Edon Zhegrova do të jetë startues për ndeshjen vendimtare ndaj Kombëtarja e Turqisë.

Lajmi u konfirmua nga përzgjedhësi Franco Foda në konferencë, duke i dhënë një shtysë të madhe “Dardanëve” para sfidës historike për kualifikim në Kupa e Botës 2026.

Lajm në  zhvillim

Në mbledhjen e shtatë të radhës, Qeveria e Kosovës ka miratuar edhe Projektligjin për Byronë Shtetërore për Verifikimin dhe Konfiskimin e Pasurisë së Pajustifikueshme, një nismë kjo e propozuar nga Ministria e Drejtësisë si pjesë e reformave rrënjësore për sundimin e ligjit.

Kryeministri Albin Kurti e vlerësoi këtë ligj si një nga zotimet kryesore të ekzekutivit, duke theksuar se pavarësisht kundërshtimeve të ashpra nga ish-pushtetarët dhe sfidave në Gjykatën Kushtetuese, procesi i jetësimit të Byrosë nuk do të ndalet.

Nga ana tjetër, ministrja e Drejtësisë, Donika Gërvalla, u shpreh se ky ligj përcjell mesazhin e qartë se mandati publik është përgjegjësi ligjore dhe jo rrugë për pasurim personal.

Ajo sqaroi se ky projektligj është rezultat i një pune pesëvjeçare që ka nisur në vitin 2021, duke integruar rekomandimet e Komisionit të Venedikut dhe gjetjet e Gjykatës Kushtetuese për të garantuar që çdo ndërhyrje në pronë të bëhet vetëm përmes vendimeve gjyqësore dhe mbi bazë provash.

Ky hap konsiderohet vendimtar për rritjen e llogaridhënies së zyrtarëve dhe rikthimin e besimit të qytetarëve te institucionet shtetërore përmes luftës direkte ndaj korrupsionit dhe krimit të organizuar.

Qeveria procedon në Kuvend kërkesën për dërgimin e FSK-së në misionin paqeruajtës në Gazë

Gjatë mbledhjes së kësaj të hëne, Qeveria e Kosovës i ka propozuar zyrtarisht Kuvendit miratimin e dërgimit të pjesëtarëve të Forcës së Sigurisë së Kosovës në kuadër të Forcës Ndërkombëtare Stabilizuese në Gazë.

Kryeministri Albin Kurti u shpreh se FSK-ja zotëron gatishmërinë e plotë për të kontribuar në këtë mision humanitar dhe stabilizues, duke bërë një paralelizëm me mbështetjen që Kosova ka marrë nga forcat ndërkombëtare që prej vitit 1999.

Nga ana tjetër, ministri i Mbrojtjes, Ejup Maqedonci, sqaroi se ky angazhim nënkupton integrimin e personelit tonë nën Komandën e unifikuar ndërkombëtare, me synimin kryesor zbatimin e planit që do t’i jepte fund konfliktit në atë rajon.

Qeveria miraton pagën e 13-të për sektorin publik

Qeveria e Kosovës ka miratuar zyrtarisht vendimin për t’u dhënë pagën e 13-të të gjithë punonjësit që financohen nga Buxheti i Republikës.

Gjatë prezantimit të këtij propozimi, ministri i Financave, Hekuran Murati, sqaroi se krahas stafit që ka shërbyer përgjatë 12 muajve të fundit, do të përfitojnë edhe ata që kanë më pak përvojë pune në sektorin publik, duke marrë një pagesë të pjesshme proporcionale.

Ky vendim pason zotimin e dhënë nga kryeministri Albin Kurti gjatë fushatës zgjedhore të 28 dhjetorit dhe është integruar në planifikimet e Buxhetit për vitin 2026.

Megjithatë, ekzekutimi i kësaj page kërkon një vendim final nga kabineti qeveritar, i cili kushtëzohet nga respektimi i rregullave fiskale; konkretisht, duhet të garantohet se deficiti i përgjithshëm nuk do të tejkalojë tavanin prej 2 për qind të Bruto Produktit Vendor.

Rruga “Don Shtjefën Kurti” në Prishtinë është shembur plotësisht si pasojë e rrëshqitjes së dheut, ka njoftuar Komuna e Prishtinës.

Sipas njoftimit, ekipet emergjente kanë dalë menjëherë në vendin e ngjarjes dhe kanë ndërmarrë veprime për të garantuar sigurinë e qytetarëve.

“Ekipet e Drejtorisë për Siguri dhe Emergjenca, Inspekcionit, KEDS, Ujësjellësit dhe Policisë ndodhen në vendin e ngjarjes dhe kanë ndërmarrë të gjitha masat e nevojshme për sigurimin e zonës dhe parandalimin e rrezikut për qytetarët”, thuhet në njoftim.

Autoritetet kanë bërë të ditur se segmenti rrugor është bllokuar plotësisht për qarkullim.

“Rruga është e bllokuar për qarkullim. Lusim qytetarët që të shmangin këtë segment dhe të ndjekin udhëzimet e autoriteteve në terren”, thuhet më tej.

Komuna ka bërë të ditur se për çdo zhvillim të ri, qytetarët do të njoftohen me kohë.

Ushtarët e Forcës së Sigurisë së Kosovës (FSK) janë duke u bërë gati për dislokim në Gazë, dhe po e presin vetëm dritën e gjelbër nga institucionet shtetërore.

Kosova është zotuar se do të dërgojë trupa në këtë vend të shkatërruar nga lufta në kuadër tëForcës Ndërkombëtare Stabilizuese (FNS), mekanizëm që është paraparë të formohet me themelimin e Bordit të Paqes – nismës së presidentit amerikan, Donald Trump për arritjen e paqes në botë.

Krahas vendimit për dërgimin e trupave në Gazë, Kuvendi duhet të miratojë edhe marrëveshjen për anëtarësimin e Kosovës në këtë mekanizëm.

Komandanti i Forcës Ndërkombëtare Stabilizuese, Jasper Jeffers, ka bërë të ditur se Kosova është në mesin e pesë shteteve të para – përfshirë Indonezinë, Marokun, Kazakistanin dhe Shqipërinë – që janë zotuar se do të angazhojnë trupa, me qëllim të ofrimit të sigurisë në Gazë.

Megjithatë, në publik dihet pak se kur do të dislokohen ushtarët e FSK-së atje, dhe sa do të jetë numri i tyre.

Hapat deri te finalizimi i procesit

Funksionalizimi i punës së Kuvendit të Kosovës, pas vendimit të Gjykatës Kushtetuese më 25 mars, e ka hapur një pjesë të rrugës që duhet të ndiqet deri te nisja e ushtarëve.

Kjo pasi Ligji për dërgimin e FSK-së jashtë vendit parasheh që vendimi në këtë drejtim merret nga Qeveria e Kosovës.

Sipas Ministrisë së Mbrojtjes, propozimvendimi për dislokimin e FSK-së në Gazë është përcjellë për miratim në Qeveri më 3 mars. Pas miratimit aty, vendimi kalon në duart e ligjvënësve dhe në fund duhet të merret edhe miratimi i presidentit të shtetit.

Presidentja e Kosovës, Vjosa Osmani, ka qenë ndër themelueset e Bordit të Paqes dhe e ka përkrahur plotësisht nismën e Trumpit. Mandati i saj presidencial skadon më 4 prill.

Mundësitë për angazhim prej muajit maj?

Transmetuesi publik i Izraelit, KAN ka raportuar më 14 mars se Forca Ndërkombëtare Stabilizuese (FNS) do të nisë angazhimin në Gazë që nga muaji maj, përfshirë këtu edhe angazhimin e dhjetëra ushtarëve nga Kosova.

Me gjithë interesimin e Radios Evropa e Lirë (REL) Qeveria nuk ka konfirmuar nëse ky informacion është i saktë dhe as nuk ka treguar as kur do ta procedojë në Kuvend vendimin për këtë angazhim të FSK-së.

Njëjtë, përgjigje nuk ka kthyer as Presidenca e Kosovës, lidhur me afatet eventuale për ratifikimin e kësaj marrëveshjeje.

Maqedonci: Fillimisht planifikohen të dërgohen mbi 20 ushtarë

Zyrtarë të Ministrisë së Mbrojtjes i kanë thënë REL-it se janë në komunikim të vazhdueshëm me zyrtarët e FNS-së për përgatitjet që duhet të bëhen dhe se për këtë qëllim është caktuar edhe një ushtarak ndërlidhës që “ndihmon në përgatitje zbarkimin e kontigjentit të FSK-së në Gazë”.

“FNS, ashtu si dhe Bordi i Paqes, përbëjnë dy mjete që e kanë qëllimin e njëjtë e që është ruajtja e sigurisë dhe paqes në Gazë, andaj dhe për dërgimin e FSK-së në Gazë ka pasur koordinim mes Qeverisë dhe institucioneve të tjera”, është thënë në përgjigjen e ministrisë, duke rikujtuar se Forca Ndërkombëtare Stabilizuese ka edhe mandat të Këshillit të Sigurimit të Kombeve të Bashkuara.

Ministri i Mbrojtjes, Ejup Maqedonci, ka thënë në një intervistë për mediumin lokal në Kosovë, Tëvë1, se në Gazë planifikohen të dërgohen “fillimisht mbi 20 ushtarë” të fushave të ndryshme.

“Do të dominojë EOD-ja (Njësia për Eliminimin e Mjeteve të pashpërthyera) dhe deminimi, që është një specialitet tashmë i Forcës së Sigurisë së Kosovës. Do të kemi edhe oficerë dhe nënoficerë nga operacionet speciale, por gjithashtu do të kemi edhe oficerë planifikues që do të jenë të atashuar në komandën e Forcës Stabilizuese. Por, do të kemi edhe ekipe mjekësore të cilat do të jenë pjesë e këtij kontingjenti të Forcës së Sigurisë së Kosovës”, ka thënë Maqedonci më 24 mars.

Hollësi për kohën e dislokimit nuk ka dhënë as vetë Bordi i Paqes, duke u thirrur në “siguri operacionale”.

“Objektivi kryesor i FNS-së është të stabilizojë mjedisin e sigurisë në Gazë”, thuhet në një përgjigje të bordit drejtuar REL-it.

Për kolonelin e pensionuar të FSK-së, Afrim Veselin, numri i trupave që do të dërgohen në Gazë “nuk është aq i rëndësishëm”.

Sipas tij, FSK-ja ka oficerë e nënoficerë të përgatitur me standardet e NATO-s dhe ky operacion do t’i hapë Kosovës dhe ushtrisë së saj edhe më tej rrugën në arenën ndërkombëtare.

“Kjo do të ndikojë fuqishëm edhe në rrugën tonë drejt NATO-s”, tha ai për Radion Evropa e Lirë.

REL-i i është drejtuar edhe Qeverisë së Shqipërisë për të kuptuar se në çfarë faze janë përgatitjet atje, por nuk ka marrë ndonjë përgjigje deri në publikimin e këtij artikulli.

“Prania e FSK-së në Gazë, kthim i nderit për ndihmën e marrë më 1999”

Më 24 mars janë bërë 27 vjet nga nisja e bombardimeve të NATO-s mbi caqet ushtarake dhe policore serbe në ish-Jugosllavi për të ndalur dhunën e forcave serbe kundër shqiptarëve në Kosovë.

Bombardimet që zgjatën 78 ditë u ndalën një ditë pas nënshkrimit të Marrëveshjes së Kumanovës, pas së cilës forcat jugosllave u tërhoqën nga Kosova dhe u krijua forca paqeruajtëse ndërkombëtare, e udhëhequr nga NATO-ja, KFOR.

Kosova ka shprehur hapur aspiratën e saj për t’u bërë pjesë e NATO-s, derisa misioni i saj paqeruajtës, KFOR-i, vazhdon të jetë i pranishëm në Kosovë, ndonëse me numër më të reduktuar sesa në periudhën e pasluftës. Fillimisht përbëhej nga rreth 50.000 trupa, derisa sot numëron 4.767 trupa, nga 33 vende të botës.

Ish-koloneli Veseli thotë se Kosova, përmes angazhimit të saj në Gazë, është duke kthyer “nderin dhe ndihmën që e mori më 1999”.

“Nga një vend që më 1999 ishte vetë viktimë, tani Kosova dhe ushtria e saj marrin një operacion të tillë”, tha ai.

Hulumtuesi i Institutit të Kosovës për Drejtësi (IKD), Melos Kolshi, i tha Radios Evropa e Lirë se anëtarësimi i Kosovës në struktura të tilla “forcon subjektivitetin ndërkombëtar të shtetit dhe e thellon bashkëpunimin me aleatët kryesorë, përfshirë Shtetet e Bashkuara të Amerikës”.

“Në një kontekst më të gjerë gjeopolitik, zhvillime të tilla kontribuojnë në konsolidimin e partneritetit strategjik me SHBA-në dhe në ruajtjen e mbështetjes së vazhdueshme amerikane, e cila historikisht ka qenë vendimtare për shtetndërtimin dhe sigurinë e Kosovës”, tha ai.

Angazhimi i FSK-së jashtë vendit

Kjo nuk do të ishte hera e parë që pjesëtarë të FSK-së dislokohen jashtë vendit.

Më 2021, kjo forcë u dërgua në mision në Kuvajt në kuadër të bashkëpunimit me forcat amerikane, ndërsa më 2022 në Ishujt Falklands, në bashkëpunim me Mbretërinë e Bashkuar.

Pjesëtarë të FSK-së marrin pjesë edhe në trajnime jashtë vendit në kuadër të bashkëpunimit me shtete të ndryshme.

Në këtë drejtim, FSK-ja ka partneritet të ngushtë me Gardën Kombëtare të shtetit amerikan të Ajovës.

FSK-ja është në proces të shndërrimit në ushtri dhe planet janë që gjithçka të përmbyllet deri më 2028. /REL/