Pas gati një dekade përpjekjesh, është përuruar Muzeu i Masakrës në “Lagjen e Boshnjakëve” në Mitrovicë, në shtëpinë ku në prill të vitit 1999 forcat serbe vranë nëntë civilë shqiptarë.

Objekti, pronë e Mustafë Sahitit dhe i vendosur në territorin e Mitrovicës së Veriut, është shndërruar në një institucion kujtese me investim të Ministrisë së Kulturës në vlerë prej afro 150 mijë eurosh. Restaurimi është realizuar duke ruajtur gjendjen autentike të shtëpisë, ashtu siç kishte mbetur pas luftës, ndërsa tabelat përkujtimore me emrat e viktimave nuk janë prekur.

Ndërhyrjet kryesore janë bërë në hapësirat përreth objektit, me qëllim të sigurimit të qëndrueshmërisë dhe mbrojtjes së tij nga dëmtimet e kohës. Shtëpia tashmë është rrethuar me elemente mbrojtëse prej xhami dhe pajisje të tjera që garantojnë ruajtjen afatgjatë të saj.

Në ceremoninë e përurimit, kryeministri Albin Kurti tha se ky projekt përfaqëson një investim në kujtesën kolektive dhe edukimin e brezave të rinj.

“Ky projekt, në vlerë prej afro 150 mijë eurosh, në këtë vend të kujtesës, është investim në vetëdijen historike të shoqërisë sonë dhe në edukimin e brezave të rinj. Sepse pa të vërtetën nuk mund të ketë drejtësi të plotë, ndërsa pa drejtësi nuk mund të ketë paqe të qëndrueshme”, deklaroi Kurti.

Përpjekjet për shndërrimin e kësaj shtëpie në muze kishin nisur vite më parë. Në vitin 2019, Komuna e Mitrovicës dhe organizata “Zëri i Prindërve” vendosën gurthemelin simbolik të projektit, në një ceremoni ku morën pjesë përfaqësues institucionalë, familjarë të viktimave dhe qytetarë.

Me këtë rast, ish-kryetari i Mitrovicës së Jugut, Agim Bahtiri, kishte theksuar rëndësinë e ruajtjes së kujtesës për krimet e luftës, duke e cilësuar muajin prill si një nga periudhat më të dhimbshme në historinë e Kosovës.

Ndërkaq, ish-këshilltari i kryeministrit Ramush Haradinaj, Jahja Lluka, kishte deklaruar se muzeu do të merrte formën që e meritojnë dëshmorët dhe martirët e kombit, ndërsa Bajram Çerkini, në atë kohë kryetar i Shoqatës së të Pagjeturve në Mitrovicë, kishte shprehur pakënaqësinë për mungesën e drejtësisë ndaj autorëve të krimit.

Përurimi i Muzeut të Masakrës në Mitrovicë vjen vetëm pak ditë pasi u përurua edhe shtëpia-muze e shkrimtarit Ymer Elshani në Korroticën e Poshtme të Drenasit. Elshani u vra së bashku me familjen e tij dhe 46 civilë të tjerë në Masakrën e Poklekut më 17 prill 1999.

Sipas Ministrisë së Kulturës, këto institucione të kujtesës shërbejnë si pika referimi për ruajtjen e së vërtetës historike dhe për edukimin e brezave të ardhshëm mbi krimet e kryera gjatë luftës në Kosovë.

Në ceremoninë e përurimit të shtëpisë-muze të Ymer Elshanit, kryeministri Kurti shprehu mirënjohje të veçantë për Teuta Elshanin, të vetmen të mbijetuar të familjes, e cila ka ruajtur me përkushtim kujtimet dhe sendet personale të familjarëve të vrarë.

Pas gjobave të shqiptuara edhe në javët e kaluara, Ministria e Industrisë, Ndërmarrësisë, Tregtisë dhe Inovacionit (MINT) ka njoftuar se ka vazhduar masat ndaj KEDS-it, duke i shqiptuar së fundmi gjoba në vlerë prej 110 mijë eurosh për shkak të parregullsive të evidentuara në njehsorët elektrikë të konsumatorëve.

Sipas njoftimit të ministrisë, gjatë muajit maj ka vazhduar verifikimi i njehsorëve të konsumatorëve që kanë paraqitur ankesa pranë Departamentit për Mbrojtjen e Konsumatorit.

Të dhënat e Agjencisë së Metrologjisë së Kosovës tregojnë se nga verifikimet e realizuara, 18 njehsorë kanë rezultuar me afat të skaduar të validitetit, dy të tjerë me miratim tipi të tërhequr, ndërsa 30 njehsorë kanë pasur pasaktësi në datë dhe orë.

Bazuar në këto gjetje dhe në përputhje me Ligjin për Metrologjinë, Inspektorati Qendror i Tregut ka shqiptuar ndaj KEDS-it gjoba në vlerë totale prej 110 mijë eurosh.

Ministria bëri të ditur se raportet zyrtare të verifikimit janë dorëzuar edhe te KESCO, me qëllim që të bëhet kompensimi i konsumatorëve që mund të jenë dëmtuar nga këto parregullsi.

Sipas MINT-it, procesi i verifikimit të njehsorëve do të vazhdojë edhe në periudhën e ardhshme, deri në trajtimin dhe shqyrtimin e plotë të të gjitha ankesave të paraqitura nga qytetarët.

Sipas njoftimit të Institutit Hidrometeorologjik të Kosovës, gjatë ditës pritet shtim i vranësirave, të cilat mund të sjellin reshje shiu të shoqëruara me shkarkime rrufesh.

Në disa zona nuk përjashtohet mundësia e paraqitjes së breshrit.

Temperaturat minimale do të sillen ndërmjet 10 dhe 13 gradë Celsius, ndërsa ato maksimale do të arrijnë nga 22 deri në 26 gradë Celsius.

“Era do të fryjë nga drejtimi verilindor me shpejtësi prej 1 deri në 12 metra në sekondë”, ka bërë të ditur IHMK.

Të paktën 10 persona kanë humbur jetën dhe dhjetëra të tjerë janë plagosur pas një vale të gjerë sulmesh ruse me raketa dhe dronë në Ukrainë, në atë që cilësohet si një nga ofensivat më të mëdha të Moskës gjatë muajve të fundit, raporton BBC.

Sipas autoriteteve ukrainase, gjashtë persona u vranë në Dnipro dhe katër të tjerë në kryeqytetin Kiev. Mes të plagosurve ka edhe fëmijë. Sulmet goditën ndërtesa banimi në disa zona, ndërsa ekipet e emergjencës vazhdojnë kërkimet për persona që dyshohet se kanë mbetur të bllokuar nën rrënoja.

Gjatë orëve të para të mëngjesit, në Kiev u dëgjuan shpërthime të shumta dhe zhurma e dronëve që fluturonin mbi qytet. Sulmet shkaktuan zjarre pranë një stacioni karburanti, në një kantier ndërtimi, në disa blloqe banimi dhe në dy shtëpi private. Në pjesë të ndryshme të kryeqytetit u raportuan edhe ndërprerje të energjisë elektrike.

Kryetari i Kievit, Vitali Klitschko, u bëri thirrje qytetarëve të qëndrojnë në strehimore, ndërsa kreu i Administratës Ushtarake të qytetit, Tymur Tkachenko, deklaroi se Rusia po përdor raketa balistike kundër objektivave në kryeqytet.

Një objekt industrial në Zaporizhia u godit gjithashtu gjatë sulmeve, ndërsa alarmet për sulme ajrore u aktivizuan në pjesën më të madhe të territorit ukrainas.

Presidenti ukrainas, Volodymyr Zelensky, kishte paralajmëruar një ditë më parë për mundësinë e një sulmi të madh rus. Në një fjalim me video, ai tha se shërbimet e inteligjencës kishin sinjalizuar përgatitje të Rusisë për një ofensivë të gjerë ajrore.

“Paralajmërimet e inteligjencës për sulme ruse mbeten në fuqi. Një sulm masiv është i mundshëm, ata e kanë përgatitur atë”, deklaroi Zelensky.

Sulmet vijnë në një kohë tensionesh të shtuara mes dy vendeve. Javën e kaluar, Moska paralajmëroi se do të kryente “sulme sistematike” ndaj Ukrainës si përgjigje ndaj një sulmi ukrainas me dron në rajonin e pushtuar të Luhanskut, ku sipas autoriteteve ruse humbën jetën 21 persona.

Nga ana tjetër, ushtria ukrainase ka pranuar se kreu një operacion pranë Starobilskut më 21-22 maj, por ka theksuar se objektivi ishte një njësi ushtarake ruse dhe jo një objekt civil.

Ndërkohë, edhe Rusia raportoi një sulm me dron në rajonin e Krasnodarit. Autoritetet lokale njoftuan për një zjarr në rafinerinë e naftës Ilsky, por thanë se nuk pati viktima.

Kievi i ka cilësuar kërcënimet ruse si “shantazh të paturpshëm” dhe u ka bërë thirrje aleatëve perëndimorë të shtojnë presionin ndaj Moskës, ndërsa lufta mes dy vendeve vazhdon të përshkallëzohet./BBC/