Gjatë vizitës në Spanjë këtë javë, sekretari i përgjithshëm i NATO-s u bëri thirrje vendeve anëtare të rrisin shpenzimet për ushtrinë përballë kërcënimit nga Rusia. Spanja shpenzon më pak për mbrojtjen në krahasim me madhësinë e ekonomisë së saj.

Ndërkaq, Presidenti amerikan ka veçuar Madridin për dështimin për të përmbushur objektivin e NATO-s për shpenzimet e mbrojtjes.

Spanja është ekonomia e katërt më e madhe e eurozonës. Megjithatë, vendi është në fund të listës kur bëhet fjalë për shpenzimet e mbrojtjes në aleancën 32 anëtarëshe të NATO-s.

Madridi shpenzoi rreth 21.3 miliardë dollarë për mbrojtjen vitin e kaluar, apo 1.28% të Prodhimit të saj të Brendshëm Bruto, pavarësisht zotimit që NATO ka bërë më 2014 për të shpenzuar të paktën 2%.

Sekretari i Përgjithshëm i NATO-s Mark Rutte vizitoi Spanjën dhe Portugalinë këtë javë dhe bëri këtë paralajmërim.

“Qëllimi për të shpenzuar 2% të Prodhimit të Brendshëm Bruto për mbrojtjen, i miratuar para një dekade, nuk do të mjaftojë për të përballuar sfidat e së nesërmes. Kërcënimi nga Rusia mund të duket i largët, por ju siguroj se nuk është”, tha Rutte.

Kryeministri i Spanjës Pedro Sanchez, tha se Spanja është e përkushtuar për të arritur objektivin prej 2% deri në vitin 2029. Ai shtoi se shpenzimet për mbrojtjen ishin rritur me 70% gjatë dekadës së fundit. Kryeministri Sanchez shtoi se Madridi, në përgjithësi, ishte kontribuesi i 10-të më i madh i NATO-s.

Trupat spanjolle gjithashtu ndihmojnë për të trajnuar forcat ukrainase ndërsa Kievi lufton kundër agresionit rus.

Presidenti Trump e cilësoi kontributin e Spanjës në NATO si “shumë të ulët”. Ai gjithashtu kërkoi rritjen e objektivit të shpenzimeve për mbrojtjen.

“Do t’u kërkoj të gjitha vendeve të NATO-s që të rrisin shpenzimet e mbrojtjes në 5% të Prodhimit të Brendshëm Bruto, një qëllim që duhej të ishte arritur vite më parë”, tha Presidenti Trump.

Në prag të takimit të liderëve të Bashkimit Evropian, shumica e vendeve të BE-së, përfshirë Gjermaninë dhe 18 shtete të tjera, kanë propozuar zgjerimin e financimit për armët përmes Bankës Evropiane të Investimeve (BEI). Kjo iniciativë synon të përballojë nevojat urgjente për të forcimin e industrisë dhe teknologjisë së mbrojtjes në Evropë.

Në një letër të dërguar BEI-së, udhëheqësit evropianë theksuan se përdorimi i mekanizmave të financimit dhe mjetet e disponueshme janë të nevojshme për të adresuar sfidat afatshkurtra dhe afatgjata të sigurisë në rajon. Ata theksuan se kjo do të ndihmojë në forcimin e gatishmërisë dhe aftësive të mbrojtjes së Evropës, veçanërisht përballë agresionit rus ndaj Ukrainës.

Në këtë kontekst, udhëheqësit e BE-së do të mblidhen të hënën për të diskutuar mënyrat e forcimit të aftësive mbrojtëse evropiane dhe mundësinë e mbledhjes së fondeve për këtë qëllim. Disa shtete të BE-së janë të hapura për mundësinë e marrjes së një borxhi të ri të përbashkët, ndërkohë që Gjermania, Holanda dhe Austria kanë shprehur kundërshtimin ndaj kësaj ideje.

Përveç kësaj, zgjerimi i rolit të BEI-së në financimin e mbrojtjes mund të shndërrohet në një kompromis të mundshëm për të siguruar fonde për projektet mbrojtëse. BEI ka rritur ndjeshëm angazhimin e saj në sektorin e mbrojtjes gjatë vitit të kaluar, me investime që dyfishuan vlerën e tyre në 2024, duke arritur në një miliard euro. Për vitin 2025, BEI planifikon të dyfishojë sërish investimet në këtë sektor, duke arritur në dy miliardë euro./UBTNews/

Kina po ndërton një qendër komanduese ushtarake të përmasave mbresëlënëse, afër Pekinit, e cila pritet të jetë më e madhe se çdo tjetër në botë, madje 10 herë më e madhe se Pentagoni. Kjo bazë, e cila po ndërtohet në një zonë rreth 32 kilometra në jugperëndim të kryeqytetit kinez, ka tërhequr vëmendjen e shërbimeve sekrete amerikane dhe ekspertëve të sigurisë për shkak të përmasave dhe karakteristikave të saj ushtarake.

Imazhet satelitore të këtij kantieri ndërtimi tregojnë një kompleks masiv që mund të përfshijë bunkerë të përforcuar, të cilët mund të mbrojnë liderët ushtarakë të Kinës në rast të një konflikti bërthamor. Pas përfundimit të ndërtimit, kjo strukturë, e quajtur “Qyteti Ushtarak i Pekinit”, do të rivalizojë madhësinë e Pentagonit, që është ndërtesa më e madhe e zyrave në botë.

Punimet për këtë projekt masiv kanë filluar në mes të vitit 2024 dhe janë pjesë e përgatitjeve të Ushtrisë Çlirimtare Popullore për 100-vjetorin e saj, i cili do të ndodhë në vitin 2027. Përveç kësaj, Presidenti Xi Jinping ka deklaruar vazhdimisht synimin e tij për të aneksuar Tajvanin deri në këtë vit, duke rritur më tej shqetësimet ndërkombëtare, veçanërisht në lidhje me kërcënimet që kjo mund të ketë për sigurinë globale dhe për Shtetet e Bashkuara, të cilat mbështeten te Tajpei për furnizimet me mikroçipe.

Pavarësisht përparimit të shpejtë të ndërtimit, nuk ka asnjë informacion zyrtar në lidhje me këtë bazë në burimet kineze të lajmeve, dhe zona është jashtëzakonisht e mbrojtur. Ndalimet për të fotografinë dhe përdorimin e dronëve janë të shprehura rreptësisht, ndërkohë që studimet e imazheve sugjerojnë se objekti ka shumë mundësi të jetë një strukturë të ndjeshme ushtarake, me tunele të thella dhe mbrojtje të fortë betoni.

Ekspertët dhe analistët kanë paralajmëruar se ky zhvillim ushtarak është një hap tjetër i madh në ambiciet e Xi Jinping për të zgjeruar ndikimin global të Kinës dhe për të sfiduar Shtetet e Bashkuara si një superfuqi. Sipas vlerësimeve të Pentagonit, Kina mund të ketë deri në 1,500 armë bërthamore operacionale deri në vitin 2035, duke arritur një fuqi të barabartë me atë të Shteteve të Bashkuara./UBTNews/