Presidenti amerikan, Donald Trump, është kthyer më herët në Uashington nga samiti i Grupit të Shtatë shteteve më të industrializuara (G7), që është mbajtur në Kanada, për shkak se duhet të trajtojë “çështje të rëndësishme”, tha më 16 qershor zëdhënësja e Shtëpisë së Bardhë, Karoline Leavitt.

Njoftimi erdhi pak pasi Trump, përmes rrjeteve sociale, u bëri thirrje banorëve të Teheranit që të largohen menjëherë nga qyteti.

“Irani është dashur ta nënshkruajë ‘marrëveshjen’. U thashë ta nënshkruanin. Sa turp dhe sa humbje e jetës së njerëzve. Thënë thjesht: Irani nuk mund të ketë një armë bërthamore. E kam thënë vazhdimisht”, shkroi Trump në Truth Social. “Të gjithë duhet të evakuohen menjëherë nga Teherani!”.

Ushtria izraelite, më herët, lëshoi një njoftim duke u bërë thirrje banorëve të një qarku të Teheranit që të evakuohen.

Paralajmërimet vijnë në një kohë kur Izraeli ka intensifikuar sulmet ndaj Iranit, të cilat thotë se synojnë të shkatërrojnë objektet bërthamore të Republikës Islamike.

Para vendimit të tij për t’u larguar më herët nga samiti në Kanada, Trump u tha gazetarëve: “Sapo të largohem, ne do të bëjmë diçka. Por, më duhet të largohem”.

Presidenti i Francës, Emmanuel Macron, tha se, duke pasur parasysh qëllimin për të arritur një armëpushim në Lindjen e Mesme, largimi i Trumpit nga samiti i G7-ës është një zhvillim pozitiv, duke theksuar se amerikanët kanë ofruar të takohen me iranianët.

“Nëse Shtetet e Bashkuara arrijnë të sigurojnë një armëpushim, kjo është një gjë shumë e mirë“, u tha Macron gazetarëve.

Por, më vonë Trump iu përgjigj kësaj deklarate të Macronit, duke thënë se udhëheqësi francez gabimisht tha se ishte larguar nga samiti për të punuar për një armëpushim mes Izraelit dhe Iranit.

“Gabim! Ai nuk ka idenë pse po kthehem tani në Uashington, por me siguri nuk ka të bëjë fare me një armëpushim. Është diçka shumë më e madhe se kaq. Qoftë qëllimisht apo jo, Emmanuel gjithmonë gabon“, shkroi Trump në Truth Social.

Para largimit të Trumpit nga samiti, të shtatë udhëheqësit nënshkruan një deklaratë ku theksohej “rëndësia e mbrojtjes së civilëve”, pas rritjes së sulmeve që kanë shkaktuar viktima civile në të dyja vendet.

Udhëheqësit e G7-ës – Britania, Kanadaja, Franca, Gjermania, Italia, Japonia dhe SHBA-ja – gjithashtu thanë se Irani “kurrë nuk mund të ketë armë bërthamore” dhe se Izraeli “ka të drejtë të mbrojë veten”.

Në deklaratë thuhej se shpresohet të gjendet një zgjidhje për krizën iraniane, një zgjidhje “që çon drejt uljes së tensioneve në Lindjen e Mesme, përfshirë një armëpushim në Gazë”.

Janë ngritur pikëpyetje rreth përfshirjes së mundshme të SHBA-së në sulmet ndaj Iranit që nga vala e parë e bombardimeve të kryera nga Izraeli më 13 qershor. Presidenti amerikan ka përsëritur disa herë se Shtetet e Bashkuara nuk kanë qenë të përfshira në sulmet fillestare dhe ka refuzuar të deklarojë nëse do të marrin pjesë në të ardhmen.

I pyetur se çfarë do të duhej të ndodhte që SHBA-ja të përfshihej ushtarakisht në konflikt, Trump tha: “Nuk dua të flas për këtë”.

Izraeli ka shënjestruar disa objekte të programit bërthamor iranian, por nuk ka arritur ta shkatërrojë objektin për pasurimin e uraniumit në Fordou, i cili ndodhet thellë nën tokë dhe gjendet rreth 200 kilometra në jug të Teheranit. Sipas ekspertëve ushtarakë, që kanë folur për mediat amerikane, për ta eliminuar këtë objekt, Izraelit do t’i nevojitej një bombë amerikane që depërton në bunkerë, e cila mund të transportohet vetëm nga bombarduesi amerikan B-2, që është i pajisur me teknologji për shmangie të radarëve./REL

Izraeli njoftoi sot se ka “kontroll të plotë operativ ajror” mbi kryeqytetin iranian Teheran, katër ditë pasi nisi sulmet në vend, sipas BBC.

Forcat ajrore izraelite kryen një valë sulmesh gjatë natës, ndërsa media iraniane raportoi sot sulme të reja në perëndim të vendit.

Irani goditi Izraelin me një valë raketash gjatë natës. Disa raketa depërtuan në sistemin mbrojtës të Kupolës së Hekurt – ndërsa numri i të vrarëve në Izrael që nga e premtja është rritur në 24.

Ministria e Shëndetësisë e Iranit raportoi se të paktën 224 persona janë vrarë në sulmet izraelite që nga e premtja.

Izraeli filloi të sulmonte Iranin të premten, duke goditur objekte bërthamore, vende ushtarake dhe zona të populluara. Irani është përgjigjur me dronë dhe raketa balistike./atsh

Agjencia për mbrojtje civile në Gazë tha se të paktën 20 persona, që po prisnin për të marrë ndihma në jug të Gazës, u vranë nga trupat izraelite më 16 qershor.

Zëdhënësi i kësaj agjencie, Mahmud Bassal, tha për AFP-në se përveç 20 të vrarëve edhe më shumë se 200 persona u plagosën “pasi Izraeli hapi zjarr”, duke shtuar se të plagosurit janë dërguar në një spital fushor të Kryqit të Kuq në Han Junis dhe në spitalin Naser.

Bassal deklaroi se njerëzit ishin duke pritur për të arritur te një qendër për shpërndarjen e ndihmave në Rafah “kur forcat pushtuese hapën zjarr”.

Ushtria izraelite tha se po verifikon këto raportime.

Izraeli ka vendosur kufizime ndaj mediave ndërkombëtare në Gazë dhe raportimet për viktima nga agjencia për mbrojtje civile janë të pamundura të konfirmohen në mënyrë të pavarur.

Sipas agjencisë për mbrojtje civile në Gazë, dhjetëra palestinezë janë vrarë duke tentuar që të arrijnë në qendrat e shpërndarjes së ndihmave që ka ngritur Fondacioni Humanitar për Gazën (GHF) – grup që mbështetet nga Izraeli dhe Shtetet e Bashkuara dhe që ka nisur operimin në fund të majit.

Kjo agjenci raportoi për më shumë se 20 të vrarë edhe gjatë fundjavës.

Izraeli po përballet me trysni të madhe ndërkombëtare për shkak të kushteve humanitare në Gazë. Kombet e Bashkuara thanë në maj se Gaza është “vendi më i uritur në botë”.

OKB-ja dhe grupe të tjera të ndihmës kanë refuzuar të bashkëpunojnë me GHF-në për shkak të shqetësimeve se ky grup është krijuar për të ndihmuar Izraelin që të përmbushë synimet e tij ushtarake.

Lufta në Gazë filloi kur militantë të udhëhequr nga Hamasi – grupi palestinez i shpallur organizatë terroriste nga Shtetet e Bashkuara dhe Bashkimi Evropian – sulmuan jugun e Izraelit, duke vrarë 1.200 njerëz dhe duke marrë rreth 250 pengje. Izraeli thotë se 58 pengje mbeten në Gazë, megjithëse besohet se rreth 35 prej tyre janë të vdekur.

Që atëherë, lufta e Izraelit i ka vrarë më shumë se 55.000 njerëz në Gazë, shumë prej tyre gra dhe fëmijë, sipas zyrtarëve shëndetësorë palestinezë./REL

Shërbimi Sekret i Inteligjencës në Britaninë e Madhe (SIS), i njohur si MI6 (Inteligjenca Ushtarake, Seksioni 6), do të drejtohet nga një grua për herë të parë në historinë 116-vjeçare të shërbimit të inteligjencës së jashtme, sipas BBC.

Blaise Metreweli, e cila iu bashkua Shërbimit Sekret të Inteligjencës në vitin 1999, do të bëhet shefja e 18-të e organizatës duke zëvendësuar, Richard Moore.

Aktualisht, Metreweli është përgjegjëse për teknologjinë dhe inovacionin në M16.

Kryeministri britanik, Keir Starmer e cilesoi emërimin e saj si “historik” në një kohë kur puna e shërbimeve të inteligjencës ishte më e rëndësishme se kurrë.

MI6 është e ngarkuar me punën e inteligjencës jashtë vendit – për të përmirësuar sigurinë e BM-së, me qëllimet kryesore që janë ndalimi i terrorizmit, ndërprerja e aktiviteteve të shteteve armiqësore dhe forcimi i sigurisë kibernetike.

Shefi i saj, i njohur si “C”, është i vetmi anëtar i shërbimit – i emëruar publikisht.

Metreweli, 47 vjeç, është aktualisht Drejtoreshë e Përgjithshme “Q” – shefja e divizionit të rëndësishëm të teknologjisë dhe inovacionit – që synon të mbajë sekret identitetin e agjentëve sekretë – dhe të dalë me mënyra të reja për t’iu shmangur kundërshtarëve si mbikëqyrja biometrike e Kinës.

“MI6 luan një rol jetësor – së bashku me MI5 dhe GCHQ – në mbajtjen e popullit britanik të sigurt dhe promovimin e interesave të Britanisë së Madhe jashtë vendit”, tha ajo.

Metreweli, e cila studioi antropologji në Universitetin e Kembrixhit, më parë ka mbajtur pozicione në nivel drejtoreshe në MI5 – simotra e MI6, agjencia e sigurisë së brendshme – dhe e kaloi pjesën më të madhe të karrierës së saj duke punuar në Lindjen e Mesme dhe Evropë. /atsh