Në kuadër të festivalit me të madh të dijes, “Global UBT Fest 2026”, Fakulteti i Arkitekturës dhe Planifikimit Hapësinor në UBT ka hapur zyrtarisht punimet e Akademisë Verore me temë qendrore “NEO HABITAT: Rethinking Urban Space, Architecture & Heritage”.

Ky program synon ndërlidhjen e njohurive teorike me praktikat bashkëkohore të arkitekturës, duke krijuar mundësi për zhvillim profesional dhe fuqizim të kompetencave të studentëve.

Ceremonia e hapjes u udhëhoq nga udhëheqësi i kësaj akademie, Prof. Kujtim Elezi, ndërsa me fjalë rasti pjesëmarrësve iu drejtuan edhe Dekani i Fakultetit, Prof. Binak Beqaj.

Në kuadër të aktiviteteve të ditës së sotme, Prof. Besa Jagxhiu mbajti një ligjëratë mbi trashëgiminë urbane dhe arkitektonike, duke trajtuar transformimin e saj në qytetin bashkëkohor. Po ashtu, Dr.  Aurora Saidi ligjëroi mbi mekanizmat perceptualë që ndërmjetësojnë përvojat urbane gjatë ndërveprimit të banorëve me ambientin e ndërtuar. Një kontribut të veçantë në ditën e parë dha edhe Prof. Nuran Saliu me ligjëratën e tij mbi dizajnin parametrik dhe optimizimin në Grasshopper, duke sjellë trendet më të reja nga gjeometria tek inteligjenca arkitektonike.

Në ditët në vazhdim, Akademia Verore do të zhvendosë fokusin tek puna praktike. Nga data 7 deri më 10 korrik, studentët do të angazhohen në punëtori (workshops) intensive 5-ditore të ndara në tri module: Trashëgimi Arkitektonike dhe Restaurim, Planifikim dhe Dizajn Urban, si dhe Arkitekturë dhe Efiçiencë. Ky edicion do të përmbyllor më 13 korrik me prezantimin e projekteve finale të realizuara nga vetë studentët.

/E.A/

Në kuadër të festivalit më të madh, Global UBT Fest 2026, Fakulteti i Inxhinierisë së Mekatronikës në UBT hapi zyrtarisht punimet e Akademisë Verore për Inxhinierinë e Dizajnit të Produkteve, e cila po zhvillohet në Qendrën UBT – Dukagjin në Prishtinë.

Ceremonia e hapjes u udhëhoq nga koordinatorja e programit të Akademisë Verore në Fakultetin e Inxhinierisë së Mekatronikës, Prof. Saranda Demolli, i cili theksoi rëndësinë e kësaj akademie në zhvillimin e aftësive praktike dhe profesionale të studentëve në fushën e projektimit dhe dizajnimit të produkteve moderne. Ai vlerësoi se kombinimi i njohurive teorike me aplikimet praktike përbën një element kyç në përgatitjen e gjeneratave të reja të inxhinierëve, të gatshëm për sfidat e industrisë bashkëkohore.

Programi i akademisë nisi me ligjëratat e udhëhequra nga Ideal Rafuna, i cili prezantoi konceptet bazë të modelimit 2D dhe 3D, duke u fokusuar në përdorimin e metodave dhe mjeteve moderne të projektimit kompjuterik. Pjesëmarrësit patën mundësinë të zhvillojnë ushtrime praktike në dizajnimin e pjesëve mekanike, duke fituar njohuri të vlefshme mbi procesin e krijimit dhe optimizimit të komponentëve inxhinierikë.

Në ditët në vijim, akademia do të vazhdojë me tema të avancuara që përfshijnë projektimin e komponentëve të dronëve, krijimin e bashkësive (assemblies), simulimet strukturore dhe animacionin e modeleve të projektuara. Përmes këtyre sesioneve, pjesëmarrësit do të njihen me procesin e plotë të zhvillimit të një produkti – nga konceptimi dhe modelimi digjital deri te analiza funksionale dhe vizualizimi i tij.

Shoqata e Fermerëve Kosovarë të Qumështit ka protestuar këtë të hënë para Ministrisë së Bujqësisë, duke kërkuar zgjidhje urgjente për situatën e krijuar pas ndërprerjes së grumbullimit të qumështit nga fermat vendore.

Fermerët dolën në protestë me mjete bujqësore dhe derdhën qumësht para objektit të ministrisë, ndërsa mbanin pankarta me mbishkrimet “Mos na leni pa bukë” dhe “Mbroni prodhimet vendore”.

Sipas Shoqatës, vendimi për protestë u mor unanimisht në mbledhjen e mbajtur më 5 korrik, pasi, siç thanë, institucionet nuk kanë reaguar ndaj shqetësimeve të tyre.

“Protesta është e pashmangshme me situatën e krijuar për mosgrumbullimin e qumështit të freskët nga fermat tona, duke hasur në vesh të shurdhër tek akterët kompetentë”, thuhej në njoftimin e shoqatës.

Fermerët kanë paraqitur tri kërkesa kryesore: rifillimin e menjëhershëm të grumbullimit të qumështit, publikimin urgjent të rezultateve të analizave për të larguar dyshimet mbi produktet vendore dhe rikthimin e çmimit të mëparshëm të qumështit, me qëllim që të shmanget falimentimi i fermave.

Protesta vjen pas zhvillimeve të javës së kaluar, kur Agjencia e Ushqimit dhe Veterinarisë (AUV) njoftoi se gjatë një inspektimi në kompaninë “Vita” kishte konstatuar mospërputhje me legjislacionin në fuqi, pas verifikimit të dokumentacionit, kontrollit fizik të objektit dhe inspektimit të linjave të prodhimit.

Një ditë pas inspektimit, kompania “Vita” njoftoi ndërprerjen e përkohshme të punës, ndërsa drejtori i përgjithshëm, Artan Spahija, tha se vendimi ishte marrë nga bordi i kompanisë.

Ndërkohë, Komisioni inspektues i AUV-së bëri të ditur se gjatë kontrollit është konstatuar se fabrika kishte shkelur vendimin e Ministrisë së Bujqësisë që ndalon përdorimin e qumështit pluhur, vajit të palmës, hirrës dhe përbërësve të tjerë në produktet e qumështit. Sipas AUV-së, rezultatet përfundimtare do të bëhen të ditura pas analizave laboratorike./A.K/

Një i ri nga Kosova është vrarë të dielën në mbrëmje në Suedi, në një ngjarje tragjike që, sipas familjarëve, lidhet me përplasjet mes grupeve kriminale.

Familja ka bërë të ditur se ai po ecte në lagje kur u godit nga plumbat e shkrepur gjatë një konflikti mes bandave rivale.

“Mbrëmë G… na la tragjikisht nga plumbat e konflikteve të bandave të shumta në Suedi. Duke ecur në lagje, ai u vra aksidentalisht nga qërimi i hesapeve mes bandave rivale”, thuhet në reagimin e familjarëve.

Rastin e kanë raportuar edhe mediat suedeze. Sipas Aftonbladet, autori i dyshuar lëvizte me biçikletë dhe fillimisht qëlloi një herë me armë zjarri ndaj viktimës.

Mediumi suedez shkruan më tej se, pasi i riu rreth të 20-ave kishte rënë në tokë, i dyshuari u kthye sërish me biçikletë dhe e qëlloi edhe një herë nga një distancë shumë e afërt, duke e përshkruar ngjarjen si një “ekzekutim të mirëfilltë”.

Sipas raportimeve, për rastin është arrestuar një i dyshuar nën moshën 18-vjeçare. Autoritetet suedeze nuk kanë bërë ende të ditur identitetin e viktimës dhe as motivin zyrtar të ngjarjes, ndërsa hetimet janë duke vazhduar.

D.L