Beteja ligjore mes Brad Pitt dhe Angelina Jolie për pronësinë e vreshtarisë së tyre franceze, Château Miraval, ka marrë një kthesë të re.

Sipas dokumenteve gjyqësore të dorëzuara në fund të tetorit, aktori amerikan po kërkon nga ish-bashkëshortja e tij kompensim prej 30 milionë eurosh, lidhur me shitjen e pjesës që ajo zotëronte në pronë.

Sipas raportimeve të revistës People, kërkesa e Pitt mbështetet në email-e të dërguara nga avokatët e Jolie vitin e kaluar, që janë paraqitur si prova në dosjen gjyqësore. Dokumentet e reja, të depozituara më 29 tetor, përfshijnë një seri komunikimesh që lidhen me shitjen e aksioneve të Jolie në vitin 2021, si dhe një email nga nëntori 2023, ku ekipi ligjor i aktores i përgjigjet padisë së Pitt.

Avokatët e Jolie shkruajnë: “Vështirësitë e procesit janë krijuar nga vetë zoti Pitt, ai po padit znj. Jolie e po kërkon 30 milionë euro dëmshpërblim. Për këtë arsye, duhet të mbulojë shpenzimet për përgatitjen e dokumenteve që vërtetojnë (ose jo) dëmet që pretendon.”

Në një tjetër komunikim të datës tetor 2023, thuhet se Pitt “po kërkonte dëmshpërblim të përhershëm për dëmin e supozuar që i ishte shkaktuar biznesit të Miraval”.

Ekipi ligjor i Jolie përmend “ngulmimin e Pitt për të mos dorëzuar dokumentet që lidhen me arsyet pse ai kërkonte një marrëveshje katërvjeçare konfidencialiteti, e cila mbulonte sjelljen e tij të papërshtatshme personale”.

Sipas tyre, të dhënat janë të rëndësishme për thelbin e çështjes dhe duhet të bëhen publike. Përplasja ligjore mes çiftit ka nisur më 2022, kur Pitt e paditi Jolie duke pretenduar se kishte shitur pjesën e saj në Miraval pa marrëveshje paraprake, në kundërshtim me marrëveshje verbale sipas së cilës asnjëri prej tyre nuk mund ta shiste pjesën e vet pa miratimin e tjetrit.

Jolie mohoi ekzistencën e një marrëveshjeje të tillë dhe iu kundërpërgjigj me padi të re, duke e akuzuar Pitt se po “zhvillon një luftë hakmarrëse” kundër saj. Saga ligjore për pronësinë e Château Miraval, një pasuri e mrekullueshme në jug të Francës ku çifti dikur u martua, vazhdon ende në gjykatë. /A.Z/UBT News/

Princi William ka zhvilluar një vizitë të ngjeshur në Brazil, ku çdo veprim i tij ka reflektuar përkushtimin e thellë ndaj mbrojtjes së mjedisit.

Trashëgimtari ka marrë pjesë në një sërë iniciativash ekologjike, duke treguar se pasioni i tij për planetin nuk është vetëm deklaratë, por veprim konkret. Një nga momentet më të spikatura të udhëtimit ndodhi pranë ishullit Paquetá, një parajsë e vogël në Gjirin Guanabara, ku Princi mbolli tre mangrovë të rinj në një zonë të mbrojtur.

Pas punës në terren, i mbuluar nga balta deri në gjunjë, ai u përgatit të hipte në një varkë për t’u kthyer në destinacionin e tij.

Në atë çast, një burrë në varkë i ofroi një shishe me ujë plastik për t’i larë duart, William refuzoi me mirësjellje. Në vend të saj, u përkul pranë lumit e përdori ujin natyror për t’i pastruar duart, një gjest i thjeshtë, por domethënës.

Ky moment, i kapur nga kamerat, u vlerësua si simbol i përkushtimit ndaj qëndrueshmërisë dhe respektit për natyrën.

Si themelues i Çmimit Earthshot, William tregoi se filozofia për mbrojtjen e mjedisit nuk është teorike, por e mishëruar në zgjedhje të përditshme – si shmangia e plastikës.

Gjatë qëndrimit në Brazil, ku ndodhej për të ndarë Çmimin Earthshot – një nismë që shpërblen projektet që kontribuojnë në restaurimin e planetit, Princi dha edhe një mesazh frymëzues.

“Duhet të qëndrojmë pranë atyre që mbrojnë natyrën çdo ditë,” deklaroi ai, duke shtuar se mbrojtja e mjedisit nuk duhet të mbetet vetëm fjalë, por të shihet në veprimet tona. Gjestin e tij pranë lumit, e kanë interpretuar si shembull të lidershipit të heshtur, por të fuqishëm.

Me çdo vizitë, fjalim e tani me këtë akt modest por të ngarkuar me simbolikë, Princi vazhdon të dëshmojë se kujdesi për planetin nuk është vetëm mision mbretëror, por detyrë njerëzore. /A.Z/UBT News/

Ylli amerikan Madonna thuhet se është fejuar fshehurazi me të dashurin e saj 29-vjeçar, futbollistin Akeem Morris.

Burimet pranë këngëtares tregojnë se ajo është “më e lumtur se sa ka qenë në dekada” dhe se marrëdhënia e saj i sjell paqe dhe stabilitet.

Çifti u takua në 2022 gjatë një xhirimi për revistën Paper e filluan lidhjen menjëherë pas ndarjes së Madonnës me boksierin Joshua Popper.

Ata u shfaqën për herë të parë në publik këtë verë, ndërsa spekulimet për fejesë nisën në janar pas fotos së një unaze diamanti që Madonna publikoi në rrjetet sociale.

Së fundmi, ata festuan ditëlindjen e 67-të të artistes në Toskanë, me gjashtë fëmijët e saj. Madonna po shqyrton vendet për dasmën, duke përfshirë Italinë, Portugalinë ose pronën e saj në East Hampton, duke preferuar një festë intime.

Mediat raportojnë se ajo po përgatit edhe një marrëveshje paramartesore, të cilën Akeem e pranon pa problem.

Data e dasmës nuk është konfirmuar, por disa burime thonë se ceremonia mund të zhvillohet deri në fund të vitit. /A.Z/UBT News/