Qeveria e Bjellorusisë ka dhënë dorëheqjen, njoftoi shërbimi për shtyp i Këshillit të Ministrave të Bjellorusisë. Dekreti përkatës është nënshkruar nga Kryeministri Roman Golovchenko dhe ka hyrë në fuqi menjëherë. Ky vendim është marrë në përputhje me Kushtetutën e Republikës, e cila kërkon që qeveria të dorëzojë kompetencat para presidentit të sapozgjedhur.

Dorëheqja e qeverisë ndodhi pas zhvillimit të zgjedhjeve presidenciale në Bjellorusi më 26 janar 2025, ku Alexander Lukashenko, presidenti aktual, doli fitues për një mandat të shtatë presidencial. Lukashenko, i cili është në pushtet që nga viti 1994, ka mbajtur drejtimin e vendit për një periudhë të gjatë, duke u bërë figura kyçe e politikës bjelloruse.

Ky hap ndodh pas një periudhe tensioni dhe pasigurie politike në vend, ndërkohë që shumë grupe opozitare dhe organizata ndërkombëtare kanë kritikuar procesin zgjedhor, duke e cilësuar atë të manipuluar. Edhe pse Lukashenko ka shpallur fitoren, ka pasur protesta dhe kundërshti të shumta nga qytetarët dhe opozita që nuk e kanë pranuar rezultatin e zgjedhjeve.

Pas dorëheqjes së qeverisë, shumë qytetarë dhe analistë presin zhvillime të mëtejshme në skenën politike të Bjellorusisë, veçanërisht në lidhje me marrëdhëniet e vendit me Bashkimin Evropian dhe Shtetet e Bashkuara, si dhe me rritjen e tensioneve të brendshme për shkak të qeverisjes autoritare të Lukashenkos./UBTNews/

Punonjësit e Agjencisë Amerikane për Zhvillim Ndërkombëtar (USAID) u udhëzuan të qëndronin jashtë selisë së agjencisë në Washington më 3 shkurt, pasi miliarderi Elon Musk deklaroi se presidenti Donald Trump kishte rënë dakord për mbylljen e saj.

Punonjësit e USAID-it kanë thënë se kishin kuptuar se 600 punonjës ishin larguar nga sistemet kompjuterike të agjencisë gjatë natës. Ata që ishin ende në sistem morën emaile ku thuhej se “nën drejtimin e udhëheqjes së Agjencisë” ndërtesa e selisë “do të mbyllet për personelin e Agjencisë të hënën, 3 shkurt”, raporton AP.

Musk, i cili drejton një rishikim të qeverisë federale në administratën “Trump 2”, e quajti USAID-in një “organizatë kriminale” dhe tha se ajo duhej mbyllur pasi ishte e “përtej riparimit”. Kjo deklaratë erdhi pas largimit të 600 punonjësve nga sistemet kompjuterike të agjencisë dhe njoftimeve për mbylljen e ndërtesës për personelin.

Musk tha se kishte diskutuar me Trumpin për USAID-in dhe se kjo agjenci kishte nevojë të mbyllej, duke e krahasuar me një “grumbull krimbash”. Komentet e tij pasuan largimin nga puna të dy shefave të lartë të sigurisë në USAID, pasi ata refuzuan të dorëzonin materiale të klasifikuara për inspektim nga ekipet e Muskut./UBTNews/

Konservatori Bart De Wever është betuar si kryeministri i ri i Belgjikës, pasi arriti një marrëveshje koalicioni të luftuar me vështirësi që e çon vendin në të djathtë.

Marrëveshja, e arritur të premten vonë pas shtatë muaj negociatash, e bën De Wever nacionalistin e parë nga Flanders-i holandisht-folës që emërohet kryeministër belg.

54-vjeçari, i cili vitet e fundit është tërhequr nga thirrjet që Flanders të bëhet një vend i pavarur, bëri betimin përpara mbretit Philippe, në një ceremoni në pallatin mbretëror në Bruksel.

Ai pritej të shkonte drejt e në një mbledhje të liderëve të BE-së, disa blloqe më larg për bisedime lidhur me mbrojtjen dhe marrëdhëniet transatlantike.

Autoritetet ruse njoftuan se një shpërthim në një kompleks banesor në Moskë ka lënë të vdekur disa njerëz, përfshirë themeluesin e një batalioni që lufton përkrah forcave ruse në Ukrainë.

Shpërthimi i 3 shkurtit është më i fundit në një valë shpërthimesh dhe sulmesh, duke ngjallur frikë për rikthimin e dhunës së bandave që kishte përfshirë kryeqytetin rus në vitet e ’90-ta.

Agjencia shtetërore e lajmeve e Rusisë, TASS, i citoi autoritetet të kenë thënë se mjeti shpërtheu rreth orës 9:45 në mëngjes. Mjeti me gjasë ishte dërguar në kompleksin banesor, Alye Parusa, nga korrieri.

Në mesin e viktimave ishte edhe Armen Sarkisian, themeluesi i një batalioni ushtarak me përkatësi armene, i cili ka luftuar në Ukrainë përkrah trupave ruse. Agjencitë e lajmeve Interfax dhe TASS cituan zyrtarë të paemëruar që thanë se ai vdiq pasi u dërgua në spital në gjendje të rëndë.

Dëshmitarët thanë se në kohën e shpërthimit, Sarkisian u pa duke ecur në një korridor të ndërtesës drejt një parkimi.

TASS citonte një zyrtar të paemëruar të forcave të rendit që tha se me gjasë ky ka qenë tentativë për vrasje.

Ende askush nuk e ka marrë përgjegjësinë për shpërthimin.

Gazeta Kommersant raportoi se truproja i tij, Oleg Kasperovich, u vra dhe një truprojë tjetër u plagos rëndë.

Batalioni që Sarkisian thuhet se e ka themeluar quhet ArBat, tani formalisht pjesë e Redut, një rrjet mercenarësh të mbështetur nga inteligjenca ushtarake ruse.

Autoritetet ukrainase e kanë akuzuar Sarkisianin për përfshirje në dhunën e protestave të rrugës Maidan në Kiev në vitin 2014.

Sipas mediave ukrainase, ai gjithashtu është mik i ngushtë i ish-presidentit të Ukrainës, Viktor Yanukovych, i cili iku në Rusi pas protestave të Maidanit në vitin 2014.

Në prill të vitit 2018, Sarkisian u ndalua në Francë, ku po priste ekstradimin në Ukrainë. Megjithatë, ai u lirua pas dy ditësh “me garanci personale”.

Shpërthimi i së hënës është i dyti në muajt e fundit në kryeqytetin rus që ka tronditur banorët dhe ka ngjallur frikën për rikthimin e dhunës në rrugë që Moska e përjetoi gjatë viteve ‘90.

Në dhjetor, një gjeneral i lartë i forcave ruse të mbrojtjes kundër armëve kimike dhe biologjike u vra kur një skuter elektrik shpërtheu në trotuar pranë ndërtesës së tij./REL/