Prokuroria Speciale e Republikës së Kosovës (PSRK) në bashkëpunim me Krimet Ekonomike të Policisë së Kosovës janë duke zhvilluar një aksion në ndërmarrjen publike regjionale të pastrimit “Ekoregjioni” në Prizren.

Veprat penale për të cilat është duke u zhvilluar aksioni janë “Keqpërdorim i detyrës apo autoritetit zyrtar” dhe “Mashtrim me prokurim publik”.

Aksionin e ka konfirmuar për “Betimi për Drejtësi”, zëdhënësja e PSRK-së, Arbnorë Luta.

“Betimi për Drejtësi” merr vesh se janë duke u kryer bastisje në zyrat e kësaj ndërmarrjeje në Prizren./BetimipërDrejtësi

Në Qendrën e Numërimit dhe Rezultateve është duke vazhduar numërimi i fletëvotimeve sipas listës së vendvotimeve për të cilat KQZ-ja ka marrë vendim për rinumërim.

Nga fillimi i procesit më 13 janar 2026 dhe deri sot, 26 janar, janë rinumëruar 1.729 vendvotime nga gjithsej 2.557, që përbën 67.62% të totalit të votave.

Bazuar në këto rezultate, LVV ka marrë 47.04% të votave, PDK 22.70%, LDK 11.42% dhe AAK 5.94%.

Qendra e Menaxhimit Kufitar e Kosovës ka njoftuar se shoqata e transportuesve nga Maqedonia e Veriut do të organizojë sot një protestë, e cila pritet të nisë nga ora 12:00. Ndërprerje të qarkullimit të kamionëve, në të gjitha pikat kufitare do të ketë edhe me Serbinë, si pasojë e masave të ndërmarra nga BE për shoferët e kamionëve të rajonit. Sipas njoftimit protesta do të mbahet në territorin e Serbisë dhe mund të zgjasë shtatë ditë.

Si pasojë e këtyre protestave, autoritetet kanë paralajmëruar se do të ketë ndalim të qarkullimit për transportuesit e mallrave, çka mund të shkaktojë vonesa dhe vështirësi në qarkullimin kufitar me Kosovën.

“Protesta do të mbahet në territorin e Republikës së Maqedonisë së Veriut, ndërsa në territorin e Republikës së Kosovës mund të krijohen kolona të gjata kamionësh, të cilët do të presin për të kaluar në territorin e Republikës së Maqedonisë së Veriut”, thuhet në njoftimin zyrtar.

Aty thuhet po ashtu se shoqatat e transportit të mallrave ose shoferët e kamionëve mund të mbajnë kontakte me homologët e tyre ose kolegët e tyre në rajon.

“Për çdo informatë shtesë kontaktoni QKMK, në numrat +38345198000, +38345198606 dhe në nr pa pagesë 080050095.”

Minatorët e ndërrimit të dytë të Trepçës kanë dalë nga miniera para rreth tri orësh, pasi kishin qëndruar të ngujuar përreth 7 orë.

Ngjarja kishte ndodhur si pasojë e një defekti në furnizimin me energji elektrike, i cili kishte pamundësuar daljen e tyre nga miniera.

Dhjetëra minatorë të Trepçës kanë mbetur të ngujuar qindra metra nën tokë.

Dhjetëra minatorë që kanë përfunduar ndërrimin e dytë, s’kanë mundur të dalin nga Miniera.

Kryetari i Sindikatës së Minatorëve, Ibrahim Januzi ka deklaruar se ende nuk ka informata të plota për situatën.

“Për shkak të një defekti në energji elektrike ka mbetur i ngujuar ndërrimi i dytë. Nuk kam shumë informata, sepse ende nuk jam njoftuar nga askush. Edhe unë këtë e kam kuptuar nga lajmet”, ka thënë ai.

Ndërkaq, sipas portaalit “Jepi zë”, minatorët e ndërrimit të dytë janë ngujuar në horizontet 10, 9 dhe 8.

Kujtojmë se para disa ditësh ngjashëm, si pasojë e ndërprerjes së energjisë, pesë pompistë kujdestarë kishin mbetur të ngujuar për rreth 8 deri në 9 orë.