ChatGPT po shndërrohet gjithnjë e më shumë në një asistent personal inteligjent dhe një mjet kërkimi të përditshëm.

Për ta përdorur në mënyrën më të dobishme, është e rëndësishme të dini si të komunikoni qartë me të.

Ndryshe nga motorët tradicionalë të kërkimit, ChatGPT jep rezultatet më të mira kur i ofroni kontekst, udhëzime të qarta, shembuj dhe stil të dëshiruar. Një pyetje e thjeshtë shpesh nuk mjafton për të marrë përgjigjen që kërkoni.

Më poshtë gjeni pesë këshilla profesionale për të përmirësuar ndërveprimin tuaj me këtë inteligjencë artificiale.

1. Caktoni një rol (Role Prompting)

ChatGPT reagon më mirë kur i caktoni një rol specifik. Kjo e ndihmon të përcaktojë tonin, stilin dhe thellësinë e përgjigjes.

Shembull:

“Ma shpjego këtë sikur të jem 12 vjeç.” → përgjigje e thjeshtë dhe e kuptueshme.

“Sillu sikur je profesor me mbi 30 vjet përvojë në sociologji.” → përgjigje më e thellë dhe analitike.

2. Jepni shembuj

Shembujt janë një mënyrë shumë efektive për të drejtuar ChatGPT-në drejt rezultatit që dëshironi.

Nëse i kërkoni të shkruajë një email, tregoni një shembull të stilit tuaj të zakonshëm ose thuajini “Dua që ta shkruash në stil të ngjashëm.” Sa më konkretë të jeni me shembujt, aq më i saktë dhe afër pritshmërive tuaja do të jetë rezultati.

3. Shtoni kontekst

Thelbësor për të marrë përgjigje të sakta, shpjegoni pse po bëni pyetjen, çfarë dini tashmë dhe çfarë prisni nga përgjigjja.

4. Përcaktoni tonin dhe stilin

Toni ndikon drejtpërdrejt në mënyrën se si ChatGPT formulon përgjigjen. Nëse po mësoni një gjuhë të re, mund të kërkoni që përgjigjet të jenë miqësore, edukative dhe me shembuj.

Nëse ju nevojitet diçka profesionale, kërkoni që stili të jetë i përmbledhur, Në rast se po shkruani për media apo rrjete sociale, mund të zgjidhni tone si humoristik, frymëzues, ironik apo dramatik.

5. Kërkoni shpjegime hap pas hapi

Kur bëhet fjalë për tema të ndërlikuara, si matematika, logjika apo analizat – kërkoni që përgjigjja të jetë e shpjeguar hap pas hapi. Kjo do t’ju ndihmojë të kuptoni më qartë procesin e arsyetimit dhe të dalloni çdo gabim të mundshëm.

Në përmbledhje, sa më qartë dhe me më shumë informacion të komunikoni me ChatGPT, aq më të dobishme, të personalizuara dhe profesionale do të jenë përgjigjet që merrni. /A.Z/UBT News/

YouTube ka njoftuar një përditësim të madh për aplikacionin në televizorë, duke sjellë funksione të reja për krijuesit, pamje më të qarta dhe integrim më të zgjuar të blerjeve online.

Sipas kompanisë, gjithnjë e më shumë përdorues po shikojnë përmbajtje në ekranet e mëdha, disa kanale gjenerojnë mbi 45% të të ardhurave nga TV-të.

Disa krijues, madje, raportojnë fitime me shifra gjashtëshifrore nga ky burim. Për të përmirësuar këtë përvojë, YouTube po prezanton disa risi që “e shndërrojnë televizorin në mënyrën më të mirë për të shikuar përmbajtje.” Krijuesit do të mund të ngarkojnë miniatura deri në 50 MB, duke ofruar pamje shumë më të qarta në ekranet 4K. Kompania po teston edhe mbështetjen për skedarë video më të mëdhenj, për një cilësi më të lartë të përmbajtjes.

Një tjetër risi është funksioni me inteligjencë artificiale “Super Resolution”, i cili përmirëson videot e vjetra nga cilësia SD në HD, madje deri në 4K.

Krijuesit mund të vendosin vetë nëse do ta aktivizojnë këtë opsion, ndërsa shikuesit kanë mundësi të zgjedhin rezolucionin origjinal nga cilësimet.

Aplikacioni për TV po merr dizajn të ri të kanaleve. Faqja e përmirësuar mundëson shfletim më të shpejtë dhe mënyra të reja organizimi të videove, përfshirë një seksion të posaçëm për serialet (Shows). Edhe kërkimi është bërë më intuitiv — tani, kur kërkon brenda një kanali, shfaqen fillimisht videot e atij krijuesi.

YouTube po teston një opsion që lejon përdoruesit të skanojnë një kod QR nga videoja në TV për të hapur faqen e produktit në telefonin e tyre.

Gjithashtu, janë në fazë testimi “etiketat inteligjente të produkteve”, që cilat shfaqen gjatë momenteve kyçe të një videoje, duke i lejuar shikuesit të blejnë menjëherë produktet që shohin. /A.Z/UBT News/

Që nga prezantimi i tij në fillim të vitit 2024, Galaxy AI i Samsung ka vijuar të zgjerojë mbështetjen për gjuhë të reja në mënyrë të qëndrueshme. Platforma mbështeste 16 gjuhë në prill të 2024-s, ndërsa deri në dhjetor arriti në 20 gjuhë.

Samsung ka njoftuar shtimin e dy gjuhëve tjera: filipinishten dhe guxharatishten, që mund të shkarkohen si paketa gjuhësore përmes aplikacionit Cilësimet.

Filipinishtja flitet nga rreth 87 milionë persona, ndërsa guxharatishtja nga rreth 62.5 milionë. Të dyja u zhvilluan në bashkëpunim me qendrat kërkimore të Samsung në Indonezi dhe Indi.

Me këto shtesa, Galaxy AI mbështet gjithsej 22 gjuhë, që përfaqësojnë rreth 74% të popullsisë botërore, ose afërsisht 5.9 miliardë njerëz.

Sipas Samsung, më shumë se 70% e përdoruesve të Galaxy S25 përdorin rregullisht Galaxy AI dhe Google Gemini, ndërsa 47% e tyre deklarojnë se mbështeten “shumë” në inteligjencën artificiale në jetën e përditshme.

Kompania synon që deri në fund të këtij viti, Galaxy AI të jetë i disponueshëm në mbi 400 milionë pajisje, pasi tashmë ka arritur shifrën prej 200 milionë pajisjesh gjatë vitit 2024. /A.Z/UBT News/

Apple, kompania e njohur për qasjen e kujdesshme ndaj ndryshimeve në harduer, duket se po përgatit një hap të madh përpara me gjeneratën e ardhshme të iPhone-ve.

Sipas raportimeve nga portali The Bell, modeli standard i iPhone 18 mund të vijë me 12 GB RAM, rritje e ndjeshme krahasuar me 8 GB që ofrohet aktualisht.

Nëse të dhënat rezultojnë të sakta, kjo do të ishte hera e parë që Apple merr versionin bazë të iPhone-it, dhe jo vetëm variantet Pro – me kaq shumë memorie.

Shtimi i RAM-it nuk do të shërbejë vetëm për statistika më të larta: do të përmirësojë performancën në multitasking, do të lehtësojë hapjen më të shpejtë të aplikacioneve dhe do të optimizojë përdorimin e funksioneve të inteligjencës artificiale, që pritet të jenë pjesë qendrore e sistemit të ri operativ iOS 19.

Apple planifikon të përdorë LPDDR5X RAM, teknologji që ofron shpejtësi më të lartë dhe konsum më të ulët energjie krahasuar me versionin aktual.

Ky hap do ta vendoste kompaninë në një pozitë më konkurruese ndaj rivalëve si Samsung dhe Google, që cilët ofrojnë pajisje premium me sasi të ngjashme ose më të mëdha memorjeje.

Edhe pse Apple nuk ka dhënë asnjë koment zyrtar, vërehet se kompania po e ngushton diferencën mes modeleve standarde dhe atyre Pro – një strategji që do t’u sillte përdoruesve më shumë vlerë për çmimin që paguajnë.

Seria iPhone 18 pritet të prezantohet në shtator 2026, dhe përveç rritjes së RAM-it, flitet edhe për përmirësime në kamera, dizajn të ri dhe një fokus më të madh në inteligjencën artificiale. /A.Z/UBT News/