Aktualitet

I dyshuari gjendet i vdekur pas sulmit në studio kërcimi në Monterey Park

Ai kishte një plagë të vetëshkaktuar me armë zjarri.

Published

3 years ago

January 23, 2023

UBT news

Policia e Kalifornisë ka identifikuar personin e armatosur të dyshuar për vrasjen e 10 personave në një studio vallëzimi pranë Los Anxhelosit si Huu Can Tran, 72 vjeç, i cili më vonë u gjet i vdekur në një furgon të bardhë.

Ai kishte një plagë të vetëshkaktuar me armë zjarri dhe u deklarua i vdekur në vendngjarje, tha sherifi i kontesë LA Robert Luna, shkruan BBC.

Festimet për Vitin e Ri Hënor ishin duke u zhvilluar në Monterey Park, i njohur për popullsinë e tij të madhe aziatike.

Policia nuk e di ende motivin.

10 persona të tjerë u plagosën në të shtënat dhe shtatë janë ende në spital – disa në gjendje kritike – tha sherifi në një konferencë shtypi të dielën pasdite në Monterey Park.

Më herët, zyrtarët thanë se pesë gra dhe pesë burra ishin vrarë, të gjithë “ndoshta” me origjinë aziatike.

Të shtënat masive, një nga më vdekjeprurësit në historinë e Kalifornisë, filluan rreth orës 22:22 me kohën lokale të shtunën (06:22 GMT të dielën) në studion e njohur të kërcimit Star Ballroom në Monterey Park, rreth shtatë milje (11 km) në lindje të qendrës të Los Angjelos.

Shefi i policisë Scott Wiese tha se ajo që gjetën oficerët e tij ishte një “skenë kasaphane” dhe se oficerët e parë që arritën atje ishin disa nga më të rinjtë në skuadrën e tij, pasi sapo kishin përfunduar stërvitjen e tyre disa muaj më parë.

“Ata hasën në një skenë për të cilën asnjëri prej tyre nuk ishte përgatitur”, tha ai. “Brenda kishte të plagosur dhe të vdekur. Oficerët e mi të rinj bënë punën e tyre”.

Rreth 30 minuta më vonë, personi i armatosur mbërriti në një studio tjetër vallëzimi në qytetin e afërt të Alhambra.

Ai hyri në studio, por dy persona arritën t’i hiqnin armën – një pistoletë sulmi gjysmë automatike me një karikator të zgjatur – dhe ai u arratis.

Sherifi Luna tha se ai besonte se arma ishte e paligjshme në Kaliforni, megjithëse shtoi se duhej ta hetonte më tej këtë.

Ai lavdëroi dy anëtarë të komunitetit, të cilët tha se i konsideron si heronj.

“Ata shpëtuan jetë, kjo mund të kishte qenë shumë më keq”, tha sherifi, duke shtuar se ai beson se Tran kishte për qëllim të vriste më shumë njerëz.

Për orë të tëra të dielën, autoritetet kontrolluan zonën e Los Anxhelosit në kërkim të personit të armatosur.

Aktualitet

SHBA mbledh mbi 60 shtete në një samit kundër dhunës politike

Published

2 minutes ago

June 26, 2026

UBTNews

Sekretari Amerikan i Shtetit, Marco Rubio, do të organizojë një samit të madh më 15 korrik për të diskutuar mënyrat se si të luftohet rritja e dhunës politike në botë.

Një zyrtar nga Departamenti i Shtetit njoftoi se samiti do të mbahet në Uashington. Në këtë takim, Rubio ka planifikuar të ftojë përfaqësues nga më shumë se 60 shtete të ndryshme nga Evropa, Azia dhe Amerika.

Ky samit po organizohet pas strategjisë së re kundër terrorizmit që Presidenti Donald Trump nënshkroi në muajin maj. Kjo strategji fokusohet në zbulimin dhe ndalimin e grupeve të dhunshme politike, të cilat Shtëpia e Bardhë i cilëson si antiamerikane dhe anarkiste.

Zyrtarët amerikanë thanë se ky sistem ka nevojë për një përditësim të ri, me qëllim që të mbrohen më mirë qytetarët dhe siguria kombëtare. SHBA do të godasë të gjitha aktivitetet që konsiderohen terrorizëm, siç janë vrasjet, rrëmbimet, kërcënimet ndaj qeverisë, si dhe sulmet ndaj policisë dhe ushtrisë./Reuters/ /E.A/

Aktualitet

TikTok dhe YouTube mbyllin 4.7 milionë llogari të fëmijëve në Indonezi

Published

45 minutes ago

June 26, 2026

UBTNews

Platformat e njohura TikTok dhe YouTube kanë mbyllur rreth 4.7 milionë llogari të fëmijëve nën moshën 16 vjeç në Indonezi. Ky vendim erdhi pas rregullave të reja dhe rrepta që ka vendosur qeveria atje.

Ministrja e Komunikimit e Indonezisë njoftoi se rrjeti TikTok ka çaktivizuar 4.1 milionë llogari, ndërsa YouTube ka mbyllur 600 mijë të tilla. Përveç tyre, kufizimet kanë prekur edhe platformat e tjera si Instagram, X dhe Roblox.

Qeveria indoneziane mori këtë vendim për të mbrojtur fëmijët nga varësia ndaj rrjeteve sociale dhe nga dhuna në internet. Autoritetet thanë se duan që këto kompani të ndryshojnë sjelljen e tyre ndaj të miturve.

Indonezia ka ndjekur shembullin e Australisë, e cila vitin e kaluar ndaloi plotësisht përdorimin e rrjeteve sociale për fëmijët. Edhe Britania e Madhe ka njoftuar se po planifikon të vendosë kufizime të ngjashme së shpejti. /Euronews/ /E.A/

Aktualitet

Tërmet i fuqishëm në Japoni, dridhen zonat afër Tokios

Published

2 hours ago

June 26, 2026

UBTNews

Një tërmet me magnitudë 5.8 ballë ka goditur zonën e Chibas në Japoni, duke shkaktuar lëkundje të forta edhe në rrethinën e Tokios.

Sipas autoriteteve japoneze dhe Shërbimit Gjeologjik të SHBA-së, epiqendra e tërmetit ishte në prefekturën Chiba, në një thellësi prej rreth 50 kilometrash.

Agjencia Meteorologjike e Japonisë njoftoi se lëkundjet ishin të fuqishme, por fatmirësisht nuk ka asnjë rrezik për cunami.

Deri më tani, autoritetet vendase raportojnë se nuk ka njerëz të lënduar dhe as dëme të mëdha materiale nga ky tërmet. /BBC/ /E.A/

Kronikë e zezë

Gjashtë raste të dhunës në familje brenda një dite në Kosovë

Published

2 hours ago

June 26, 2026

UBTNews

Policia e Kosovës ka njoftuar se gjatë ditës së djeshme janë regjistruar gjashtë raste të ndryshme të dhunës në familje në disa qytete të vendit.

Në Graçanicë, pas një mosmarrëveshjeje familjare, tre burra janë përleshur mes vete. Ata janë intervistuar dhe me vendim të prokurorit janë liruar në procedurë të rregullt.

Në Prishtinë, është arrestuar një grua pasi ka sulmuar fizikisht një grua tjetër. Viktima ka marrë tretman mjekësor, ndërsa e dyshuara është dërguar në mbajtje.

Në Viti, një grua ka raportuar se pas një fjalosjeje është sulmuar fizikisht nga një burrë. Viktima ka marrë ndihmë mjekësore, ndërsa i dyshuari është arrestuar dhe dërguar në mbajtje.

Në Mitrovicë, është arrestuar një burrë pasi ka sulmuar fizikisht një grua. Viktima ka pranuar tretman mjekësor, ndërsa i dyshuari është dërguar në mbajtje.

Në Pejë, një grua ka raportuar se një burrë ka ushtruar në vazhdimësi dhunë fizike dhe psikike ndaj saj, si dhe e ka kërcënuar përmes telefonit. Pas intervistimit, palët janë liruar në procedurë të rregullt.

Në Deçan, është arrestuar një burrë pasi ka sulmuar fizikisht një burrë tjetër. Viktima ka pranuar tretman mjekësor, ndërsa i dyshuari është dërguar në mbajtje. /E.A/