Lexoni pesë kuriozitete. Mund të mos i keni ditur:

1. Zemra e njeriut punon pa u ndalur gjatë gjithë jetës dhe mund të rrahë mbi 3 miliardë herë, duke pompuar gjak në çdo pjesë të trupit.
2. Disa peshq kanë aftësinë të ndryshojnë gjininë gjatë jetës, varësisht nga nevoja e grupit të tyre për riprodhim.
3. Ajri që thithim sot përmban atome që kanë ekzistuar për miliarda vite dhe mund të kenë qenë pjesë e frymës së dinosaurëve.
4. Një rrufe është një shkarkesë elektrike shumë e fuqishme që mund të godasë të njëjtin vend disa herë rresht.
5. Kameleontët nuk ndryshojnë ngjyrë vetëm për t’u fshehur, por edhe për të shprehur emocione si frikë, agresion apo qetësi.

Një person është gjetur pa shenja jete të premten në mëngjes në rrugën “Enver Maloku”, në lagjen “Bregu i Diellit” në Prishtinë.

Lajmin e ka konfirmuar Policia e Kosovës. Zëdhënësi i policisë për rajonin e Prishtinës, Enis Pllana, tha se informata është pranuar rreth orës 08:00.

“Sot rreth orës 08:00 kemi pranuar informatën për një person pa shenja jete në rrugën ‘Enver Maloku’ në Prishtinë. Vdekjen e viktimës e ka konstatuar ekipi mjekësor në vendin e ngjarjes,” deklaroi Pllana.

Ai theksoi se policia, në koordinim me prokurorin e shtetit, ka nisur një hetim mbi vdekjen dhe po vazhdon me ndërmarrjen e të gjitha veprimeve hetimore e të ekzaminimit për sqarimin e plotë të rrethanave të rastit. /E.A/

Policia e Kosovës ka bërë të gjitha përgatitjet operacionale për ruajtjen e rendit dhe sigurisë publike gjatë protestës së lajmëruar nga Organizata e Veteranëve të Luftës të UÇK-së, e cila do të mbahet sot në orën 12:00 në sheshet e Prishtinës.

Përmes një komunikate për media, Policia e Kosovës bën të ditur se e njeh të drejtën e qytetarëve për protestë të qetë e demokratike dhe konfirmon se zyrtarët kompetentë kanë mbajtur tashmë një takim koordinues me përfaqësuesit e OVL-UÇK-së për organizimin dhe masat e sigurisë.

Gjithashtu, policia iu bën thirrje të gjithë pjesëmarrësve që të tregojnë kujdes e maturi, të respektojnë udhëzimet e zyrtarëve policorë, të mos hedhin mjete të forta dhe të mos përdorin maska gjatë protestimit.

Për shkak të lëvizjes së protestuesve, në disa rrugë që shpien drejt shesheve të kryeqytetit mund të ketë kufizime apo ndërprerje të përkohshme të trafikut, ndërsa njësitë patrulluese do të kujdesen për riorientimin e automjeteve në rrugë alternative. /E.A/

Organizata e Veteranëve të Luftës e UÇK-së ka thirrur një protestë gjithëpopullore për sot në orën 12:00 në sheshin “Skënderbeu” në Prishtinë, për të kundërshtuar vendimin dënues të Dhomave të Specializuara ndaj katër ish-udhëheqësve të Shtabit të Përgjithshëm të UÇK-së. Nënkryetari i kësaj organizate, Gazmend Syla, ka bërë të ditur se protesta do të jetë plotësisht paqësore dhe pa persona të maskuar, duke u distancuar nga incidentet e dhunshme që ndodhën pas shpalljes së verdiktit. Ai ka theksuar se ky vendim tenton të barazojë krimet serbe me luftën çlirimtare, por se asnjë gjykatë nuk mund ta tjetërsojë të vërtetën e luftës për liri.

Përveç protestës, përfaqësuesit e OVL-UÇK-së kanë shpalosur një platformë me hapa konkretë deri në përfundimin e procesit në Apel për rastin e Hashim Thaçit, Jakup Krasniqit, Kadri Veselit dhe Rexhep Selimit. Siç njoftoi nënkryetari Fatmir Sopi, kjo platformë kërkon debat parlamentar për amendamentimin ose shfuqizimin e Ligjit për Dhomat e Specializuara, rivlerësim institucional të mandatit të gjykatës në raport me pretendimet fillestare të raportit të Këshillit të Evropës, si dhe mbështetje të plotë juridike e financiare për procesin e ankesave.

Gjykata Speciale në Hagë ka dënuar Hashim Thaçin dhe Jakup Krasniqin me nga 25 vjet burgim, Kadri Veselin me 18 vjet dhe Rexhep Selimin me 13 vjet burgim për krime lufte, ndërsa të gjithë janë shpallur të pafajshëm për akuzat që lidheshin me krime kundër njerëzimit. /E.A/