Basketbollistja ukrainase Kate Koval ka vendosur të largohet nga programi i basketbollit të Universitetit Shtetëror të Luizianës (LSU), pasi ekipi transferoi lojtaren ruse Anna Minaeva.

Pas vetëm një sezoni në ekipin amerikan, 20-vjeçarja u largua fillimisht për “arsye personale”. Megjithatë, përmes një reagimi në Instagram, Koval bëri të ditur se pas vendimit të saj qëndron lufta në Ukrainë dhe ndikimi i drejtpërdrejtë që ka pasur pushtimi rus në familjen e saj.

“Babai im shërben në ushtrinë ukrainase dhe është jashtëzakonisht krenar që mbron vendin e tij nga agresioni rus”, shkroi Koval.

Ajo tregoi se lufta nuk është diçka e largët për të, pasi njerëz të afërt me të janë vrarë dhe plagosur nga sulmet ruse, ndërsa vendet ku është rritur dhe ku ka nisur të luajë basketboll janë shkatërruar.

Koval, e cila pritej të ishte një nga lojtaret kryesore të LSU-së në sezonin e ri, tha se vendimi për t’u larguar nuk ishte i lehtë.

“E kuptoj dhe e respektoj që vendimet për skuadrën janë pjesë e basketbollit universitar. Por unë duhet të qëndroj besnike ndaj vetes, vlerave të mia dhe vendit tim”, u shpreh ajo.

Afati i transferimeve tashmë ka përfunduar, por Koval shpreson që NCAA ta marrë parasysh situatën e saj dhe t’i lejojë të transferohet në një universitet tjetër për sezonin e ardhshëm.

“Ndjeva se gjeta një shtëpi në LSU dhe jam jashtëzakonisht mirënjohëse për bashkëlojtaret, trajnerët, stafin, profesorët dhe gjithë komunitetin e LSU-së”, tha basketbollistja ukrainase.

Koval sezonin e kaluar regjistroi mesatarisht 8.3 pikë për ndeshje në basketbollin universitar amerikan dhe ka edhe dy vite të mbetura në NCAA.

D.L

Flamuri i Kosovës u ngrit për herë të tretë në ceremoninë mbyllëse të Lojërave Mesdhetare “Taranto 2026”, duke shënuar edhe dorëzimin simbolik të organizimit të edicionit të ardhshëm, i cili do të mbahet në Prishtinë në vitin 2030.

Gjatë Lojërave Mesdhetare “Taranto 2026”, flamuri i Kosovës ishte ngritur në shtizën më të lartë edhe dy herë të tjera, falë medaljeve të arta të fituara nga boksierja Donjeta Sadiku dhe karateisti Islam Selmani.

Në ceremoninë mbyllëse, e cila u mbajt të enjten mbrëma në Taranto, flamuri gjigant i Kosovës u vendos përkrah flamurit të Komitetit Ndërkombëtar të Lojërave Mesdhetare dhe atij të Italisë, nikoqires së këtij edicioni.

Kosova e përmbylli pjesëmarrjen në “Taranto 2026” me gjithsej nëntë medalje: dy të arta, tri të argjendta dhe katër të bronzta.

Ceremonia mbyllëse nisi me program muzikor dhe vazhdoi me parakalimin e sportistëve pjesëmarrës. Flamurin e Kosovës në këtë ceremoni e bartën karateisti Islam Selmani dhe karateistja Fortesa Orana.

Pas parakalimit të sportistëve, u zhvillua ceremonia e pranimit të flamurit të Lojërave Mesdhetare “Prishtina 2030”. Flamuri i Kosovës u pranua me nderime shtetërore dhe u vendos përkrah flamurit të Komitetit Ndërkombëtar të Lojërave Mesdhetare dhe atij të Italisë.

Pas ngritjes së flamurit në shtizë, u intonua himni i Republikës së Kosovës, i cili u përcoll me duartrokitje të mëdha nga të pranishmit.

Flamurin e Lojërave Mesdhetare “Prishtina 2030” e pranoi delegacioni i Kosovës, i udhëhequr nga kryetari i Komunës së Prishtinës, Përparim Rama.

Prishtina do të jetë nikoqire e Lojërave Mesdhetare në vitin 2030, në atë që pritet të jetë ngjarja më e madhe sportive e organizuar ndonjëherë në Kosovë.

Vendimi që Lojërat Mesdhetare të vitit 2030 të mbahen në Prishtinë u mor më 8 shtator 2023, në Heraklion të Greqisë. Organizimi i këtij eventi do të kërkojë investime të mëdha në infrastrukturën sportive dhe në fusha të tjera, me synim që Prishtina dhe Kosova të jenë të gatshme për të mirëpritur mijëra sportistë dhe delegacione nga vendet e rajonit të Mesdheut.

Përgjatë katër viteve të ardhshme pritet të investohen miliona euro në infrastrukturë sportive dhe në përgatitjet e nevojshme për organizimin e Lojërave.

Pjesëmarrja në “Taranto 2026” ishte paraqitja e tretë e Kosovës në Lojërat Mesdhetare. Kosova garoi me 163 sportistë, ndërsa nëntë prej tyre arritën të fitojnë medalje, duke vendosur rekord të ri për vendin.

Në debutimin e saj në Lojërat Mesdhetare, në “Tarragona 2018”, Kosova fitoi katër medalje. Në “Oran 2022”, numri u rrit në gjashtë, ndërsa në “Taranto 2026” sportistët kosovarë e çuan bilancin në nëntë medalje.

Pas përfundimit të “Taranto 2026”, vëmendja tashmë zhvendoset te Prishtina, e cila pas katër vjetësh do të mirëpresë një nga ngjarjet më të mëdha sportive ndërkombëtare të zhvilluara në Kosovë.

D.L

Kosova e ka mbyllur pjesëmarrjen në Lojërat Mesdhetare “Taranto 2026” me nëntë medalje, duke regjistruar paraqitjen më të suksesshme në historinë e saj në këtë ngjarje.

Bilanci i Kosovës përbëhet nga dy medalje të arta, tri të argjendta dhe katër të bronzta.

Medaljet e arta u fituan nga boksierja Donjeta Sadiku dhe karateisti Islam Selmani. Medaljet e argjendta i siguruan xhudistja Laura Fazliu dhe peshëngritësi Kianoush Rostami, i cili fitoi dy medalje të argjendta.

Ndërkaq, medaljet e bronzta i fituan xhudistët Akil Gjakova, Shpati Zekaj, Fatjona Kasapi dhe Flaka Loxha.

Me këtë bilanc, Kosova ka thyer rekordin e saj të mëparshëm në Lojërat Mesdhetare. Në “Tarragona 2018” kishte fituar katër medalje, ndërsa në “Oran 2022” gjashtë.

Nëntë medaljet e fituara në Taranto konsiderohen sukses për Komitetin Olimpik të Kosovës, ndonëse pritshmëritë ishin më të mëdha edhe në disa sporte të tjera. Rezultate më të mira priteshin në taekwondo, atletikë, si dhe në sportet ekipore, përfshirë futbollin, basketbollin 3×3, hendbollin dhe volejbollin e meshkujve.

Kosova garoi në “Taranto 2026” me një delegacion të gjerë sportistësh, ndërsa në fund arriti të vendosë një rekord të ri sa i përket numrit të medaljeve të fituara në Lojërat Mesdhetare.

Të enjten mbrëma do të mbahet ceremonia e mbylljes së Lojërave Mesdhetare, ku flamuri do t’i dorëzohet Kosovës si nikoqire e edicionit të ardhshëm, “Prishtina 2030”.

D.L

Federata e Futbollit e Kosovës (FFK) ka pranuar një letër falënderimi dhe vlerësimi nga Shefi i Zhvillimit Global të Futbollit në FIFA, Arsène Wenger.

Në letrën drejtuar presidentit të FFK-së, Wenger ka vlerësuar lart angazhimin, përkushtimin dhe bashkëpunimin e federatës kosovare në procesin e themelimit të “FIFA Talent Academy Kosova”.

Wenger ka theksuar se përkushtimi i FFK-së ka qenë thelbësor në avancimin e kësaj nisme, ndërsa eventin e mbajtur në Prishtinë e ka cilësuar si një dëshmi të profesionalizmit, organizimit dhe pasionit për zhvillimin e futbollit.

“Eventi historik i mbajtur në Prishtinë është dëshmi e profesionalizmit tuaj, përsosmërisë organizative dhe pasionit për zhvillimin e futbollit”, ka shkruar Wenger.

Ai ka vlerësuar gjithashtu mbështetjen dhe burimet e ofruara nga FFK-ja gjatë gjithë procesit, duke nënvizuar rolin e Kosovës në zhvillimin dhe kultivimin e talenteve të rinj.

Sipas Wengerit, kjo nismë mund të shërbejë edhe si standard për vendet e tjera, ndërsa FIFA pret që partneriteti me FFK-në të forcohet edhe më tej.

“Me kënaqësi presim që ta forcojmë edhe më tej partneritetin tonë, ndërsa ecim përpara në këtë kapitull të ri dhe emocionues. Së bashku, mund të vazhdojmë të ndërtojmë një trashëgimi të qëndrueshme për futbollin në Kosovë dhe më gjerë”, thuhet në letrën e tij.

Në fund të letrës, Wenger ka falënderuar FFK-në për kontributin e saj në krijimin e mundësive për talentet e rinj në Kosovë.

D.L