Lajmet

Inflamacion i muskulit të zemrës pas vaksinimit me BioNTech në Izrael?

Published

5 years ago

April 28, 2021

Betim Gashi

Një lidhje midis “dyzina rasteve” të inflamacionit të muskulit të zemrës (miokardit) tek meshkujt e rinj dhe vaksinimit me BioNTech nuk është provuar, sipas Ministrisë izraelite të Shëndetësisë.

Ende nuk ka prova se ekziston me të vërtetë një lidhje midis miokarditit të diagnostikuar së fundmi dhe vaksinës BioNTech/Pfizer. Ministria izraelite e Shëndetësisë aktualisht po studion disa raste të tilla të raportuara nga media izraelite.

Një analizë e cituar nga media nuk u botua nga ministria dhe një akumulim i pazakontë i rasteve sëmundjes nuk është provuar, tha një zëdhënëse e Ministrisë. Nuk ka “asnjë rritje të qartë të vdekshmërisë për shkak të vaksinimit dhe gjithashtu nuk është e sigurt që krahasuar me të njëjtën periudhë të vitit të kaluar, ka një rritje të numrit të inflamacionit të muskulit kardiak”. Një numër i ngjashëm i rasteve të inflamacionit të muskulit kardiak është raportuar edhe në vitet e fundit.

Jo raport zyrtar

është e paqartë se kush ua nisi mediave izraelite raportin paraprak të një grupi ekspertësh. Sipas raportit, te më shumë se pesë milionë personat e vaksinuar, kishte “dyzina raste” të tilla, kryesisht pas dozës së dytë të vaksinës BioNTech/Pfizer.

Fjala është për 62 raste të inflamacionit të muskulit të zemrës, kryesisht tek meshkujt e rinj mes moshës 18 dhe 30 vjeç. Shumica e pacientëve tani ka dalë nga spitali në gjendje të mirë. Sidoqoftë, një grua 22 vjeçare dhe një burrë 35 vjeçar kanë vdekur. Me sa duket ata nuk kishin ndonjë sëmundje të mëparshme.

Raportimet për efekte të mundshme të padëshiruara sjellin paqetësi

Edhe nëse përfundimet janë paraprake dhe gjithçka duhet të studiohet, sipas raporteve të medias, duhet të ketë një lidhje midis vaksinës dhe rasteve të sëmundjes: “është e mundur që shfaqja e rasteve të inflamacionit të muskulit të zemrës të ketë lidhje me vaksinimin (sidomos me dozë e dytë)”, e citon Jerusalem Post raportin. “Për momentin ekziston përshtypja e një numri më të lartë të të inflamacionit të muskulit kardiak sesa pritej, veçanërisht për grupmoshën deri në 30 vjeç”, thuhet atje.

Sipas kësaj, rreziku i inflamacionit të muskulit të zemrës pas vaksinimit me vaksinën e BioNTech/Pfizer mund të jetë 1:100.000 për të gjithë popullsinë, ndërsa mund të jetë 1:20.000 për meshkujt e rinj.

Israel | Coronakrise: Pfizer-BioNtech Imfpung

Ministria e Shëndetësisë po shqyrton rastet

Edhe nëse raporti nuk e ka burimin te Ministria izraelite e Shëndetësisë, ajo do ta diskutojë këtë “raport të rëndësishëm” me ekspertë dhe do t’i publikojë rezultatet në ditët e ardhshme. Aktualisht nuk ka asnjë lajm në faqen e internetit të Ministrisë izraelite të Shëndetësisë në lidhje me efektet e padëshiruara kardiake të mundshme të vaksinës së BioNTech/Pfizer Comirnaty.

Megjithatë, është e vështirë të vendoset një lidhje midis sëmundjes dhe vaksinës, sepse inflamacioni i muskulit kardiak mund të shkaktohet nga shumë viruse të tjera. Përveç kësaj, inflamacioni i muskulit kardiak shpesh zhvillohet pa simptoma ose komplikime, gjë që e bën të vështirë diagnozën.

Inflamacioni i muskulit kardiak mund të mjekohet mirë dhe rrallë mbeten pasoja. Po të mos mjekohet, inflamacioni mund të shkaktojë çrregullime të ritmit të rrahjes së zemrës ose dobësi të zemrës. Në raste të rralla, inflamacioni i muskulit kardiak çon në vdekje kardiake të papritur.

Prodhuesi i vaksinës e mohon lidhjen

Prodhuesi i vaksinave BioNTech/Pfizer njoftoi se efektet anësore të padëshiruara kontrollohen rregullisht dhe rrënjësisht. “Ne nuk kemi vërejtur një numër më të lartë të miokarditit, se sa pritej në popullatën e përgjithshme,” thuhet në një deklaratë të Pfizer. “Një lidhje shkakësore me vaksinimin nuk është konstatuar. Tani për tani nuk ka prova se ekziston ndonjë rrezik i miokarditit i lidhur me vaksinën e BioNTech/Pfizer.”

Fakti që në muajt e fundit ka pasur më shumë informacione në lidhje me vaksinën e BioNTech nga Izraeli ka të bëjë me strategjinë e zgjuar të vaksinimit të Izraelit. Izraeli arriti të siguronte herët sasi të mëdha të vaksinës së lakmuar, jo vetëm sepse pagoi shumë më tepër sesa BE për vaksinën, por edhe se shteti mori përgjegjësinë për produktin.

Mbi të gjitha, Izraeli e furnizon Pfizerin çdo javë me shifra të infektimit dhe vaksinimit, por edhe në mënyrë të anonimizuar edhe me informacione demografike të pacientëvëve, të tilla si mosha dhe gjinia. Falë sistemit të digjitalizuar shëndetësor në Izrael, kompanitë farmaceutike jo vetëm që marrin të dhëna shumë shpejt dhe me besueshmëri, por marrin shumë më tepër të dhëna se sa do të merrnin nga çdo studim.

Symbolfoto I Belgien - die Corona-Apotheke der EU

Si shpërblim, prodhuesit e vaksinave marrin përsipër të furnizojnë Izraelin me vaksina derisa të arrihet imuniteti i tufës, d.m.th. një imunitet i 95% të popullsisë, në vend. Aktualisht pothuajse 60% e 9.3 milionë izraelitëve, janë vaksinuar me vaksinën e BioNTech/Pfizer.

Dhe sukseset e fushatës izraelite të vaksinimit tashmë mund të shihen qartë: ndërsa numri i infektimeve në javë në fillim të vitit ishte rreth 600 infeksione të reja për 100.000 banorë, incidenca tani është 11.

Meqenëse Izraeli vaksinon vetëm me vaksinën e BioNTech dhe Pfizer për Covid-19, ka një interes të madh për lajmet. Sidoqoftë, nëse ka një lidhje midis vaksinës dhe sëmundjes, kjo mund të sqarohet vetëm me një studim të hollësishëm.DW

Lajmet

Rasti i 53 milionë eurove, Lekaj dhe të tjerët në gjykatë

Published

20 minutes ago

November 17, 2025

UBTnews

Në Gjykatën Themelore në Prishtinë është duke u mbajtur seanca e radhës e rigjykimit në rastin e njohur si “53-milionëshi” ndaj të akuzuarve Pal Lekaj, Eset Berisha, Nebih Shatri dhe Besim Tahiri, të akuzuar për keqpërdorim të detyrës lidhur me autostradën “Arbën Xhaferi”.

Sot do të jap dëshminë e tij si dëshmitar Lutfi Zharku.

Gjykata Themelore në Prishtinë më 31 janar 2024 i shpalli fajtorë dhe i dënoi me 10 vjet e 3 muaj burgim (së bashku): Pal Lekajn, Eset Berishën, Nebih Shatrin dhe Besim Tahirin për rastin e njohur si “53-milionëshi”.

Sipas aktgjykimit të Themelores, Pal Lekaj u dënua me 3 vite e 8 muaj burgim efektiv. Ndaj tij, gjykata shpalli edhe dënim plotësues, ndalimi i ushtrimit të funksionit publik në administratë publike ose në shërbimin publik në kohëzgjatje prej 3 vite e 6 muaj.

Nebih Shatri u dënua me 1 vit e 8 muaj burgim, kurse Besim Tahiri u dënua me 1 vit e 8 muaj burgim. Ndaj tyre u shpall edhe dënim plotësues, ndalim i ushtrimit të funksionit publik në administratë publike ose në shërbimin publik në kohëzgjatje prej 2 vitesh. Ndërsa, Eset Berisha u dënua me 3 vite e 3 muaj burgim.

Po ashtu, ndaj Berishës u shpall edhe dënimi plotësues ndalimi i ushtrimit të funksionit publik në administratë publike ose në shërbimin publik në kohëzgjatje prej 3 vitesh.

Por, Gjykata e Apelit e ka kthyer në rigjykim rastin ndaj Pal Lekajt, Eset Berishës, Nebih Shatrit dhe Besim Tahirit,

Sipas aktakuzës së ngritur më 4 shkurt 2022 nga Prokuroria Speciale e Republikës së Kosovës, Pal Lekaj, në cilësinë e ministrit të Ministrisë së Infrastrukturës (MI), Eset Berisha, këshilltar i lartë politik i tij, Nebih Shatri, si sekretar i Përgjithshëm në këtë ministri, në bashkëveprim dhe me dashje edhe me të pandehurin Besim Tahiri, drejtor i Prokurimit Publik në MI, akuzohen për keqpërdorim të detyrës zyrtare me rastin e ndarjes së 53 milionë eurove për konsorciumin “Bechtel &Enka”, për ndërtimin e autostradës Prishtinë – Hani i Elezit apo e njohur ndryshe si autostrada “Arbën Xhaferi”./EO

Lajmet

Zyra e presidentës sqaron deklaratën e Osmanit: Është menduar për rastet dhe jo për numrin e bandave

Published

37 minutes ago

November 17, 2025

UBTnews

Presidentja e Kosovës, Vjosa Osmani, në një intervistë për Politico në Berlin ka folur për shumë çështje, në mesin e tyre edhe luftimin e krimit të organizuar dhe korrupsionit.

Osmani gjatë intervistës tha se Kosova ka çmontuar mbi 900 banda kriminale, teksa zyra e presidentës përmes një reagimi sqaroi se në fakt ishte fjala për raste dhe jo për banda kriminale.

“Në fakt, është menduar për raste e jo për numër bandash.Siç e dini, disa banda serbe të veriut kanë qenë të involvuara në qindra raste të veprave penale.Në asnjë moment Presidentja nuk e ka paraqitur Kosovën si vend të krimit, por si vend të rendit e ligjit dhe si vend ku respektohen në vazhdimësi vlerat evropiane të të drejtave të njeriut dhe sundimit të ligjit“, thuhet në komunikatën nga zyra e presidentës.

Osmani ka thënë se pret mbështetjen e Gjermanisë për Kosovën edhe në të ardhmen, duke përmendur aplikimin për anëtarësim në Këshillin e Evropës.

“Nëse Gjermania merre një rol udhëheqës, unë mendoj se mund të ndodhë sikurse ka ndodhur në çdo proces të mirë që ka nisur deri më tani”, ka thënë Osmani./KP

Lajmet

Shqipëria hap të gjithë kapitujt e negociatave me Bashkimin Evropian

Published

1 hour ago

November 17, 2025

UBTnews

Shqipëria dhe Bashkimi Evropian do të mbajnë sot në Bruksel Konferencën e 7-të Ndërqeveritare.

Takimi do të shërbejë për të hapur negociatat me Shqipërinë mbi grup-kapitullin 5 “Burimet, bujqësia dhe kohezioni”, duke përfshirë Kapitullin 11 (bujqësia dhe zhvillimi rural), 12 (siguria ushqimore, veterinaria dhe fitosanitaria), 13 (peshkimi dhe akuakultura), 22 (politika rajonale dhe koordinimi i instrumenteve strukturore) dhe 33 (dispozitat financiare dhe buxhetore), shkruan ATSH.

Ky është grup-kapitulli i fundit i negociatave që vendi ynë hap me bashkimin Evropian në rrugëtimin drejt anëtarësimit në BE.

Konferenca e 1-rë Ndërqeveritare Shqipëri-BE

Më 19 korrik 2022 u mbajt Konferenca e parë Ndërqeveritare Shqipëri-BE, që shënoi zyrtarisht hapjen e negociatave me Shqipërinë.

Kjo Konferencë vjen pas një vendimi të Këshillit të ministrave të çështjeve Evropiane më 25 mars 2020 për të hapur negociatat e pranimit, i cili u miratua nga anëtarët e Këshillit Evropian më 26 mars 2020, si dhe miratimit nga Këshilli më 18 korrik 2022 të Kornizës Negociuese për negociatat me Shqipërinë, në përputhje me metodologjinë e rishikuar të zgjerimit.

Konferenca e 2-të Ndërqeveritare Shqipëri-BE

Më 15 tetor 2024 u mbajt Konferenca e dytë Ndërqeveritare Shqipëri-BE.

Takimi shërbeu për të hapur negociatat me Shqipërinë mbi Grup-kapitullin 1: Themeloret, duke përfshirë fushat dhe kapitujt negociues: Funksionimi i institucioneve demokratike; Reforma e administratës publike; Kapitulli 23 – Gjyqësori dhe të drejtat themelore; Kapitulli 24 – Drejtësia, liria dhe siguria.

Kriteret ekonomike: Kapitulli 5 – Prokurimi publik; Kapitulli 18 – Statistikat; Kapitulli 32 – Kontrolli financiar.

Konferenca e 3-të Ndërqeveritare Shqipëri-BE

Më 17 dhjetor 2024 u mbajt Konferenca e tretë Ndërqeveritare Shqipëri-BE.

Takimi shërbeu për të hapur negociatat me Shqipërinë mbi Grup-kapitullin VI: Marrëdhëniet e Jashtme, duke përfshirë kapitujt negociues: Kapitulli 30 – Marrëdhëniet e Jashtme; Kapitulli 31 – Politika e Jashtme, e Sigurisë dhe e Mbrojtjes.

Konferenca e 4-t Ndërqeveritare Shqipëri-BE

Më 14 prill 2025 u mbajt Konferenca e katërt Ndërqeveritare. Takimi shërbeu për të hapur negociatat me Shqipërinë mbi Grup-kapitullin II: Tregu i brendshëm, duke përfshirë kapitujt negociues: Kapitulli 1 – Lëvizja e lirë e mallrave, Kapitulli 2 – Liria e lëvizjes së punëtorëve, Kapitulli 3 – E drejta e themelimit dhe liria për të ofruar shërbime, Kapitulli 4 – Lëvizja e lirë e kapitalit, Kapitulli 6 – E drejta e shoqërive tregtare, Kapitulli 7 – E drejta e pronësisë intelektuale, Kapitulli 8 – Politika e konkurrencës, Kapitulli 9 – Shërbimet financiare, Kapitulli 28 – Mbrojtja e konsumatorit dhe shëndetit.

Konferenca e 5-të Ndërqeveritare Shqipëri-BE

Më 22 maj 2025 u mbajt në Bruksel Konferenca e pestë Ndërqeveritare për anëtarësimin e Shqipërisë në Bashkimin Evropian.

Kjo konferencë shërbeu për të hapur negociatat me Shqipërinë mbi grup-kapitullin III: Konkurrueshmëria dhe rritja gjithëpërfshirëse. Në këtë grup-kapitull përfshihen: Kapitulli 10 – Transformimi digjital dhe media; Kapitulli 16 – Taksat; Kapitulli 17 – Politika ekonomike dhe monetare; Kapitulli 19 – Politika sociale dhe punësimi; Kapitulli 20 – Politika për ndërmarrjet dhe industrinë; Kapitulli 25 – Shkenca dhe kërkimi; Kapitulli 26 – Arsimi dhe kultura; Kapitulli 29 – Bashkimi doganor.

Konferenca e 6-të Ndërqeveritare Shqipëri-BE

Më 16 shtator 2025 u mbajt Konferenca e gjashtë Ndërqeveritare Shqipëri-BE që iu kushtua grup-kapitullit IV: Agjenda e Gjelbër dhe Ndërlidhja e Qëndrueshme, i cili përmban fusha me rëndësi të posaçme për ekonominë dhe biznesin.

Kapitujt përfshinin: politikat e transportit (Kapitulli 14), energjia (Kapitulli 15), rrjetet trans-europiane (Kapitulli 21), mjedisi dhe klima (Kapitulli 27), të cilat prekin drejtpërdrejt jetën e përditshme të qytetarëve dhe janë faktor transformimi për zhvillimin afatgjatë të vendit./KP

Lajmet

Partia Demokratike e Kosovës sot zgjedh kryetarin e ri

Published

1 hour ago

November 17, 2025

UBTnews

Partia Demokratike e Kosovës (PDK)sot do të mbajë Konventën e Përgjithshme, në të cilën do të zgjidhet kryetari i ri i kësaj partie, meqenëse me 12 nëntor në një konferencë për media, Memli Krasniqi kumtoi lajmin se ka dhënë dorëheqje nga drejtimi i këtij subjekti politik.

“Sot, pas shumë kohe reflektimi, ka ardhur momenti i duhur, prandaj sot kam vendosur të jap dorëheqje nga pozita e kryetarit të partisë. Ky vendim nuk është as i momentit dhe nuk lidhet vetëm me zhvillimet e fundit. Është reflektim i gjatë i imi mbi atë se çfarë i duhet më shumë partisë në fazën e ardhshme’, tha Krasniqi në konferencën për media.

Ai tha edhe preferencën e tij, ndonëse tentoi të tregohej i rezervuar kur u pyet për emrin e ri në këtë pozitë.

“Preferencën time për Bedri Hamzën nuk e fshehi, përkundrazi me kënaqësi e bëj publike”, tha ai.

E një ditë pas, nëpërmjet një shkrimi në “Facbook”, Bedri Hamza zyrtarizoi kandidaturën e tij për kryetar të PDK-së.

“Sot, me përgjegjësi dhe besim në të ardhmen e partisë sonë, e shpalli kandidaturën time për Kryetar të PDK-së. Unë besoj se PDK-ja ka forcën për t’u unifikuar, reformuar dhe rikthyer si partia kryesore në vend. Nga lufta për liri, deri te shtetndërtimi, demokratizimi dhe integrimi, PDK-ja ka lënë gjurmë të pashlyeshme në historinë e Kosovës. Me mirënjohje të thellë për themeluesit tanë, Hashim Thaçin, Kadri Veselin e Jakup Krasniqin, të cilët uroj të jenë së shpejti mes nesh, unë angazhohem për një PDK që ruan vlerat dhe krijon rrugë për gjeneratat e reja. Falënderim i veçantë edhe për dy miqtë e mi, Enver Hoxhajn dhe Memli Krasniqin, për udhëheqjen e tyre me dinjitet në kohë sfidash”, pati shkruar Hamza.

Por është Enver Hoxhaj ai i cili kërkoi që Konventa e paraprë të mbahet më 17 nëntor të shtyhet. Madje ai gjatë një intervistë në “Rubikon” deklaroi se do të jetë kandidat për kryetar të PDK-së, por kandidaturën e kushtëzon me shtyrjen e Konventës së partisë.

“Konventa e ardhshme nuk është një konventë ku unë garoj për karrigen e kryetarit. Unë po ftoj kryesinë e PDK-së që të ma japë të drejtën që të marr besimin e delegatëve, që të ketë një proces politik, që të ketë një javë më shumë. Çka ndryshon një javë më shumë: që të ketë debat politik, që të ketë prezantim të platformave”, deklaroi Hoxhaj.

Ndërsa në “Facebook”, shkroi se “Konventa e PDK-së për të zgjedhur kryetarin e partisë duhet të shtyhet, sepse një parti serioze nuk mund të mbajë një konventë politike dhe përmbajtjesore në një kohë kaq të shkurtër. Kërkoj nga Kryesia e PDK-së shtyrjen e Konventës për të paktën deri të dielën e ardhshshme, sepse kështu do u jepej mundësia anëtarësisë dhe delegatëve të njihen me kandidaturat dhe platformat për zhvillimin e partisë dhe për çështje serioze që prekin vendin. Kjo do ta rriste cilësinë e kandidaturave dhe konkurrencën ndërmjet platformave, pasi zhvillimet e fundit kanë qenë të befasishme”.

Madje Hoxhaj e ftoi Hamzën në një përballje televizive

Kujtojmë që Memli Krasniqi ka qenë pjesë e PDK-së për gati dy dekada, fillimisht si kryetar i të rinjve të partisë e më pas nënkryetar i partisë para se të zgjidhej kryetar më 2021./EO