Në Shtetet e Bashkuara janë publikuar detaje të reja lidhur me një padi serioze ndaj Priscilla Presley, e cila akuzohet për fshehjen e bizhuterive me vlerë të madhe dhe kujtimeve të rralla të Elvis Presley-t.

Ish-aktorja 80-vjeçare po përballet gjithashtu me akuza për përpjekje për të marrë kontrollin e pasurisë së familjes Presley, përfshirë edhe pronën ikonike “Graceland”.

Padia është ngritur në Gjykatën e Lartë të Los Anxhelosit nga ish-partnerët e saj të biznesit, Brigitte Kruse dhe Kevin Fialko, të cilët kërkojnë një dëmshpërblim prej të paktën 50 milionë dollarësh.

Ata pretendojnë se Priscilla ka shkelur kontratat, ka kryer mashtrim dhe ka tentuar të përjashtojë vajzën e saj, Lisa Marie Presley, nga e drejta trashëgimore.

Një nga akuzat më të ndjeshme ka të bëjë me momentin tragjik të janarit 2023, kur Lisa Marie pësoi arrest kardiak. Dokumentet sugjerojnë se Priscilla ka kërkuar fikjen e aparateve që e mbanin në jetë vajzën e saj vetëm disa orë pas pranimit në spital, gjë që ka shkaktuar reagime të forta në publik.

Ajo akuzohet se ka fshehur një koleksion bizhuterish me vlerë 25 milionë dollarë, ndërsa në dokumente kishte deklaruar 6 mijë dollarë për të shmangur pagesat tatimore ndaj autoriteteve amerikane.

Koleksioni i dyshuar është ruajtur në një vend të fshehtë, i menaxhuar nga drejtoresha e arkivave të Graceland-it, Angie Marchese. Sipas paditësve, Priscilla i ka larguar nga puna sapo ka mësuar se ata kishin ndërmend të informonin autoritetet për fshehjen e pasurisë.

Avokati i Priscilla, Marty Singer, i ka hedhur poshtë akuzat, duke i cilësuar “absurde dhe të pabazuara”.

Ai ka deklaruar se padia është përpjekje për të njollosur reputacionin e saj dhe manovër nga individë që vetë janë nën hetim për përvetësim fondesh dhe abuzim ndaj një personi të moshuar. /A.Z/UBT News/

Selena Gomez ka emocionuar ndjekësit e saj duke treguar se dëshiron me gjithë zemër të bëhet nënë.

Në një story të publikuar në Instagram, këngëtarja dhe aktorja festoi rikthimin në vazhdimin e serialit “Wizards of Waverly Place”.

Duke folur për rolin e saj, Gomez u shpreh: “Alex Russo është një nënë. Shpresoj që edhe unë një ditë të bëhem një e tillë.”

Në vazhdimin e serialit, zbulohet se personazhi i Alex është nëna e Billie Russo-s, e interpretuar nga aktorja e re Janice LeAnn Brown. Pas transmetimit të episodit, Gomez dhe Brown ndanë emocionet e tyre për bashkëpunimin, si në set ashtu edhe jashtë tij.

“Ishte shumë emocionuese, si për mua ashtu edhe për të,” – tha Brown në një intervistë.

Gomez shtoi se ndjehet e lidhur me rolin e saj, duke theksuar se “ndihet si Alex” dhe se personazhi e ka ndihmuar ta formësojë më shumë si person. Në një podcast të mëparshëm me Jay Shetty, ajo dhe partneri i saj Benny Blanco folën për dëshirën e tyre për të krijuar një familje.

“Nuk e di çfarë do të ndodhë, por i dua fëmijët. Më pëlqen t’i bëj të qeshin, janë shumë të ëmbël. Kur të vijë ajo ditë, do të jem shumë e emocionuar,” – u shpreh Gomez.

Ndërkohë, Blanco shtoi se sa herë që Selena sheh fëmijë, ajo menjëherë afrohet dhe kalon kohë duke folur me ta, duke treguar anën e saj të butë dhe të dashur, raporton People. /A.Z/UBT News/

Gene Simmons, këngëtari i grupit KISS, u dërgua me urgjencë në spital pas një aksidenti në Malibu, pasi humbi ndjenjat gjatë ngasjes së makinës në autostradë.

Automjeti i tij përfundoi duke u përplasur me një veturë të parkuar, por fatmirësisht askush nuk u lëndua.

Pas trajtimit, Simmons është liruar e po rikuperohet në shtëpi. Bashkëshortja e tij, aktorja Shannon Tweed, tha se mjekët kohët e fundit i kishin ndryshuar medikamentet dhe ai duhet të pijë më shumë ujë, gjë që nuk është zakon për të.

Përfaqësuesi i këngëtarit konfirmoi se ai është mirë dhe ka rifilluar aktivitetet e tij normale.

Aksidenti ndodhi vetëm një muaj para se KISS të rikthehej në skenë për një koncert special “pa maska” në Las Vegas, i cili do të mbahet nga 14 deri më 16 nëntor.

Ky koncert vjen pas performancës së fundit të grupit në Madison Square Garden në New York në vitin 2023, që Simmons e kishte quajtur “performanca e fundit e KISS me grim”. /A.Z/UBT News/