Policia e Kosovës përmes një njoftimi ka bërë të ditur së një i ri 17-vjeçar me inicialet A.N nga fshati Bablak i Ferizajt është paraqitur vullnetarisht në stacionin policor pasi kishte gjetur një portofol pranë një pike karburanti në fshatin Lloshkobare.

Pas verifikimeve nga zyrtarët policorë, u bë i mundur identifikimi i pronarit, K.S., 40 vjeç nga Gjakova, të cilit iu kthyen të gjitha mjetet monetare në vlerë prej 2,435 eurosh e 270 frangash, së bashku me dokumentet e tij të identifikimit.

Drejtoria Rajonale e Policisë në Ferizaj ka shprehur falënderimin dhe vlerësimin e lartë për veprimin e A. Nuhës, duke e cilësuar ndershmërinë e tij si një shembull të shkëlqyer për të gjithë komunitetin. /E.A/

Instituti Kombëtar i Shëndetësisë Publike të Kosovës (IKShPK) ka nxjerrë një përditësim mbi situatën epidemiologjike në vend, ku njofton se nga 16 prilli deri më 3 gusht 2026 janë konfirmuar gjithsej 99 raste me fruth. Vetëm përgjatë javës së fundit janë regjistruar 21 raste të reja, duke shënuar një rritje të ndjeshme krahasuar me të njëjtën periudhë të vitit të kaluar, ku ishin raportuar 65 raste.

Sipas të dhënave të institutit, vatrat kryesore të infeksionit mbeten Prishtina me 33 raste dhe Fushë-Kosova me 25 raste, të ndjekura nga Ferizaj me 12 dhe Kaçaniku me 7 raste. Rastet e tjera janë shpërndarë në numër më të vogël në komunat si Drenas, Lipjan, Obiliq, Gjilan, Skenderaj, Shtime, Vushtrri, Deçan, Graçanicë, Podujevë, Shtërpcë dhe Viti.

Për shkak të shkallës së lartë të infektueshmërisë dhe rrezikut nga komplikimet e mundshme, IKShPK u ka bërë thirrje të gjithë prindërve dhe kujdestarëve që të verifikojnë kartelat e vaksinimit dhe të sigurojnë imunizimin e fëmijëve në Qendrat e Mjekësisë Familjare sipas kalendarit të rregullt. Po ashtu, instituti u bën apel qytetarëve që me shfaqjen e simptomave të para — si temperaturë e lartë, skuqje në lëkurë, kollë apo rrufë — të paraqiten menjëherë për kontroll në institucionet shëndetësore. /E.A/

Drejtoria e Inspektoratit e Kryeqytetit ka njoftuar se asnjë objekt nuk do të lejohet të vihet në përdorim pa kaluar inspektimin final dhe pa u pajisur me certifikatën e përdorimit, duke paralajmëruar masa të rrepta ndaj shkelësve.

Sipas njoftimit, masa vlen për të gjitha objektet që janë në kompetencë të Inspektoratit të Ndërtimit të Kryeqytetit, përfshirë shtëpitë individuale, ndërtesat kolektive të banimit, objektet banesore-afariste, objektet afariste, industriale dhe publike.

Komuna thekson se, në përputhje me Ligjin për Ndërtim, përdorimi i një objekti lejohet vetëm pasi organi kompetent të kryejë inspektimin final dhe të lëshojë certifikatën e përdorimit, e cila dëshmon se objekti është ndërtuar sipas lejes ndërtimore, projektit të miratuar dhe standardeve të sigurisë.

Drejtoria e Inspektoratit ka bërë të ditur se investitorët do të njoftohen individualisht, para përfundimit të punimeve, përmes një urdhërese inspektuese. Me këtë urdhëresë ata do të obligohen të mos e vënë objektin në përdorim, të mos ua dorëzojnë banesat apo lokalet blerësve dhe të mos lejojnë vendosjen e banorëve apo fillimin e aktiviteteve ekonomike deri në përfundimin e procedurës së inspektimit dhe pajisjen me certifikatën përkatëse.

Njëkohësisht, qytetarëve u është bërë thirrje që të mos pranojnë në dorëzim banesa, lokale afariste apo objekte të tjera pa certifikatën e përdorimit, pasi një objekt i tillë nuk konsiderohet i verifikuar zyrtarisht për përmbushjen e kushteve ligjore dhe teknike për përdorim të sigurt.

Komuna paralajmëron se ndaj atyre që shkelin këto dispozita do të ndërmerren të gjitha masat e parashikuara me ligj. Këto përfshijnë ndërprerjen e menjëhershme të përdorimit të objektit, urdhërimin për lirimin e tij deri në pajisjen me certifikatë të përdorimit, shqiptimin e gjobave administrative, si dhe inicimin e procedurave të tjera ligjore dhe administrative.

Në fund të njoftimit, Drejtoria e Inspektoratit thekson se inspektimi final dhe certifikata e përdorimit nuk janë vetëm formalitete administrative, por mekanizma ligjorë që garantojnë sigurinë e qytetarëve. Për këtë arsye, thuhet se nuk do të tolerohet vënia në përdorim e asnjë objekti që nuk i plotëson kërkesat ligjore.

D.L

Partia Demokratike e Kosovës (PDK) dhe Aleanca për Ardhmërinë e Kosovës (AAK) kanë konfirmuar se kanë pranuar ftesë për takim nga kryeministri në detyrë, Albin Kurti.

Mirëpo, nga të dyja këto subjekte politike nuk është bërë ende e ditur nëse do t’i përgjigjen pozitivisht ftesës për të marrë pjesë në takimin e thirrur. Nga ana tjetër, Lidhja Demokratike e Kosovës (LDK) nuk ka dhënë ndonjë deklaratë apo përgjigje lidhur me këtë çështje.

Paralajmërimi për këto konsultime erdhi gjatë ditës së sotme nga ministrja në detyrë e Industrisë, Ndërmarrësisë dhe Tregtisë, Mimoza Kusari-Lila, e cila bëri të ditur se kryetari i Lëvizjes Vetëvendosje pritet t’u dërgojë ftesa partive parlamentare për të diskutuar rreth formimit të institucioneve të reja dhe zgjedhjes së presidentit. Po ashtu, vetë Kurti ka lënë të kuptohet se gjatë kësaj jave mund të ketë lëvizje konkrete drejt një marrëveshjeje të mundshme me LDK-në.

Këto zhvillime politike vijnë në prag të seancës konstituive për inaugurimin e legjislaturës së 11-të të Kuvendit të Kosovës, e cila është caktuar të mbajë punimet më 6 gusht. /E.A/