Lajmet

Izrael: Kriza e kostos së jetesës bëhet çështje zgjedhore

Është një problem për miliona izraelitë që kanë duruar rritjen e çmimeve për vite.

Published

2 years ago

October 29, 2022

UBT news

Talia, një grua krahët e së cilës janë të mbushur me tatuazhe, duket disi e pavend duke blerë në një supermarket me zbritje në Jerusalem që u shërben hebrenjve ultra-ortodoksë të veshur modest.

“Nuk kam zgjidhje tjetër veçse të vij këtu”, i tha AFP-së infermierja 32-vjeçare, ndërsa ajo diskuton vështirësitë financiare të familjes së saj në një kohë që çmimet e ushqimeve po rriten në Izrael.

Ajo shqetësohet nëse do të mund të ushqejë dy fëmijët e saj edhe pse ajo dhe burri i saj, i cili riparon pajisje shtëpiake, “punojnë si të çmendur”, përfshirë turneun e natës dhe fundjavës.

“Nuk mund ta bëjmë më”, thotë ajo e zhgënjyer ndërsa mbushte karrocën e saj me pako makarona, duke shmangur artikujt më të shtrenjtë.

Është një problem për miliona izraelitë që kanë duruar rritjen e çmimeve të konsumit për vite, duke mos përfituar nga një epokë e rritjes së shpejtë ekonomike.

Pjesa më e madhe e botës ka parë inflacion të shpejtë që nga fillimi i luftës së Rusisë në Ukrainë në fillim të këtij viti, duke rritur çmimet e energjisë dhe ushqimeve kudo.

Por në Izrael, problemi ka qenë i pranishëm prej vitesh.

Tel Avivi, me çmimet e tij në rritje të pronave, u rendit qyteti më i shtrenjtë në botë nga revista Economist vitin e kaluar dhe zemërimi i zjarrtë mbi kostot dhe pabarazia e të ardhurave është veçanërisht i përhapur.

Izraeli, me politikën e tij të trazuar, kthehet në qendrat e votimit të martën e ardhshme, për zgjedhjet e pesta të përgjithshme në më pak se katër vjet.

Historikisht, modelet e votimit në Izrael janë formësuar nga përkatësia fetare dhe etnike dhe, më e rëndësishmja, nga pikëpamjet mbi konfliktin palestinez.

Por këtë herë, përpara votimit të 1 nëntorit, kriza e kostos së jetesës është bërë një çështje kryesore për kandidatët, përfshirë kryeministrin Yair Lapid dhe liderin e opozitës Benjamin Netanyahu.

Të dy kanë premtuar veprime për të korrigjuar problemin.

Rami Levy, pronari i një rrjeti të njohur supermarketesh që e konsideron veten me kosto të ulët, i tha AFP-së se shitjet e tij janë rritur me 15 për qind gjatë vitit të kaluar pasi fituesit e klasës së mesme kanë kërkuar gjithnjë e më shumë ushqim më të lirë.

“Me rritjen e çmimeve, njerëzit që dikur ishin në gjendje të blinin më afër shtëpisë po vijnë tek ne sepse e dinë se është më e lirë”, tha Levy.

Aron Troen, i cili jep mësim në Shkollën e Shëndetit Publik të Universitetit Hebraik të Jerusalemit, theksoi se edhe familjet e klasës së mesme po përballen me presione të sigurisë ushqimore dhe se ushqimi i shëndetshëm është bërë më pak i përballueshëm.

“Kur ka inflacion të shpejtë në çmimet e ushqimeve dhe pagat nuk mbajnë ritmin, klasa e mesme duhet të shpenzojë më shumë, jo vetëm për ushqime, por për qira, transport, gaz dhe arsim”, tha ai.

Ai vuri në dukje se shumë familje përballen me “vështirësi për të marrë ushqim të shëndetshëm… Njerëzit fillojnë duke ndryshuar atë që hanë, pastaj cilësinë e asaj që hanë dhe më pas fillojnë të anashkalojnë vaktet ose vetëm të ushqejnë fëmijët e tyre”.

Vetëm disa ditë përpara zgjedhjeve, Benshoshan shprehu shpresën se politikanët do t’i bënin vështirësitë e klasës së mesme një fokus në të ardhmen.

“Do të doja që ata të mendojnë për ne, qytetarët e thjeshtë, që punojmë shumë dhe të cilëve nuk u janë rritur rrogat, që kemi fëmijë, që paguajmë taksat, që kemi kryer shërbimin civil apo ushtarak”, tha ajo.

“Ne meritojmë një jetë më të lehtë… Ne jemi shtresa e mesme që me të vërtetë ka filluar të shpërbëhet. Shpresoj se ata do të na dëgjojnë”./UBTNews/

Lajmet

Reforma e asistencës sociale, lansohet masa për mbështetjen e punësimit

Published

18 mins ago

November 15, 2024

UBTnews

Masa për mbështetjen e punësimit për anëtarët e aftë për punë të familjeve përfituese nga pilotimi i reformës së asistencës sociale, do të lansohet sot.

Në këtë ngjarje që nis në orën 13:00 marrin pjesë kryeministri Albin Kurti, dhe ministri i Financave, Punës dhe Transfereve, Hekuran Murati. Po ashtu i pranishëm do të jetë edhe drejtori i Bankës Botërore për Kosovë dhe Maqedoninë e Veriut, Massimiliano Paolucci.

Lajmet

Rexhbeçaj: Do të luajmë të bashkuar

Published

25 mins ago

November 15, 2024

UBTnews

Mesfushori i Kosovës, Elvis Rexhbeçaj, theksoi rëndësinë e kontrollimit të lojës në mesfushë dhe angazhimin e të gjithë ekipit për të fituar kundër Rumanisë.

“Stërvitjet kanë shkuar shumë mirë këtë javë. Besoj se jemi gati, e dimë se çfarë atmosfere na pret, por ne jemi futbollistë profesionistë të gjithë, jemi të përgatitur 100 përqind për ndeshjen kundër Rumanisë. Na duhet që ta kontrollojmë lojën në mesfushë, por duhet të gjithë të luftojmë së bashku, pasi kemi ekip shumë cilësor në ofensivë. Do të luajmë të bashkuar në mënyrë që ta dominojmë lojën”, tha Rexhbeçaj, duke premtuar se do të japë maksimumin për fitoren e Kosovës.

Në Grupin C2 të Ligës së Kombeve, Rumania kryeson me 12 pikë, ndërsa Kosova e ndjek me 9 pikë. Për të fituar grupin dhe për të avancuar në Ligën B, Kosovës i nevojitet një fitore më e thellë se 3:0 kundër rumunëve. Ndeshja vendimtare do të zhvillohet nesër në ora 20:45.

Lajmet

Malishevë, arrestohen tetë persona të mitur të përfshirë në një rrahje

Published

54 mins ago

November 15, 2024

UBTnews

Policia e Kosovës ka njoftuar se të enjten në Malishevë, janë arrestuar tetë persona të mitur të cilët ishin përfshirë në një rrahje mes vete.

Sipas policisë në këtë rast dyshohet se janë përdorur edhe armë zjarri.

“Dyshohet se është përdorur edhe armë zjarri, pasi që në vendin e ngjarjes është gjetur dhe sekuestruar një gëzhojë dhe një predhë e pistoletës me gaz”, thuhet në njoftim.

Policia ka bërë me dije se të lënduarve i është ofruar tretman mjekësor, derisa me vendim të prokurorit të dyshuarit janë dërguar në mbajtje.

Lajmet

Trump emëron Robert F. Kennedy Jr. në krye të Departamentit të Shëndetësisë

Published

58 mins ago

November 15, 2024

UBTnews

Presidenti i sapozgjedhur, Donald Trump, thotë se do të emërojë zotin Robert F. Kennedy Jr. në krye të Departamentit të Shëndetësisë dhe Shërbimeve Njerëzore (HHS), agjenci që ka një shtrirje të gjerë, që nga mbikëqyrja e ilaçeve, vaksinave dhe sigurisë ushqimore, e deri tek kërkimet shkencore në fushën e mjekësisë dhe programet e kujdesit shëndetësor.

“Për një kohë të gjatë, amerikanët janë dëmtuar nga industria ushqimore dhe e prodhimit të ilaçeve, të cilat janë përfshirë në manipulime, keqinformime dhe dezinformime, kur bëhet fjalë për shëndetin publik”, tha zoti Trump në një postim në rrjetin TruthSocial ndërsa njoftoi emërimin e zotit Kennedy. Ai tha se: “Kennedy do ta bëjë Amerikën përsëri të madhërishme dhe të shëndetshme!”

Zoti Kennedy, një ish demokrat që kandidoi si i pavarur në garën presidenciale të këtij viti, i dha fund fushatës së tij duke shprehur mbështetjen për republikanin Donald Trump me premtimin për të patur një rol në politikën shëndetësore të administratës së ardhshme republikane.

Që nga ajo kohë, ai dhe zoti Trump i kanë shtuar lidhjet, ndërsa zoti Kennedy u përshëndet me duartrokitje të forta gjatë tubimeve të republikanit Trump.

Një skeptik i kahershëm ndaj vaksinave, zoti Kennedy është një avokat që për dekada me radhë ka krijuar një bazë të gjerë mbështetësish që e admirojnë punën e tij për mjedisin, duke ngritur padi kundër kompanive të mëdha farmaceutike dhe të prodhimit të plehrave kimike që përdoren në bujqësi. Ai ka bërë thirrje për rregulla më të rrepta lidhur me përbërësit në artikujt ushqimor.

Ndërsa u përfshi në fushatën e republikanit Donald Trump, zoti Kennedy u përpoq të fitonte mbështetjen e nënave të reja, me mesazhin për ushqime më të shëndetshme në Shtetet e Bashkuara. Ai premtoi se do të ndiqte shembullin e rregullave evropiane për ushqimet. Ai nxori sloganin “Ta Bëjmë Amerikën të Shëndetshme Përsëri”.

Gjatë mandatit të parë, Presidenti Trump eliminoi shumë rregulla për industritë e mëdha, përfshirë atë të ushqimit, çka mund të bjerë ndesh me synimet e zotit Kennedy për të bërë shtrëngime kur flitet për përbërësit ushqimor. Gjatë kohës në Shtëpinë e Bardhë, zoti Trump bëri thirrje për më pak inspektime në industrinë e mishit.

Qëndrimi i zotit Kennedy ndaj vaksinave e ka bërë atë një figurë të debatueshme mes demokratëve dhe disa republikanëve, çka ngre pikëpyetje në lidhje me mundësinë e marrjes së konfirmimit në Senatin e kontrolluar nga republikanët.

Zoti Kennedy ka thënë se do të rekomandojë heqjen e fluorit nga uji i pijshëm. Shtimi i fluorit, sipas ekspertëve, shërben për të mbrojtur dhëmbët.