Një nga ikonat më të mëdha të sportit kosovar, Nora Gjakova, ka hapur një kapitull të ri në karrierën e saj, këtë herë jashtë tatamit si garuese. Kampionia olimpike e Tokios 2020 ka nisur zyrtarisht rrugëtimin si trajnere në Federatën e Xhudos së Valonisë në Belgjikë.

Pas tërheqjes nga sporti aktiv më herët gjatë këtij viti, Gjakova i është bashkuar stafit të trajnerëve, ku do të punojë krah për krah me Pedro Guedes, me synimin për të zhvilluar gjeneratat e reja të talentëve belgë. Dyshja njihen më parë, pasi Guedes kishte kaluar një periudhë të shkurtër si trajner në Kosovë.

Në një postim në rrjetin social Facebook, Judo Wallonie Bruxelles shkruan:
“Mirë se vini te Nora Gjakova në Xhudo Wallonie-Bruksel! Me krenari të madhe e mirëpresim Nora Gjakovën në ekipin tonë si trajnere. E mirëpresim në Belgjikë dhe i urojmë shumë suksese në aventurën e saj të re me JWB.”

Gabriele Gravina ka dhënë dorëheqjen zyrtarisht nga posti i Presidentit të Federatës së Futbollit të Italisë, pas dështimit të kombëtares italiane për t’u kualifikuar në Kupën e Botës për herë të tretë radhazi.

Dorëheqja e tij u paraqit gjatë një mbledhjeje urgjente të këshillit të përgjithshëm, pas humbjes së Italisë në finalen e play-off-it të Kupës së Botës kundër Bosnjë dhe Hercegovinës, të martën në mbrëmje.

Gravina kishte mbajtur postin më të lartë në futbollin italian që nga tetori i vitit 2018. Gjatë mandatit të tij, Italia fitoi Kampionatin Evropian Euro 2020, por gjithashtu dështoi të kualifikohej në Kupat e Botës 2022 dhe 2026.

Me konfliktin në Lindjen e Mesme ende të pazgjidhur, ekzistonin dyshime mbi pjesëmarrjen e Iranit në Botërorin “FIFA 2026”. Presidenti i FIFA-s, Gianni Infantino, i dha fund këtyre dyshimeve gjatë një ndeshjeje miqësore ndërmjet Iranit dhe Costa Rica-s në Antali, Turqi.

“Irani do të jetë në Botëror, kjo është arsyeja pse ndodhem këtu. Madje ju siguroj se do të luajë në SHBA”, deklaroi Infantino.

Kjo vjen pas kërkesës së Federatës së Futbollit të Iranit për garanci mbi sigurinë dhe pjesëmarrjen e tyre në turne. Megjithatë, mbetet për t’u parë reagimi i Iranit ndaj deklaratës së presidentit të FIFA-s.

Sulmuesi i Kosovës, Vedat Muriqi, është përballur me kritika të ashpra nga një tifozë, i cili e akuzoi se ka ndarë informacione dhe taktika të ekipit me Turqinë. Megjithatë, një valë mbështetjeje ka ardhur nga figura publike dhe politike, të cilët e kanë mbrojtur dhe falënderuar për përkushtimin e tij, duke theksuar: “Ne jemi me ty dhe ti e bere maksimumin.”

Së fundmi, Federata e Futbollit e Kosovës (FFK) i ka dalë në mbrojtje Muriqit, duke theksuar rëndësinë e rolit të tij jo vetëm si lojtar, por edhe si simbol i kombit:

“Futbolli nuk është thjesht lojë. Ai është pasqyrë e identitetit, përkushtimit dhe vlerave që ne, si shoqëri, duam t’i promovojmë. Kur kapiteni i Kombëtares sulmohet me fyerje dhe gjuhë përçarëse, kjo prek jo vetëm një lojtar, por një simbol të Kosovës dhe të gjithë shqiptarëve që e ndjekin futbollin me krenari.”

FFK vlerëson kontributin e Muriqit në fushë, jo vetëm për golat, por edhe për lidershipin, energjinë dhe shpirtin që sjell në çdo ndeshje:

“Ai është shembull i profesionalizmit, pasionit dhe unitetit që Kombëtarja e Kosovës përfaqëson. Golat e tij nuk janë thjesht pikë në tabelë, por emocione që frymëzojnë popullin shqiptar dhe krijojnë krenari për vendin tonë.”

Federata shton se ofendimet në rrjetet sociale nuk kanë vend në futboll dhe se si individë dhe si shoqëri duhet të reagojmë kur vihen në diskutim vlerat që përfaqësojnë Kosovën në arenën ndërkombëtare.

“Vedat Muriqi nuk është vetëm kapiteni i Kombëtares. Ai është njëri prej Dardanëve që po shkruan historinë e vendit tonë. Mirënjohja për të dhe për të gjithë lojtarët tanë nuk është thjesht një detyrim moral, por reflektim i vlerave që duam të kultivojmë: përkushtim, dinjitet dhe krenari.”

FFK përfundon duke theksuar se futbolli është më shumë se rezultatet, është mënyra se si tregojmë se kush jemi dhe çfarë vlerash mbrojmë. Punë dhe shpirtin e Muriqit, sipas federatës, e tregojnë çdo ditë përkushtimin dhe krenarinë që një komb duhet të ketë.

Federata gjithashtu falënderon tifozët dhe qytetarët që, edhe pas humbjes kundër Turqisë, qëndruan pranë ekipit, duartrokitën dhe mbështetën përkushtimin e jashtëzakonshëm të lojtarëve.