Aktualitet

Kosova s’mund ta gjurmojë variantin Delta

Published

4 years ago

July 13, 2021

UBT news

Kosova nuk mund të kryejë teste për të detektuar rastet eventuale me variantin Delta, pasi për këtë nuk ka reagenca, thuhet në përgjigjen e Ministrisë së Shëndetësisë. Këto teste, ministria i dërgon në Berlin.

Reagenca është substancë që ndikon në kryerjen e një reaksioni apo analize dhe një procedurë e tillë kërkon pajisje, ekspertizë, ambient dhe infrastrukturë të veçantë.

Më 29 qershor, Kosova regjistroi dy raste me variantin Delta të koronavirusit, variant ky që po përhapet me shpejtësi në mbarë botën. Rezultatet e testeve për këtë variant ishin bërë në Berlin.

Për dallim nga Kosova, shtetet fqinje, siç janë Mali i Zi, Serbia dhe Bosnja e Hercegovina vazhdimisht përcjellin përhapjen e variantit Delta.

Varianti Delta, që fillimisht është identifikuar në tetorin e vitit të kaluar në Indi, ka shkallë më të lartë të infektimit për 50-60 për qind më e lartë se variantet tjera, duke prekur edhe moshat më të reja.

Skender Syla nga Organizata Botërore e Shëndetësisë në Bullgari, tha për Radion Evropa e Lirë, se vaksinimi i qytetarëve, në këtë kohë kur po përhapet varianti Delta, është shumë i rëndësishëm.

Ai shtoi se Kosova duhet të ngre kapacitetet, në mënyrë që testet të jenë të përditësuara, varësisht prej zhvillimit të situatës epidemiologjike dhe shfaqjes së varianteve të reja të COVID-19. Ai po ashtu tha se hapa të tjerë epidemiologjikë duhet të ndërmerren gjatë gjithë fazave të pandemisë.

“(Hapat që duhet të ndërmerren janë) Identifikimi i hershëm i rasteve, izolimi i tyre, mbajtja e distancës fizike apo sociale në momentet kur identifikohet se ka shpërndarje të virusit. Sa u takon testeve, secili vend bën numër të testeve në bazë të resurseve që ka në dispozicion, në bazë të kapaciteteve dhe nevojave. Mirëpo, është një fatmirësi që tash ka edhe rrjete ndërkombëtare, ku edhe nëse nuk mund të bëhet sekuencimi i testeve në vendin përkatës, mostrat mund të dërgohen edhe në vende të tjera”, tha Syla.

Isme Humolli, zyrtare profesionale e emergjencave në Organizatën Botërore të Shëndetësisë në Kosovë, tha se kjo organizatë është duke ndihmuar Kosovën që sa më parë të sigurojë materiale testuese për variantin Delta.

Ndërkaq, ushtruesi i detyrës së drejtorit të Klinikës Infektive në Prishtinë, Arben Vishaj tha se klinika që ai udhëheq, është në gjendje gatishmërie për të trajtuar rastet me cilindo variant të koronavirusit.

“Varianti Delta nuk ka ndonjë protokoll të veçantë të trajtimit, por trajtimi është sikurse variantet e tjera që kanë qenë më përpara, edhe ky variant duhet të trajtohet me protokoll të njëjtë”, tha Vishaj.

Vishaj tha se variantet ekzistuese të sëmundjes COVID-19, por edhe ato që mund të zbulohen në të ardhmen, janë shqetësuese nëse qytetarët nuk vaksinohen.

“Vaksinimi është i vetmi mjet i cili është i domosdoshëm, është shumë e nevojshme që të bëhet vaksinimi masiv i popullatës në mënyrë që në të ardhmen, situata të tilla që mund të vijnë, të mos na befasojnë për të keq”, tha ai.

Zyrtarë të OBSH-së, kanë konfirmuar se vaksinat ekzistuese kundër koronavirusit, “janë efektive”, kundër variantit Delta.

Ndryshe, që prej fillimit të procesit të vaksinimit në Kosovë, numri i personave të vaksinuar me të dyja dozat e vaksinave është 67,578, ndërsa shifra totale e vaksinave të administruara është 260,955.

Në 24 orët e fundit, 6,361 persona janë vaksinuar kundër koronavirsuit.

Instituti Kombëtar i Shëndetësisë Publike në Kosovë, të hënën regjistroi pesë raste të infektimit me koronavirus pas testimit të 1,050 mostrave.

Prej 13 marsit 2020, kur janë regjistruar rastet e para të infektimit, autoritetet shëndetësore në Kosovë kanë regjistruar 107,859 pacientë me këtë virus.

Prej tyre 2,264 kanë vdekur.

Aktualitet

Paga shtesë për punonjësit e angazhuar në shuarjen e zjarreve në Shqipëri

Published

52 seconds ago

September 3, 2025

UBT News

Këshilli i Ministrave në Shqipëri vendosi të shpërblejë financiarisht të gjithë personelin shtetëror të angazhuar në operacionet për shuarjen e zjarreve gjatë kësaj vere.

Vendimi, i propozuar nga Ministria e Mbrojtjes dhe i mbështetur në kuadër të buxhetit të miratuar për vitin 2025, ka për qëllim vlerësimin dhe motivimin e forcave që kanë kontribuar në menaxhimin e emergjencave natyrore, përmes një skeme të strukturuar shpërblimi në varësi të kohëzgjatjes së angazhimit të tyre.

Sipas vendimit, shpërblimi do t’u jepet punonjësve të këtyre institucioneve: Forcave të Armatosura të Republikës së Shqipërisë; Agjencisë Kombëtare të Mbrojtjes Civile; Policisë së Shtetit; Drejtorisë së Përgjithshme të Mbrojtjes nga Zjarri dhe Shpëtimi; Shërbimeve të Mbrojtjes nga Zjarri dhe Shpëtimit në nivel bashkiak.

Shuma e shpërblimit do të përcaktohet sipas ditëve të angazhimit të personelit në operacionet e shuarjes së zjarreve: 1 deri në 7 ditë angazhim- shpërblim në masën e 1 page mujore bruto; 8 deri në 15 ditë angazhim -shpërblim në masën e 2 pagave mujore bruto; 16 ditë ose më shumë -shpërblim në masën e 3 pagave mujore bruto.

Efekti financiar për strukturat e përcaktuara do të përballohet nga fondi rezervë i buxhetit të shtetit, i miratuar për vitin 2025.

Sipas vendimit, në buxhetin e Ministrisë së Mbrojtjes, në shpenzimet korrente, shtohet fondi prej 193 140 098 lekësh, përkatësisht 145 809 950 lekë në programin buxhetor “Forcat e luftimit”, 43 408 127 lekë në programin buxhetor “Mbështetja e luftimit” dhe 3 922 021 lekë në programin buxhetor “Emergjencat civile”.

Në buxhetin e Ministrisë së Brendshme, në shpenzimet korrente, shtohet fondi prej 69 615 100 lekësh në programin buxhetor “Policia e Shtetit”.

Vendimi është botuar në Fletoren Zyrtare dhe ka hyrë në fuqi menjëherë.

/S.K/KP/

Aktualitet

Shqipëria merr drejtimin e Komitetit Monitorues të “Interreg Europe”, si kandidat i parë në këtë rol

Published

3 minutes ago

September 3, 2025

UBT News

Shqipëria merr për herë të parë drejtimin e Komitetit Monitorues të programit “Interreg Europe”, duke u bërë vendi i parë kandidat për Bashkimin Europian që mban këtë rol.

Agjencia Shtetërore e Programimit Strategjik dhe Koordinimit të Ndihmës e konsideroi këtë një hap historik që reflekton rritjen e rolit tonë në bashkëpunimin ndërajonal evropian.

“Me 34 partneritete aktive dhe mbi 30 organizata pjesëmarrëse, Shqipëria po kontribuon realisht në fusha si tranzicioni i gjelbër, inovacioni territorial dhe menaxhimi i qëndrueshëm i burimeve natyrore”, thuhet në njoftimin për shtyp.

Në dhjetor 2025 Tirana do të presë mbledhjen e radhës të Komitetit me përfaqësues nga 36 vende europiane, një mundësi unike për të promovuar partneritetet tona dhe për të shkëmbyer praktikat më të mira ndërmjet rajoneve.

Kryesimi i Shqipërisë konsiderohet më shumë se një përgjegjësi, një mundësi për të çuar më përpara vizionin europian të vendit.

“Është një tregues i rolit në rritje të vendit tonë në vendimmarrjen evropiane dhe një mundësi për të nxjerrë në pah kontributin e Shqipërisë në projekte konkrete me ndikim rajonal. Ne jemi të përkushtuar ta shfrytëzojmë këtë mandat, jo vetëm për të avancuar rrugën tonë drejt BE-së, por edhe për të sjellë rezultate të prekshme për qytetarët tanë, për bashkitë dhe për komunitetet”, deklaroi Eridana Cano, drejtoreshë e përgjithshme e SASPAC.

/S.K/KP/Interreg Europe/

Aktualitet

Qeveria sllovene rrit akcizën për karburantet

Published

7 minutes ago

September 3, 2025

UBT News

Qeveria sllovene rriti këtë javë akcizën për llojet e karburanteve ku Ministria e Financave theksoi qeveria po monitoron nga afër situatën në tregun e produkteve të naftës.

Akciza u rrit për benzinën pa plumb nga 0.49693 euro për litër në 0.50177 euro për litër, për naftën nga 0.43250 euro në 0.45022 euro për litër dhe për vajin e ngrohjes nga 0.167 euro në 0.18676 euro për litër.

Një litër benzinë do të kushtojë 1.443 euro për 14 ditët e ardhshme, duke përfshirë deri më 8 shtator, një litër naftë do të kushtojë 1.465 euro dhe një litër vaj ngrohjeje do të kushtojë 1.063 euro.

Siç theksoi Ministria e Financave, qeveria po monitoron nga afër situatën në tregun e produkteve të naftës dhe, duke rregulluar akcizat, po kërkon një ekuilibër midis ruajtjes së çmimeve të shitjes me pakicë të përballueshme dhe konkurruese dhe sigurimit të qëndrueshmërisë financiare publike, raporton H1 Slovenia.

Marzhet e tregtarëve mund të vazhdojnë të jenë një maksimum prej 0.0983 euro për litër naftë, 0.0994 euro për litër benzinë 95 oktane dhe 0.08 euro për litër naftë për ngrohje.

Që nga qershori, çmimet e karburantit janë rregulluar në të gjitha stacionet e benzinës në të gjithë vendin, si në rrjetin autostradal ashtu edhe jashtë tij.

Me rritjen e marzheve, çmimet e produkteve të naftës llogariten bazuar në një metodologji të bazuar në lëvizjen e çmimeve të produkteve të naftës në tregun botëror dhe lëvizjen e kursit të këmbimit dollar-euro.

Çmimet model llogariten bazuar në mesataret 14-ditore të çmimeve të produkteve minerale të naftës.

/S.K/KP/

Aktualitet

Garda Skoceze ekspozon armët dhe pajisjet ushtarake në Kosovë

Published

10 minutes ago

September 3, 2025

UBT News

Komandanti i misionit të KFOR, Gjeneralmajor Enrico Barduani udhëhequr nga NATO, zhvilloi një vizitë zyrtare në Kampin Bondsteel, ku u prit nga Komandanti i Komandës Rajonale Lindje (RC-E), Kolonel Jonathan Lloyd.

Gjatë vizitës, Barduani mori një informim të detajuar mbi operacionet dhe aktivitetet e përditshme të RC-E, duke u njohur nga afër me përkushtimin dhe profesionalizmin e trupave në terren.

Në kuadër të vizitës, u zhvillua edhe një shfaqje armësh dhe pajisjesh ushtarake, e organizuar nga Garda Skoceze, e cila është e vendosur në Kosovë si pjesë e Forcës Rezervë të NATO-s për qëllime stërvitore.

Kjo ekspozitë ofroi një pasqyrë mbi kapacitetet moderne që KFOR-i ka në dispozicion.

“Profesionalizmi, përkushtimi dhe kompetenca juaj janë thelbësore për misionin tonë,” u shpreh gjeneralmajor Barduani, duke falënderuar personelin për kontributin e tyre në ruajtjen e sigurisë.

KFOR-i bashkëpunon ngushtë me Policinë e Kosovës dhe EULEX-in, në rolet e tyre përkatëse si reagues të sigurisë.

/S.K/KP/