Më 1 nëntor të vitit 1878, një ngjarje historike e rëndësishme shënoi fillimin e një kapitulli të ri në historinë shqiptare, Kuvendi i Dibrës. Nën udhëheqjen e krerëve të Lidhjes Shqiptare të Prizrenit, përfshirë Iljaz pashë Dibrën dhe Abdyl bej Frashërin, Kuvendi shënoi një përpjekje të fortë për të kërkuar autonominë e shqiptarëve brenda kornizës së Perandorisë Osmane.

Rezoluta e përpiluar nga Abdyl beu, e cila do t’i dorëzohej sulltanit në Stamboll, përmbante pesë pika thelbësore që ilustronin aspiratat e popullit shqiptar për vetëqeverisje dhe zhvillim.

Krijimi i Vilajetit të Shqipërisë, një nga kërkesat kryesore ishte formimi i një vilajeti që do të përfshinte katër vilajetet e atëhershme: Shkodra, Kosova, Manastiri dhe Janina. Kjo do të ndihmonte në centralizimin e pushtetit dhe administratës shqiptare.

Emërimi i nëpunësve shqiptarë, kuvendi kërkonte që administrata e vilajetit të drejtohej nga vetë shqiptarët, duke i dhënë fund praktikave të diskriminimit dhe kolonizimit nga elementë të huaj.

Arsimi në gjuhën shqipe, një nga pikat më të rëndësishme ishte krijimi i shkollave që do të mësonin në gjuhën shqipe, duke ndihmuar kështu në ruajtjen e identitetit kulturor dhe kombëtar.

Kuvendi i vilajetit, Kuvendi i Dibrës propozoi formimin e një kuvendi që do të zgjidhte çështjet e brendshme, duke përfshirë caktimin e buxhetit dhe emërimin e qeverisë dhe gjykatave të vilajetit.

Buxheti për arsim dhe infrastrukturë, kërkesa për një buxhet të posaçëm që do të mbështeste arsimin dhe zhvillimin e infrastrukturës ishte po ashtu një element kyç, që dëshmonte përkushtimin për një shoqëri të zhvilluar.

Pas përfundimit të Kuvendit, në shkurt të vitit 1879, një delegacion shqiptar iu drejtua Portës së Lartë me këto kërkesa, por ato u shpërfillën dhe u kundërpërgjigjën me forcë, duke theksuar sfidat dhe pengesat me të cilat përballej populli shqiptar në përpjekjet e tij për autonomi dhe vetëqeverisje.

Kuvendi i Dibrës nuk ishte thjesht një ngjarje politike; ai përfaqësonte një moment të rëndësishëm të ndërgjegjësimit kombëtar dhe aspiratave për një të ardhme më të ndritur për shqiptarët, duke e vendosur themelin për lëvizjet që do të pasonin në vitet e ardhshme./UBTNews/

Të gjithë e njohim atë ndjenjën e trazuar kur zgjohesh në mëngjes me ngut. Çdo gjë duket si një sfidë, sidomos kur kupton se nuk e ke planifikuar kohën siç duhej.

Fillon ditën me mendimin se po vesh rrobat e duhura, por ndjenja e pishmanit të kap më vonë, sapo del nga shtëpia. Ajo ndjesi e frikës dhe dyshimit se gjithçka nuk ka shkuar siç e kishe imagjinuar, është një pjesë e zakonshme e rutinës së përditshme.

Nëse një natë më përpara do të ishit ulur vetëm 15 minuta për të gjetur veshjen tuaj, sot nuk do të pendoheshit rrugës për në punë për pantallonat e rrudhosura apo kombinimin e çuditshëm të veshjes.

Kjo gjë është me të vërtetë e sikletshme por, ne sot ju sjellim disa ‘truqe’ që mos të bëheni me nerva sapo t’i hapni sytë.

Përpara se të filloni: krijoni luksin e të paturit një pasqyrë ku mund të shiheni i gjithi, vendoseni në një zonë të ndriçuar mirë.

1. Kontrolloni motin dhe zgjidhni veshjen në varësi të tij;

2. Mos lini asgjë jashtë- vendosni këpucët, çorapet, rripin, orën dhe syzet e diellit;

3. Hekurosni rrobat nëse është e nevojshme;

4. Përdorni varëset e rrobave në një vend enkas për veshjen e ditës;

5. Bëni disa hapa mbrapa dhe mendoni se si do të dukeni me atë veshje;

Koha ju del pasi puna është 10 orë larg e jo 10 minuta kështu keni hequr një stres të madh, nëse i’a dilni sot ka qenë dita e fundit që shkoni vonë në punë duke djersitur me ankth se si dukeni me rrobat që zgjodhet në mënyrë rastësore. /UBT News/

Dëshira për të shëtitur botën është një ndjenjë që e ndajnë shumë prej nesh, por jo të gjithë janë në gjendje ta realizojnë këtë ëndërr për shkak të pengesave financiare. Megjithatë, për ata që kanë pasion udhëtimin, ekspertët ofrojnë disa këshilla të vlefshme që ndihmojnë në realizimin e kësaj dëshire pa shpenzuar shuma marramendëse.

Ka mënyra për të udhëtuar pa u rënduar në mënyrë të tepruar buxhetin. Duke ndjekur disa strategji të thjeshta dhe të mençura, ju mund të shijoni aventurat e udhëtimit dhe të eksploroni destinacione të ndryshme, duke ruajtur një ekuilibër financiar.

Zgjidhni autobusë dhe trena që udhëtojnë në mbrëmje, udhëtimet e natës me tren ose autobus janë më të lira. Këtë opsion shfrytëzoni për të kursyer kohë dhe para, por edhe për të mos qëndruar në hotel.

Ofertat sekrete të hoteleve, nëse nuk keni shumë kohë e para, kushtoni vëmendje ueb sajteve që postojnë oferta të hoteleve, siç janë “Hotwire” apo “Priceline”.

Shikoni çmimin e biletave për një person, nëse do të udhëtoni shikoni sa kushton bileta për një person. Esenca është se ueb sajtet e linjave ajrore provojnë t’ju shesin bileta që kushtojnë më shumë nëse udhëtoni me një apo disa persona.

Kur blini bileta përmes internetit, bëni në platformën “Incognito, nëse i kontrolloni çmimet e pastaj më vonë e bëni të njëjtën gjë, mund të rriten. Kjo se linjat ajrore e dinë se jeni të interesuar në bileta e provojnë t’jua shesin me çmim të lartë. Këtë e shmangni duke i blerë biletat përmes platformës “Incognito”.

Përndryshe, sa për kuriozitetin tuaj, në vitin 2017, 27-vjeçarja Cassandra De Pecol i kishte thyer dy rekorde: Ishte bërë femra e parë që i kishte vizituar të gjitha shtetet sovrane në botë dhe njeriu i parë që kishte arritur ta bënte këtë brenda 1 viti e gjysmë. /UBT News/

Në kalendarin liturgjik, data 1 nëntor është e shenjtëruar si Dita e të Gjithë Shenjtorëve, një festë e rëndësishme për besimet që kanë si bazë mësimet e Krishtit. Kjo ditë, e njohur gjithashtu si një kohë për reflektim dhe nderim, festohet në shumë vende të botës. Ajo ndihmon në ruajtjen e kujtimit të shenjtorëve, disa prej të cilëve nuk kanë një datë specifike për t’u kremtuar gjatë vitit.

Dita e të Gjithë Shenjtorëve shënon një moment të veçantë në kalendarin e fesë, duke hapur një treditësh kushtuar kujtimit të të ndjerëve. Kjo periudhë fillon me Halloween-in më 31 tetor, vazhdon me Dita e të Gjithë Shenjtorëve më 1 nëntor dhe përfundon me Dita e Gjithë Shpirtrave më 2 nëntor. Në këtë mënyrë, shumë besimtarë i përkujtojnë të afërmit e tyre të ndarë nga jeta, duke i dhënë kështu një kuptim më të thellë ceremonive.

Historikisht, fillimet e kësaj feste datojnë në shekullin e IV, kur në Antioki kremtohej dita e parë pas Rrëshajve. Në shekullin VII, data e kremtimit u vendos më 13 maj, përkujtim i kushtuar Panteonit të Shën Marisë së Martirëve. Megjithatë, Papa Gregori IV, duke e lidhur festën me ciklin bujqësor dhe kthimin e shtegtarëve pas të korrave vjeshtore, e vendosi kremtimin e saj në 1 nëntor, duke e bërë më të lehtë organizimin e festimeve.

Në Shtetet e Bashkuara dhe Kanada, ndërkohë që festimet e Halloween-it zhvillohen më 31 tetor, ato vazhdojnë të kenë një lidhje të ngushtë me Ditën e të Gjithë Shenjtorëve. Edhe pse në shekullin e 20-të festa ka marrë një karakter më laik, duke u shndërruar në një ngjarje të gëzueshme dhe festive, ende ekzistojnë grupe të krishterësh që e festojnë këtë ditë me solemnitetin e duhur. Sidoqoftë, Halloween nuk ka statusin e festës zyrtare në SHBA dhe Kanada, duke theksuar kështu ndarjen mes kulturës popullore dhe praktikave fetare.

Në këtë kontekst, Dita e të Gjithë Shenjtorëve mbetet një përkujtim i rëndësishëm për besimtarët, duke ofruar një mundësi për të reflektuar mbi jetën e shenjtorëve dhe për të përkujtuar ata që kemi humbur, duke i dhënë një kuptim më të thellë marrëdhënieve tona me ata që kanë kaluar në jetën tjetër.