Real Madridi ka kthyer vëmendjen nga Martin Zubimendi, të cilin e sheh si një alternativë për përforcimin e mesfushës, pasi nuk ka arritur të sigurojë shërbimet e mesfushorit të Manchester Cityt, Rodri.

Sipas raportimeve të “Mundo Deportivo”, gjiganti spanjoll po shqyrton mundësinë e transferimit të Zubimendit, i cili pas vetëm një sezoni te Arsenali është shndërruar në një prej lojtarëve të rëndësishëm të skuadrës së drejtuar nga Mikel Arteta.

Megjithatë, një transferim i mundshëm nuk do të jetë i lehtë. Arsenali nuk ka ndërmend ta lejojë largimin e mesfushorit spanjoll për më pak se 90 milionë euro, duke vendosur një çmim të lartë për një prej pjesëtarëve kryesorë të repartit të mesfushës.

Zubimendi iu bashkua Arsenalit nga Real Sociedad dhe ka arritur të përshtatet shpejt me futbollin anglez. Para tij, Real Madridi kishte tentuar të afronte Rodrin si një prej objektivave kryesorë për mesfushën, por interesimi për fituesin e Topit të Artë nuk është konkretizuar.

Në rast se transferimi te Real Madridi realizohet, Zubimendi do të rikthehej në La Liga pas vetëm një sezoni në Premier League, këtë herë për të veshur fanellën e një prej klubeve më të mëdha në Evropë.

Për momentin, Arsenali mbetet i vendosur në kërkesën prej 90 milionë eurosh, ndërsa tash i takon Real Madridit të vendosë nëse është i gatshëm të bëjë investimin për transferimin e mesfushorit spanjoll.

D.L

Kombëtarja e Kosovës U17 në konkurrencën e vajzave ka përmbyllur sot grumbullimin treditor, i cili u zhvillua në kuadër të përgatitjeve dhe seleksionimit të ekipit për ndeshjet kualifikuese të muajit shtator.

Kosova është pjesë e një grupi me Azerbajxhanin, Irlandën dhe Shqipërinë, me këtë të fundit që do të jetë nikoqire e mini-turneut kualifikues.

Gjatë tri ditëve të grumbullimit, futbollistet e reja dardane shfaqën përkushtim, disiplinë dhe angazhim maksimal në seancat stërvitore. Stafi teknik, i udhëhequr nga përzgjedhësja Sanije Krasniqi, pati mundësinë të vlerësojë nga afër formën dhe cilësitë e secilës lojtare.

Në ditën e fundit, ekipi zhvilloi edhe një ndeshje kontrolluese, e cila shërbeu si një tjetër mundësi për stafin teknik për të testuar futbollistet dhe për të krijuar një pasqyrë më të qartë për formacionin që do të përfaqësojë Kosovën në sfidat e shtatorit.

Grumbullimi i radhës i Kosovës U17 do të zhvillohet në prag të ndeshjeve kualifikuese të shtatorit, ku vajzat dardane do të synojnë paraqitje sa më të mira dhe rezultate pozitive në mini-turneun në Shqipëri.

D.L

Ish-sulmuesi i Liverpoolit, Mohamed Salah, është përballur me një moment të pazakontë vetëm pak javë pasi nisi aventurën e tij të re te Trabzonspori.

34-vjeçari iu bashkua klubit turk në fillim të këtij muaji si lojtar i lirë, pas përfundimit të kontratës me Liverpoolin. Vendimi i tij për të vazhduar karrierën në Turqi surprizoi shumë tifozë dhe analistë të futbollit.

Pas prezantimit zyrtar, Salah vizitoi distriktin Arakli në Trabzon, ku u prit nga kryetari i komunës, Huseyin Avni Coskun Çebi. Takimi ishte planifikuar fillimisht si pjesë e një xhirimi promovues, por mori një kthesë të papritur.

Gjatë bisedës, Çebi foli për ndikimin e ndryshimeve klimatike dhe përmendi se në të ardhmen temperaturat e larta mund ta bëjnë jetën më të vështirë në Egjipt, vendlindjen e futbollistit.

“Ngrohja globale po kërcënon botën. Në të ardhmen do të bëhet e vështirë të jetohet në Egjipt gjatë verës. Distrikti ynë do të jetë shumë i banueshëm dhe ndër vendet më pak të prekura nga ngrohja globale”, tha ai.

Më pas, kryetari i komunës i bëri Salahut një ofertë që e la të habitur.

“Prandaj, le t’ju dhurojmë një copë të bukur tokë këtu. Mund të jetë një vend i mrekullueshëm për fëmijët dhe nipërit tuaj, pa probleme me ujin dhe i paprekur nga ngrohja globale”, shtoi Çebi.

Reagimi i Salahut u bë menjëherë viral në rrjetet sociale. Egjiptiani u pa duke prekur fytyrën në shenjë befasie, ndërsa iu përgjigj kryetarit të komunës me një “Faleminderit”, përpara se ta përshëndeste me shtrëngim duarsh.

Salah ka nisur kështu një kapitull të ri në karrierën e tij me Trabzonsporin, klub me të cilin, sipas raportimeve, do të përfitojë rreth 16.8 milionë euro në sezon. Me afrimin e yllit egjiptian, Trabzonspori synon të rivalizojë Galatasarayn dhe Fenerbahçen në garën për titullin e kampionit në Turqi.

D.L

Fenerbahçe po përgatit një lëvizje befasuese në afatin kalimtar të verës, duke synuar transferimin e sulmuesit brazilian të Real Madridit, Endrick.

Sipas mediumit turk Fanatik, drejtori ekzekutiv i klubit, Cihan Kamer, pritet të udhëtojë drejt Madridit për të zhvilluar bisedime lidhur me një marrëveshje të mundshme. Klubi turk thuhet se është i vendosur ta bindë talentin brazilian të pranojë ofertën dhe të transferohet në Stamboll.

E ardhmja e 20-vjeçarit në “Santiago Bernabéu” është vënë në pikëpyetje pas afrimit të Carlos Espit nga Levante për 25 milionë euro. Konkurrenca e shtuar në repartin ofensiv pritet të kufizojë hapësirat e Endrickut në formacion.

Ndërkohë, trajneri i Real Madridit, Jose Mourinho, raportohet se e konsideron Espin si një alternativë të rëndësishme në repartin sulmues dhe nuk mund t’i garantojë Endrickut minutat që ai kërkon.

Pikërisht kjo situatë ka nxitur interesimin e Fenerbahçes, e cila shpreson të përfitojë nga pasiguria rreth rolit të brazilianit në skuadrën madrilene dhe ta bindë atë të vazhdojë karrierën në Superligën turke.

D.L