Presidenti i SHBA-së, Donald Trump, paralajmëroi tarifa prej 35 për qind për importet nga Serbia dhe 30 për qind për importet nga Bosnje dhe Hercegovina.

Tarifat e reja për dy vendet e Ballkanit Perëndimor, si edhe ato për një sërë vendesh të tjera do të hyjnë në fuqi më 1 gusht.

Ato janë më të ulëta sesa ato që Trump i paralajmëroi në prill – 37% për mallrat nga Serbia dhe 35% për ato nga Bosnje dhe Hercegovina.

Megjithatë, zbatimi i këtyre të fundit u shty për 90 ditë.

Trump i paralajmëroi tarifat e reja në letrat drejtuar udhëheqësve të vendeve – në rastin e Serbisë, presidentit Aleksandar Vuçiq, ndërsa në rastin e Bosnje dhe Hercegovinës kryetares aktuale të presidencës, Zhelka Cvijanoviq.

Këto letra janë të njëjta, përveç ndryshimeve në normat doganore që i vendosen secilit shtet veç e veç.

Letra e Trumpit fillon duke thënë se është “nder i madh” për të që dërgon një letër, e cila tregon rëndësinë dhe përkushtimin e SHBA-së për marrëdhëniet tregtare me atë shtet.

Ai shton se SHBA-ja ka pranuar ta vazhdojë bashkëpunimin tregtar me vendin në fjalë, pavarësisht “deficitit të konsiderueshëm tregtar” që SHBA-ja ka me të.

Sipas tij, norma e deklaruar e tarifës – 30 për qind për Bosnje dhe Hercegovinën dhe 35 për qind për Serbinë – është shumë më e ulët se ajo që nevojitet për të eliminuar pabarazitë dhe deficitin tregtar.

Trump, gjithashtu, kërcënon se do t’i rrisë tarifat nëse vendet hakmerren, duke vendosur tarifa shtesë për importet nga SHBA-ja.

Trump njoftoi të hënën në rrjetin e tij social, Truth Social, vendosjen e tarifave të reja doganore për një sërë shtetesh.

Për Japoninë, Korenë e Jugut, Malajzinë dhe Kazakistanin parashikohen tarifa prej 25%; për Afrikën e Jugut 30%; për Indonezinë 32%; për Bangladeshin 35%; për Kamboxhën dhe Tajlandën 36%, dhe për Laosin e Mianmarin 40%.

Në fillim të prillit, Trump vendosi tarifë 10% për importet nga Kosova.

Masë të ngjashme, atëkohë, vendosi edhe për importet nga Shqipëria, kurse për ato nga Serbia ishte 37%, nga Bosnje dhe Hercegovina 35% dhe nga Maqedonia e Veriut 33%.

Ekspertët vlerësuan se tarifat amerikane do të kenë shumë ndikim në Kosovë, për shkak të varësisë së madhe nga importet.

Presidentja e Kosovës, Vjosa Osmani, tha atëkohë se zyra e saj ka bërë gati një ligj që do të mundësonte heqjen e tarifave prej 10% ndaj mallrave të importuara nga SHBA-ja, por se për miratimin e kësaj mase duhet fillimisht të konstituohet Kuvendi i ri.

Kosova nuk e ka konstituuar ende institucionin ligjvënës, edhe pse zgjedhjet parlamentare janë mbajtur pesë muaj më parë./REL

Presidenti i Shteteve të Bashkuara, Donald Trump tha të hënën se planifikon të dërgojë armë shtesë mbrojtëse në Ukrainë, pasi administrata e tij ndaloi disa dërgesa javën e kaluar.

“Do të dërgojmë më shumë armë. Duhet ta bëjmë – ata duhet të jenë në gjendje të mbrojnë veten“, tha Trump përpara një darke me homologun e tij izraelit, Benjamin Netanyahu, raporton CNN.

“Ata po goditen shumë rëndë. Do të na duhet të dërgojmë më shumë armë“, shtoi Trump.

“Armë mbrojtëse, kryesisht, por po goditen shumë, shumë rëndë“.

Komentet e fundit të presidentit vijnë pasi një zyrtar i lartë i Shtëpisë së Bardhë i tha CNN-it javën e kaluar se administrata Trump po ndalonte disa dërgesa armësh në Ukrainë, duke përfshirë raketat e mbrojtjes ajrore. Vendimi erdhi pas një shqyrtimi të shpenzimeve ushtarake dhe mbështetjes amerikane për vendet e huaja, i cili u nënshkrua nga Sekretari i Mbrojtjes, Pete Hegseth.

Zëdhënësja e Shtëpisë së Bardhë, Anna Kelly, tha në atë kohë se vendimi u mor “për të vënë interesat e Amerikës në radhë të parë”.

Disa zyrtarë amerikanë lanë të kuptohej se rishikimi i ndihmës për Ukrainën lidhej pjesërisht me përpjekjen e Pentagonit për t’u përqendruar te Kina dhe për t’u përgatitur për konflikte të mundshme në të ardhmen në Paqësor – një çështje e prioritizuar nga shefi i politikave të Pentagonit, Elbridge Colby.

“Departamenti i Mbrojtjes vazhdon t’i ofrojë Presidentit mundësi të forta për të vazhduar ndihmën ushtarake për Ukrainën, në përputhje me qëllimin e tij për t’i dhënë fund kësaj lufte tragjike. Në të njëjtën kohë, Departamenti po shqyrton dhe përshtat me rigorozitet qasjen e tij për arritjen e këtij objektivi, duke ruajtur gjithashtu gatishmërinë e forcave amerikane për prioritetet e mbrojtjes së Administratës“, tha Colby në një deklaratë në kohën e pauzës.

Rusia mirëpriti ndalimin e disa dërgesave në Ukrainë, duke pretenduar – pa dhënë asnjë provë – se kjo u bë sepse SHBA-të nuk kishin armë të mjaftueshme.

“Me udhëzimin e presidentit Trump, Departamenti i Mbrojtjes do të dërgojë armë shtesë mbrojtëse në Ukrainë për të siguruar që ukrainasit të mund të mbrojnë veten ndërsa ne punojmë për të siguruar një paqe të qëndrueshme“, tha zëdhënësi kryesor i Pentagonit, Sean Parnell, në një deklaratë të hënën.

SHBA-ja e ka furnizuar Ukrainën me sisteme mbrojtjeje ajrore, dronë, raketahedhës, radarë, tanke dhe armë anti-blind, duke çuar në shqetësime për pakësimin e rezervave amerikane.

Trump më parë ndaloi të gjitha dërgesat e ndihmës ushtarake për Ukrainën në mars, pas një debati të nxehtë në Zyrën Ovale me presidentin ukrainas Volodymyr Zelensky.

Trump rifilloi fluksin e ndihmës në Ukrainë rreth një javë më vonë.

Vendimi për të dërguar armë shtesë vjen gjithashtu pasi Trump foli veçmas javën e kaluar si me presidentin rus, Vladimir Putin, ashtu edhe me Zelenskyn. Ai tha më pas se biseda e tij me Putinin ishte zhgënjyese dhe se nuk kishte “asnjë përparim” drejt një armëpushimi.

Ndërkohë, Zelensky në javët e fundit iu është lutur aleatëve perëndimorë të forcojnë mbrojtjen ajrore të vendit të tij pas intensifikimit të sulmeve ajrore ruse. Rusia lëshoi një numër rekord dronësh në Ukrainë gjatë natës së të premtes, vetëm disa orë pas telefonatës Trump-Putin.

Trump më vonë të premten tha se SHBA-ja po shqyrton kërkesën e Ukrainës për më shumë sisteme mbrojtëse Patriot pas një telefonate “shumë të mirë” me Zelenskyn.

Presidenti ukrainas tha të shtunën se biseda e fundit me Trump ishte më e mira dhe “më produktive” që ai ka pasur.

Trump të hënën riafirmoi pakënaqësinë e tij me udhëheqësin rus, duke thënë: “Nuk jam aspak i kënaqur me presidentin Putin“.

Polonia rifilloi të hënën kontrollet në kufijtë me Gjermaninë dhe Lituaninë, duke ndjekur shembullin e masave të ngjashme të ndërmarra nga Gjermania më herët, me qëllim pengimin e azilkërkuesve.

Kryeministri polak, Donald Tusk, qeveria e të cilit i mbijetoi një votëbesimi në parlament së voni, i paralajmëroi këto kufizime qysh nga java e kaluar.

Presioni u rrit pasi grupet e ekstremit të djathtë në Poloni e akuzuan Gjermaninë për transportimin e migrantëve në territorin polak, pas mbërritjes së tyre në Evropën perëndimore.

Kontrollet që nisën natën e së dielës, do të zgjasin fillimisht 30 ditë, por autoritetet mund t’i zgjasin edhe më tej nëse është e nevojshme, tha Ministria e Brendshme e Polonisë.

“Migrimi i paligjshëm është thjesht një krim”, tha ministri i Brendshëm polak, Tomasz Siemoniak, gjatë një konference për media.

Kufiri i Polonisë me Lituaninë, që shtrihet në 104 kilometra, do të ketë kontrolle në 13 pika kalimi. Ndërsa, kufiri me Gjermaninë, i gjatë 467 kilometra, do të ketë kontrolle në 52 pika.

Autoritetet lituaneze thanë të hënën se janë të gatshme të përballen me bllokime të mundshme të trafikut në kufirin polak.

“Nëse krijohet trafik i shtuar, ne do të fillojmë ta menaxhojmë lëvizjen… për t’i minimizuar ndërprerjet dhe për t’i bërë kontrollet sa më të shpejta”, tha Antanas Montvydas, zëvendësshef i Shërbimit Shtetëror të Rojës Kufitare të Lituanisë, për radion lituaneze.

Pas marrjes së detyrës në maj, kancelari gjerman, Friedrich Merz, i cili e bëri politikën më të ashpër të migracionit shtyllë të fushatës së tij elektorale, urdhëroi rritjen e pranisë policore në kufi dhe tha se disa azilkërkues do të ndalohen të hyjnë në Gjermani.

Javën e kaluar, Merz tha se Polonia dhe Gjermania po bashkëpunojnë ngushtë për t’u siguruar që kontrollet kufitare të Gjermanisë të shkaktojnë sa më pak probleme dhe vonesa.

“Mbrojtja e kufijve kundër migracionit të parregullt është një interes që Gjermania e ka, Polonia e ka dhe fqinjët tanë evropianë e ndajnë me ne”, tha të hënën Stefan Kornelius, zëdhënës i Merzit.

“Ne nuk duam kontrolle të përhershme kufitare”, shtoi ai.

Bashkimi Evropian ka një zonë udhëtimi pa viza, të quajtur Schengen, e cila u mundëson qytetarëve të shumicës së vendeve anëtare të udhëtojnë lirshëm përtej kufijve.

Zvicra është gjithashtu pjesë e zonës Schengen, edhe pse nuk është anëtare e BE-së.

Sipas BE-së, shteteve anëtare u lejohet të rivendosin përkohësisht kontrolle kufitare, në rast të ndonjë kërcënimi serioz, si siguria e brendshme.

Me rregulla, kontrollet kufitare duhet të zbatohen si mjet i fundit në situata të jashtëzakonshme dhe duhet të jenë të kufizuara në kohë./REL

Presidenti i Shteteve të Bashkuara, Donald Trump deklaroi se janë afër një marrëveshjeje për Rripin e Gazës, transmeton Anadolu.

Duke folur me gazetarët në një aeroport, Trump shprehu shpresën lidhur me arritjen e një marrëveshje së shpejti në Gazë.

“Mendoj se jemi afër një marrëveshjeje për Gazën“, tha Trump duke theksuar vendosmërinë e tij për të arritur armëpushim në Gazë gjatë orëve kur kryeministri izraelit Benjamin Netanyahu po udhëtonte për në Uashington.

Trump bëri vërejtjet e mëposhtme në fjalimin e tij, ku vlerësoi se një armëpushim në Gazë mund të jetë i mundur “këtë javë”.

“Mendoj se ka një shans të mirë të arrijmë marrëveshje me Hamasin për shumë nga pengjet javën e ardhshme. E dini, ne kemi liruar shumicën e pengjeve, por shumë nga pengjet e mbetura do të lirohen. Mendojmë se këtë do ta bëjmë këtë javë“, tha presidenti amerikan.

Duke folur me gazetarët të premten, Trump tha: “Mendojmë se do të arrijmë armëpushim në Gaza brenda javës së ardhshme”. Në të njëjtën ditë, Hamasi dërgoi përgjigjen e tij “pozitive” ndaj propozimit të fundit për armëpushim ndërmjetësve Katarit dhe Egjiptit.

Trump sot pritet të takohet në Shtëpinë e Bardhë në orën 18:00 sipas kohës lokale të SHBA-së, me Netanyahun mbi të cilin ka ushtruar presion për armëpushim në Rripin e Gazës.