Lajmet
Ish-drejtori i Krimeve të Rënda thotë se nga hetuesit kishte dëgjuar se nxitës për vrasjen e Triumf Rizës kishte qenë Enver Sekiraqa
Published
5 years agoon
By
Betim GashiIsh-drejtori i Krimeve të Rënda në Policinë e Kosovës, Latif Merovci ka thënë se kryesi i vrasjes së Triumf Rizës ka qenë i panjohur derisa njësitet kishin qenë në vendngjarje, ndërsa nga hetuesit kishte dëgjuar se nxitës i kësaj vrasje ishte Enver Sekiraqa.
Një deklaratë të tillë Merovci e ka dhënë në seancën e mbajtur të hënën, në rastin ku Enver Sekiraqa akuzohet akuzohet për nxitje të vrasjes së Triumf Rizës, raporton “Betimi për Drejtësi”.
Duke u përgjigjur në pyetjet e prokurorit special Haki Gecaj, dëshmitari Latif Merovci, ka thënë se në vitin 2007, kur kishte ndodhur vrasja e Rizës, ai kishte pasur pozitën e drejtorit të hetimit të krimeve të rënda.
“Vrasja ka qenë para orës 16:00, ai është edhe orari i rregullt i yni edhe pse ne punojmë edhe pas kësaj ore, jemi njoftuar ose prej qendrës operative qendrore ose prej njësiteve të hetimeve rajonale, apo edhe nga radio-lidhja”, ka thënë dëshmitari.
Dëshmitari Merovci tha se pas njoftimit se kishte ndodhur vrasja e ish-zyrtarit policor Triumf Riza, togeri Fadil Gashi dhe hetuesit e sektorit të krimeve të rënda kishin dalë në vendin e ngjarjes, ndërsa ai personalisht tha se nuk kishte qenë në vendin e ngjarjes.
I pyetur se a është njoftuar prokurori për këtë rast, dëshmitari ka thënë se fillimisht në vendin e ngjarjes kanë dalë njësitë e stacionit policor, njësitë rajonale të Prishtinës, ekipi i sektorit të krimeve të rënda, ndërsa sipas tij, prokurori Osman Mehmeti ka qenë në vendin e ngjarjes, por tha se nuk ka njohuri se kush e kishte njoftuar.
Dëshmitari deklaroi se derisa njësitet kishin qenë në vendin e ngjarjes, nga njoftimet që i kishte marrë nga togeri Fadil Gashi, kryesi i veprës penale ka qenë i panjohur.
“Më është thënë se kryesi i veprës penale të vrasjes ka shtënë me armë në drejtim të viktimës dhe është larguar me shpejtësi, dyshimet kanë qenë që kryesi ka dalë për ta vrarë viktimën, ngase nuk ka pasur asnjë konflikt verbal apo fizik në mes të kryesit dhe viktimës”, ka thënë dëshmitari.
Sipas tij, njëri prej dëshmitarëve okular ka bërë një fotografi në drejtim të kryesit të vrasjes.
I pyetur nga prokurori se në vendin e ngjarjes a janë bërë propozime që të bëhen bastisje, dëshmitari ka thënë se leje për kontroll dhe bastisje nuk është kërkuar ngase nuk duhet domosdo.
“Nga vendi i ngjarjes, togeri Fadil Gashi më ka njoftuar se sipas vlerësimit të ekipit hetimor nga informacionet e mbledhura në vendin e ngjarjes, në bashkëpunim me prokurorin, do të kryen disa bastisje”, ka thënë dëshmitari Merovci.
Sipas dëshmitarit, e kishin njoftuar se ishte parë të arsyeshme që të bëhen disa bastisje si: në lokalin e Enver Sekiraqës, shtëpinë, objekteve përcjellëse, si dhe disa të dyshuarve të tjerë.
Ai ka thënë se i është kërkuar që nga gjyqtari i procedurës paraprake të kërkohet urdhri verbal.
“Prokurori me ekipin hetimor kanë vlerësuar të kryhen disa bastisje dhe kanë kërkuar nga unë që të kontaktoj me gjyqtaren e procedurës paraprake Drita Hoxha dhe ta marr urdhrin verbal për bastisje”, ka thënë dëshmitari Merovci.
Merovci tha se pas kësaj kërkese, kishte kontaktuar gjyqtaren Hoxha dhe nga ajo ka marrë urdhrin verbal për bastisje dhe pas marrjes së këtij urdhri tha se ia kishte komunikuar menjëherë togerit Gashi dhe prokurorit Mehmeti.
Prokurori Gecaj ia prezantoi dëshmitarit katër procesverbale të bastisjes, në tri prej tyre figuron se bastisja është kryer me urdhrin e gjyqtares Drita Hoxha, kurse në njërin procesverbal nuk është shënuar fare emri i gjyqtarit.
“Shumë njësi kanë qenë të angazhuara për kryerjen e bastisjeve, andaj ngatërrimi i emrit apo mos shkruarja e tij mund të jetë rezultat se kanë qenë shumë njësi të angazhuara dhe hetuesi ka mundur të mos e shkruajë”, është përgjigjur dëshmitari Merovci.
Sipas dëshmitarit, ai personalisht ka qenë në afërsi të vendit të ngjarjes, por jo në pjesën e cila ka qenë e rrethuar me shirit, si dhe në afërsi të lokalit Sekiraqa.
Dëshmitari e arsyetoi shkuarjen e tij në afërsi të lokalit Sekiraqa me informacionet në teren se Enver Sekiraqa mund të jetë kryes i mundshëm i kësaj vrasjeje, pasi sipas tij, ka ekzistuar një historik i konfliktit në mes të ndjerit Riza dhe të akuzuarit Sekiraqa.
“Jam njoftuar nga hetuesit se personi i dyshimtë që mund ta ketë kryer këtë vrasje është Enver Sekiraqa”, ka thënë dëshmitari.
Pasi dëshmitari ka deklaruar se pesë minuta sa kishte qëndruar në afërsi të lokalit Sekiraqa nuk ka qenë në dijeni se çfarë veprimesh po ndërmerrnin njësitet policore, mbrojtësja e Sekiraqës, avokatja Kosovare Kelmendi e pyeti se a do të thotë kjo se njësitet policore kanë hyrë në lokalin Sekiraqa akoma pa e siguruar urdhëresën verbale nga gjykata.
“Nuk do të thotë ashtu, jo domosdo, nuk do të thotë se nuk kanë pasur urdhër verbal kur kanë hyrë njësitë”, është përgjigjur dëshmitari.
Por, avokatja Kosovare Kelmendi, e pyeti dëshmitarin lidhur me një raport të vendit të ngjarjes, ku sipas këtij raporti figuron se bastisja në lokalin Sekiraqa ka ndodhur para se të jepet urdhri verbal nga gjyqtari i procedurës paraprake.
“Bastisja kërkon urdhër, ndërsa shikimi i vendit të ngjarjes nuk kërkon urdhër. Çka kanë bërë njësitë tjera policore, bastisje nuk besoj dhe nuk ka filluar pa marrë urdhër verbal nga gjyqtari i procedurës paraprake. Kjo nuk nënkupton që nuk është ndalë dikush në qytet, nuk është pyetur dikush si dëshmitar, nuk është arrestuar ndonjë prej të arrestuarve, por bastisja me njohuri që kam është kryer pas urdhrit verbal”, është përgjigjur dëshmitari Merovci.
Avokatja Kelmendi e pyeti dëshmitarin se çka ka kërkuar policia një orë e 15 minuta pas vrasjes së të ndjerit Riza, në lokalin Sekiraqa, kur në atë kohë as për hetuesit në teren e as për dhomën e incidentit, akoma nuk ka qenë i identifikuar ndonjë i dyshuar për këtë vrasje.
“Nuk ka qenë i identifikuar kryesi i veprës orën e parë pas vrasjes, por policia nuk ka mundur me ndejt pa bë asnjë veprim, me bë “sehir”, mos me marrë asnjë dëshmitar”, ka thënë dëshmitari.
Por, avokatja Kelmendi ka thënë se në shkresat e lëndës nuk ekziston as edhe një dëshmitar okular i cili e ka parë ngjarjen, përveç një dëshmitari që e ka fotografuar të dyshuarin duke ikur, dhe e pyeti dëshmitarin se cilat ishin indiciet që policinë e drejtuan në lokalin Sekiraqa, akoma pa e zbuluar kryesin.
“Këto pyetje mund t’ua parashtroni hetuesve dhe përgjegjësve që kanë qenë të kyçur në këtë rast”, ka qenë përgjigjia e dëshmitarit.
Avokatja e pyeti dëshmitarin lidhur me procesverbalin e bastisjes së lokalit Sekiraqa, në të cilin nuk figuron emri i gjyqtarit të procedurës paraprake, si dhe sipas saj, ora e batisjes është 19:15 minuta, ndërsa përfundimi në 19:45 minuta, ndërkaq në raportin e teknikës kriminalistike, sipas avokates, është konstatuar se në lokalin Sekiraqa kanë arritur në ora 18:50 minuta, ndërsa në fotoalbum figuron koha 17:40 minuta.
“Të gjitha këto pyetje mund t’ua parashtroni hetuesve. Ka mundur që kushdo që e ka përpiluar procesverbalin që nuk figuron emri i gjyqtarit, nuk iu ka kujtuar emri i gjyqtares dhe për atë ka mundur të mos shënohet”, është përgjigjur dëshmitari.
Por, avokatja Kelmendi e pyeti dëshmitarin se edhe në një tjetër procesverbal, në të cilin figuron emri i gjyqtarit, nuk është emri dhe nënshkrimi i hetuesve policorë.
“Mund t’i kontaktoni hetuesit dhe ata do ju japin sqarime. Besoj që emrat e hetuesve që kanë pjesë në bastisje duhet të jenë të shkruar”, është përgjigjur dëshmitari Merovci.
Dëshmitari ka thënë se emri i Arben Berishës, i cili edhe e kishte pranuar se e kishte privuar nga jeta të ndjerin Riza ishte i njohur për policinë.
Ai ka thënë se si udhëheqës i hetimeve për vrasjen e Rizës, nuk i ishte paraqitur asnjë vërejtje për ndonjërin nga hetuesit policor.
Dëshmitari shtoi se sipas informacioneve, i ndjeri ka qenë duke u përcjellë edhe më herët para se të vritet, raporton “Betimi për Drejtësi”.
I pyetur nga kryetari i trupit gjykues, gjykatësi Agim Kuçi se a ka dëgjuar nga dikush se Enver Sekiraqa e ka nxitur vrasjen e të ndjerit Riza, dëshmitari ka thënë se nga hetuesit kishte dëgjuar se nxitës i kësaj vrasje ishte Sekiraqa. Seanca e radhës pritet të mbahet me 8 shtator 2021.
Sekiraqa për të njëjtin rast ishte dënuar edhe më 17 maj 2016, për dy vepra penale për “nxitje në kryerje të vrasjes së rëndë” dhe për veprën “detyrimi” me dënim unik prej 37 viteve burgim, kurse ishte liruar për veprën penale “dhunimi”.
Gjykata e Apelit, më 24 tetor 2017, kishte mbajtur një seancë dëgjimore lidhur me caktimin e masës së sigurisë ndaj Enver Sekiraqës, pasi e njëjta gjykatë më 19 tetor, në orët e mbrëmjes, e kishte liruar nga paraburgimi atë dhe ndaj tij kishte shqiptuar masën e arrestit shtëpiak.
Për ndryshimin e masës së sigurisë ndaj tij, kishin votuar tri gjykatëset e Apelit, dy nga radhët e EULEX-it, Elka Ermenkova dhe Anna Adamska-Gallant, si dhe gjykatësja vendore Mejreme Memaj.
Por, kjo gjykatë, pas vetëm dy ditësh, kishte vendosur që sërish ta rikthejë në paraburgim, Enver Sekiraqën dhe për këtë, shkak ishte bërë një fotografi e publikuar në rrjetin social, nga miqtë që e kishin vizituar atë pas lirimit nga paraburgimi.
Me këtë, gjykata e shkallës së dytë, kishte vlerësuar se Enver Sekiraqa ka shkelur masën e arrestit shtëpiak, që i ishte caktuar.
Ndryshe, në seancën e Gjykatës së Apelit, e cila ishte mbajtur me 6 shtator 2017, ku ishin shqyrtuar pretendimet ankimore të palëve, Enver Sekiraqa, kishte kërkuar që të lirohet nga paraburgimi dhe të mbrohet në liri.
E si garancion për lirimin e tij, Sekiraqa kishte ofruar pasurinë e tij, përfshirë shtëpinë, lokalin dhe një shumë parash, të cilat kishte thënë se do t’i mblidhte me ndihmën e familjes.
Prokurorja ndërkombëtare e Prokurorisë së Apelit, Anca Stan, në seancën e 6 shtatorit të kolegjit të Apelit, kishte deklaruar se përveç pretendimeve në ankesë nuk kishte çfarë të shtonte tjetër, por e njëjta kishte thënë se kërkesa e palës mbrojtëse që të përjashtohen disa nga provat kruciale janë të gabuara.
Në prill të vitit 2014, Prokuroria Speciale e Republikës së Kosovës kishte ngritur aktakuzë ndaj Enver Sekiraqës për tri vepra penale, për nxitje në vrasjen e Triumf Rizës, “detyrim” dhe “dhunim”, ku për këtë të fundit, gjykata e shkallës së parë e kishte shpallur të pafajshëm.
Prokuroria pretendon se incidenti i ndodhur në “Swiss Casino” në mes të Sekiraqës dhe Rizës ishte njëri nga motivet që çuan në vrasjen e Triumf Rizës.
Incidenti në “Swiss Casino”, kishte ndodhur në dhjetorin e vitit 2006, ndërsa në të ishin të përfshirë Enver Sekiraqa dhe disa shoqërues të tij në njërën anë, dhe i ndjeri Triumf Riza e Arben Selmani në anën tjetër. Në këtë incident i plagosur rëndë kishte mbetur Arben Selmani.
Triumf Riza u vra më 30 gusht të vitit 2007, vrasje për të cilën Arben Berisha është dënuar me 35 vjet burg, ndërsa Enver Sekiraqa me 37 vjet.
You may like
lajme
Rektori i UBT-së, Prof. Dr. Edmond Hajrizi, merr pjesë në Asamblenë e Përgjithshme Vjetore të Asociacionit të Universiteteve të Ballkanit në Prizren
Published
13 hours agoon
November 21, 2026By
UBTNews
Rektori i UBT-së Prof. Dr. Edmond Hajrizi, mori pjesë në Asamblenë e Përgjithshme Vjetore të Asociacionit të Universiteteve të Ballkanit (BAUNAS), e cila u mbajt sot në Prizren, duke riafirmuar angazhimin e UBT-së në bashkëpunimin dhe ndërkombëtarizimin e arsimit të lartë në rajon dhe më gjerë.
Gjatë punimeve të Asamblesë u diskutuan dhe u miratuan çështje me rëndësi për funksionimin dhe zhvillimin e asociacionit, përfshirë pranimin e anëtarëve të rinj dhe votimin e rregullores së re. Takimi shërbeu gjithashtu si një mundësi e rëndësishme për shkëmbimin e përvojave dhe forcimin e bashkëpunimit ndërmjet universiteteve anëtare.

Në kuadër të këtij aktiviteti, rektori Hajrizi zhvilloi takime me përfaqësues të universiteteve të ndryshme anëtare, përfshirë rektorin dhe sekretarin e përgjithshëm të Universitetit Trakya, si dhe përfaqësues të tjerë akademikë. Gjatë këtyre takimeve u diskutuan mundësitë e bashkëpunimit në fusha të ndryshme akademike, zhvillimi i projekteve të përbashkëta, shkëmbimi i stafit dhe studentëve, si dhe krijimi i partneriteteve të reja ndërinstitucionale.
UBT është anëtar i rregullt i Asociacionit të Universiteteve të Ballkanit prej disa vitesh dhe merr pjesë aktive në aktivitetet dhe iniciativat e tij. Përveç këtij asociacioni, UBT është pjesë edhe e rrjeteve dhe organizatave të rëndësishme ndërkombëtare të arsimit të lartë, përfshirë Asociacionin e Universiteteve Evropiane (EUA), Magna Charta Universitatum dhe UNIMED-in.

Pjesëmarrja e UBT-së në këto platforma ndërkombëtare dëshmon angazhimin e vazhdueshëm të institucionit për zgjerimin e bashkëpunimit akademik, shkëmbimin e njohurive dhe përvojave, si dhe krijimin e mundësive të reja për studentët dhe stafin akademik.

Përmes pjesëmarrjes aktive në asociacione dhe rrjete ndërkombëtare, UBT vazhdon të kontribuojë në avancimin e arsimit të lartë, forcimin e lidhjeve akademike rajonale dhe ndërkombëtare dhe zhvillimin e partneriteteve strategjike me universitete nga vende të ndryshme.

Kujtesë
Ditari: Lajmet kryesore që shënuan datën 21 nëntor 1992-1998?
Published
17 hours agoon
November 21, 2026By
UBTNews
Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1992-1998.
21 nëntor 1994
Gazeta suedeze “Folket”: Republika e Kosovës duhet të njihet si shtet sovran
Më 17 nëntor e përdithmja suedeze “Folket” nga qyteti Eskilstuna botoi një artikull me titull “Republika e Kosovës duhet të njihet si shtet sovran”.
Artikulli bën fjalë për historinë, traditat, kulturën dhe gjuhën shqipe dhe vazhdon me një pasqyrë të okupimit të Kosovës në vitin 1989 nga ana e Serbisë.
Shqiptarët, thuhet më tej në artikull, u përjashtuan nga puna për shkak të përkatësisë kombëtare, ata po vriten, burgosen, ndiqen, keqtrajtohen, helmohen; kundër tyre po aplikohet politikë e hapët e aparteidit dhe si pasojë e të gjitha këtyre po bëhet pastrimi etnik i shqiptarëve nga trojet e tyre.
Më tej në artikull bëhet fjalë për mençurinë e shqiptarëve në organizimin e partive politike, arsimit, shëndetësisë, ekonomisë së vogël, sistemit të shpërndarjes së ndihmave, sportit, kulturës etj., në kushte tejet të vështira.
Shqiptarët e Kosovës kanë shpallë Kushtetutën e vet në vitin 1990, kanë mbajtur Referendumin gjithëpopullor ku janë deklaruar për Kosovën shtet sovran dhe të pavarur, kanë mbajtur zgjedhjet e lira dhe shumëpartiake si dhe kanë zgjedhë presidentin e Republikës së Kosovës.
Në vitet e fundit shqiptarët e Kosovës, të prirë nga presidenti i Republikës së Kosovës dr.Ibrahim Rugova, kanë bërë mjaft për ndërkombëtarizimin e çështjes së Kosovës, duke shtruar para bashkësisë ndërkombëtare kërkesat legjitime të popullit shqiptar. Shqiptarëve të Kosovës duhet t’u njihet e drejta për vetëvendosje. Republika e Kosovës duhet të njihet si shtet sovran dhe i pavarur.
Prandaj të mos harrohet Kosova! Përndryshe do të jetë burim i përhershëm i konflikteve dhe njollë e zezë e bashkësisë evropiane dhe botërore, thuhet në fund të artikullit të gazetës suedeze “Folket”, të cilin e hartoi Dega e LDK-së në Suedi.
21 nëntor 1995
Ngritet akuza e dytë për gjenocid kundër Fatos Nanos
Pas akuzës për gjenocid ndaj disa personave të vrarë në periudhën shkurt-mars 1992, Fatos Nano, lider i Partisë Socialiste, dhe ish-kryeministër para dhe pas zgjedhjeve të vitit 1991, i burgosur për korrupsion dhe falsifikim të dokumenteve zyrtare, tash akuzohet edhe për ngjarjet e 2 prillit të vitit 1991, në Shkodër, njofton ATSH.
Sipas këtij njoftimi të plagosurit e masakrës së Shkodrës, po përgatisin një aktakuzë që së shpejti do t’i kalojë prokurorisë. Në këtë akuzë kërkohet që së bashku me të dënuarit e tjerë për këtë ngjarje të ulen në bankën e të akuzuarve edhe urdhërdhënësit për gjenocidin e ushtruar ndaj popullit të kësaj zone.
Përkujtohet se më 2 prill të vitit 1991 në Shkodër u vranë 4 persona dhe u plagosën 57 të tjerë, shumica e të cilëve edhe sot vuajnë pasojat e plagëve të marra. Gjykata e rrethit për ngjarjet e atëhershme tashmë ka dhënë dënimin për 5 persona të akuzuar për vrasje, por ky vendim ka lënë të pakënaqur njerëzit të cilët duan që përpara drejtësisë të dalin autorët e vërtetë të krimit dhe urdhërdhënësit e tyre.
21 nëntor 1996
Në fatkeqësi komunikacioni humbi jetën prof.dr. Xhavit Ahmeti
Nga plagët e marra në një aksident komunikacioni në afërsi të Smederevës, sot në orën 11,30 vdiq prof.dr. Xhavit Ahmeti, këshilltar për arsim i kryetarit të Republikës së Kosovës.
Në aksidentin që ndodhi sot rreth orës 8 në autostradën Nish-Beograd, afër Smederevës, u lënduan rëndë edhe Mr. Fatmir Sejdiu, sekretar i përgjithshëm i LDK-së e Agim Spanca, vozitës në Kryesinë e LDK-së, ndërsa nënkryetari i LDK-së Hydajet Hyseni mori lëndime të lehta.
- Hyseni i tha QIK-ut se dr. Xhavit Ahmeti u dërgua me plagë të rënda në spitalin e Neurokirurgjisë në Beograd. Përgjegjësit e këtij spitali thanë se plagët ishin vdekjeprurërse.
Një përgjegjës i spitalit të Smederevës tha se me plagë të rënda në këtë spital gjenden mr. Fatmir Sejdiu dhe Agim Spanca.
Ndërsa Hydajet Hyseni ka marrë lëndime të lehta.
Funksionarët e lartë të LDK-së dhe këshilltari për arsim i kryetarit të Kosovës udhëtonin për në Beograd për të kryer punë në disa ambasada të vendeve perëndimore.
Me vdekjen e prof. dr. Xhavit Ahmetit, shkenca, arsimi dhe lëvizja për pavarësi e Kosovës humbën një prej personaliteteve më të shquara.
21 nëntor 1997
AFP: Franca dhe Gjermania kërkojnë palë të tretë në bisedimet për Kosovën
Prishtinë, 21 nëntor (QIK)
Në një mesazh të përbashkët të enjtën Franca dhe Gjermania kanë ftuar presidentin e Jugosllavisë që të fillojë bisedimet për një status special për Kosovën, ku 9 nga 10 banorët e saj janë shqiptarë etnikë, thuhet në një njoftim të agjencisë frenge AFP, në versionin anglisht.
Në një letër të dërguar, që mbanë datën e të mërkurës (19 nëntor -QIK), e cila i është dërguar presidentit Sllobodan Millosheviq, Ministrat e Punëve të Jashtme të Francës dhe Gjermanisë, Yber Vedren dhe Klaus Kinkel theksojnë se janë të gatshëm të diskutojnë me Millosheviqin për një numër zotimesh të favor të Jugosllavisë.
“As pavarësia për Kosovën e as status quo-ja nuk mund të shërbejnë si bazë për zgjidhje paqësore dhe afatgjate për Kosovën”, thuhet në letër. Në versionin frengjisht të lajmit citohet pos kësaj fjalie edhe formulimi: “Një zgjidhje e qëndrueshme në nivelin evropian duhet të parashikojë një status të veçantë për Kosovën”.
Parisi dhe Boni kanë kërkuar nga autoritetet jugosllave të fillojnë bisedimet me shumicën shqiptare në Kosovë nën mbikëqyrje të palës së tretë.
“Vetëm një zgjidhje me negociata në mes përfaqësuesve të Republikës Federale të Jugosllavisë (Serbia dhe Mali i Zi), Republikës së Serbisë dhe komunitetit shqiptar të Kosovës mund të krijojë themelet për paqë stabile dhe të qëndrueshme në rajon, ndërsa një palë e tretë e pranuar nga palët negociuese do të duhej të mirrte pjesë në bisedime”, theksojnë liderët frengë dhe gjermanë.
Vedren dhe Kinkel do të udhëtojnë për në Bosnje më 4 dhjetor për të diskutuar përgatitjet për një konferencë, e cila to të analizojë rezultatet e marrëveshjes paqësore për Bosnjë të vitit 1995. Ata poashtu kishin planifikuar një vizitë në Serbi për të diskutuar gjendjen në Kosovë, por kjo vizitë është shtyer, thanë ata. Vizita ende qëndron në “orarin e tyre edhe pse është shtyrë për një kohë”, i kanë thënë ata Millosheviqit.
“Franca dhe Gjermania do të ndërmarrin nisma që Unioni Evropian dhe bashkësia ndërkombëtare do të reagojnë pozitivisht ndaj çdo progresi drejt zgjidhjes paqësore të problemit të Kosovës”, thanë ata.
Në mesin e masave të parapara Vedren dhe Kinkel përmendin hapjen e misionit të UE-së në Prishtinë, kryeqytet i Kosovës, rivendosjen e marrëdhënieve normale diplomatike në mes të UE-së dhe Jugosllavisë, përkrahje përpjekjeve të Jugosllavisë për t’iu bashkuar Organizatës për Siguri dhe Bashkëpunim në Evropë, vazhdimin e marrëveshjes tregtare në mes të UE-së dhe Jugosllavisë dhe përparimin drejt qëllimit afatgjatë të riintegrimit të Jugosllavisë në institucionet ndërkombëtare si dhe ripërtrirjen e bashkëpunimit me UE.
21 nëntor 1998
Forcat serbe mbajtën dje në shtetrrethim fshatin Prejlep të Deçanit
Forca të shumta të ushtrisë dhe të policisë serbe gjatë tërë ditës së djeshme kanë mbajtur nën rrethim fshatin Prejlep të Deçanit për shkak të vrasjes së dy dhe plagosjes së katër policëve serbë në këtë fshat në rrethana ende të pasqaruara, njofton KI i Degës së LDK-së për Deçan.
Me këtë preteskt forca të mëdha serbe rrethuan në fillim tri shtëpitë e familjes Latifaj, të vetmet shtëpi të fshatit Prejlep që kanë mbetur pa u djegur, dhe në prani të anëtarëve të familjes në mënyrë barbare rrahën e torturuan vellezërit Azem dhe Hazir Latifaj që të dy pleq dhe djalin e Azemit, Musliun, 50 vjeçar. Më vonë këta tre persona forcat policore serbe i morën dhe i dërguan në drejtim të panjohur.
Forcat serbe në këto shtëpi kanë rrahur dhe kanë maltretuar edhe gratë dhe vajzat e këtyre familjeve, Zade dhe Gale Latifaj, pastaj vajzat e Azemit Ajmane e Zylfie si dhe dy vogëlushet e tij Shqipen dhe Gentianën.
Mbrëmë në orët e vona, me ndihmën e verifikuesve të Misionit të OSBE-së, janë liruar të gjithë këta persona. Mirëpo për shkak të dhunës së ushtruar nga forcat serbe, gjendja e tyre shëndetësore është e rëndë.
Gjatë ditës së djeshme edhe në disa fshatra janë dëgjuar të shtëna nga automatikët.
Situatën në komunën e Deçanit e ka rënduar tepër edhe bora e cila tash dy ditë po bie pandërprerë, sidomos për ato familje të cilat ishin të zhvendosura në vende të tjera dhe janë kthyer në shtëpitë e tyre të djegura e të rrënuara, thuhet në njoftim.
Foto: Xhavit Ahmeti
Vendi
“Solidariteti” dhe shtypshkronjat ilegale në Poloni (1981-1989): kur media e fshehtë sfidoi një regjim komunist
Published
18 hours agoon
November 21, 2026By
UBTNews
Shumë studiues e konsiderojnë Poloninë e viteve 1980 si vendin me sistemin më të zhvilluar të medias ilegale në gjithë bllokun sovjetik
Historia e lëvizjes polake Solidariteti (Solidarność) dhe e shtypit ilegal gjatë viteve 1980 konsiderohet një nga kapitujt më të rëndësishëm në historinë e medias në Evropën Lindore komuniste. Ajo dëshmoi se, edhe në kushtet e censurës së plotë shtetërore, qytetarët mund të ndërtonin rrjete alternative komunikimi dhe informacioni. Në fakt, shumë studiues e konsiderojnë Poloninë e viteve 1980 si vendin me sistemin më të zhvilluar të medias ilegale në gjithë bllokun sovjetik.
Për gati një dekadë, mijëra gazetarë amatorë, shtypshkronjës, intelektualë, studentë, punëtorë dhe priftërinj katolikë krijuan një rrjet të fshehtë gazetash, revistash, librash dhe radiostacionesh që sfidonin monopolin informativ të Partisë Komuniste Polake. Ky rrjet nuk kishte mbështetjen e shtetit, nuk dispononte teknologji moderne dhe vepronte nën kërcënimin e arrestimit. Megjithatë, ai arriti të informonte miliona polakë dhe të luante rol të rëndësishëm në procesin që çoi drejt rrëzimit të komunizmit.
Lindja e “Solidaritetit”
Në fund të viteve 1970, Polonia po përballej me krizë ekonomike, mungesa ushqimore dhe pakënaqësi të përgjithshme shoqërore. Qeveria komuniste kontrollonte të gjitha gazetat, radion dhe televizionin. Çdo informacion që mund të dëmtonte imazhin e partisë censurohej para publikimit.
Në gusht të vitit 1980, shpërthyen greva të mëdha në kantierin detar “Lenin” në Gdanjsk. Në krye të punëtorëve doli elektricisti Leh Valensa, i cili do të bëhej më vonë simbol i rezistencës demokratike polake.
Pas javësh negociatash, autoritetet u detyruan të pranonin krijimin e një sindikate të pavarur nga shteti. Kështu lindi Solidariteti, organizata e parë masive independente në një vend komunist të Evropës Lindore.
Brenda pak muajsh, sindikata numëroi rreth 10 milionë anëtarë. Për regjimin, kjo përbënte një kërcënim të madh politik. Nëse partia komuniste kontrollonte shtetin, “Solidariteti” po fitonte mbështetjen e shoqërisë.

| Në gusht të vitit 1980, shpërthyen greva të mëdha në kantierin detar “Lenin” në Gdanjsk. Në krye të punëtorëve doli elektricisti Leh Valensa, i cili do të bëhej më vonë simbol i rezistencës demokratike polake. |
Lufta për informacionin
Një nga sfidat më të mëdha ishte komunikimi me publikun. Televizioni shtetëror dhe gazetat zyrtare paraqisnin “Solidaritetin” si një lëvizje destabilizuese dhe të rrezikshme. Prandaj aktivistët kuptuan se duhej të krijonin kanalet e tyre të informacionit.
Në fillim u shtypën buletine të thjeshta informative. Këto përmbanin lajme mbi grevat, kërkesat e punëtorëve dhe aktivitetet e sindikatës. Materialet shumëzoheshin me makina shkrimi, kopjues të improvizuar ose me shtypshkronja primitive të fshehura në bodrume, banesa private dhe objekte kishtare.
Brenda një kohe të shkurtër, këto botime u shndërruan në një sistem mediatik paralel.
| Shumë studiues e konsiderojnë Poloninë e viteve 1980 si vendin me sistemin më të zhvilluar të medias ilegale në gjithë bllokun sovjetik. |
Gjendja ushtarake dhe kalimi në ilegalitet
Më 13 dhjetor 1981, gjenerali Vojçeh Jaruzelski shpalli gjendjen ushtarake në Poloni. U vendosën patrulla ushtarake në rrugë, mijëra aktivistë u arrestuan dhe “Solidariteti” u ndalua.
Regjimi besonte se me arrestimin e udhëheqësve mund ta shkatërronte lëvizjen. Por ndodhi e kundërta.
Pasi humbi mundësinë për të vepruar ligjërisht, “Solidariteti” u organizua në fshehtësi dhe investoi edhe më shumë te komunikimi ilegal. Qindra grupe filluan të prodhonin materiale informative pa miratimin e shtetit.
Në shumë raste, shtypshkronjat ilegale montoheshin gjatë natës dhe çmontoheshin para agimit. Pajisjet transportoheshin vazhdimisht nga një vend në tjetrin për të shmangur zbulimin nga policia sekrete.
Fenomeni i “Shtypit të Dytë”
Polakët e quanin këtë botim të fshehtë, “Qarkullimi i Dytë”. Termi përdorej për të dalluar botimet ilegale nga shtypi zyrtar i kontrolluar nga shteti.
| Në shumë raste, shtypshkronjat ilegale montoheshin gjatë natës dhe çmontoheshin para agimit. |
“Qarkullimi i dytë” nuk përfshinte vetëm gazeta politike. Aty botoheshin libra, ese filozofike, studime historike, vepra letrare dhe materiale fetare që censura komuniste i ndalonte.
Autorë të njohur polakë dhe të huaj, veprat e të cilëve nuk lejoheshin nga regjimi, u bënë të qasshme falë këtyre rrjeteve ilegale.
Deri në mesin e viteve 1980, qindra tituj gazetash dhe revistash qarkullonin në mënyrë të fshehtë në të gjithë vendin. Tirazhet e disa botimeve arrinin dhjetëra mijëra kopje, një shifër e jashtëzakonshme për aktivitet ilegal.
Kisha Katolike si strehë e informacionit
Një rol vendimtar luajti Kisha Katolike Polake. Ndryshe nga shtetet e tjera komuniste, Kisha në Poloni gëzonte ndikim të madh shoqëror dhe nuk mund të kontrollohej plotësisht nga pushteti.
Shumë famulli u përdorën si qendra shpërndarjeje për botimet ilegale. Priftërinjtë ndihmonin në fshehjen e materialeve dhe sigurimin e kontakteve midis aktivistëve.
Zgjedhja e kardinalit polak Karol Vojtilla si Papa Gjon Pali II në vitin 1978 i dha edhe më shumë forcë morale lëvizjes. Vizitat e tij në Poloni mobilizuan miliona njerëz dhe krijuan hapësira të reja për rezistencën civile.
Radio ilegale
Përveç shtypit, opozita krijoi edhe radio të fshehta.
Aktivistët ndërtonin transmetues të vegjël që funksiononin për periudha të shkurtra kohore. Emisionet zgjasnin vetëm disa minuta para se transmetuesi të çmontohej dhe të zhvendosej në një vend tjetër.
| Deri në mesin e viteve 1980, qindra tituj gazetash dhe revistash qarkullonin në mënyrë të fshehtë në të gjithë vendin. Tirazhet e disa botimeve arrinin dhjetëra mijëra kopje, një shifër e jashtëzakonshme për aktivitet ilegal. |
Këto radio jepnin lajme mbi arrestimet, protestat dhe aktivitetet e opozitës. Për shërbimet e sigurisë ishte tepër e vështirë të lokalizonin transmetuesit përpara se ata të zhdukeshin.
Megjithëse teknikisht modeste, këto transmetime kishin vlerë të madhe simbolike. Ato tregonin se monopoli shtetëror mbi informacionin mund të sfidohej.
Një rrjet i mbështetur nga mijëra njerëz
Forca e sistemit ilegal polak nuk qëndronte vetëm te teknologjia, por te pjesëmarrja masive e qytetarëve. Mijëra persona ndihmonin në shtypje, transport, ruajtje dhe shpërndarje.
Gazetat kalonin dorë më dorë. Një kopje mund të lexohej nga dhjetëra persona. Materialet shpesh kopjoheshin përsëri dhe vazhdonin qarkullimin në qytete të ndryshme.
Në këtë mënyrë u krijua një “hapësirë publike paralele”, e pavarur nga shteti. Për herë të parë pas dekadash, një pjesë e madhe e shoqërisë polake po informohej jashtë kontrollit të partisë komuniste.
Nga shtyp ilegal në fitore politike
Gjatë viteve 1988-1989, kriza ekonomike dhe politike u thellua. Regjimi nuk ishte më në gjendje të ndalonte ndikimin e “Solidaritetit”.
Negociatat e njohura si Bisedimet e Tryezës së Rrumbullakët çuan në legalizimin e sindikatës dhe në mbajtjen e zgjedhjeve gjysmë të lira në vitin 1989.
“Solidariteti” fitoi në mënyrë dërrmuese. Brenda pak muajsh, Polonia u bë vendi i parë i bllokut lindor që nisi tranzicionin paqësor drejt demokracisë.
Trashëgimia historike
Historia e “Solidaritetit” dhe shtypshkronjave ilegale dëshmon se media nuk është vetëm një institucion profesional, por edhe një mjet rezistence qytetare. Në kushtet kur gazetat, radioja dhe televizioni kontrolloheshin nga shteti, polakët krijuan një sistem alternativ informacioni që sfidoi censurën dhe propagandën.
Për studiuesit e historisë së medias, Polonia e viteve 1980 mbetet shembulli më i suksesshëm i një sfide të organizuar kundër monopolit shtetëror të informacionit në Evropën komuniste. Ajo tregoi se kontrolli i mediave mund të kufizojë qarkullimin e informacionit, por nuk mund ta shuajë plotësisht nevojën e njerëzve për të ditur të vërtetën. Në fund, pikërisht kjo etje për informacion të lirë u bë një nga faktorët që kontribuoi në rënien e sistemit komunist në Poloni dhe më pas në gjithë Evropën Lindore.
Lajmet
Njëzet zonat urbane më të mëdha në botë (2026)
Published
18 hours agoon
November 21, 2026By
UBT News
Statistika e këtij viti ka nxjerrë 20 qytetet me numrin më të madh të banorëve në botë.
Në këtë listë prin qyteti Guangzhou i Kinës, i pasuar nga Shangai e Tokio. Listën e mbyll Stambolli në vendin e njëzet.
Lista e plotë:
- Guangzhou, Kinë – 73.6 milionë banorë
- Shanghai, Kinë – 42.3 milionë banorë
- Tokio, Japoni – 41.3 milionë banorë
- Delhi, Indi – 36.9 milionë banorë
- Xhakarta, Indonezi – 29.8 milionë banorë
- Mumbai, Indi – 28.1 milionë banorë
- Manila, Filipine – 27.1 milionë banorë
- Qyteti i Meksikos, Meksikë – 25.6 milionë banorë
- Seul, Koreja e Jugut – 25.4 milionë banorë
- Dhaka, Bangladesh – 23.7 milionë banorë
- Kajro, Egjipt – 23.2 milionë banorë
- São Paulo, Brazil – 22.7 milionë banorë
- Nju Jork, SHBA – 22.6 milionë banorë
- Bangkok, Tajlandë – 22.4 milionë banorë
- Lagos, Nigeri – 21.9 milionë banorë
- Pekin, Kinë – 21.8 milionë banorë
- Karachi, Pakistan – 21.8 milionë banorë
- Moskë, Rusi – 19.1 milionë banorë
- Chengdu, Kinë – 18.3 milionë banorë
- Stamboll, Turqi – 18.0 milionë banorë
Rektori i UBT-së, Prof. Dr. Edmond Hajrizi, merr pjesë në Asamblenë e Përgjithshme Vjetore të Asociacionit të Universiteteve të Ballkanit në Prizren
Ditari: Lajmet kryesore që shënuan datën 21 nëntor 1992-1998?
“Solidariteti” dhe shtypshkronjat ilegale në Poloni (1981-1989): kur media e fshehtë sfidoi një regjim komunist
Njëzet zonat urbane më të mëdha në botë (2026)
SFERAT E INTERESIT NË TRYEZËN OVALE TË TRI FUQIVE: RIFORMATIMI I RENDIT BOTËROR (Riformatimi i arkitekturës së re të sigurisë globale)
Mourinho largohet nga konferenca për shtyp pas pyetjes për Cristiano Ronaldon
QKUK përfundon verifikimin e pronësisë, paralajmëron rrënimin e objekteve pa leje në oborr
KEDS: Rikthehet energjia elektrike për rreth 80 për qind të konsumatorëve të prekur nga erërat e forta
Nga 18 vjet burgim për Ilir dhe Rrahim Abdullahun për vrasjen e policit Triumf Riza
Të kërkuara
-
Lajmet2 months agoThaçi dënohet me 25 vjet burgim për krime lufte
-
Lajmet2 months agoVotohet në parim Projektligji për ndryshimin e Ligjit për Specialen
-
Vendi2 months ago15 profesorë të UBT-së renditen të parët në Kosovë në Scholarly Index 2026
-
lajme6 days agoStudentët e Masterit në Agrokulturë me Mjedis nisin hulumtimin eksperimental për kultivimin e sallatës së gjelbër pa tokë