Kurti: Ndryshimet në ligj janë të ngutshme, por LVV-ja do t’i mbështesë

LDK: Nuk mund të bëhemi pjesë e kësaj nisme

Deputetja e LDK-së, Jehona Lushaku-Sadriu, tha se partia e saj nuk mund të bëhet pjesë e nismës për ndryshimin e Ligjit për Dhomat e Specializuara.

Jehona Lushaku-Sadriu, tha se për partinë e saj lufta e UÇK-së “ka qenë e shenjtë”, por ngriti pikëpyetje për efektin juridik të ndryshimeve të propozuara në Ligjin për Dhomat e Specializuara.

Ajo tha se miratimi i ndryshimeve nga Kuvendi nuk garanton zbatimin e tyre.

“Kjo nismë mund të mos prodhojë efekt juridik”, tha Lushaku-Sadriu, duke paralajmëruar se pasojat mund t’i mbeten shtetit të Kosovës.

Sipas saj, për LDK-në, rruga për ndryshimin e një aktgjykimi të Dhomave të Specializuara është ajo gjyqësore, përmes procesit të apelit.

Hamza kërkon qëndrim unik të partive për Specialen

Kryetari i Partisë Demokratike të Kosovës (PDK), Bedri Hamza, ka kërkuar nga të gjitha subjektet politike në Kuvend që të jenë në një linjë lidhur me procesin e ndryshimit të Ligjit për Dhomat e Specializuara, duke theksuar se kjo nismë shkon përtej interesave partiake.

Gjatë fjalës së tij në Kuvend, kreu i PDK-së ngriti shqetësime për mënyrën se si po funksionon Gjykata Speciale në Hagë.

“Kemi pritur që me i dhënë mundësinë kësaj gjykate të japë vendim mbi bazën e fakteve dhe argumenteve, dhe jo mbi bazën e thashethemeve. Kjo gjykatë nuk i ka dhënë askujt llogari”, tha Hamza, duke kërkuar që Kuvendi të përdorë mekanizmat mbikëqyrës ndaj saj.

Hamza nënvizoi se lufta e UÇK-së ishte përpjekje gjithëpopullore për çlirim dhe iu bëri thirrje deputetëve për unitet në votimin e këtij projektligji.

“Këtu sot jam me ju që të kemi qëndrim unik në votimin e këtij projektligji. Nuk është ligj i një partie politike, është ligj që shkon përtej një mandati politik. Organizimi i UÇK-së ka qenë për çlirimin e vendit. Ju lus me mirësjellje që të jemi unikë në këtë proces”, deklaroi kryetari i PDK-së.

Nagavci: LVV do t’i mbështesë ndryshimet në Ligjin për Specialen

Shefja e Grupit Parlamentar të Lëvizjes Vetëvendosje, Arbërie Nagavci, ka deklaruar në Kuvend se LVV-ja do t’i mbështesë ndryshimet e propozuara në Ligjin për Dhomat e Specializuara. Nagavci rikujtoi se Vetëvendosje ka qenë kundër krijimit të kësaj gjykate që nga fillimi dhe vazhdon të mbajë të njëjtin qëndrim edhe sot, duke e cilësuar reagimin e partive të tjera pas 11 vitesh si të vonuar.

Pavarësisht kësaj, ajo theksoi se çështja është dashur të zgjidhej me më shumë largpamësi që në vitin 2015, kur ligji u miratua nga shumica e atëhershme parlamentare. Nagavci nënvizoi se, nëse vetë subjektet që mbështetën themelimin e Speciales sot kërkojnë ndryshimin e saj, LVV-ja do ta japë mbështetjen e saj në votim.

Gruda: Projektligji i heq Speciales juridiksionin për krimet e luftës

Deputeti i PDK-së dhe propozuesi i projektligjit, Përparim Gruda, ka deklaruar para Kuvendit se Dhomat e Specializuara u themeluan fillimisht mbi pretendimet për trafikim organesh, por proceset gjyqësore në Hagë provuan se akuza të tilla nuk kanë ekzistuar.

Gruda sqaroi se ndryshimet e propozuara nuk e mbyllin Gjykatën Speciale, por synojnë t’i kufizojnë një pjesë të juridiksionit, veçanërisht atë që lidhet me krimet e luftës. Sipas tij, gjykata nuk duhet të merret me raste që dalin jashtë qëllimit primar mbi të cilin ajo u krijua.

Ai argumentoi se struktura aktuale e gjykatës ka tejkaluar qëllimin primar për të cilin u krijua, duke u marrë me raste që nuk lidhen me bazën mbi të cilën u miratua fillimisht ky institucion.

Nis seanca e Kuvendit, pika e parë ndryshimet për Gjykatën Speciale

Me më shumë se një orë vonesë, ka nisur seanca plenare e Kuvendit të Kosovës, ku pas verifikimit të kuorumit u konstatua prania e 101 deputetëve në sallë.

Pika e parë e rendit të ditës është shqyrtimi i Projektligjit për ndryshimin e Ligjit për Dhomat e Specializuara, nismë kjo që ka marrë vëmendjen kryesore të zhvillimeve politike sot.

Komisioni për Legjislacion miraton ndryshimet për Specialen

Komisioni për Legjislacion ka miratuar të hënën, në një mbledhje urgjente para seancës plenare, Projektligjin për ndryshimin e Ligjit për Dhomat e Specializuara të Kosovës. Dokumenti u votua njëzëri nga 9 deputetët e pranishëm, pa asnjë votë kundër dhe pa asnjë abstenim.

Gjatë arsyetimit të nismës, deputeti i Partisë Demokratike të Kosovës (PDK), Përparim Gruda, theksoi se përmes këtij ndryshimi të ligjit të zakonshëm synohet t’i hiqet një pjesë e juridiksionit Gjykatës Speciale, konkretisht ajo e krimeve të luftës, pa prekur Kushtetutën apo detyrimet ndërkombëtare.

Kryetari i Komisionit, Vigan Qorolli, konfirmoi mbështetjen e deputetëve të Lëvizjes Vetëvendosje (LVV), duke cilësuar se lufta e UÇK-së është pjesa më e lavdishme e historisë dhe se katër krerët e saj duhet të prezumohen të pafajshëm.

Ndërkaq, Besnik Tahiri nga Aleanca për Ardhmërinë e Kosovës (AAK) vlerësoi se procesi gjashtëvjeçar dëshmoi se qëllimi i themelimit të kësaj gjykate është tejkaluar, duke shtuar se ligjet nuk janë të pandryshueshme dhe institucionet duhet të reflektojnë sipas nevojave të kohës. /E.A/