Sport

Ibra vazhdon kritikat ndaj LeBron James

Published

5 years ago

March 3, 2021

Betim Gashi

Zlatan Ibrahimovic i ka dyfishuar kritikat e tij ndaj sportistëve që përziejnë politikën dhe sportin. Sulmuesi i Milanit foli të martën në një konferencë shtypi për festivalin muzikor “San Remo”, në të cilin ai është bashkënikoqir.

“Sportistët bashkojnë botën, politika e ndan atë”, tha Ibra. “Roli ynë është të bashkojmë botën duke bërë atë që bëjmë më së miri. Sportistët duhet të jenë sportistë dhe politikanët duhet të bëjnë politikë”.

Javën e kaluar Ibrahimovic e veçoi yllin e ekipit të NBA-së, Los Angeles Lakers, LeBron James, për sjelljen e politikës në arenën sportive. Sipas tij, James nuk duhet të përzihet në politikë, por të fokusohet në sport.

“Më pëlqen shumë James. Ai është fenomenal, por nuk më pëlqen kur njerëzit me një status flasin për politikë”, ishin fjalët e Ibrahimovicit javën e shkuar. “Unë luaj futboll, sepse jam i mirë në këtë sport, nuk bëj politikë. Nëse do të isha një politikan, do të bëja politikë. Ky është gabimi i parë që njerëzit e famshëm bëjnë kur bëhen të famshëm”.

James, i cili ishte një nga zërat kryesorë të NBA-së kundër padrejtësisë racore dhe brutalitetit të policisë, kundërshtoi komentet e Ibrahimovicit. Madje, basketbollisti amerikan shtoi se gjithmonë do ta përdorë zërin e tij në lidhje me çështjet e barazisë.

“Unë kurrë nuk do të hesht për gjëra që nuk janë në rregull. Unë predikoj për njerëzit e mi dhe predikoj për barazinë, drejtësinë shoqërore, racizmin, shtypjen e votuesve – gjëra që vazhdojnë të na mundojnë në komunitetin tonë”, ishte kundërpërgjigja e Jamesit. “Meqenëse unë isha pjesë e komunitetit tim në një moment dhe pashë gjërat që po ndodhnin, atëherë e ndieja obligim reagimin tim. Unë jam zëri i komunitetit dhe përdor platformën time për të vazhduar të hedh dritë mbi gjithçka që mund të ndodhë, jo vetëm në komunitetin tim, por në këtë vend dhe në botë”.

James gjithashtu theksoi që Ibrahimovic, i cili dikur tha se Muhamed Ali është sportisti i tij i preferuar për shkak të “asaj që ai bëri brenda dhe jashtë ringut”, ka folur për politikën në të kaluarën.

Në konferencën e mbajtur të martën, Ibra foli edhe për kritikat që ka marrë së fundi. Suedezi 39-vjeçar është kritikuar shumë që është pajtuar të marrë pjesë në katër netët e konkursit vjetor të këngës në Liguria, këtë javë. Klubi i tij ka ndeshje në Serie A të mërkurën dhe të dielën. Ibrahimovic, i cili është shënuesi më i mirë i Milanit këtë sezon me 14 gola në 14 ndeshje kampionale, u dëmtua në ndeshjen e fundit dhe për këtë arsye do t’i mungojë ekipit gjatë kësaj jave. Megjithatë, ai këmbënguli se festivali nuk do të jetë një shpërqendrim nga puna e tij ditore.

“Unë jam një profesionist dhe kushdo që më njeh e di atë. Kur luaj futboll unë jam i përqendruar vetëm në këtë. Unë dua ta ndihmoj Milanin dhe t’i jap shumë Italisë për gjithçka që më ka dhënë ndër vite, jo vetëm në futboll. Unë pata shansin të isha mysafir në Festival, një nga më të rëndësishmit në Itali dhe vendosa të marr pjesë”, insistoi Ibrahimovic.

Ai foli edhe në lidhje me përplasjen e tij të fundit me ish-bashkëlojtarin te Manchester Unitedi, belgun Romelu Lukaku. Dyshja u konfrontua në derbin e qytetit të Milanos.

“Nëse ai dëshiron të vijë në San Remo, ai është i mirëpritur”, tha Ibrahimovic. “Ajo që ndodh në fushë mbetet në fushë”.

Up Next

Buffon e zbulon datën e pensionimit

Don't Miss

21 fitore radhazi për Cityn, por janë edhe tri skuadra para anglezëve me numër më të madh të fitoreve

Sport

FIBA ia beson përsëri Kosovës Evropianin e Femrave për Shtetet e Vogla

Published

2 hours ago

February 5, 2026

Safet Zejnullahu

Është hedhur shorti për FIBA Kampionati Evropian të Femrave për Shtetet e Vogla dhe grup moshat e reja, ku Kosova ka mësuar kundërshtarët e saj.

Dardanet do të jenë në Grupin B, së bashku me Andorrën dhe Armeninë. Ndërkohë, në Grupin A janë Malta, Gjeorgjia dhe Shqipëria.

Kjo do të jetë hera e dytë që FIBA Kampionati Evropian i Femrave për Shtetet e Vogla organizohet në Kosovë, pasi më 2024 ishte organizuar në Prishtinë.

Gjatë kësaj vere, Kosova do të organizojë edhe FIBA U18 Eurobasketi i Femrave, Divizioni C, kampionat që po ashtu do të organizohet në Pejë nga 21 deri më 26 korrik, ku marrin pjesë shtatë shtete.

Kosova është në Grupin B, së bashku me Armeninë, Gjeorgjinë dhe Gjibraltarin, kurse në Grupin A janë: Malta, Shqipëria dhe Qipro.

Kjo verë do të jetë shumë e ngjeshur me aktivitete, pasi në përgjithësi, Kosova do të garojë me pesë Përfaqësuese në arenën evropiane, U20 meshkujt, U18 meshkujt dhe femrat dhe U16 meshkujt dhe femrat.

Kosova U16 femrat do të jenë në Grupin A, së bashku me Maltën dhe Gjeorgjinë, në Divizionin C, që mbahet në Maltë nga 7 deri më 12 korrik.

Kosova U16 meshkujt do të jenë në Grupi A, ku bëjnë pjesë edhe Shqipëria, San Marino dhe Moldavia. Divizioni C do të mbahet në Armeni nga 4 deri më 12 korrik.

Kosova U18 meshkujt janë në Grupi A, ku do të garojnë edhe Armenia, Andorra dhe Gjibraltari. Gara e Divizionit C do të mbahet në Shkodër nga 21 deri më 26 korrik.

Kosova U20 meshkujt do të garojë në Divizionin B, ku edicionin e kaluar kishte hyrë në Top 8, njëherë suksesi më i madh te gjeneratat e reja. Dardanët e rinj janë në Grupin C, ku marrin pjesë edhe Islanda, Portugalia, Armenia, Bosnja dhe Hercegovina dhe Qipro. Ky kampionat mbahet nga 10 deri më 19 korrik në Sllovaki. /Kosova Press/

Foto: KosovaPress

Sport

Agim Ademi në krye të FFK edhe për 4 vjet

Published

5 hours ago

February 5, 2026

Safet Zejnullahu

Agim Ademi fiton edhe një mandat në krye të futbollit kosovar. Në Kuvendin Zgjedhor të Federatës së Futbollit të Kosovës (FFK), të mbajtur sot, Ademi mori besimin e 52 delegatëve edhe për një mandat katërvjeçar.

Ademi, pasi mori për të tretën herë mandatin për të udhëhequr me Federatën e Futbollit të Kosovës, ka thënë se do të jetë në shërbim 24/7 për çështjen e futbollit. Po ashtu, ai theksoi se vota e dhënë ndaj tij, është besim për të dhe ekipin e tij.

Gjatë kuvendit u miratua edhe buxheti i FFK-së për vitin 2026, rreth 25 milionë euro.

Kryetari Ademi ka prezantuar fanellën e Dardanëve, teksa ka thënë se të gjitha ekipet nacionale do të vishen me “Adidas”.

“Ekipet tona nacionale nga ky vit do të vishen nga Adidas. Kjo është fanella e Kosovës dhe shpresoj që do të prezantohemi me të në SHBA”, ka thënë Ademi.

Sport

Davis largohet nga Dallasi pas vetëm 31 ndeshjesh

Published

8 hours ago

February 5, 2026

Safet Zejnullahu

Washington Wizards po e transferojnë Anthony Davis në një shkëmbim me tetë lojtarë me Mavericks që përfshin zgjedhje në draft për Dallas, tha të mërkurën një burim i sigurt për AP.

Wizards do të dërgojnë Khris Middleton, AJ Johnson, Malaki Branham dhe Marvin Bagley III te Mavericks së bashku me dy zgjedhje të raundit të parë të draftit dhe tre të raundit të dytë, sipas personit që foli me Associated Press, në kushte anonimiteti sepse marrëveshja ende nuk ishte miratuar nga NBA.

Kurse, Anthony bashkohet në Washington me Jaden Hardy, D’Angelo Russell dhe Dante Exum.

Lojtari që mori pjesë 10 herë në All-Star, Anthony Davis ka qenë jashtë fushave që nga 8 janari për shkak të një dëmtimi në dorën e majtë dhe nuk pritej të kthehej para pushimit të All-Star më vonë këtë muaj.

Kjo marrëveshje do të zbusë “gabimin” e ish-menaxherit të përgjithshëm Nico Harrison që shkëmbeu Luka Doncic-in për Davisin, ndërkohë që hoqi dorë nga një talent i gjeneratës së tij në kulmin e karrierës. Doncic ishte 25 vjeç në kohën e shkëmbimit.

/KosovaPress/

Sport

Manchester United përballë rrezikut të humbjes së kapitenit

Published

1 day ago

February 4, 2026

Safet Zejnullahu

E ardhmja e Bruno Fernandes të Manchester United është vënë sërish në pikëpyetje pas zbulimit të detajeve të kontratës së tij. Mesfushori portugez ka një klauzolë lirimi prej 57 milionë paundësh, e cila mund të aktivizohet vetëm nga klube jashtë Premier League, çka ka rritur spekulimet për një transferim të mundshëm, veçanërisht drejt Arabisë Saudite. Kontrata e kapitenit të “Djajve të Kuq” skadon në vitin 2027, duke e bërë verën e ardhshme vendimtare për klubin.

Fernandes ka qenë prej kohësh në radarin e klubeve saudite, të cilat më parë ishin të gatshme të ofronin rreth 100 milionë paund për shërbimet e tij. Edhe pse kjo lëvizje nuk u konkretizua, klauzola e re e bën largimin e tij më të realizueshëm. Vetë lojtari ka pranuar se ishte pranë largimit në verën e vitit 2025, duke zbuluar pakënaqësinë e tij me qëndrimin e drejtuesve të klubit.

“Klubi donte që unë të largohesha, këtë e kam të qartë. Vendosa të qëndroj për arsye familjare, por edhe sepse e dua këtë klub. Më dhemb dhe më trishton fakti që ndjeva sikur largimi im nuk do t’i shqetësonte shumë,” u shpreh Fernandes.

Që nga ardhja nga Sporting CP në janar 2020, Fernandes ka qenë shtylla kryesore e mesfushës së United, duke regjistruar mbi 300 paraqitje, 103 gola dhe 99 asistime. Edhe këtë sezon, ai mbetet një nga lojtarët më konstantë, me pesë gola dhe 12 asistime në Premier League, duke qenë pranë thyerjes së disa rekordeve historike. Megjithatë, me interesimin e rinovuar nga Arabia Saudite dhe klauzolën tashmë publike, Manchester United rrezikon të humbasë liderin e saj kryesor nëse nuk ndërmerr hapa vendimtarë për ta mbajtur në “Old Trafford”.

/KosovaPress/