Sulmuesi shqiptar Ernest Muçi është shprehur i kënaqur me fitoren e Trabzonsporit ndaj Beshiktashit, duke vlerësuar rëndësinë e tri pikëve dhe potencialin e skuadrës për këtë sezon.

Trabzonspori triumfoi të hënën mbrëma me rezultatin 2:0 ndaj Beshiktashit, në ndeshjen e vlefshme për xhiron e tetë të Superligës së Turqisë.

Muçi theksoi se fitorja në shtëpi, para tifozëve të skuadrës, kishte rëndësi të veçantë, duke pasur parasysh forcën e kundërshtarit.

“Jam i lumtur që fituam këtë ndeshje në shtëpi, para tifozëve tanë”, deklaroi Muçi.

Sulmuesi 25-vjeçar shprehu besimin se Trabzonspori ka potencialin për të arritur objektiva të mëdha gjatë këtij edicioni.

“Çdo ndeshje është një mundësi e veçantë për ne. Megjithatë, besoj se kemi një ekip që do të arrijë suksese të mëdha këtë vit”, u shpreh ai, raportojnë mediumet turke.

Muçi është një prej futbollistëve të rëndësishëm të Trabzonsporit, ku këtë edicion ka regjistruar dy gola dhe tri asistime në dhjetë ndeshje të zhvilluara në të gjitha garat.

D.L

Erik ten Hag ka deklaruar se Cristiano Ronaldo e zhgënjeu ekipin dhe atë personalisht gjatë periudhës kur të dy punonin te Manchester Unitedi. Trajneri holandez ka folur gjithashtu për premtimet e parealizuara nga drejtuesit e klubit, të cilat, sipas tij, ndikuan në largimin e tij në tetor të vitit 2024.

Ronaldo u rikthye te Manchester Unitedi në gusht të vitit 2021, ndërsa Ten Hag mori drejtimin e skuadrës një vit më vonë, duke pasuar Ole Gunnar Solskjaerin.

Megjithatë, marrëdhënia mes tyre u përkeqësua brenda një kohe të shkurtër. Në tetor të vitit 2022, portugezi refuzoi të futej në lojë si zëvendësues në fitoren ndaj Tottenhamit, ndërsa më vonë kritikoi publikisht klubin në një intervistë televizive. Si pasojë, kontrata e tij u ndërpre me marrëveshje të dyanshme në nëntor të po atij viti.

Në një intervistë për gazetën The Athletic, pjesë të së cilës i kanë publikuar disa mediume angleze, Ten Hag shpjegoi arsyet që e shtynë të merrte vendime të vështira për sulmuesin portugez.

“Ai e zhgënjeu ekipin dhe më zhgënjeu edhe mua, pasi kishim bërë plane duke llogaritur në të”, deklaroi Ten Hag.

“Ai është një nga më të mirët në historinë e futbollit. E kam respektuar shumë. Por në atë kohë, si trajner, duhej të merrja një vendim racional dhe të mbaja lojtarët që vlerësoja”, shtoi holandezi.

Ten Hag tregoi gjithashtu se Ronaldo nuk e kishte përfunduar vrapimin e plotë të kërkuar nga lojtarët pas humbjes 4:0 ndaj Brentfordit, në fillim të periudhës së tij si trajner i Unitedit.

“E vura përballë këtij fakti. Shpesh i thosha: ‘Ronnie, të gjithë duan të punojnë për ty, të të vendosin në pozitën e duhur, por nëse nuk arrin të futesh vetë në zonën e rreptësisë, nuk mund të shënosh’”, rrëfeu ai.

Përveç marrëdhënies me Ronaldon, Ten Hag foli edhe për pakënaqësitë e tij ndaj drejtuesve të Manchester Unitedit. Holandezi u shkarkua në tetor të vitit 2024, vetëm pesë muaj pasi kishte fituar Kupën FA dhe kishte nënshkruar vazhdimin e kontratës.

Sipas tij, drejtuesit e klubit nuk i përmbushën zotimet për besnikëri, mbështetje dhe komunikim. Një nga vendimet që e zhgënjeu më shumë ishte shitja e mesfushorit Scott McTominay te Napoli, pavarësisht kundërshtimit të trajnerit.

“Më premtuan besnikëri, më premtuan mbështetje, më premtuan komunikim që të jemi në të njëjtën linjë. Diskutuam për çështjet në fjalë. Por premtimet nuk i mbajtën. Unë thashë: ‘Scott McTominay nuk shitet’. E në fund e shitën. Natyrisht, isha shumë i zhgënjyer”, përfundoi Ten Hag.

D.L

Sulmuesi i Prishtinës, Rin Ahmeti, është shpallur futbollisti më i mirë i xhiros së dhjetë në Superligën e Kosovës, duke u vlerësuar me çmimin “Ylli i Javës” nga Federata e Futbollit e Kosovës (FFK).

Ahmeti e fitoi këtë epitet pas paraqitjes vendimtare në përballjen ndaj Ballkanit, ku realizoi golin e vetëm të ndeshjes, duke ia siguruar Prishtinës fitoren me rezultat 1:0.

FFK-ja e shpalli të martën sulmuesin kryeqytetas si më të mirin e javës, duke vlerësuar kontributin e tij në një përballje të rëndësishme të kampionatit.

“Ahmeti realizoi golin vendimtar të takimit, duke i siguruar Prishtinës tri pikë tejet të vlefshme. Me paraqitjen e tij dhe golin e shënuar, ai dha kontribut të jashtëzakonshëm në suksesin e skuadrës kryeqytetase në një përballje të rëndësishme të kampionatit”, thuhet në njoftimin e FFK-së.

D.L

Real Madridi po shqyrton mundësinë e ndryshimeve në mesfushë, me Arda Gulerin që shihet si një alternativë për të sjellë më shumë kreativitet, kontroll dhe qetësi në organizimin e lojës, raporton gazeta spanjolle “Diario AS”.

Futbollisti turk po kalon një sezon të mirë, duke regjistruar dy gola dhe pesë asistime në 10 paraqitje. Deri më tani, ai është aktivizuar kryesisht në krahun e djathtë të sulmit, por paraqitjet e tij kanë nxitur diskutime për një rol më qendror në skuadër.

Sipas raportimeve, Guler mund të aktivizohet si njëri prej dy mesfushorëve në formacionin me bosht të dyfishtë, ku do të kishte përgjegjësi më të mëdha në ndërtimin e aksioneve, shpërndarjen e topit dhe kontrollin e ritmit të lojës.

Deri tani, Aurelien Tchouameni dhe Federico Valverde kanë qenë ndër zgjedhjet kryesore në këtë repart, megjithëse bashkëpunimi i tyre është kritikuar për mungesë kreativiteti dhe vështirësi në përballimin e presionit kundërshtar.

Me vizionin, teknikën dhe saktësinë në pasime, Guler shihet si një lojtar që mund t’i japë një dimension të ri mesfushës madrilene.

Ndërkohë, aftësia e Valverdes për të luajtur në disa pozicione mund të krijojë hapësirë për ndryshime taktike, duke i mundësuar Real Madridit të shfrytëzojë më mirë potencialin e futbollistëve të tij.

D.L