Bota

Kinë: Pse kjo gjeneratë e të rinjve nuk dëshiron të ketë fëmijë?

Published

4 years ago

May 25, 2021

Betim Gashi

Një regjistrim i popullsisë ka treguar se lindjet në Kinë kanë rënë në nivelin më të ulët që nga vitet 1960 – duke bërë thirrje për t’i dhënë fund politikave të kontrollit të lindjeve. Por disa në Kinë thonë se këto politika nuk janë e vetmja gjë që i ndalon ato.

Shumë prej tyre nuk planifikojnë të kenë fëmijë së shpejti, pasi që dëshirojnë të jetojnë jetën e tyre pa shqetësimet e vazhdueshme për të rritur një fëmijë.

“Unë kam shumë pak bashkëmoshatarë që kanë fëmijë, dhe prej atyre që kanë fëmijë, janë të fiksuar rreth përzgjedhjes së dados më të mirë ose regjistrimit të fëmijëve në shkollat më të mira. Duket lodhëse”, u shpreh një e sapomartuar, kur u pyet rreth kësaj.

Të dhënat shqetësuese

Regjistrimi i Kinës, i lëshuar në fillim të këtij muaji, tregoi se rreth 12 milionë foshnje kanë lindur vitin e kaluar – një rënie e konsiderueshme nga 18 milionë në vitin 2016, dhe numri më i ulët i lindjeve të regjistruara nga vitet 1960.

Popullsia në tkurrje është problematike për shkak të strukturës së përmbysur të moshës, me më shumë njerëz të moshuar sesa të rinj. Kur kjo të ndodhë, nuk do të ketë mjaft punëtorë në të ardhmen për të mbështetur të moshuarit dhe mund të ketë një kërkesë të shtuar për kujdes shëndetësor dhe social.

Çekuilibri i rëndë gjinor

Ekspertët thonë se situata e Kinës mund të përkeqësohet duke pasur parasysh numrin e burrave që e kanë të vështirë të gjejnë një grua në radhë të parë, e lëre më të krijojnë një familje. Mbi të gjitha, ekziston një çekuilibër i rëndë gjinor në vend – vitin e kaluar, kishte 34.9 milionë më shumë meshkuj sesa femra.

Kjo është pasojë e politikës së rreptë të vendit për të lindur vetëm një fëmijë që u prezantua në vitin 1979 për të ngadalësuar rritjen e popullsisë.

Në një kulturë që historikisht favorizon djemtë mbi vajzat, politika çoi në aborte të detyruara dhe një raport të tepërt të djemve të sapolindur nga vitet 1980 e këtej.

“Kjo paraqet probleme për tregun e martesave, veçanërisht për burrat me më pak burime socio-ekonomike”, tha Dr Mu Zheng, nga departamenti i sociologjisë i Universitetit të Singaporit.

Ekspertët thonë se kjo është gjithashtu sepse zbutja e politikës nuk erdhi me ndryshime që mbështesin jetën familjare – të tilla si mbështetja monetare për arsimimin ose qasjen në objektet e kujdesit për fëmijët. Shumë njerëz thjesht nuk kanë mundësi të rrisin për shkak të kostos së jetesës, thonë ata.

“Mosdashja e njerëzve për të pasur fëmijë nuk qëndron në procesin e lindjes së fëmijëve, por ajo që vjen pas”, tha Dr Mu.

Ajo shtoi se nocioni i asaj që e bën një person të suksesshëm ka ndryshuar edhe në Kinë – të paktën për ata që jetojnë në qytete të mëdha. Nuk përcaktohet më nga shënjuesit tradicionalë në jetë siç është martesa dhe lindja e fëmijëve – përkundrazi, kjo ka të bëjë me rritjen personale.

“Frika mund të ndikojë që gratë të mos kenë dëshirë të kenë fëmijë sepse mendojnë se kjo mund të zvogëlojë perspektivat e tyre të karrierës”, tha Dr. Mu.

Në mediat sociale kineze, kjo është një temë e ‘nxehtë’, hashtag-u “Pse kjo gjeneratë e të rinjve nuk dëshiron të ketë fëmijë?” është lexuar më shumë se 440 milionë herë në platformën e mikroblogjeve Weibo.

“Realiteti është se nuk ka shumë punë të mira për gratë, dhe gratë që kanë punë të mira do të të bëjnë gjithçka që duhet për t’i mbajtur ato. Kush do të guxonte të kishte fëmijë në këtë situatë?”, u shpreh një person./UBTNews

(Arjeta Ibishi, Media dhe Komunikim)

Bota

Kuba goditet nga një tërmet me magnitudë 5.9, s’ka raportime për dëme

Published

39 minutes ago

December 23, 2024

UBT NEWS

Një tërmet me magnitudë 5.9 goditi Kubën të hënën, sipas Qendrës Sizmologjike Evropiane-Mesdhetare (EMSC). Autoritetet lokale kanë njoftuar se nuk ka pasur dëme serioze dhe nuk ka raporte për të vdekur apo të lënduar. Tërmeti u regjistrua në një thellësi prej 25 km (15.53 milje). Shërbimi Sizmologjik Kombëtar Kuban e ka raportuar ngjarjen si një tërmet me magnitudë 6.1 ballë, me pasgoditje të shumta në orët e para të mëngjesit, të ndodhura në brigjet lindore të Santiago de Kubës.

Në muajin nëntor, një tërmet me magnitudë 6.9 goditi brigjet e provincës fqinje Granma, duke shkaktuar disa dëme strukturore, por pa viktima. Zona e Santiago de Kubës është e njohur për aktivitetin sizmik, pasi aty kalon një vijë thyerje që ndan pllakën e Amerikës së Veriut dhe pllakën e Karaibeve. Kryeqyteti kuban, Havana, nuk është prekur nga tërmeti./UBTNews/

Bota

Shefi i NATO-s i shqetësuar për sigurinë afatgjate të aleancës

Published

1 hour ago

December 23, 2024

UBTnews

Sekretari i Përgjithshëm i NATO-s, Mark Rutte, ka thënë se aktualisht nuk sheh rrezik të ndonjë sulmi rus në territorin e aleancës, mirëpo e sheh të ardhmen me shqetësim.

“Nuk ka vend për frikë tani”, ka thënë ai në një intervistë për agjencinë e lajmeve dpa, i pyetur nëse vendet e NATO-s duhet të frikësohen nga Rusia, mirëpo ka shtuar se “nëse nuk shpenzojmë më shumë dhe nuk prodhojmë më shumë, do të kemi problem serioz në katër, pesë vjet”.

Rusia e ka zgjeruar në masë të madhe prodhimin për qëllime të mbrojtjes, pas nisjes së luftës në Ukrainë.

Sipas Ruttes, aleatët e NATO-s nuk janë duke bërë shumë për ta luftuar këtë gjë.

“Na duhet ta rrisim prodhimin për mbrojtje, bazën industriale të mbrojtjes”, ka thënë ai.

“Duhet krijuar linja të reja prodhimi, ndërrime shtesë, sepse nuk jemi duke prodhuar mjaftueshëm pajisje ushtarake për t’u mbrojtur në afat të gjatë”.

Rutte pret edhe presion prej presidentit të zgjedhur amerikan, Donald Trump, i cili ka kërcënuar me tërheqje prej NATO-s përgjatë mandatit të parë, nëse aleatët nuk shpenzojnë për mbrojtje 2 për qind të bruto prodhimit të brendshëm.

“Ai do të kërkojë që të bëjmë më shumë. Dhe ka të drejtë. Duhet të bëjmë më shumë”, ka thënë Rutte.

“Aleatët e NATO-s janë të përkushtuar që të investojnë 2 për qind të bruto prodhimit të brendshëm në mbrojtje. Dhe shumë vende evropiane tani e kanë arritur atë synim”, ka thënë Rutte.

Megjithatë, ai ka thënë se sheh problem në mbrojtje kundër Rusisë, nëse nuk rriten shpenzimet edhe më shumë.

Rutte nuk ka thënë nëse aleatët e NATO-s duhet të shpenzojmë 3 për qind të bruto prodhimit të brendshëm, apo edhe më shumë.

Vendimi për shpenzime pritet të merret në samitin e radhës të aleancës, që do të mbahet në qershor.

Përgjatë fushatës zgjedhore në SHBA, Trump pati thënë se e konsideron të domosdoshme që vendet anëtare të aleancës të shpenzojnë 3 për qind të buxhetit të tyre.

Ka raportime që Trump mund ta rrisë kërkesën në 5 për qind./REL/

Bota

Sulmi në tregun e Krishtlindjes, rritet presioni ndaj autoriteteve gjermane

Published

1 hour ago

December 23, 2024

UBTnews

Ministrja e Brendshme e landit të Saksonisë Anhalt ka mbrojtur masat e sigurisë të marra në Magdeburg, pak ditë pasi një person vërshoi me makinë në tregun e Krishtlindjes duke vrarë 5 persona dhe plagosur rreth 200 të tjerë. Ministrja tha se prania e policisë kishte qenë e lartë në mbarë rajonin.

“Policia bëri përgatitje intensive për të siguruar tregun e Krishtlindjes në të gjithë shtetin. Në Magdeburg në veçanti ne ushtruam të gjitha të drejtat ligjore për kontrolle rutinë të valixheve dhe çantave të shpinës në tregun e Krishtlindjes, për të parandaluar aksesin me armë apo thika”, tha Tamara Zieschang, ministre e Brendshme e landit të Saksonisë Anhalt.

I dyshuari, i njohur vetëm si Taleb A., është një shtetas saudit që u zhvendos në Gjermani në 2006-n. Ai akuzohet për vrasje dhe tentativë vrasjeje.

Por autoritetet gjermane tani ndodhen nën presion për të sqaruar përse nuk vepruan më shpejt pas informacioneve që kishin marrë mbi të vitin e kaluar.

Kreu i Policisë Kriminale Federale pranoi marrjen e informacioneve nga Arabia Saudite dhe theksoi se mori ndaj të dyshuarit masat e duhura hetimore. Por ai shtoi se të dhënat nuk ishin specifike.

“Ai nuk njihej për akte të dhunshme, gjë që do të përbënte një sinjal alarmi. Në këtë aspekt unë besoj se do të na duhet të kontrollojmë sërish për të verifikuar nëse ndonjë detaj na shpëtoi nga duart”, u shpreh Holger Münch, shef i Policisë Kriminale Federale.

Edhe Zyra Federale për Emigracionin dhe Refugjatët tha se kishte marrë të dhëna për të dyshuarin verën e vitit të kaluar, por insistoi se nuk është një autoritet hetimor dhe se ia kishte kaluar informacionin zyrtarëve përgjegjës.

Ndërkohë, tregu i Krishtlindjes në Magdeburg është hapur sërish, me një prani policore të shtuar.

Bota

Franca mban ditë zie për vdekjet nga cikloni Mayotte

Published

2 hours ago

December 23, 2024

UBTnews

Franca po mban një ditë zie kombëtare pasi cikloni Chido shkatërroi territorin e saj në Oqeanin Indian të Mayotte në fillim të këtij muaji.

Presidenti francez Emmanuel Macron drejtoi homazhet e së hënës duke mbajtur një minutë heshtje për viktimat e stuhisë.

Ai bëri thirrje për përkujtim mbarëkombëtar gjatë vizitës së tij në ishull javën e kaluar, ku u përballë me kritikat e disa banorëve të ishullit që kritikuan shpërndarjen e ngadaltë të ndihmës.

Dyshohet se qindra, ndoshta mijëra njerëz vdiqën kur Chido zbarkoi në brigjet juglindore të Afrikës më 14 dhjetor, duke sjellë erëra deri në 260 km/h (160 mph) dhe 250 mm reshje në 24 orët e para.

Duke folur pasi u mbajt një minutë heshtje, kryeministri francez François Bayrou tha se ishte “simbol i solidaritetit tonë me të gjithë ata që po vuajnë”.

“Është një angazhim për të siguruar që komuniteti kombëtar është i pranishëm, për të rindërtuar Mayotte dhe për të siguruar që njerëzit e Mayotte të ndjehen të rrethuar nga një vend i tërë,” shtoi ai.

Flamujt u ulën në gjysmështizë në shenjë solidariteti në qytetet franceze, përfshirë Parisin, Marsejën dhe Lionin.

Momenti i heshtjes është vërejtur edhe në Mayotte, ku më shumë se një javë pas stuhisë, të mbijetuarit po përballen me vështirësi pa ujë, komunikim dhe energji elektrike, ndërsa ekipet e shpëtimit përpiqen të ofrojnë ndihmën e nevojshme urgjente.