Policia e Kosovës ka njoftuar se gjatë 24 orëve të fundit janë regjistruar tre raste të dhunës në familje në rajone të ndryshme të vendit. Si pasojë e këtyre rasteve, tre persona janë arrestuar, ndërsa dy viktima kanë pranuar tretman mjekësor.

Sipas raportit 24-orësh të Policisë, incidentet kanë ndodhur në Podujevë, Klinë dhe Rahovec:

Në Podujevë është arrestuar një i dyshuar burrë nën dyshimin se ka ushtruar dhunë ndaj një viktime grua. Palët janë shoqëruar në stacionin policor dhe, pas inicimit të rastit me urdhër të prokurorit, janë liruar në procedurë të rregullt.

Ndërsa në Klinë pas një mosmarrëveshjeje, një i dyshuar burrë ka ushtruar dhunë ndaj një viktime po ashtu burrë. Viktima ka pësuar lëndime dhe është dërguar për trajtim mjekësor. Me vendim të prokurorit, i dyshuari është dërguar në mbajtje.

Ngjashëm, edhe në Rahovec pas një mosmarrëveshjeje familjare, është arrestuar një i dyshuar burrë për dhunë ndaj një viktime tjetër burrë. Viktima ka pranuar tretman mjekësor, ndërsa i dyshuari, pas intervistimit me vendim të prokurorit, është dërguar në mbajtje. /E.A/

Në kuadër të festivalit më të madh në Evropën Juglindore, Global UBT Fest 2026, Fakulteti i Menaxhmentit, Biznesit dhe Ekonomisë në UBT hapi zyrtarisht punimet e Akademisë Verore për Ekonomi, Financa, Banka dhe Sigurime.

Ceremonia e hapjes u udhëhoq nga koordinatori i kësaj akademie, Prof. Kestrim Avdimetaj, i cili theksoi rëndësinë e këtij programi veror për të gjithë pjesëmarrësit. Në fjalën e tij, ai nënvizoi rolin e akademisë në ndërlidhjen e njohurive teorike me praktikat bashkëkohore të ekonomisë dhe industrisë, duke krijuar mundësi të vlefshme për zhvillim profesional, shkëmbim të përvojave dhe fuqizim të kompetencave të studentëve dhe të rinjve pjesëmarrës.

Në kuadër të aktiviteteve të akademisë, Gazmend Selmani mbajti një ligjëratë mbi fintech-un dhe inovacionin financiar, duke prezantuar modelin IBAS si një shembull të suksesshëm të transformimit digjital të shërbimeve financiare në Kosovë. Gjatë prezantimit u trajtuan trendet bashkëkohore në industrinë fintech, roli i teknologjisë dhe i të dhënave në krijimin e vlerës, menaxhimi i rrezikut dhe përputhshmëria me rregulloret, si dhe mundësitë profesionale që ky sektor dinamik ofron për studentët dhe profesionistët e rinj.

Po ashtu, Prof. Ermal Lubishtani mbajti ligjëratën me temën “Green Investment Landscape in Kosovo: Opportunities, Gaps, and the Road Ahead for Climate-Smart FDI”. Gjatë ligjëratës u trajtuan trendet aktuale të investimeve të gjelbra, rëndësia e tyre për zhvillimin ekonomik të qëndrueshëm të Kosovës, si dhe sfidat dhe mundësitë për tërheqjen e investimeve të huaja të drejtpërdrejta, të orientuara drejt tranzicionit të gjelbër dhe zhvillimit të qëndrueshëm.

Një kontribut të veçantë në kuadër të Akademisë Verore dha edhe ekonomisti i njohur dhe ish-kryetari i Odës Ekonomike të Kosovës, Prof. Safet Gërxhaliu, i cili mbajti një ligjëratë mbi rëndësinë e stabilitetit politik si një parakusht thelbësor për zhvillimin e qëndrueshëm ekonomik të vendit. Ai theksoi se një mjedis politik i qëndrueshëm krijon kushtet e nevojshme për tërheqjen e investimeve, rritjen e konkurrueshmërisë së ekonomisë, fuqizimin e institucioneve dhe përmirësimin e klimës së biznesit. Gjithashtu, ai vuri në pah lidhjen e ngushtë ndërmjet stabilitetit politik, zbatimit të reformave dhe avancimit të procesit të integrimit evropian të Kosovës.

Në vijim të programit, prof. Shpresim Vranovci mbajti një ligjëratë me temën “Asetet Digjitale, Blockchain dhe e Ardhmja e Sektorit Bankar”, duke trajtuar transformimin që teknologjitë e reja po sjellin në sistemin financiar global. Ai theksoi potencialin e teknologjisë blockchain për rritjen e sigurisë, transparencës dhe efikasitetit të transaksioneve financiare, si dhe ndikimin e saj në zhvillimin e aseteve digjitale dhe të shërbimeve inovative bankare. Gjatë prezantimit u diskutuan gjithashtu sfidat dhe mundësitë që këto zhvillime paraqesin për institucionet financiare, si dhe rëndësia e përshtatjes së sektorit bankar me trendet e ekonomisë digjitale dhe financave të së ardhmes.

Akademia Verore për Ekonomi, Financa, Banka dhe Sigurime do të vazhdojë me aktivitete të shumta akademike dhe profesionale, duke ofruar një platformë të rëndësishme për shkëmbimin e njohurive, diskutimin e sfidave bashkëkohore dhe promovimin e ideve inovative në fushën e ekonomisë dhe financave.

Policia e Kosovës ka nisur hetimet për dy raste të ndara të vdekjeve që kanë ndodhur gjatë ditës së djeshme në rajonin e Prizrenit dhe atë të Dragashit.

Trupat e pajetë të viktimave janë dërguar për obduksion për të zbardhur shkaqet e vdekjes.

Në qytetin e Prizrenit, rreth orës 14:15, një grua është gjetur pa shenja jete brenda banesës së saj.

“Në vendin e ngjarjes kanë dalë njësitet përkatëse policore, ndërsa ekipi mjekësor ka konstatuar vdekjen e viktimës. Me vendim të prokurorit, trupi i pajetë është dërguar në Institutin e Mjekësisë Ligjore (IML) për obduksion,” thuhet në raportin e policisë. Rastit i është dhënë kualifikimi “Hetim i vdekjes”.

Një tjetër rast i “Hetimit të vdekjes” është regjistruar edhe në komunën e Dragashit. Sipas policisë, atje është gjetur pa shenja jete një burrë.

Edhe në këtë rast, vdekjen e tij e ka konstatuar ekipi mjekësor në vendngjarje dhe me urdhër të prokurorit trupi është dërguar menjëherë në IML për obduksion, deri në sqarimin e plotë të rrethanave të ngjarjes. /E.A/

Kryeqyteti ukrainas është përballur me një tjetër valë të përgjakshme sulmesh, ku të paktën nëntë persona kanë humbur jetën. Ekipet e shpëtimit në Kiev po garojnë me kohën për të nxjerrë të mbijetuarit nën rrënojat e ndërtesave të banimit që u shkatërruan pjesërisht nga raketat balistike ruse.

Shefi i administratës ushtarake të Kievit, Timur Tkachenko, njoftoi se nga ky sulm — i dyti masiv brenda një jave — kanë mbetur të plagosur edhe 46 persona të tjerë, në mesin e të cilëve janë të paktën pesë fëmijë.

Kjo goditje e radhës nga Moska vjen në një moment tejet të ndjeshëm politik, pikërisht në prag të Samitit të NATO-s që po mbahet në Turqi. Në këtë samit, presidenti ukrainas Volodymyr Zelensky pritet të zhvillojë bisedime të rëndësishme ballë për ballë me presidentin amerikan, Donald Trump.

Vetëm pak orë para se raketat të goditnin qytetin, Zelensky kishte paralajmëruar publikisht se inteligjenca ukrainase kishte sinjale për një “sulm masiv”, pas bombardimeve të përgjakshme të së enjtes që lanë 30 të vrarë.

Kryetari i Kievit, Vitali Klitschko, bëri të ditur se raketat ruse shënjestruan lagje të banuara, duke shkaktuar zjarre të mëdha në disa komplekse apartamentesh, si dhe duke dëmtuar depo e punishte mekanike. Pamjet e publikuara nga vendngjarja tregojnë një situatë apokaliptike: rrënoja në flakë, makina të shkrumbuara dhe ekipe emergjente që po gërmojnë pa ndalur për të gjetur qytetarët e bllokuar. /Reuters/ /E.A/