“Dëbime masive, ripërtëritje e traditës dhe kulturës, përmbysje e globalizmit të Bashkimit Evropian”… Këto janë vetëm disa nga parullat e përfshira në një paketë të re vendimesh për “çdo nacionalist të bardhë”.

Materiali është shpërndarë në Telegram nga një organizatë e sapokrijuar ndërkombëtare e ekstremit të djathtë.

Bëhet fjalë për Ligën Ndërkombëtare Sovraniste “Paladins” (International Sovereigntist League – Paladins / ISL Paladins) – një aleancë kjo transnacionale e organizatave të djathta radikale dhe neonaziste, sipas të dhënave nga llogaritë e saj në Telegram.

Liga është themeluar në shtator të vitit 2025 në Shën Petersburg të Rusisë.

Në kongresin themelues është deklaruar se qëllimi i saj duhet të jetë bashkëpunimi dhe koordinimi i aktiviteteve mes organizatave të ekstremit të djathtë.

Në këtë aleancë marrin pjesë edhe disa grupe ekstremiste të djathta nga Serbia, së bashku me rreth dhjetë organizata të tjera evropiane me të njëjtin orientim ideologjik, si dhe disa lëvizje nga Afrika dhe Amerika Latine, përfaqësuesit e të cilave kanë qenë të pranishëm në takimin në Rusi.

Një analizë e Radios Evropa e Lirë tregon se që nga themelimi i “ISL Paladins”-it, gjatë tre muajve të fundit, anëtarët e ligës kanë zhvilluar veprime të sinkronizuara dhe kanë shkëmbyer përmbajtje në mënyrë të koordinuar në rrjetet sociale.

“Liga ka lindur. Rezistenca është bashkuar. Lufta ka filluar!”, thuhet në postimin e parë të kësaj aleance në rrjetin social Telegram, të publikuar më 22 shtator të vitit 2025.

Përhapja e mesazheve përmes rrjetit të kanaleve të ndërlidhura

Kanali në Telegram i këtij grupi është hapur në shtator të vitit të kaluar dhe ka pak më shumë se një mijë ndjekës.

Megjithatë, sipas analizës së të dhënave që mund të shihen në platformën Telemetr, e cila mbledh të dhëna analitike për kanalet dhe grupet në Telegram, profili i “ISL Paladins”-it ka një nivel jashtëzakonisht të lartë ndërveprimi me audiencën.

Kjo do të thotë se, falë ripostimeve, përmbajtja nga ky kanal arrin te një numër shumë më i madh njerëzish.

Analiza e Radios Evropa e Lirë tregon se mesazhet nga ky profil shpërndahen rregullisht nga kanale informuese të djathta dhe proruse në Telegram, si “Fortress Europe”, “Right People Z” dhe “Bellum Acta”, të cilat kanë mbi 150 mijë ndjekës, si dhe nga kanalet e organizatave të djathta që kanë marrë pjesë në themelimin e “ISL Paladins”-it.

Gjatë dhjetorit 2025, përmbajtja nga kanali “ISL Paladins” është ripublikuar në 30 profile të tjera në Telegram.

Ndër dhjetë llogaritë që shpërndajnë më së shumti mesazhet e “ISL Paladins”-it janë tri kanale në Telegram të organizatave të djathta serbe.

Organizata nga Serbia, “Narodne patrole”, me rreth 10.900 ndjekës, mesatarisht çdo të dytën ditë shpërndan postime nga kanali i “ISL Paladins”-it.

Në një masë pak më të vogël, të njëjtën gjë e bëjnë edhe grupet “Srpska akcija” dhe krahu i saj rinor “Zborashka omladina” – llogaritë e të cilave, sipas të dhënave të Telegramit, ndiqen nga rreth 6.700 persona.

Bëhet fjalë për organizata të njohura për ideologji etnonacionaliste, retorikë antimigrante dhe homofobike.

“Narodne patrole” ishte në qendër të vëmendjes së publikut në fillim të vitit 2020, kur aktivistë të këtij grupi joformal ndalonin migrantë në rrugët e Beogradit dhe u shpërndanin fletëpalosje me mesazhin se u “ndalohej lëvizja jashtë qendrave të migrantëve nga ora 22:00 deri në 06:00 të mëngjesit”, si dhe “lëvizja në grupe më të mëdha se tre persona gjatë ditës”.

Organizata “Srpska akcija” është një grup që deklaron se angazhohet për “ortodoksinë luftarake, ruajtjen e qenies kombëtare dhe identitetin racor”.

Aktivistë të grupit “Srpska akcija” në vitin 2022 vizituan një poligon stërvitor ushtarak të “Legjionit Perandorak” në Shën Petersburg. Ky është krahu militant i Lëvizjes Perandorake Ruse (RIM) – një organizatë ultranacionaliste nga Rusia, e cila në vitin 2020 është shpallur nga Departamenti i Shtetit i SHBA-së si kërcënim terrorist global.

Fokusi në politikën antimigrante

Që nga themelimi, “ISL Paladins” e ka fokusuar veprimtarinë e vet te çështja e migracionit.

Menjëherë pas kongresit themelues në Rusi filluan aktivitetet e koordinuara përmes një rrjeti kanalesh të lidhura në Telegram dhe organizatash me të njëjtin narrativ: migrantët prezantohen si kërcënim për sigurinë, armik kulturor dhe burim dhune.

Analiza e postimeve tregon se informacionet mbi incidentet ku janë të përfshirë migrantët, shpërndahen në mënyrë të sinkronizuar përmes shumë kanalesh të lidhura.

Përveç thirrjeve të hapura për masa represive, përndjekje dhe dëbime masive, kritikohet edhe politika e menaxhimit të migracionit në vendet perëndimore, shpesh duke përdorur të dhëna të pasakta ose jo të plota.

Për shembull, në kanalin në Telegram “ISL Paladins” u publikua informacioni se një avion me 141 pasagjerë me origjinë afgane kishte ateruar në Gjermani, me pretendimin se “gjermanët detyrohen të pranojnë në vend myslimanë që praktikisht dhunojnë popullsinë e tyre”.

Megjithatë, bëhej fjalë për bashkëpunëtorë të institucioneve gjermane, gazetarë dhe aktivistë nga Afganistani, të cilët, pas marrjes së pushtetit nga talibanët, Gjermania i përfshiu në programin humanitar të pritjes.

Gjatë vitit 2021, kancelarja e atëhershme gjermane, Angela Merkel, theksoi se “e konsideron të rëndësishëm evakuimin e njerëzve nga Afganistani që kanë punuar për Gjermaninë për 20 vjet”.

Në korrik të vitit 2025, gjykata urdhëroi që programi i pritjes për këta njerëz të vazhdojë edhe pas ndryshimit të Qeverisë në Gjermani dhe pas paralajmërimeve për politikë më të ashpër të imigracionit.

Ndërkohë që për “ISL Paladins”-in e gjithë Evropa është “në rrezik” për shkak të ardhjes së migrantëve, i vetmi shembull i një politike “të mirë” migracioni, sipas kësaj organizate, gjendet në Rusi.

Në kanalin e tyre në Telegram u publikua një informacion se 87 për qind e fëmijëve migrantë që kishin dorëzuar dokumentacionin, nuk ishin regjistruar në shkollat ruse, pasi, sipas postimit, nuk kishin dokumentacion të plotë ose nuk i plotësonin kriteret.

“Fëmijët migrantë janë kriminelë të ardhshëm dhe barrë për vendet tona. Ata nuk duhet ta shfrytëzojnë sistemin tonë arsimor”, thuhet në llogarinë në Telegram të “ISL Paladins”-it.

“Human Rights Watch” dhe organizata të tjera e kanë kritikuar politikën e re ruse, e cila e kufizon qasjen në arsim të fëmijëve migrantë, si dhe ligjin, i cili që nga prilli i vitit 2025 kërkon që fëmijët e familjeve migrante, të kalojnë një test në gjuhën ruse për t’u regjistruar në shkolla publike.

Kjo është vlerësuar si një masë diskriminuese që shkel të drejtën për arsim dhe obligimet ndërkombëtare të Rusisë sipas Konventës së OKB-së për të drejtat e fëmijëve.

Nga propaganda te veprimtaria e koordinuar

Menjëherë pas kthimit nga kongresi themelues në Shën Petersburg, organizata “Narodna Patrola” thirri një protestë në Beograd kundër, siç tha, “ndryshimit të popullsisë”.

Protesta më pas u anulua, pasi udhëheqësi i këtij grupi të djathtë ekstremist, Damjan Knezheviq, u arrestua në Beograd, për shkak të dyshimeve për kryerje të veprës penale të diskriminimit racor.

Knezheviq nuk ishte në dispozicion për të komentuar nëse aktivitetet e aleancës së formuar në Shën Petersburg dhe ato të “Narodna Patrola”-s janë të koordinuara me shpërndarjen e përmbajtjes nga kanali në Telegram i “ISL Paladins”-it.

Deri në publikimin e këtij artikulli, Prokuroria e Lartë Publike e Beogradit nuk iu përgjigj pyetjes së Radios Evropa e Lirë mbi statusin aktual të procedurës që çoi në arrestimin e tij.

Përndryshe, Knezheviq është arrestuar edhe në vitin 2023, pas organizimit të një proteste lidhur me politikën e Serbisë ndaj Kosovës.

Atëkohë, ai është akuzuar për thirrje për rrëzim të dhunshëm të rendit kushtetues, por është liruar në nëntor të vitit 2024, për shkak të mungesës së provave.

Informacionin për arrestimin e Knezheviqit në vitin 2025, “ISL Paladins” e ndau në kanalin në Telegram me mesazhin:

“Njerëzit tanë janë të ekspozuar ndaj represionit në vendet e tyre, ku mbi ta ushtrohet padrejtësi”.

Më 1 dhjetor të vitit të kaluar, “ISL Paladins” mbajti edhe tubimin e parë të përbashkët zyrtar kundër Bashkimit Evropian.

Anëtarët e organizatave të djathta, pjesë e kësaj lige, dolën njëkohësisht në rrugët e Greqisë, Hungarisë, Belgjikës, Rusisë, Spanjës dhe Serbisë.

Mikpritësit rusë

Edhe pse formalisht pa mbështetje institucionale, “ISL Paladins” u themelua në një takim që u mbajt më 12 shtator, 2025, në selinë e Asamblesë Ligjvënëse të Shën Petersburgut, nën organizimin e Konstantin Malofejevit, një oligark rus me lidhje të afërta me Kremlinin dhe Kishën Ortodokse Ruse.

Malofejev është nën sanksionet e Perëndimit që nga viti 2014 për rolin e tij në nxitjen e kryengritjeve në jug dhe në lindje të Ukrainës, për ndihmën në aneksimin rus të Krimesë dhe për mbështetjen ndaj separatistëve prorusë.

Në takim ishte i pranishëm edhe Aleksandar Dugin – një nga ideologët kryesorë të Kremlinit dhe mik i ngushtë i presidentit rus, Vladimir Putin.

Aty morën pjesë përfaqësues të organizatave të djathta nga tri kontinente./REL

Presidenti amerikan, Donald Trump, ka thënë se çdo vend që bën biznes me Iranin do të përballet me një normë tarife prej 25 për qind për çdo tregti me SHBA-në, ndërsa Uashingtoni po shqyrton një përgjigje ndaj situatës në Iran, ku po zhvillohen protestat më të mëdha antiqeveritare të viteve të fundit.

“Me efekt të menjëhershëm, çdo vend që bën biznes me Republikën Islamike të Iranit do të paguajë një tarifë prej 25 për qind për çdo dhe të gjithë biznesin që kryhet me Shtetet e Bashkuara të Amerikës”, tha Trump në një postim në Truth Social.

Tarifat paguhen nga importuesit amerikanë të mallrave nga ato vende. Irani, anëtar i grupit të vendeve prodhuese të naftës OPEC, është sanksionuar rëndë nga Uashingtoni prej vitesh.

Ai eksporton pjesën më të madhe të naftës së tij në Kinë, ndërsa Turqia, Iraku, Emiratet e Bashkuara Arabe dhe India janë ndër partnerët e tjerë kryesorë tregtarë.

“Ky urdhër është përfundimtar dhe përfundues”, tha Trump pa dhënë ndonjë detaj të mëtejshëm.

Ende nuk është publikuar dokumentacion zyrtar nga Shtëpia e Bardhë për këtë politikë në faqen e saj të internetit, as informacion mbi autoritetin ligjor që Trump do të përdorte për të vendosur tarifat, apo nëse ato do të synonin të gjithë partnerët tregtarë të Iranit. Shtëpia e Bardhë nuk iu përgjigj një kërkese për koment nga agjencia Reuters.

Ambasada kineze në Uashington kritikoi qasjen e Trumpit, duke thënë se Kina do të marrë “të gjitha masat e nevojshme” për të mbrojtur interesat e saj dhe kundërshtoi “çdo sanksion të paligjshëm unilateral dhe juridiksion me shtrirje të gjatë”.

“Qëndrimi i Kinës kundër vendosjes pa dallim të tarifave është i qëndrueshëm dhe i qartë. Luftërat tarifore dhe luftërat tregtare nuk kanë fitues, dhe detyrimi dhe presioni nuk mund të zgjidhin problemet”, tha një zëdhënës i ambasadës kineze në Uashington në X.

Japonia dhe Koreja e Jugut, të cilat ranë dakord për marrëveshje tregtare me SHBA-në vitin e kaluar, thanë të martën se po monitorojnë nga afër zhvillimet.

“Ne … planifikojmë të marrim çdo masë të nevojshme sapo veprimet konkrete të qeverisë së SHBA-së të bëhen të qarta”, tha ministria e tregtisë e Koresë së Jugut në një deklaratë.

Zëvendësshefi i Sekretariatit të Kabinetit të Japonisë, Masanao Ozaki, u tha gazetarëve se Tokio do të “shqyrtojë me kujdes përmbajtjen konkrete të çdo mase sapo ato të bëhen të qarta, si edhe ndikimin e tyre të mundshëm mbi Japoninë, dhe do të reagojë në mënyrë të përshtatshme”.

Irani, i cili pati një luftë 12-ditore me aleatin e SHBA-së, Izraelin, vitin e kaluar dhe objektet bërthamore të të cilit u bombarduan nga ushtria amerikane në qershor, po përjeton demonstratat më të mëdha antiqeveritare të viteve të fundit.

Trump ka thënë se SHBA-ja mund të takohet me zyrtarë iranianë dhe se ai ka qenë në kontakt me opozitën iraniane, ndërsa ushtron presion mbi udhëheqësit e vendit, duke përfshirë edhe kërcënime për veprime ushtarake.

Teherani tha të hënën se po i mban të hapura kanalet e komunikimit me Uashingtonin, ndërsa Trump po shqyrtonte se si të përgjigjej ndaj situatës në Iran, e cila ka qenë një nga testet më të rënda për sundimin klerikal në vend që nga Revolucioni Islamik i vitit 1979.

Demonstratat evoluan nga ankesa për vështirësi të rënda ekonomike në thirrje sfiduese për rrëzimin e establishmentit klerikal thellësisht të rrënjosur. Grupi për të drejtat e njeriut me bazë në SHBA, HRANA, tha se kishte verifikuar vdekjen e 599 personave – 510 protestues dhe 89 pjesëtarë të forcave të sigurisë – që nga fillimi i protestave më 28 dhjetor.

Ndërsa sulmet ajrore ishin një nga shumë alternativat e hapura për Trump, “diplomacia është gjithmonë opsioni i parë për presidentin”, tha të hënën sekretarja për shtyp e Shtëpisë së Bardhë, Karoline Leavitt.

Gjatë mandatit të tij të dytë në detyrë, Trump ka kërcënuar shpesh dhe ka vendosur tarifa ndaj vendeve të tjera për shkak të lidhjeve të tyre me kundërshtarët e SHBA-së dhe për politika tregtare që ai i ka përshkruar si të padrejta ndaj Uashingtonit.Tarifat e Trumpit për drurin dhe mobiliet hyjnë në fuqi, rrezikohen edhe tregtarët kosovarë

Politika tregtare e Trumpit është nën presion ligjor, pasi Gjykata e Lartë e SHBA-së po shqyrton rrëzimin e një pjese të gjerë të tarifave ekzistuese të Trumpit.

Irani eksportoi produkte në 147 partnerë tregtarë në vitin 2022, sipas të dhënave më të fundit të Bankës Botërore./REL

Shtetet e Bashkuara të Amerikës e kanë akuzuar Rusinë të hënën për “përshkallëzim të rrezikshëm dhe të pashpjegueshëm” të luftës së saj gati katërvjeçare në Ukrainë, në një kohë kur administrata e presidentit Donald Trump po përpiqet të shtyjë përpara negociatat drejt paqes.

Zëvendësambasadorja amerikane në Kombet e Bashkuara, Tammy Bruce, veçoi lëshimin nga Rusia javën e kaluar të raketës balistike “Oreshnik”, e aftë për mbajtje bërthamore, pranë kufirit të Ukrainës me Poloninë, një aleate e NATO-s.

Ajo tha  në një mbledhje emergjente të Këshillit të Sigurimit se SHBA-ja e dënon “numrin tronditës të viktimave” në konflikt dhe i ka dënuar sulmet gjithnjë e më intensive të Rusisë ndaj infrastrukturës energjetike dhe asaj civile.

Ukraina kishte kërkuar mbledhje pas bombardimit rus gjatë natës së enjtes së kaluar, kur  përdoren qindra dronë dhe dhjetëra raketa, përfshirë raketën e re dhe të fuqishme hipërsonike “Oreshnik” e cila u përdor nga Moska për herë të dytë, si një paralajmërim i qartë për aleatët e Kievit nga NATO.

Sulmi i përmasave të mëdha ndodhi disa ditë pasi Ukraina dhe aleatët e saj raportuan përparim të madh drejt një marrëveshjeje si të mbrohet vendi nga represioni i mëtejmë rus, në rast se arrihet një marrëveshjeje paqeje e udhëhequr nga SHBA-ja.

Sulmi përkoi gjithashtu me një ftohje të re të marrëdhënieve mes Moskës dhe Washingtonit, pasi Rusia dënoi sekuestrimin nga SHBA-ja të një cisterne nafte në Atlantikun e Veriut. Ai ndodhi në të njëjtën kohë kur presidenti amerikan, Donald Trump sinjalizoi mbështetjen e tij për një paketë të ashpër sanksionesh që synon të gjymtojë ekonomikisht Rusinë.

Moska nuk dha asnjë sinjal publik se është e gatshme të tërhiqet nga kërkesat e saj maksimaliste ndaj Ukrainës. Ndërkohë, ambasadori rus në OKB fajësoi të hënën Ukrainën për bllokimin diplomatik.

Udhëheqësit evropianë e dënuan përdorimin e raketës “Oreshnik”.

Ndërsa aleatët evropianë u mblodhën në Paris për të konsoliduar garancitë e sigurisë për Ukrainën, prania e emisarëve të paqes të Trumpit ofroi shpresë se BE mund të dëgjohej ende në Uashington, pavarësisht polemikës së ashpër mbi kërcënimet e Uashingtonit për të aneksuar Groenlandën. “Ne kemi finalizuar në masë të madhe protokollet e sigurisë,” tha Steve Witkoff, një nga dy emisarët, ndërsa qëndronte krah udhëheqësve të Francës, Gjermanisë, Britanisë së Madhe  dhe Ukrainës në pallatin presidencial francez në Paris.

“Kjo është e rëndësishme që kur kjo luftë të përfundojë, të përfundojë përgjithmonë,” shtoi ai. Megjithatë, edhe pse Franca dhe Britania e Madhe nënshkruan vendimin e tyre për të dërguar trupa në Ukrainë në një skenar pas luftës, SHBA nuk ofruan të shpëtonin këto trupa në rast se Rusia do të kërcënonte sigurinë e tyre.

Ç’pamje mund të ketë ky stacionim?

Këtë javë, Franca, Britania e Madhe dhe Ukraina nënshkruan një deklaratë qëllimi në lidhje me vendosjen e asaj që ata e përshkruan si një forcë shumëkombëshe në mbështetje të mbrojtjes, rindërtimit dhe qëndrueshmërisë strategjike të Ukrainës.

Ekspertët thanë se, meqë deklarata ishte një dokument i shkruar dhe i nënshkruar, ajo përbënte një garanci më të fortë dhe më formale për Ukrainën. Të martën, kancelari gjerman Friedrich Merz njoftoi se Gjermania mund të luajë gjithashtu një rol ushtarak dhe të dislokojë “forca në territorin e NATO-s që kufizohet me Ukrainën” sapo të arrihet një armëpushim.

Për herë të parë, Kryeministri spanjoll Pedro Sánchez gjithashtu shprehu gatishmërinë për të dërguar trupa si pjesë e një misioni paqeruajtës në Ukrainë, megjithëse shkalla e kontributit mbetet e paqartë.

Jacob Funk Kirkegaard, bashkëpunëtor i lartë në qendrën kërkimore Bruegel, me bazë në Bruksel, tha se forca dykombëshe përshkruhet me qëllim si shumëkombëshe për t’i lejuar vende të tjera evropiane, por edhe vende jo evropiane, të bashkohen me të.

“Kush mund të jenë ata? Mendoj ndoshta Australia, ose sigurisht Turqia, e cila është një lojtar i rëndësishëm në Detin e Zi,” i tha ai DW.

Takimi i Parisit u mbajt në kuadër të koalicionit të të vullnetshmëve, i cili përbëhet nga rreth 30 vende, përveç SHBA, që ka vendosur të ndihmojë Ukrainën dhe t’i ofrojë një lloj garancie sigurie.

Në një deklaratë, grupi tha se do të ndihmonte në ndërtimin e “fortifikatave mbrojtëse” brenda Ukrainës, pa dhënë detaje të mëtejshme.

Kirkegaard tha se, megjithëse nuk është e qartë saktësisht se çfarë lloj fortifikimesh do të jenë këto, ato mund të jenë të ngjashme me ato që po ndërtohen në shtetet anëtare të NATO-s pranë Rusisë. “Si në Finlandë,” tha ai, mund të përfshijë, të paktën, “vendosjen e më shumë minave dhe telave me gjemba.”

Deklarata e udhëheqësve të koalicionit gjithashtu thotë se ata do të marrin pjesë në një mekanizëm monitorimi dhe verifikimi të armëpushimit të propozuar nga Shtetet e Bashkuara, për të vëzhguar shkelje ruse të një paqeje të ardhshme. Kjo do të përfshinte sigurimin dhe operimin e pajisjeve të nevojshme për të vëzhguar aktivitetin përgjatë vijës së kontaktit, si dronë, sensorë dhe satelitë.

Deklarata shton se ukrainasit “do të mbeten linja e parë e mbrojtjes dhe e frenimit”, ndërsa ekspertët i thanë DW-së se trupat evropiane do të jenë të pranishme kryesisht si trajnerë dhe jo në role luftarake.

Shumë pyetje pa përgjigje rreth stacionimit të trupave evropiane

Disa në Evropë po bëjnë presion për krijimin e një arkitekture sigurie afatgjatë për Ukrainën. Por edhe në këtë fazë, ka më shumë pyetje se përgjigje, pasi detajet mbeten të paqarta.

Presidenti francez Emmanuel Macron tha se Franca mund të dislokojë “disa mijëra” ushtarë në territorin ukrainas. Por ai mund të ketë vështirësi ta bëjë Parlamentin francez të miratojë financimin e nevojshëm për të mbajtur trupat jashtë vendit, veçanërisht në mes të krizës politike dhe ekonomike që po kalon vendi, shtoi Kirkegaard.

Nënshkrimi i deklaratës nga Keir Starmer ka nxitur zemërimin e liderëve të opozitës ndërsa ekspertët, thonë se Britania nuk ka mjaftueshëm ushtarë për t’i dërguar.

Rishikimi strategjik i mbrojtjes së Britanisë së Madhe të vitit të kaluar vuri në dukje se madhësia dhe gatishmëria e forcave të armatosura u zvogëluan me përfundimin e Luftës së Ftohtë dhe me tërheqjen e kërcënimit nga Bashkimi Sovjetik. Raporti theksoi se “vetëm një grup i vogël forcash” janë gati për t’u dislokuar në çdo kohë. Rishikimi vuri në dukje se ulja e numrit të trupave ndodhi paralelisht me një rënie të shpenzimeve për mbrojtjen.

Duke folur në Parlament, Starmeri tha se numri i trupave që do të dërgohen në Ukrainë “do të përcaktohet në përputhje me planet tona ushtarake, të cilat po i zhvillojmë dhe shpresojmë që anëtarët e tjerë do t’i mbështesin”.

Në Gjermani, sugjerimi i Kancelarit Merz për të dërguar trupa në vendet e NATO-s fqinje me Ukrainën gjithashtu duhet të miratohet së pari nga Bundestagu gjerman.

Anëtarë të tjerë të koalicionit të ttë vullnetshmëve kanë qenë më pak të qartë se si  do ta ndihmojnë Ukrainën konkretisht, duke shtyrë zbulimin e kontributeve të tyre derisa të vendoset paqja.

“A do të jepnin të gjithë partnerët e Koalicionit të të Vullnetshmëve një përgjigje të fortë nëse Rusia do të sulmonte përsëri? Është një pyetje e vështirë. I kam pyetur të gjithë dhe ende nuk kam marrë një përgjigje të qartë,” u tha presidenti ukrainas Volodymyr Zelenski gazetarëve të mërkurën. Derisa të miratohen garancitë e sigurisë nga parlamentet dhe Kongresi i SHBA-së, “nuk mund t’i përgjigjemi pyetjes nëse partnerët janë të gatshëm të na mbrojnë,” shtoi ai.

Mungesa e mbështetjes amerikane – pengesa më e madhe

Pengesa më e madhe për praninë evropiane në Ukrainën e pasluftës vjen nga ajo që dikur ishte aleatja më e afërt e bllokut përtej Atlantikut. Të dërguarit e Trumpit që morën pjesë në takimin në Paris nuk arritën t’i qetësojnë shqetësimet evropiane nëse Shtetet e Bashkuara do të vinin në ndihmë të trupave të tyre po të shkelte Rusia kushtet e marrëveshjes.

Markus Reisner, historian ushtarak austriak dhe profesor në Akademinë Ushtarake Teresian në Vjenë, i tha DW-së se mesazhi kryesor i projekt-deklaratës së miratuar në Paris ishte të inkurajonte Shtetet e Bashkuara të angazhoheshin për të mbështetur një stacionim të ardhshëm evropian.

“Pa këtë garanci, ose më saktë, pa këtë angazhim nga Shtetet e Bashkuara, Europa nuk është e gatshme të vazhdojë. Kjo do të thotë se tani i takon Shteteve të Bashkuara të bëjnë angazhimin përkatës,” tha ai.

“Aktualisht, duket e pakonceptueshme që forcat e armatosura evropiane të vendosnin një prani në shkallë të gjerë në Ukrainë pa mbështetjen e Shteteve të Bashkuara dhe pa aftësitë e saj ushtarake të specializuara, dhe pa garancinë e ndërhyrjes ushtarake amerikane në rast të një sulmi rus.” “Kjo është veçanërisht e vërtetë për sa kohë që Rusia i konsideron ushtarët perëndimorë në Ukrainë si objektiva ushtarake,” paralajmëroi Reisner./DW