Presidenti ukrainas Volodymy Zelensky ka deklaruar sot në Oslo se plantacionet bërthamore i takojnë vetëm Kievit zyrtar, pasi Departamenti Amerikan i Shtetit ka sugjeruar se kontrolli amerikan i termocentraleve të Ukrainës mund të nënkuptojë më pak sulme nga Rusia.

Zëdhënësja e DASH-it, Tammy Bruce, ka adresuar mbrëmë sugjerimin e Shtëpisë së Bardhë, se Ukraina mund të përfitojë nga marrja e “pronësisë” së Shteteve të Bashkuara të pjesëve të infrastrukturës energjetike të Ukrainës, duke nënkuptuar se Rusia mund të hezitonte të sulmonte një termocentral nëse do të operohej nga inxhinierë amerikanë, transmeton KosovaPress.

Zelensky në reagimin e tij pohoi se të gjitha plantacionet bërthamore i takojnë popullit të Ukrainës.

Ai shtoi se nuk ka diskutuar drejtpërdrejt për pronësinë e plantacioneve, por tha se “nëse (plantacionet bërthamore) nuk i takojnë Ukrainës, nuk do të funksionojnë për askënd”.

Zelensky njoftoi se Ukraina dhe zyrtarët amerikanë do të takohen në Arabinë Saudite të hënën, ndonëse do të jenë ndarë nga bisedimet mes zyrtarëve rusë dhe amerikanë. Ndërsa në lidhje me territorin e okupuar të Krimesë, ai tha se është pjesë e pandashme e Ukrainës.

Krimea njihet ndërkombëtarisht si pjesë e Ukrainës, pavarësisht pushtimit dhe aneksimit të pretenduar nga Rusia në 2014.

Po ashtu, ai shprehu se është një “dhuratë e madhe për Rusinë” që anëtarësimi i Ukrainës në NATO është hequr nga tryeza nga Uashingtoni, pas një vendimi të zyrtarëve amerikanë që përjashtuan pranimin e Kievit në aleancë.

Kryeministri i Kroacisë, Andrej Pllenkoviq, ka deklaruar ditën e some se liderët e Bashkimit Evropian duhet t’i kushtojnë më shumë vëmendje mungesës së stabilitetit në Ballkanin Perëndimor, posaçërisht në Bosnje e Hercegovinë dhe Serbi.

“Duhet ta vëzhgojmë gjendjen në Evropën juglindore, posaçërisht stabilitetin e Bosnje e Hercegovinës dhe situatën në Serbi. Ka kaq shumë ngjarje globale për momentin, është koha që një pjesë e asaj vëmendjeje të fokusohet edhe në një rajon që është treguar shumë i ndezshëm gjatë 35 vjetëve të fundit”, deklaroi Andrej Pllenkoviq para samitit të BE-së në Bruksel.

Ai po i referohej krizës më të rëndë politike në Bosnje që nga përfundimi i luftës së saj 1992-95, e shkaktuar nga lëvizjet separatiste të Republikës Sërpska, pasi lideri i saj, Millorad Dodik, u dënua me një vit burg për shpërfilljen e vendimeve të Përfaqësuesit të Lartë ndërkombëtar.

Kryeministri i Kroacisë gjithashtu iu referua edhe protestave disamujore kundër Qeverisë në Serbi, pas vdekjes së 15 njerëzve nga shembja e një strehe prej betoni në stacionin hekurudhor në Novi Sad në nëntor.

Sipas mediave kroate, kryeministri deklaroi në Bruksel se e kupton që në Serbi po përpiqen të kërkojnë probleme diku tjetër, por se ato nuk gjenden në memorandumin e bashkëpunimit në fushën e mbrojtjes, e nënshkruar rishtazi mes Kroacisë, Kosovës dhe Shqipërisë.

Ministrja e Jashtme gjermane Annalena Baerbock rihapi sot ambasadën e vendit të saj në kryeqytetin sirian Damask, pas një mbylljeje 13-vjeçare.

“Ministrja Baerbock rihapi zyrtarisht ambasadën e Berlinit në Damask“, tha në X i dërguari special gjerman për Sirinë, Stefan Schneck.

“Jemi të kënaqur të punojmë ngushtë me të gjithë sirianët për një Siri më të mirë“, shtoi ai.

I dërguari tha se ekipi i punës në ambasadë është “ende i vogël”.

“Çështjet e vizave dhe ato konsullore do të mbeten të menaxhuara nga Bejruti për periudhën e ardhshme“, shtoi ai.

Shumë vende arabe dhe të huaja mbyllën misionet e tyre diplomatike në Siri pas një goditjeje vdekjeprurëse të nisur nga regjimi i rrëzuar i Bashar al-Asadit kundër protestave prodemokratike në vitin 2011.

Assad, udhëheqësi i Sirisë për gati 25 vjet, iku në Rusi pasi grupet anti-regjimit morën kontrollin e Damaskut më 8 dhjetor, duke i dhënë fund regjimit të Partisë Baath, e cila kishte qenë në pushtet që nga viti 1963.

Ahmed al-Sharaa, i cili udhëhoqi forcat kundër regjimit për të rrëzuar Assadin, u shpall president për një periudhë kalimtare në fund të janarit.

Kancelari gjerman, Olaf Scholz i bëri thirrje Rusisë të respektojë angazhimin e saj për një armëpushim të pjesshëm në Ukrainë, ndërsa premtoi mbështetje të vazhdueshme për Kievin për të forcuar pozicionin e saj negociues.

Duke folur para gazetarëve në Bruksel përpara një samiti të liderëve evropianë, Scholz përshëndeti pajtimin e Rusisë për një armëpushim të kufizuar nëpërmjet ndalimit të sulmeve në infrastrukturën energjetike të Ukrainës.

“Tani ka një hap të parë që duket i mundshëm pas bisedimeve mes presidentit rus dhe presidentit të SHBA-së, por ky tani duhet të bëhet realitet dhe të çojë në një armëpushim që vërtet vlen“, tha Scholz.

Kancelari gjerman nënvizoi gjithashtu se vendet anëtare të BE-së do të vazhdojnë mbështetjen e tyre politike dhe ushtarake për Ukrainën, për të forcuar pozicionin e Kievit në negociatat e mundshme të paqes me Moskën.

“Për ne, është thelbësore që Ukraina të mbetet një komb i pavarur, sovran dhe demokratik, që të vazhdojë rrugën e saj drejt BE-së dhe të mbajë një ushtri të fortë edhe pas një marrëveshjeje paqeje. Ne duhet t’i sigurojmë këto rezultate“, theksoi Scholz.