Policia e Kosovës ne raportin 24 orësh njofton se ka konfiskuar dy armë zjarri gjatë kontrolleve në komunikacion në rajonin e Ferizajt brenda dy ditëve të fundit.

Në rastin e parë, njësia policore ka ndaluar një automjet ku gjatë kontrollit i ka gjetur drejtuesit një pistoletë me gjashtë fishekë, për të cilën ai posedonte vetëm leje për shenjëtari por jo edhe për bartje.

“Njësia policore gjatë patrullimit ka ndaluar një veturë të cilën e drejtonte i dyshuari mashkull kosovar dhe gjatë kontrollit tek i njëjti ka gjetur dhe ka sekuestruar një pistoletë me 6 fishekë për të cilën i dyshuari kishte leje për shenjëtari. Në konsultim me prokurorin i dyshuari është intervistuar dhe rasti vazhdon të trajtohet në gjendje të lirë”, thuhet ne raport.

Ndërsa në rastin e dytë, po ashtu në Ferizaj, policia ka gjetur dhe sekuestruar një pistoletë tjetër në çantën e brezit të një personi gjatë kontrollit të makinës së tij, për të cilën nuk kishte fare leje.

Pas intervistimit, me vendim të prokurorit, të dy personat janë liruar dhe rastet po trajtohen në procedurë të rregullt në gjendje të lirë.

“Gjatë kontrollit në automjetin e të dyshuarit mashkull kosovar në një çantë brezi i është gjetur dhe konfiskuar një pistoletë për të cilën nuk posedonte leje për bartje. I dyshuari është intervistuar dhe me vendim të prokurorit rasti vazhdon të trajtohet në gjendje të lirë”, sipas raportit.

Një person është gjetur pa shenja jete gjatë ditës së djeshme në shtëpinë e tij në Prizren, sipas raportit 24 orësh të Policisë së Kosovës.

Rastin në polici e ka raportuar një dëshmitar, i cili e ka gjetur viktimën e burrë në banesën e tij.

Menjëherë pas marrjes së informatës, në vendin e ngjarjes kanë dalë njësitë relevante policore dhe ekipi mjekësor, ku ky i fundit ka konstatuar vdekjen e viktimës.

Me urdhër të prokurorit, trupi i pajetë është dërguar në Institutin e Mjekësisë Ligjore për obduksion, ndërkohë që rasti po trajtohet si “hetim i vdekjes” deri në zbardhjen e plotë të rrethanave.

Kosova dhe Shqipëria janë cilësuar si vende “pjesërisht të lira” në raportin më të fundit vjetor të organizatës Freedom House me seli në Uashington.

Megjithatë, Kosova ka shënuar një përmirësim të vogël në Raportin e vitit 2026 për Lirinë në Botë, duke u vlerësuar me 61 pikë nga 100, një më shumë se një vit më parë.

Në raportin e publikuar më 19 mars thuhet se në Kosovë “gjykatat kanë nxjerrë vendime që dëshmojnë pavarësinë e tyre, megjithëse janë përballur me trysni të madhe politike”.

Sipas raportit, kriza politike dhe institucionale që goditi Kosovën gjatë vitit të kaluar, kur vendi u qeveris pothuajse tërë kohën nga një qeveri në detyrë, ka ndikuar në përparimin e vendit në gjyqësor.

“Në Kosovë, për shembull, ligjvënësit e sapozgjedhur nuk arritën të formonin një qeveri për pjesën më të madhe të vitit, ndërsa qeveria në detyrë thuhet se e tejkaloi mandatin e saj teknik, duke rezultuar në zgjedhje të parakohshme; kjo bllokadë i zbehu përparimet e vendit në pavarësinë gjyqësore dhe sigurinë fizike”, thuhet në raport.

Në raportin paraprak, kur Kosova kishte 60 pikë, vendi vlerësohej se kishte shumë institucione publike të minuara nga korrupsioni, se gazetarët përballeshin me frikësim dhe se sundimi i ligjit pengohej nga ndërhyrjet dhe mosfunksionimi në sistemin gjyqësor.

Si renditen vendet e tjera të Ballkanit Perëndimor?

Nga vendet e rajonit, Serbia qëndron më së keqi, pasi vlerësohet me 53 pikë, ndërsa Bosnja e Hercegovina me 54 pikë.

Shqipëria, ndërkohë, vlerësohet më së larti, me 69 pikë, e ndjekur nga Mali i Zi me 68 pikë dhe Maqedonia e Veriut me 67 pikë.

Edhe Shqipëria shënoi përparim për një pikë, krahasuar me raportin e vitit të kaluar.

Raporti Liria në Botë përfshin vlerësime dhe raporte për vendet mbi të drejtat politike dhe liritë qytetare në 195 vende dhe 13 territore në mbarë botën.

Raporti i këtij viti mbulon zhvillimet nga 1 janari 2025 deri më 31 dhjetor 2025.

Puçet ushtarake, dhuna kundër protestuesve paqësorë dhe përpjekjet për të dobësuar garancitë kushtetuese gjatë vitit 2025, bënë që ky të ishte viti i 20-të radhazi të rënies së lirisë globale, sipas raportit nga Freedom House.

Raporti zbuloi se 54 vende përjetuan përkeqësim të të drejtave politike dhe lirive qytetare, ndërsa vetëm 35 shënuan përmirësime.

Sot, vetëm 21 për qind e popullsisë së botës jeton në vende të vlerësuara si të lira, një rënie nga 46 për qind që ishte para dy dekadash, thuhet në raport.

Guinea-Bissau, Tanzania, Burkina Faso, Madagaskari dhe El Salvadori shënuan rëniet më të mëdha të pikëve brenda një viti, ndërsa Siria, Sri Lanka, Bolivia dhe Gaboni gëzuan përmirësimet më të mëdha.

Tri vende – Bolivia, Fixhi dhe Malaui – u përmirësuan nga statusi “pjesërisht të lira” në “të Lira”, falë zgjedhjeve konkurruese, rritjes së pavarësisë së gjyqësorit dhe forcimit të sundimit të ligjit. /REL/

Mbrëmja e fundit e raundit të 16-tave në Champions League ka përcaktuar tetë skuadrat më të mira të Evropës, me Barcelonën që dhuroi një spektakël të vërtetë golash.

Katalanasit shkatërruan Newcastle United me rezultatin e thellë 7-2 në “Camp Nou”, duke kaluar tutje me rezultat të përgjithshëm 8-3. Robert Lewandowski dhe Raphinha ishin protagonistët kryesorë me nga dy gola secili, ndërsa listës së realizatorëve iu bashkuan edhe Lamine Yamal, Marc Bernal dhe Fermín López. Kjo fitore e rëndësishme rikonfirmon formën e lartë të ekipit të drejtuar nga Hansi Flick në garën më të rëndësishme për klube.

Në sfidat e tjera, Liverpooli arriti të përmbysë gjithçka kundër Galatasaray-t, duke fituar 4-0 në “Anfield” dhe duke harruar humbjen e ndeshjes së parë në Turqi.

Mohamed Salah shënoi golin e tij të 50-të në këtë garë, duke udhëhequr ekipin drejt kualifikimit.

Ndërkohë, Bayern München nuk lejoi befasi ndaj Atalantës, duke fituar 4-1 dhe duke e mbyllur këtë fazë me shifrën mbresëlënëse prej dhjetë golash të shënuar në dy ndeshje.

Pavarësisht humbjes 3-2 mbrëmë ndaj Tottenhamit, Atlético Madrid siguroi kalimin tutje falë avantazhit të krijuar në takimin e parë.

Me përfundimin e këtyre takimeve, tashmë janë konfirmuar të gjitha skuadrat çerekfinaliste. Së bashku me Barcelonën, Liverpoolin, Bayernin dhe Atléticon, në fazën tjetër do të jenë edhe Real Madrid, Paris Saint-Germain, Arsenal dhe Sporting CP.

Shorti për fazën e çerekfinaleve do të hidhet së shpejti, ku pritet të përcaktohen përballje akoma më intensive që do të luhen gjatë muajit prill.