Kulturë

“Kosovo – Albania Theatre Showcase- 2024” me shfaqje dhe diskutime për teatrin dhe dramaturgjinë

Published

on

Qendra Multimedia nga Prishtina, në bashkëpunim me Teatrin Kombëtar të Shqipërisë, Teatrin Kombëtar Eksperimental “Kujtim Spahivogli” dhe Qendrën M.A.M, do të sjellin për herë të parë në Tiranë ngjarjen më të madhe teatrore në rajon, “Kosovo – Albania Theatre Showcase – 2024”.

Ngjarja do të zhvillohet nga data 29 tetor deri më 2 nëntor, duke mbledhur mbi 80 mysafirë ndërkombëtarë, përfshirë selektorë festivalesh, kritikë, gazetarë dhe profesionistë të teatrit nga e gjithë bota, përfshirë Amerikën, Gjermaninë, Francën, Itali, dhe shumë vende të tjera. Programi do të përfshijë një gamë të gjerë aktivitetesh, përfshirë shfaqje teatrore, panele diskutimi dhe ngjarje promovuese për dramaturgë dhe artistë të rinj.

Programi do të hapet me shfaqjen “Lule Sajza”, prodhim i Teatrit Kombëtar Eksperimental “Kujtim Spahivogli”, e cila do të pasojë me një performancë unike të grupit polifonik “Bashkimi” në ceremoninë zyrtare të hapjes. Dita e parë do të përfundojë me premierën e shfaqjes “Fausti”, e prodhuar nga Teatri Kombëtar i Shqipërisë.

Më 30 tetor, diskutimi “Peisazhi teatror në Shqipërinë post-komuniste” do të jetë në fokus, duke ofruar një platformë për reflektim mbi zhvillimet e fundit në teatër. Pas kësaj, do të shfaqet “Bottecchia” nga aktorët Ema Andrea dhe Rafael Hoxhaj, me regji nga Riccardo Ventrella, dhe muzika e Sevasti Ndinit. Në mbrëmje, shfaqja “Të gjashtët kundër Turqisë” do të sjellë një tjetër dimension të artit skenik.

31 tetori do të ofrojë mundësi unike për publikun që të ndërveprojë me aktorë të njohur në ngjarjen “Konsultimet Poetike”, duke vazhduar me një ditë të mbushur me shfaqje dhe panele diskutimi. Në këtë ditë, publiku do të shijojë shfaqjen “Të bardhët” dhe “Kamarja e Turpit” për të mbyllur ditën me një tjetër premierë.

Programi do të vazhdojë edhe më tej me një sërë punëtorish që do të udhëhiqen nga emra të njohur, si dramaturgu britanik Mark Ravenhill dhe kritikë të njohur nga Anglia dhe Gjermania, duke u ofruar pjesëmarrësve mundësi të shkëlqyera për zhvillim profesional dhe kreativ.

Pas gjashtë vjetësh mbajtjeje në Prishtinë, këtë vit ngjarja është zgjeruar në Shqipëri me qëllim të promovimit të skenës teatrore shqiptare, duke sjellë gjithashtu emra të njohur si Marco Giorgetti dhe Julia Wissert, të cilët do të kontribuojnë në këtë platformë ndërkombëtare.

Ngjarja e “Kosovo – Albania Theatre Showcase 2024” pritet të ofrojë një pasqyrë të pasur të teatrove në rajon, duke theksuar rëndësinë e kolaborimeve ndërkombëtare dhe inovacionit në artin skenik./UBTNews/

PROGRAMI I PLOTË I NGJARJES DHE INFORMACIONET E DËGJUESVE MUND TË GJENI KËTU

 

 

Continue Reading

Lajmet

54 vjet nga Kongresi i Drejtshkrimit të Gjuhës Shqipe

Published

on

Sot shënohen 54 vjet nga hapja e punimeve të Kongresit të Drejtshkrimit të Gjuhës Shqipe, i cili nisi më 20 nëntor 1972 në Tiranë, me pjesëmarrjen e albanologëve nga të gjitha trevat shqiptare.

Në Kongres morën pjesë 87 delegatë nga Shqipëria, Kosova, Maqedonia e Veriut, Mali i Zi dhe arbëreshët e Italisë.

Qëllimi i këtij tubimi ishte përcaktimi i parimeve dhe drejtimeve kryesore për hartimin e një sistemi të njësuar të drejtshkrimit, me synimin e krijimit të një standardi të përbashkët të gjuhës shqipe.

Në këtë proces, rol të rëndësishëm luajti edhe delegacioni nga Prishtina. Kongresi u parapri nga një takim me rëndësi i mbajtur në Prishtinë, ku ishin diskutuar dhe përcaktuar disa nga standardet gjuhësore.

Kongresi i vitit 1972 shënoi një moment të rëndësishëm në historinë e gjuhës shqipe dhe në përpjekjet për njësimin e saj në të gjitha trevat shqiptare./A.K/

Continue Reading

Lajmet

Reka dhe Çitaku diskutojnë promovimin e filmave kosovarë në garën për Oscar

Published

on

Ambasadori i Kosovës në Shtetet e Bashkuara të Amerikës, Blerim Reka, ka pritur në Konsullatën e Përgjithshme të Kosovës në Nju-Jork, Lum Çitakun, drejtor i Programeve në Qendrën Kinematografike të Kosovës. Në takim është diskutuar promovimi ndërkombëtar i kinematografisë kosovare.

Në fokus të takimit ishte filmi “DUA”, me regji të Blerta Bashollit, i cili po shfaqet këto ditë në Nju-Jork dhe është propozimi zyrtar i Kosovës për edicionin e 99-të të çmimeve Oscar, në kategorinë “Filmi më i mirë ndërkombëtar”.

Në të njëjtën kategori garon edhe filmi “Shame and Money”, me regji të Visar Morinës, i cili, sipas raportimit të Telegrafit, është kualifikuar drejtpërdrejt pas fitimit të çmimit kryesor të jurisë, World Cinema Grand Jury Prize, në Festivalin e Filmit Sundance në janar të këtij viti.

Gjatë takimit, Reka theksoi rëndësinë e mbështetjes institucionale për krijimtarinë filmike dhe promovimin e kulturës së Kosovës në arenën ndërkombëtare. Ai vlerësoi kinematografinë si një nga mënyrat e rëndësishme për përfaqësimin dhe afirmimin e vendit në botë./A.K/

Continue Reading

Lajmet

Vazhdojnë punimet për rinovimin e teatrit ODA në Prishtinë

Published

on

Ministrja e Kulturës, Saranda Bogujevci, ka njoftuar se po vazhdojnë punimet për rinovimin e teatrit ODA në Prishtinë, duke bërë të ditur se kjo hapësirë së shpejti do të jetë e gatshme për artistët dhe publikun.

Përmes një njoftimi, Bogujevci ka theksuar se rinovimi i teatrit ODA është pjesë e investimeve në infrastrukturën teatrore në vend.

Ajo ka përmendur edhe projektet e përfunduara, përfshirë rinovimin e teatrit të qytetit “Muharrem Qena” në Mitrovicë dhe të hapësirave teatrore në Pallatin e Rinisë në Prishtinë, si dhe ndërtimin e Shtëpisë së Kulturës në Suharekë.

Sipas ministres, punimet po vazhdojnë edhe në Teatrin Kombëtar të Kosovës dhe në teatrin “Adriana” në Ferizaj, ndërsa Qendra për Arte në Rahovec ndodhet në fazën përfundimtare të ndërtimit.

Ndërkaq, Teatri i Operës dhe Baletit në Prishtinë është në fazën e fundit të projektimit./A.K/

Continue Reading

Lajmet

“Palimpsest”, projekt artistik që rikthen në vëmendje trashëgiminë muzikore shqiptare

Published

on

Teatri Kombëtar i Operës, Baletit dhe Ansamblit Popullor ka prezantuar projektin artistik “Palimpsest”, i cili synon të rikthejë në vëmendje trashëgiminë muzikore shqiptare të viteve ’30, ’40 dhe ’50.

Përmes krijimeve origjinale dhe përpunimeve të këngëve popullore, projekti sjell vepra të kompozitorëve Antonio Muçi, Karlo Pali, Muharrem Xhediku, Koço Uçi, Ramadan Sokoli dhe Çesk Zadeja.

Në këtë mbrëmje artistike do të interpretojnë Ardita Bufaj në piano, Armando Likaj në bariton dhe Maida Resulbegoviç në soprano, ndërsa e ftuar speciale do të jetë pianistja Norena Gaxha.

Koncepti artistik, hulumtimi arkivor dhe mbledhja e partiturave janë realizuar nga pedagogia Ardita Bufaj.

Projekti organizohet në bashkëpunim me Teatrin Kombëtar të Operës, Baletit dhe Ansamblit Popullor, në kuadër të Festivalit “Netët e Muzikës Shqiptare”, me synimin për të promovuar vlerat e trashëgimisë muzikore dhe për t’i përcjellë ato te brezat e rinj./A.K/

Continue Reading

Të kërkuara