Presidenti i SHBA, Donald Trump, ka përsëritur se nuk përjashton mundësinë e transferimit të shtetasve amerikanë të burgosur në El Salvador, pas një pyetjeje të bëre nga gazetarët në avionin presidencial.

Ky deklarim erdhi pas propozimit të Presidentit të El Salvadorit, Naguib Bukele, i cili sugjeroi që vendi i tij të pranojë dhe burgosë kriminelët e dhunshëm nga SHBA në një qendër masive paraburgimi për të dyshuarit për lidhje me bandat kriminale, të njohur si CECOT.

Në një intervistë me gazetarët, Trump tha: “Nëse ata mund t’i mbajnë këta kriminelë të tmerrshëm për shumë më pak para se sa na kushtojnë neve, unë jam për këtë, por do të bëj vetëm atë që është brenda ligjit.” Ky qëndrim sugjeron se presidenti amerikan është i hapur ndaj mundësisë që të burgosurit amerikanë të transferohen në burgjet e El Salvadorit, për sa kohë që kjo është në përputhje me ligjin.

Gjithashtu, Trump ka ftuar homologun e tij salvadoran, Naguib Bukele, për një vizitë në Shtëpinë e Bardhë më 14 prill, ku kjo çështje mund të jetë pjesë e diskutimeve. Ky transferim i mundshëm nuk është diçka e re, pasi administrata Trump ka dërguar tashmë më shumë se 200 të huaj në El Salvador, shumica e të cilëve janë anëtarë të bandave famëkeqe ndërkombëtare të krijuara fillimisht në Venezuelë.

Propozimi i Bukeles për të pranuar qytetarë amerikanë në burgjet salvadorane ka shkaktuar reagime të përziera. Ai argumenton se të ardhurat që do të gjeneroheshin nga mbajtja e të burgosurve do të mundësonin financimin dhe qëndrueshmërinë e sistemit të burgjeve të El Salvadorit. Megjithatë, ky propozim ka marrë kritika të ashpra nga organizatat për të drejtat e njeriut, të cilat kanë denoncuar kushtet e rënda që mbizotërojnë në burgjet e El Salvadorit, duke folur për shkelje të shumta të të drejtave të njeriut dhe trajtim të padrejtë të të burgosurve.

Përveç kësaj, ky transferim mund të shkaktojë shqetësime të tjera lidhur me sigurinë dhe ndikimin në marrëdhëniet ndërkombëtare mes SHBA-së dhe El Salvadorit, duke pasur parasysh ndikimin që mund të ketë ky vendim në imazhin e dy shteteve dhe në klimën e sigurisë./UBTNews/

Ministrat e Tregtisë së Bashkimit Evropian do të takohen sot në Luksemburg për të hartuar një strategji për të bindur presidentin amerikan Donald Trump që të tërhiqet nga tarifat e reja të vendosura ndaj bllokut.

Ministrat e BE-së pritet gjithashtu të diskutojnë tarifat reciproke si dhe masat e tjera hakmarrëse që do të zbatohen në rast se përpjekjet për të negociuar një zgjidhje me Uashingtonin dështojnë.

Qeveria amerikane prezantoi tarifa universale prej një minimumi prej 10% për importet nga pothuajse të gjithë partnerët e saj tregtarë të shtunën, pasi Trump i shpalli ato në fillim të javës së kaluar.

Taksa dukshëm më të larta do të aplikohen për disa vende, në varësi të deficitit tregtar. Importet nga vendet e Bashkimit Evropian në SHBA përballen me tarifa të reja prej 20% duke filluar nga e mërkura.

Gjermania do të përfaqësohet nga ministri në largim i Ekonomisë Robert Habeck, i cili, si shumë nga homologët e tij të BE-së, druhet se tarifat e reja të Trump do të kenë pasoja të rënda për ekonominë globale.

Trump tha se ai synon të kundërshtojë çekuilibrat e pretenduar tregtar, ndërsa vazhdon të bindë prodhuesit të prodhojnë në SHBA. Ai po kërkon gjithashtu të financojë shkurtime të taksave në shkallë të gjerë, një premtim qendror i fushatës.

Ministrat do të diskutojnë gjithashtu marrëdhëniet tregtare me Kinën. Komisioneri i Tregtisë së BE-së Maros Sefcovich pritet t’i informojë ata mbi bisedimet e tij të fundit në Pekin.

BE-ja është përpjekur të bindë Kinën prej disa vitesh që t’i japë fund praktikave tregtare, duke përfshirë subvencionet që blloku i konsideron se çregullojnë konkurrencën.

Në vitin 2024, mallra me vlerë 531,6 miliardë euro u eksportuan në SHBA, me vetëm 333,4 miliardë euro mallra të importuara. Në sektorin e shërbimeve, nga ana tjetër, BE-ja ka një deficit tregtar me SHBA-në.

Dy fëmijë kanë vdekur deri tani nga fruthi, ku shpërthimi i kësaj sëmundjeje ka çuar në gati 500 numrin e rasteve dhe është përhapur në 22 shtete të tjera të Shteteve të Bashkuara të Amerikës, thanë zyrtarët amerikanë.

Sekretari i Shëndetësisë dhe Shërbimeve Njerëzore, Robert F. Kennedy Jr. – kundërshtar i kamotshëm i vaksinave i cili më parë kishte këmbëngulur se vaksinimi është zgjedhje personale – tha të dielën se vaksinat janë mbrojtja më e mirë kundër fruthit.

“Mënyra më efektive për ta parandaluar përhapjen e fruthit është vaksina [kundër fruthit, shytave dhe rubeolës]”, shkroi Kennedy në rrjetin social X.

Zyrtarët shëndetësorë në Teksas thanë se fëmija i dytë që humbi jetën është një vajzë 8-vjeçare e pavaksinuar, e cila nuk kishte sëmundje të tjera.

Ajo vdiq më 3 prill në spital nga dështimi frymëmarrjes i shkaktuar nga fruthi, thanë zyrtarët.

Një fëmijë tjetër në Teksas vdiq më herët pas përhapjes së fruthit, që nisi në fund të janarit në këtë shtet.

Fruthi ishte shpallur i eliminuar në Shtetet e Bashkuara nga viti 2000, por për raste të kohëpaskohshme me këtë sëmundje janë fajësuar udhëtarët nga vende të tjera.

Kennedy tha se ka 642 raste të konfirmuara me fruth, 499 prej tyre vetëm në Teksas.

Ai shtoi se ekipe nga Qendrat për Kontrollin dhe Parandalimin e Sëmundjeve (CDC) janë dërguar në Teksas me kërkesë të guvernatorit Greg Abbott.

Në të kaluarën, Kennedy kishte rekomanduar vitaminën A dhe ushqimin e mirë si trajtim për fruthin.

Studimet në disa vende në zhvillim kanë treguar se vitamina A mund ta zvogëlojë ashpërsinë e simptomave, por gjithashtu mund të shkaktojë toksicitet në mëlçi nëse merret në sasi të larta.

Shumë demokratë e kundërshtuan emërimin e Kennedyt – djali i senatorit të ndjerë Robert F. Kennedy dhe nipi i presidentit John F. Kennedy – për shkak të teorive të tij të pazakonta për shëndetin, përfshirë qëndrimin e tij kundër vaksinave.

Zyrtarët kanë thënë se vaksina kundër fruthit është 97 për qind efektive pas dy dozave.

Në faqen e saj të internetit, CDC-ja thotë se vaksina është “mbrojtja më e mirë kundër fruthit”, i cili përhapet nëpërmjet ajrit kur një person i infektuar teshtin apo kollitet.

Deri tnai këtë vit numri i rasteve me fruth në Shtetet e Bashkuara është dyfish më i madh se tërë viti ne kaluar.

Përveç Teksasit, shtetet me raste aktive – me tri ose më shumë raste – janë Nju Meksiko, Kansas, Ohajo dhe Oklahoma. Kjo sëmundje përhapet në zona me nivel të ulët të vaksinimit.

Organizata Botërore e Shëndetësisë tha javën e kaluar se rastet me fruth në Meksikë janë të lidhura me ato në Teksas./REL/