambasadorit Gellbard pas takimit të sotëm në Prishtinë; Në Brojë 110 veta mbahen të bllokuar nga policia në një shtëpi; Nga Gjakova u nisën 57 arkivole për viktimat e terrorit shtetëror serb në Skënderaj; 600 të ikur nga Drenica janë vendosur në Istog; Istog: Në protestën e djeshme 82 të lënduar; Policia e Kijevës ndaloi dhe i keqtrajtoi protestuesit nga Bubaveci; F. Sejdiu: Deklarata e Grupit të Kontaktit – përkushtim i bashkësisë ndërkombëtare për problemin e Kosovës; Policia pengoi shqiptarët e Bujanocit për të ardhur në protestë në Gjilan; Në Kosovë kanë ardhur edhe mercenarë serbë nga Bosnja; Natasha Kandiq: Forcat serbe në Qirez dhe në Likoshan kanë vrarë njerëzit e pafajshëm; Antonio Bellushi i drejtohet popullit të Kosovës;

 

Edicioni i orës 16:30:

Lajmet kryesore:  Pas takimit të Londrës për Kosovën – Kanadaja e para zbaton masat ndëshkuese ndaj Beogradit; Delegacioni i Republikës së Kosovës u takua dje me zëvendëskryeministrin e Turqisë Bylent Exhevit; Mësimi në komunën e Prishtinës rifillon nesër; 143 të rrahur gjatë protestave në Pejë; NATO-ja dhe Shqipëria pritet të debatojnë për Kosovën; Llausha përpara krimit të paralajmëruar; Papa Gjon Pali i Dytë priti imzot Mark Sopin.

 

Shpalohet tmerri që ndodhi në Prekaz

Në një reportazh nga disa fshatra të Drenicës me titull “Shpalohet tmerri”, të botuar në numrin e sotëm të gazetës “Bujku” sillen dëshmi të njerëzve që kanë përjetuar masakrën e forcave policore e ushtarake serbe në Prekaz të Ulët. Po japim një pjesë të këtij reportazhi.

“E reja Syleme Jashari e përshkroi ngjarjen e atij mëngjesi të ditës së enjte, kur forca të mëdha policore e ushtarake, nga një largësi nisën të hedhin granata drejt shtëpive të tyre. Të gjendur në atë breshër, mundësia e vetme për t’i ruajtur kokat ishte zbritja në katin e parë dhe futja e fëmijëve nën shkallët e ndërtesës.

– Ishim të gjithë së bashku, vazhdon ajo, kurse vëllau Halili doli të shikonte se ç’po ndodhte. Brenda ishim tridhjetë vetë, prej moshës një deri në gjashtëdhjetëvjeçar. Ne më kot pritëm të kthehej Halili, por ai nuk u kthye. Në atë moment të vetmen lidhje e kishim me LDK-në, të cilët në një moment na thanë ‘Vetëm Zoti mund t’ju ndihmojë’, pastaj humbën edhe këto lidhje. Kur ranë granatat mbi ndërtesë, atëherë askush s’ka menduar se do të dalë i gjallë. Granata rrënoi gjysmën e shkallëve, ndërkaq nën shkallë i kishim fëmijët. Në këtë moment nga dritarja e banjës hodhën lotësjellës dhe ne tani e kishim shumë vështirë të shihnim që të dilnim jashtë. E pamë se edhe me ne do të ndodhë njësoj si në Likoshan, u bindëm se vinin të na masakronin. Sana jashtë digjej, shtëpia me të gjitha të tjerat në oborr u bombarduan dhe, ashtu duke i mbajtur fëmijët, dolëm në oborr ku pritnin kordone policësh. Në kordonin e parë na urdhëruan të shkonim te kordoni i dytë i policëve, të cilët i kishin fytyrat të ngjyrosura me të zezë. Ata bënë gati automatikët të na pushkatonin. Ne vazhduam të largohemi nga oborri, – thotë e tmerruara Sylemja – kurse Nazmiun njëzeteshtatëvjeçar, i cili po e mbante nënën e sëmurë për krahu, e rrëmbyen dy policë, të cilët aty për aty, në prani të nënës, e shtrinë përtokë dhe nga afërsia ia lëshuan rafalet mbi trup. Pasi që e pushkatuan Nazmiun ne na thanë se pas meshkujve do të na pushkatojnë që të gjithëve dhe ne ikëm arave… kurse policët vraponin t’i zinin fëmijët meshkuj për t’i vrarë, siç bërtitnin ata. Me këtë rast u plagos një tetëmbëdhjetëvjeçar. Tani hasëm në rrethin e tretë të policisë, të cilët Zukën, tetëdhjetëvjeçar, filluan ta godasin me kundakë automatikësh. Afër një prrocke, – vazhdon të rrëfejë motra, – policët e plagosën rëndë vëllanë tim, Beqirin. Ne provuam t’i ndihmojmë, por ai na lutej që të iknim e ta linim dhe thërriste t’ia ruanim fëmijët… Në atë rrëmujë u plagosën edhe dy vajza me nënën e vet, vritet djali i axhës tim, Qazimi dhe djali i vëllait, Faiku. Gjatë ikjes pashë edhe një plak të vrarë, një tjetër të plagosur…”

Këto shënime, në të vërtetë, paraqesin vetëm një dromcë nga gjithë ajo tragjedi e terrorit serb mbi popullatën e pambrojtur. Vetëm në Shipol, siç thanë, ka edhe shumë familje të tjera, gra e fëmijë që s’dinë ende për meshkujt, pos për ata që vetë i kanë parë të vdekur para dyerve të shtëpive, nëpër oborre, nëpër rrugë dhe në ara”, përfundon reportazhi i “Bujkut”.

 

 

Edicioni i orës 18:00:

Lajmet kryesore: Pamje të llahtarshme të masakrës në Drenicë

Në hyrje të Skënderajt, në një servis të materialit ndërtimor “Servisi i Lahut” gjenden trupat e masakruar të 53 shqiptarëve gjatë ekspeditës terroristike të forcave serbe në Prekaz të Ulët dhe Skënderaj përgjithësisht.

Pamja e kufomave të paluara ngjitas njëra tjetrës, në dy radhë tmerrësisht të gjatë, është e llahtarshme. Afër njëri tjetrit janë trupat e anëtarëve të familjeve të tëra. Nga një familje janë masakruar ose vrarë edhe 19 anëtarë, nga një tjetër pesë.

Pamja e trupave të vrarë është dëshmi për aksionin terroristik me qëllim të masakrimit të popullsisë. Dy trupa janë të goditur nga granatat, njëri në gjoks, tjetri në fyt. Trupi i Shaban Jasharit është masakruar me thikë. Në trup ka një xhep të hapur me thikë, njëra dorë i është këputur, ndërsa sytë i janë nxjerrë. Një të riu i është çarë koka përgjysmë.

Shihet se njerëzit janë vrarë me armë të rënda. Disave u është marrë shpirti dalëngadala me torturë. Adem Jashari, kundër të cilit thotë policia se e ka organizuar aksionin, ka vetëm një vrimë plumbi në fyt.

Të llahtarshme duken pamjet e trupave të fëmijëve të vrarë.

Zenë Jasharit, një 48 vjeçari, i janë vrarë Blerimi 5-vjeçar, Bujari 12-vjeçar, Abdullahu 15-vjeçar dhe gruaja Bahtie 43-vjeçare, e cila ishte shtatzënë. Gruaja me tre fënmijët e tij kishin shkuar për t’u strehuar te axha Haliti. Mirëpo, pikërisht ajo shtëpi kishte filluar të bombardohej. Nga bombardimet ishin vrarë në vend gruaja dhe djali Avdullahu. Ndërsa, dy fëmijët e vegjël policia i kishte marrë me vete dhe i kishte dërguar në oborrin e Fabrikës së Municionit.

– Mendoja se janë gjallë, por u tmerrova kur i pash trupat e tyre të vrarë që i solli policia! – thotë ai.

Trupat e dy fëmijëve kanë plot shenja të goditjeve me mjete të forta. Blerimi ka shenja në anën e djathtë të kokës, ndërsa Bujari është qëlluar edhe me një plumb në tamth në anën e majtë.

– Qe dy ditë e dy net qëndroj këtu. Nuk mund të ndahem nga trupat e vrarë të fëmijëve të mi!- thotë Zena.

Tronditës ishte momenti i identifikimit të të vrarëve gjatë ditës së sotme. Shumë anëtarë të familjeve, për shkak të rrezikut nga snajperistët serbë, nuk e kanë bërë ende identifikimin e të vrarëve.

Abaz Jashari, 22-vjeçar, nuk mund ta përballonte sot tmerrin kur i pa trupat e babait e gjyshes së vrarë për të cilët shpresonte se ishin gjallë. Dhembja e tij ishte edhe më e madhe nga frika se mund t’i jetë vrarë edhe i vëllai i tij në moshë të re, trupin e të cilit e kërkonte.

Në këtë morg të improvizuar, aktivistët e LDK-së dhe të Këshillit për Mbrojtjen e të Drejtave dhe të Lirive të Njeriut përpiqeshin të kryenin identifikimin e të vrarëve. Deri më tash ata kanë arritur të identifikojnë 37 të vrarë. Katër kufoma vështirë se do të mund të identifikohen, pasi janë të karbonizuara. Identifikimi bëhet vështirë edhe për shkak se banorët e Prekazit të Ulët mbahen ende në një rrethim të fortë.

Të gjithë janë të sigurtë se numri i shqiptarëve të vrarë është më i madh se ky që njihet deri më tash. Askush deri më tash nuk e ka kontrolluar terenin e Prekazit të Ulët as shtëpitë që janë sulmuar.

Për të humbur gjurmët e krimit, policia ka bërë presion gjatë gjithë ditës ndaj aktivistëve të LDK-së dhe anëtarëve të familjeve me qëllim që të kryhet brenda ditës varrimi i të vrarëve. Përgjegjësit e policisë serbe në Skënderaj janë kërcënuar disa herë gjatë ditës se do t’i varrosin vetë të vrarët, nëse këtë nuk e bëjnë familjet e tyre.

Varrimi do të jetë i vështirë edhe për shkak të numrit të pakët të njerëzve që do të përgatisnin ceremoninë e varrimit. Nga disa familje nuk ka mbetur askush në Prekaz ose në Skënderaj, pasi, ose janë vrarë, ose janë larguar në vende të tjera.

Në Skënderaj gjatë ditës së sotme kanë qëndruar përfaqësues të disa organizatave humanitare ndërkombëtare dhe ekipe televizive të disa qendrave të njohura në botë. Mirëpo, policia serbe nuk ia lejoi hyrjen në Skënderaj as sot një delegacioni të Kryqit të Kuq Ndërkombëtar dhe të Hënës së Kuqe.

Skënderajn sot e vizitoi një delegacion i Lidhjes Demokratike të Kosovës, në përbërje Anton Noka, nënkryetar, mr. Fatmir Sejdiu, sekretar i përgjithshëm, dr. Rexhep Gjergji, Basri Musmurati, Abdyl Ramaj, Ramë Buja, anëtarë të Kryesisë, dr. Edi Shukriu, kryetare e Forumit të Gruas së LDK-së, Naim Jerliu, kryetar i Forumit të Rinisë së LDK-së dhe Enver Maloku, përgjegjës i Qendrës për Informim të Kosovës.

Delegacioni nuk mundi të bisedonte me udhëheqjen e Degës së LDK-së, pasi shumica prej tyre janë të bllokuar në Llaushë, ose në fshatrat tjera.

Aktivistët e Degës së LDK-së në Skënderaj që mundën të bisedonin me këtë delegacion thanë se gjendja në Skënderaj është dramatike në të gjitha planet. Në planin e sigurisë fizike, janë të kërcënuar të gjithë banorët e Drenicës. Forcat serbe në gjendje të gatishmërisë më të lartë kërcënojnë praktikisht secilin. Në kodrat për rreth Skënderajt shiheshin snajperistët serbë, të cilët mbajnë në rrethim të plotë qe disa ditë fshatrat dhe vetë qytezën e Skënderajt.

Gjendja dramatike është edhe në shëndetësi dhe në ushqime. Nga frika ose mungesa e mallrave, në Skënderaj pothuaj nuk rri hapur asnjë shitore. Si në qytet, ashtu edhe në fshatrat e Drenicës përskaj udhës Komoran – Gllogoc – Skënderaj sundojnë pamje të tmerrit që vazhdon. Këto pamje japin pamjen e një jete të shkretëruar. Gjatë shkuarjes dhe kthimit në rrugën që përshkon disa fshatra të Drenicës nuk shihet njeri të lëvizë as tym në oxhaqet e shtëpive. Në Komaran, për një orë, nuk u pa qoftë një njeri në rrugë, ose në shtëpitë për rreth.

Aktivisti i LDK-së Rifat Bejta i tha QIK-ut se nga të vrarët, janë identifikuar deri më tash këta persona:

1. Qazim Jashari
2. Nazmi Zukë Jashari
3. Sinan Ramadan Jashari
4. Zarife Bahtir Jashari
5. Zaha Jashari
6. Kushtrim Adem Jashari
7. Ali Ramdan Jashari
8. Osman Shaban Geci
9. Faik Tahir Jashari
10. Adem Shaban Jashari
11. Beqir Bajram Jashari
12. Sherif Brahim Jashari
13. Hajrez Zymer Jashari
14. Halit Imer Jashari
15. Halil Bajram Jashari
16. Bahtie Muharrem Jashari
17. Isak Feriz Halili
18. Feride Ramadan Jashari
19. Besim Hamzë Jashari
20. Blerim Zenë Jashari
21. Bujar Zenë Jashari
22. Abdullah Zenë Jashari
23. Elhame Jashari
24. Murtez Zymer Jashari
25. Fatime Gashi
26. Makfirete Gashi
27. Gazmend Gashi
28. Sadik Miran Kaçkini
29. Miftar Rreci
30. Hamzë Shaban Jashari
31. Shaban Jashari
32. Qerim Hamzë Jashari
33. Blerim Hamzë Jashari
34. Igball Rifat Jashari
35. Fatushe Hamzë Jashari
36. Elfete Hamzë Jashari
37. Adile Jashari

 

Lajmet e tjera: Prishtinë: Homazh për viktimat e terrorit serb në Drenicë; Policia pengoi shkuarjen e gazetarëve në Skënderaj e Prekaz; Lëvizje të policisë në drejtimin Skënderaj-Mitrovicë.

Edicioni i orës 19:45:

Gelbard: Poblemit në Kosovë, qeveria serbe qe dhjetë vite i është qasur vetëm me dhunë e represion; Konferencë për gazetarë e drejtuesve të LDK-së pas vizitës në Skënderaj; Felipe Gonzalesi i dërguar i posaçëm i OSBE-së për Kosovën; Veprimtarëve të LDK-së në Vushtrri u merren letërnjoftimet dhe urdhërohen të paraqiten në polici.

 

10 mars 1999

Lajmet kryesore të edicionit të paradites:

Vushtrri: Një shqiptar u vra dhe dy të tjerë u plagosën gjatë ofensivës së djeshme; Forcat serbe granatuan fshatrat e Llapit; Edhe mbrëmë u granatuan fshatrat e Mitrovicës e të Vushtrrisë; Huliganët serbë sulmuan nxënësit shqiptarë; Forcat serbe plaçkitën e dogjën Shtrazhën, Kotlinën, Ivajën; Istog: Një shqiptar u mor në pyetje në sigurimin serb.

 

Edicioni i orës 13:30:

Gjakovë: Në pullazin e shtëpisë së një shqiptari u hodh një mjet shpërthyes; U identifikua trupi i pajetë që ndodhet në spitalin e Gjakovës; Prizren: Tre shqiptarë u dënuan me nga 3 vjet e gjysmë burg; Prizren: Persona të panjohur plagosën një shqiptar; Hysen Suma u varros në Bllacë të Maqedonisë; Policia e Serbisë shpalli fletarrest për 8 udhëheqës të UÇK-së; Forcat ushtarake serbe qëlluan një automjet të OSBE-së; Ushtarët serbë bastisin shtëpitë e boshatisura në Batushë të Gjakovës; Podujevë: Një i ri shqiptar u arrestua nga policia serbe; Nuk dihet për fatin e Ragip Shalës nga Oktashtica; Prej dje nuk dihet për Fadil Tolajn nga Gjakova; Kërkohet Sabri S. Morina; Uiliam Uoker vizitoi Gjilanin; Në kazermën ushtarake serbe të Prishtinës ka arritur një tren special me ushtarë; Riçard Hollbruk arriti në Beograd; Joshka Fisher qëndroi dje në Tiranë; Tajmz: Bleri kërcënon Millosheviqin se mund të akuzohet për krime lufte në Kosovë; Jirzhi Dinstbir u takua me Uilliëm Uokerin; KNKK solli tri autoambulanca në Kosovë; Igor Ivanov më 11 e 12 mars viziton Beogradin e Tiranën; Dhoma përfaqësuese e Kongresit amerikan debaton për dërgimin e trupave në Kosovë; Sipas zëdhënësit të Ministrisë së Punëve të Jashtme të Francës nuk ka shtyrje të bisedimeve shqiptaro-serbe.

 

Edicioni i orës 14:00:

Vushtrri: Në mesditë filloi përsëri granatimi i fshatrave rrëzë Qyqavicës; Shpërthim i fuqishëm në Rahovec; Të shtëna drejt fshatrave të Malishevës; Pejë: Edhe dy shqiptarë u dënuan me burg; Shtime: Një konvoj i forcave serbe shkoi në drejtim të Grykës së Carralevës; Forcat serbe arrestuan sot në afërsi të Shtimës një mësues shqiptar.

 

Edicioni i orës 15:30:

Vushtrri: Në afërsi të fshatit Druar forcat serbe plagosën tre të rinj shqiptarë; Pothuaj i tërë fshati Shallc i Vushtrrisë u dogj sot nga forcat serbe; Policia ka bllokuar spitalin e Mitrovicës; Ferizaj: Lëvizje të forcave serbe; U arrestuan dy veprimtarë të SHHB “Nëna Tereze” në Suharekë; Në Krilevë të Kamenicës policia serbe arrestoi një shqiptar.

 

Edicioni i orës 17:00:

Forcat serbe dogjën fshatrat Shallc, Druar e Mihaliq të Vushtrrisë; Podujevë: Sot forcat serbe granatuan sërish fshatin Godishnjak; Hani i Elezit po mbahet i bllokuar nga forcat e ushtrisë dhe policisë serbe; Në Prishtinë tre persona të maskuar tentuan të kidnapojnë një fëmijë shqiptar;

Gllogoc: Nga Llapushniku forcat serbe po shtijnë me armë zjarri; Kaçanik: Banorët e Kërbliqit u urdhëruan nga ushtarët serbë që t’ua bartin armatimin.