Një plagosje me armë zjarri është regjistruar dje në lagjen nr. 2 të qytetit të Durrësit, ku sipas informacioneve paraprake, një i ri rreth 33 vjeç është qëlluar në këmbë, në zonën e thembrës, dhe është transportuar me makinë drejt spitalit rajonal. 

Burime nga Policia e Durrësit bëjnë me dije se i plagosuri nuk ka pranuar të japë deklarime mbi rrethanat e ngjarjes apo identitetin e autorit të mundshëm.

Aktualisht, nuk dihen motivet dhe rrethanat e plota të incidentit, ndërsa grupi hetimor po punon për identifikimin dhe kapjen e autorit.

Njoftimi zyrtar i policisë:

Më datë 03.11.2025, rreth orës 16:20, ka shkuar për ndihmë mjekësore në urgjencën e Spitalit të Durrësit, jashtë rrezikut për jetën, shtetasi M. D., 31 vjeç, banues në Durrës, i cili dyshohet se është dëmtuar në këmbë (në zonën e thembrës), me armë zjarri, në rrethana ende të paqarta.

Është ngritur grupi hetimor dhe, nën drejtimin e Prokurorisë, po punohet për sqarimin e plotë të rrethanave të rastit./S.K/KP/

Guvernatorja e Rezervës Federale Lisa Cook  e cila u shkarkua pak kohë më parë nga presidenti Donald Trump, në fjalimin e saj të parë publik tha se normat e interesit janë në një pozicion të mirë për t’u përballur me inflacionin vazhdimisht të lartë.

Cook, e emëruar nga ish-Presidenti Joe Biden dhe gruaja e parë me ngjyrë që shërbeu si guvernatore e Rezervës Federale, është zyrtarja e parë e bankës qendrore që i është nënshtruar ndonjëherë një përpjekjeje për shkarkim.

Në një letër që njoftonte shkarkimin e saj, Trump përmendi akuzat për mashtrim hipotekor, të cilat ende nuk janë çuar në gjykatë. Cook e paditi Trump menjëherë pas kësaj, në atë që është bërë një rast historik mbi pushtetin presidencial dhe pavarësinë e Rezervës Federale që do të vendoset vitin e ardhshëm nga Gjykata Supreme.

Gjykata vendosi që Cook mund të mbetet në rolin e saj për momentin dhe ka planifikuar argumente gojore në janar. Cook tha  se është jashtëzakonisht mirënjohëse për mbështetjen që ka marrë në betejën e saj ligjore me administratën Trump, por nuk komentoi më tej mbi këtë temë, shkruan CNN.

Cook votoi për të ulur normat e interesit në dy takimet e fundit të Rezervës Federale, por nuk kishte komentuar publikisht për ekonominë që para se Trump të thoshte në gusht se e kishte shkarkuar atë. Zyrtarët e Rezervës Federale marrin pjesë rregullisht në ngjarje publike për të shprehur pikëpamjet e tyre mbi ekonominë në frymën e transparencës dhe për të ndihmuar investitorët të kuptojnë drejtimin e politikës monetare.

Në fjalimet e përgatitura për një aktivitet në Uashington, DC, Cook ofroi një perspektivë të ekuilibruar mbi ekonominë amerikane, duke detajuar kërcënimin e dyfishtë ndaj mandatit të dyfishtë të bankës qendrore për çmime të qëndrueshme dhe punësim të plotë.

Ajo vuri në dukje shenjat e tendosjes në tregun e punës, siç është rritja e papunësisë së zezakëve, por sugjeroi se ka më shumë urgjencë për të përfunduar punën me inflacionin sesa për të ulur më tej normat për të parandaluar pushimet masive nga puna.

“Më lejoni të jem i qartë. Unë jam e përkushtuar për të arritur objektivin tonë të inflacionit prej 2%,” tha ajo. “E shoh normën aktuale të politikës si modestisht kufizuese, gjë që është e përshtatshme duke pasur parasysh se inflacioni mbetet disi mbi objektivin tonë prej 2%.”

Komentet e fundit të Cook vijnë në një kohë kur politikëbërësit e Fed janë të ndarë se si politikat ekonomike të Trump mund të ndikojnë në çmime, punësim dhe rritje ekonomike./S.K/KP/BBC/

Presidentja e Kosovës, Vjosa Osmani ka reaguar pas dyshimit se një serb i Kosovës është plagosur e më pas edhe rrëmbyer nga xhandarmëria serbe në Leposaviq.

Osmani ka shkruar në Facebook se Serbia, e cila çdo ditë bën propagandë e dezinformata për të drejtat e serbëve në Kosovë, ka plagosur dhe më pas ka kidnapuar një qytetar serb të Kosovës.

“Kjo është edhe një dëshmi shtesë e qasjes së saj hegjemoniste, ku çdo qytetar që guxon të flasë të vërtetën rreth regjimit autokratik të Vuçiqit, sulmohet dhe torturohet në mënyrën më barbare të mundshme”, thuhet në reagimin e Osmanit.

Më tej ajo ka shkruar se bota demokratike duhet të reagojë e të ndalë këto sulme të Serbisë që kanë për qëllim rrezikimin e paqes e stabilitetit në rajonin tonë.

“Ndërkaq skena politike në Kosovë duhet të veprojë e flasë në një zë në mbrojtjen e Kosovës nga tendenca të tilla”, shkruan ajo.

Policia e Kosovës pretendon se ai u plagos dhe u rrëmbye nga Xhandarmëria Serbe.

Sipas njoftimit, më 1 nëntor 2025, Policia e Kosovës, ka pranuar një informacion se në zonën e Leposaviqit, një person (M. V.), shtetas i Republikës së Kosovës, (i nacionalitetit serb), dyshohet se është plagosur dhe është rrëmbyer brenda territorit të Republikës së Kosovës, nga xhandarmeria serbe./S.K/KP/

Një person ka vdekur nga aksidenti tragjik që ka ndodhur në rrugën nacionale Pejë-Prishtinë, përkatësisht në Vragoli. Kështu konfirmoi zëdhënësi i Policisë së Kosovës, Daut Hoxha, i cili tha se në vendin e ngjarjes mjeku ka konstatuar vdekjen e viktimës.

“Rreth orës 17:35 në rrugën nacionale Pejë-Prishtinë, në Vragoli është shkaktuar një aksident trafiku me fatalitet. Sipas informatave fillestare dyshohet se një këmbësor është goditur nga një motor. Në vendin e ngjarjes mjeku ka konstatuar vdekjen e një personi. Është njoftuar prokurori dhe mjekësia ligjore përderisa hetimet janë duke u kryer nga Policia për të sqaruar të gjitha rrethanat që kanë quar deri te ky aksident tragjik”, tha Hoxha.

Policia apelon për kujdes në trafik, respektim të rregullave dhe përshtatje të shpejtësisë në rrugë, posaqërisht kur ka ndryshime atmosferike-reshje dhe dukshmëria është më e kufizuar./S.K/KP/